Ome tekiuajkej mokokoliaj itlamian tonalmej

Seki profecías tlen nikan moijtouaj san sekan mochiuaj. Kiteititiaj tikatej itlamian tonalmej (Dan. 12:4).

Nikan motaj profecías tlen techititiaj akin tekiua tlen kajki norte uan akin tekiua tlen kajki sur desde 1870 uan axkan.

Textos: Apoc. 11:7; 12:13, 17; 13:1-8, 12.

Profecía: “Yolkatl temojti” sapanoua miak xiuitl yokinnauati tlaltikpaktlakamej. Itlamian tonalmej kikokouaj chikome itsonteko. Satepan pajti uan nochtin kipaleuiaj. Satanás kitekitiltia nin yolkatl temomojti uan ijkon “omotekilmakato iwa n oksikimeh ipilwah n siwatl”.

Omochi: Satepan ijkuak tlaltikpak oatenki, opejki tlanauatiaj tekiuajkej tlen okixnamikej Jehová. Miak xiuitl satepan, ijkuak omochi Primera Guerra Mundial yipojpoliuiskia Imperio británico. Pero omochi okachi chikauak ijkuak okipaleui Estados Unidos. Itlamian tonalmej, Satanás okachi kintekitiltia tekiuajkej para ma kitlajyouiltikan ialtepe toTajtsin Dios.
Texto: Dan. 11:25-45.

Profecía: Tekiua tlen kajki norte moteuia iuan tekiua tlen kajki sur.

Omochi: Alemania omoteui iuan Gran Bretaña uan Estados Unidos. Itech 1945 Unión Soviética uan akinmej okipaleuiayaj okineskayotijkej tekiua tlen kajki norte. Itech 1991 opojpoliuik Unión Soviética uan satepan Rusia uan akinmej kipaleuiaj okineskayotijkej tekiua tlen kajki norte.
Textos: Is. 61:1; Mal. 3:1; Luc. 4:18.

Profecía: Jehová okititlanki “akin tetlapouis” ma kiyektlaliki ojtli para peuas tlanauatiskia Tekiuajkayotl mesiánico. Tokniuan tlen kineskayotiaj “akin tetlapouis” opejki tetlapouiaj.

Omochi: Itech 1870, Charles Russell uan oksekimej tokniuan opejki kitaj tlen melauak tlamachtia Biblia. Ijkuak opejki 1880, okijtojkej miak ipati ma tetlapouikan itekipanojkauan toTajtsin Dios. Okinmijkuilojkej tlamachtilmej tlen omotokayotiayaj “Moneki ma tetlapouikan mil tokniuan” uan “Otechpejpenkej ma titetlapouikan”.
Texto: Mat. 13:24-30, 36-43.

Profecía: Se tlakatl amo yolkuali okitokak amo kuali xiuitl kanin se tlakatl okitokak trigo. Amo kuali xiuitl omoskalti uan ayakmo omotaya trigo. Ijkuak opixkakej sekan okitlalijkej trigo uan amo kuali xiuitl.

Omochi: Itech 1870 opejki mota akinmej melauak imachtijkauan Jesús. Itlamian tonalmej kinnechikouaj akinmej melauak kichiuaj ken Cristo uan ayakmo katej iuan akinmej tlakajkayauaj.
Texto: Dan. 2:31-33, 41-43.

Profecía: Se estatua chijchitok ika tlatlamantli tepostli uan ikxiuan chijchitokej ika tepostli uan sokitl.

Omochi: Sokitl kineskayotiaj akinmej kinnauatia Gran Bretaña uan Estados Unidos. Yejuan amo kinkauiliaj tekiuajkej ma yetokan chikauakej ken tepostli porque kinmixnamikij.
Textos: Mat. 13:30; 24:14, 45; 28:19, 20.

Profecía: Trigo kimaluiaj uan kiluiaj “tlakeuali yolmelajki uan ixtlamatki” ma kinmalui oksekimej. Opejki motetlapouia ipan nochi tlaltikpak.

