Miakej kinekij kimatiskej tlen kinpanos satepan

¿Se tonal yotimotlajtlani ken tiyetos satepan uan noijki mokalchanejkauan? ¿Timokuayejyekoa amo itlaj kinpolos uan kintlasojtlaskej? Noso ¿amo itlaj kipiaskej uan amo ikaj kintlasojtlas? Yiuejkika miakej ijkon motlajtlaniaj.

Sekimej ixtlamatkej momachtiaj para kijtoskej tlen panos satepan. Seki tlamantli tlen kijtoaj yomochi pero okseki amo mochiua. Ma tikitakan tlen opanok 1912. Guglielmo Marconi tlen okichijchi radio para ika timotlapouiskej, okijto: “Ayakmo yetos guerra ijkuak tiktekitiltiskej radio para ika timotlapouiskej”. Uan itech 1962, akin okiyekanaya discográfica Decca Record, amo okinseli akinmej otlatsotsonayaj tlen omotokayotiayaj Beatles porque omokuayejyekoaya ayakmo ikaj kinkakiskia tlen otlatsotsonayaj ika guitarra.

Miakej kintlajtlaniaj naualtin para kimatiskej tlen kinpanos. Miakej kintlajtlaniaj tlachixkej uan sekimej kinmitaj horóscopos itech revistas uan periódicos. Oksekimej kintlajtlaniaj naualtin, tlen kimatij kintlajtoltiaj cartas, kinmitiliaj inma uan noijki kintekitiltiaj números para kimatiskej tlen kinpanos.

Yiuejkika, para kimatiskiaj tlen kinpanos, okintlajtlaniayaj teopixkej uan yejuan okintlajtlaniayaj teotsitsintin tlen panoskia. Nesi ijkon okichi se tekiua itoka Creso tlen otlanauatiaya itech altepetl Lidia. Ijkuak Creso ayamo omoteuiaya iuan Ciro tlen otlanauatiaya Persia, okititlanili miak tlamantli teopixki tlen okatka ompa Delfos (Grecia) porque okinekiaya kimatis akin tlatlaniskia. Non teopixki okilui Creso tla moteuiskia iuan Ciro, kimoaxkatiskia “nochi altepetl”. Creso omoteui iuan Ciro porque teopixki okilui kitlaniliskia pero amo melauak ijkon opanok. Ciro okipojpolo ialtepe Creso.

Tlen teopixki okilui Creso amo melauak ijkon opanok. Creso okineltokili teopixki, ik non, san iselti omotlajyouilti. Axkan akinmej kinekij kimatiskej tlen kinpanos, ¿melauak kinpanoa ken kinmiluiaj?