Sekimej techtlajtlaniaj

¿Tleka itech tlaixkopinalmej tlen kinchijchiuaj iTlaixpantijkauan Jehová mota Pablo kuaxipetstik noso ayakmo okipiaya miak itsonkal?

Amo ikaj uelis kimatis ken melauak omotaya tlatitlanil Pablo. Tejuan san tikinchijchiuaj tlaixkopinalmej tlen kiteititiaj ken uelis omotaya pero amo kisa itech tlen ixtlamatkej kajsij.

Pero onka seki tlamantli tlen kiteititia ken uelis omotaya Pablo. Se neskayotl, revista La Atalaya 1 de marzo 1902 okijto se amatlajkuilol tlen omoijkuilo kanaj itech xiuitl 150 tlen itoka Hechos de Pablo y Tecla, okachi kuali okijto ken omotaya Pablo. Uan miakej ijkon kijtoaj: “Amo okatka uejkapan, okatka kuaxipetstik, ikxiuan okatkaj chijkoltikej, ochikajtoka, okipiaya miak ixtentsojmio uan iyekatsol okatka tepitsin ueyi”.

Se diccionario kiyekijtoa melauak tlen ijkuilitok itech Hechos de Pablo y Tecla (The Oxford Dictionary of the Christian Church [edición de 1997]). Miakej siglos satepan ijkuak okijkuilojkej non, ok miakej okitlakaitayaj. Ijkon mota porque onka kanaj 80 amamej tlen okinmijkuilojkej ika griego uan ika okseki tlajtolmej. Ik non, ken tiktlaliaj Pablo itech tlaixkopinalmej mouika ika tlen yiuejkika okijkuilojkej.

Moneki ma tikilnamiktokan onka okseki tlamantli tlen okachi ipati uan amo ken omotaya. Miakej okiteneuayaj Pablo ijkuak otetlapouiayaj. Ik non, Pablo okijto: “Ijkuak nika teixpa, nechita amo nichikawak iwa ijkuak nitlajtoa amaka kipaktia” (2 Cor. 10:10). Pero Pablo okichiuaya ken Cristo porque ye ineuian okimonextili. Ma tikilnamikikan nochi tlen okichi ijkuak ‘okimopejpenilijkej’ para tetlapouiskia itech Jesús “innawak non amo judíojteh” (Hech. 9:3-5, 15; 22:6-8). Uan noijki Jehová okinauati ma kinmijkuilo amochmej para ma techpaleuikan.

Pablo amo keman okijto ken omotaya nion omoueyinekiaya ika tlen okichi achto kichiuaskia ken Cristo (Hech. 26:4, 5; Filip. 3:4-6). Pablo okijto: “Ne innawak n oksikimeh tlatematiltijkeh okachi amitla nopati, iwa nion amo nechnamiki manechnotsakah nitlatematilti” (1 Cor. 15:9). Uan satepan noijki okijto: “Maski amitla nopati innawak n yekmilajkameh non iaxkawah Dios, Ye onechtliokoli nin tekitl para manikinmatilti non amo judíojteh n kualitlájtoli [itech Cristo, TNM] non amaka weleti kajsikamati” (Efes. 3:8). Tlen Pablo okitematiltiaya okachi miak ipati uan amo ken omotaya.