Omochi: Itech 1919 tlakeuali yolmelajki opejki kiyekana ialtepe toTajtsin Dios. Ijkuakon opejki okachi tetlapouiaj akinmej omomachtiayaj Biblia. Axkan iTlaixpantijkauan Jehová tetlapouiaj itech kanaj doscientos altepemej uan okseki altepetsitsintin ika kanaj mil tlajtolmej.
Textos: Dan. 12:11; Apoc. 13:11, 14, 15.

Profecía: Se yolkatl temomojti tlen kinpia ome ikuakojuan okijto ma kichijchiuilikan “se estatua [...] yolkatl temojti” uan okiyoliti.

Omochi: Gran Bretaña uan Estados Unidos okijtojkej ma mochiua Sociedad de Naciones. Okseki altepemej okipaleuijkej. Satepan itech 1926-1933, tekiua tlen kajki norte noijki okipaleui Sociedad de Naciones. Okiueyichijkej Sociedad de Naciones uan satepan Naciones Unidas (ONU) pero nin san kinamiki iTekiuajkayo toTajtsin Dios.
Texto: Dan. 8:23, 24.

Profecía: Se tekiua tlen omotaya kualani “sapanoua otlaijtlako”.

Omochi: Gran Bretaña uan Estados Unidos sapanoua yotetlajyouiltijkej. Itech Segunda Guerra Mundial, Estados Unidos okinkajkauili ome bombas atómicas se altepetl tlen okikokoliaya.
Textos: Dan. 11:31; Apoc. 17:3, 7-11.

Profecía: “Yolkatl chichiltik” tlen kinpia majtlaktli ikuakojuan kisa kanin “sentlawejkatlantik” uan ye tekiua chikueyi. Amochtli Daniel kijtoua nin tekiua “tetlajyalti uan teixpolo”.

Omochi: Itech Segunda Guerra Mundial opojpoliuik Sociedad de Naciones. Ijkuak otlanki guerra, okitlalijkej ONU uan okiueyichijkej ken Sociedad de Naciones pero nin san kinamiki iTekiuajkayo toTajtsin Dios. Tekiuajkej tlen kipaleuiaj ONU kinpojpoloskej religiones.
Textos: 1 Tes. 5:3; Apoc. 17:16.

Profecía: Tekiuajkej kijtoskej “tikateh ika kuali, iwa ya tikpiah yolsewílistli”. Satepan “májtlaktli kuakuajmeh” uan “yolkatl temojti” kipojpoloskej “mekatanajsiwatl”. Saiktlami kinpojpoloskej tekiuajkej.

Mochiuas: Tekiuajkej kijtoskej yionka yolseuilistli. Satepan akinmej kipaleuiaj ONU kinpojpoloskej religiones tlen san tlakajkayauaj. Ijkon peuas ueyi tlajyouilistli uan tlamis ika Armagedón.
Textos: Ezeq. 38:11, 14-17; Mat. 24:31.

Profecía: Gog kinekis kipojpolos ialtepe toTajtsin Dios. Satepan ángeles kinnechikoskej tlapejpenalmej.

Mochiuas: Tekiua tlen kajki norte uan nochtin tekiuajkej kitlajyouiltiskej ialtepe toTajtsin Dios. Satepan nochtin tlapejpenalmej yetoskej iluikak.
Textos: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

Profecía: Akin yaui ipan caballo istak tlatlanis ijkuak kixpolos Gog uan isoldados. Kitlamotlaskej “yolkatl temojti” kanin “kuakualakatok tletl” uan tlajtlapanis ueyi estatua.

Mochiuas: Tekiua Jesús kimakixtis ialtepe Jehová. Ángeles uan 144,000 kipaleuiskej kinmixpoloskej nochtin tekiuajkej. Ijkon tlamis nochi tlen kiyekana Satanás.