¿Tleka sekimej motlatlaujtiaj uan oksekimej amo?
María okijto: “Ijkuak niktlatlaujtia toTajtsin Dios yetoskia ken kajki nonauak, nechmakitskia uan nechyekana”.
Raúl okijto: “Nosiua sapanoua otlajyoui trece xiuitl porque okipiaya cáncer uan satepan oixpoliuik. Mojmostla onimotlatlaujtiaya uan onikmachiliaya toTajtsin Dios onechkakiaya uan onechyolseuiaya”.
Arne okijto: “Sapanoua kualtsin nikmachilia toTajtsin Dios nechkauilia iuan ma nimotlapoui”.
María, Raúl, Arne uan oksekimej kipatioitaj motlapouiskej iuan toTajtsin Dios. Ijkuak kitlapouiaj kitlasojkamatiliaj uan kiluiaj ma kinpaleui, kineltokaj tlen Biblia kijtoua: “Titlaneltokah inawak Dios, porke tikmatih Ye techkaki tla itla tiktlajtlaniliah non Ye kipaktia” (1 Juan 5:14).
Pero miakej amo kineltokaj tlen kijtoua non texto. Steve okijto tlen omokuayejyekouaya: “Ijkuak onikpiaya 17 xiuitl oixpolikej eyi noyolikniuan. Se oixpoliuik itech se accidente uan ome oixpolikej itech mar”. ¿Tlen okichi Steve? Ye okijto: “Oniktlatlaujti toTajtsin Dios uan onikilui tleka ijkon opanok pero amo onechnankili. Ik non, onimotlajtlani: ‘¿Nechpaleuis tla nimotlatlaujtis?’”. Miakej ijkon momachiliaj uan noijki kijtouaj kox kinpaleuis tla motlatlaujtiskej.
Oksekimej noijki kijtouaj amitlaj ipati motlatlaujtiskej. Sekimej kijtouaj toTajtsin Dios yikimati tlen kinpanoua. Ik non, kijtouaj amitlaj ipati kitlatlaujtiskej.
Oksekimej kijtouaj toTajtsin Dios amo kinkaki ijkuak kitlatlaujtiaj porque otlajtlakolchijkej. Jenny okijto: “Nikmachilia amitlaj nopati. Nechyolkokoua nochi tlen onikchi, ik non, nimokuayejyekoua amo nechnamiki ma nechkaki toTajtsin Dios”.
¿Tejuatsin tlen timokuayejyekoua? ¿Noijki ijkon timomachilia? Tlen kijtoua Biblia uelis mitspaleuis porque ompa kijtoua techpaleuia ma timotlatlaujtikan.a Ompa mitsnankilis tlen nikan kijtoua:
¿Techkaki toTajtsin Dios?
¿Tleka ualeua amo kichiua tlen tiktlajtlaniliaj?
¿Ken moneki tiktlatlaujtiskej tla tiknekij ma techkaki?
¿Ken mitspaleuis tla timotlatlaujtis?
a Biblia kijtoua miakej okitlatlaujtijkej toTajtsin Dios uan noijki Jesús omotlatlaujti. Itech Escrituras Hebreas noso Antiguo Testamento kipia kanaj 150 tlatlaujtilmej.