29 Sebesuka eJerikho walandelwa lixuku elikhulu. 30 Amadoda amabili ayiziphofu ayehlezi eceleni komgwaqo ezwa ukuthi uJesu wayesedlula, asememeza athi: “Nkosi! Sizwele isihawu Ndodana kaDavida!”+ 31 Kodwa abantu bawakhuza bawatshela ukuthi athule. Loba kunjalo wona amemeza kakhulu esithi: “Nkosi! Sizwele isihawu Ndodana kaDavida!” 32 Ngakho uJesu wama wawabiza, wasesithi: “Lifuna ngilenzeleni?” 33 Athi kuye: “Nkosi, yenza ukuthi amehlo ethu abone.” 34 UJesu wawazwela usizi wasewathinta amehlo.+ Amadoda la ahle aqalisa ukubona asemlandela.

46 Ngemva kwalokho bangena eJerikho. Wathi esephuma eJerikho elabafundi bakhe labantu abanengi, uBhathimewu (indodana kaThimewu) owayeyisiphofu esihamba sicela ebantwini wayehlezi eceleni komgwaqo.+ 47 Wathi esizwa ukuthi nguJesu umNazaretha, waqalisa ukumemeza esithi: “Ndodana kaDavida,+ Jesu, woba lesihawu kimi!”+ 48 Abanengi bathi bemuzwa bamkhuza bemtshela ukuthi athule kodwa yena waqhubeka ememeza kakhulu esithi: “Ndodana kaDavida, woba lesihawu kimi!” 49 Yikho uJesu wama wasesithi: “Mtsheleni abuye lapha.” Ngakho bayibiza indoda eyisiphofu bathi kuyo: “Ungesabi! Sukuma uyakubiza.” 50 Yalahlela phansi isembatho sayo sangaphandle, yathi lothu yaqonda kuJesu. 51 UJesu wasesithi kuyo: “Ufuna ngikwenzeleni?” Indoda eyisiphofu yathi kuye: “Rabhoni,* ngicela ungenze ngiphinde ngibone.” 52 UJesu wasesithi kuyo: “Hamba. Ukholo lwakho lukusilisile.”+ Yahle yaqalisa ukubona,+ yasihamba imlandela emgwaqweni.