Sekimej techtlajtlaniaj

¿Tlen kijtosneki ijkuak Pablo okijto: “Inawak n tlanawátili ne yonimik”? (Gál. 2:19).

Apóstol Pablo okijto: “Porke inawak n tlanawátili ne yonimik iwa ayakmó weleti nechnawatia, axa niyolitok sanwel para Dios” (Gál. 2:19).

Pablo okijkuilo tlen okinyekilui sekimej tokniuan tlen ochantiayaj ompa Galacia. Sekimej tokniuan okinkauilijkej oksekimej ma kinmachtikan tlen amo melauak; okijtouaya para uelis momakixtiskiaj omonekiaya kitlakamatiskej nochi tlen okijtouaya Tlanauatil tlen okijkuilo Moisés, omonekiaya kimochiuiliskej circuncisión. Pero Pablo okiteititi amo melauak tlen yejuan otlamachtiayaj uan okinyolchika tokniuan ma tlaneltokakan itech imikilis Jesús (Gál. 2:4; 5:2).

Biblia kijtoua ijkuak ikaj ixpoliui, ayakmo itlaj kimati nion itlaj kipanoua (Ecl. 9:5). Ijkuak Pablo okijto: “Inawak n tlanawátili ne yonimik”, kijtosneki Tlanauatil ayakmo okinauatiaya. Pero okimatiaya ken otlaneltokaya itech imikilis Jesús, ‘yolitoskia sanwel para Dios’.

Tlanauatil tlen okijkuilo Moisés okichi ijkon ma kipano Pablo. ¿Tlen kijtosneki non? Ye okijto: “Amaka kitlapojpolwiskeh por okichi tlan tlanawatia n tlanawátili de Dios, yej se momakixtia tla se kitlalia itlaneltokalis itech Cristo Jesús” (Gál. 2:16). Tlanauatil okiteititi itlaj miak ipati. Pablo okinmilui tokniuan tlen ochantiayaj ompa Galacia: “Non tlanawátili otechmaktilijkeh para matikajsikamatikah tlan tlajtlákoli iwa tlan amó, iwa sanwel motekitiltiskia asta ijkuak ayamó owalaya Akin Dios okisentlali kiualtitlanis” (Gál. 3:19). Tlanauatil okiteititi amikaj uelis kitlakamatiskia nochi tlen ompa kijtoua porque nochtin okatkaj tlajtlakolejkej uan okiteititi omonekiaya inpatka mikis se tlen amo okipiaya tlajtlakoli. Tlen kijtoua Tlanauatil okinpaleui ma kajsikamatikan ye Jesús akin toTajtsin ‘Dios okisentlali kiualtitlaniskia’ (Gál. 3:24). ToTajtsin Dios okitlapojpolui Pablo porque ika tlen ijkuilitok itech Tlanauatil okixmatki Jesús uan itech otlaneltokak. Ijkon yetoskia ken ‘inawak n tlanawátili omikik’ uan omoyoliti ‘sanwel para Dios’. Tlen okijtouaya Tlanauatil ayakmo omonekiaya kichiuaskia pero kema omonekiaya kichiuas tlen Dios kinauatiskia.

Itech carta tlen okintitlanili tokniuan tlen ochantiayaj ompa Roma, Pablo okijto: “Nomejwah noiwa yononmikkeh inawak non tlanawátili [ika] Cristo [...]. Pero axa yotimikkeh imak n tlanawátili non otechmapixtoka, iwa ayakmitla techtsakuilia” (Rom. 7:4, 6). Nonmej versículos uan tlen kijtoua Gálatas 2:19, tikajsikamatij Pablo amo okijto mikiskia ken se tlajtlakole porque Tlanauatil ijkon okijtouaya. Okinekiaya kijtos ayakmo ijkon kipanoskia. Tlanauatil tlen okijkuilo Moisés ayakmo okinauatiaya, ye nion oksekimej tokniuan. Ayakmo ijkon yetoskia porque yejuan otlaneltokayaj itech imikilis Cristo.