UDutheronomi
23 “Loba ngubani owathenwa ngokuchotshozwa amasende loba owaqunywa isitho sensitha kasoze avunyelwe ukungena ebandleni likaJehova.+
2 “Akulamntwana ozelwe ngobufebe ongangena ebandleni likaJehova.+ Lanxa kungaba yisizukulwane setshumi kakho owosendo lwakhe ongangena ebandleni likaJehova.
3 “Kakho um-Amoni loba umMowabi ongangena ebandleni likaJehova.+ Lanxa kungaba yisizukulwane setshumi kakho owosendo lwabo okumele angene ebandleni likaJehova, 4 ngenxa yokuthi abazange balihlangabeze bazolinceda ngokudla lamanzi ngesikhathi lisendleleni livela eGibhithe,+ langenxa yokuthi baqhatsha uBhalamu indodana kaBheyori owayevela ePhethori eMesophothamiya ukuthi azoliqalekisa.+ 5 Kodwa uJehova uNkulunkulu wenu kazange amlalele uBhalamu.+ UJehova uNkulunkulu wenu watshintsha isiqalekiso leso saba yisibusiso kini,+ ngenxa yokuthi uJehova uNkulunkulu wenu uyalithanda.+ 6 Akumelanga libasize ukuthi babe lenhlalakahle kumbe libenze baphumelele kuzo zonke insuku zokuphila kwenu.+
7 “Lingabazondi abako-Edomi ngoba bangabafowenu.+
“Akumelanga lizonde amaGibhithe ngoba lalingabezizweni elizweni lawo.+ 8 Isizukulwane sesithathu sabantwababo singangena ebandleni likaJehova.
9 “Nanzelelani lingenzi loba yini embi* nxa selikhempile,+ selilungele ukuhlasela izitha zenu. 10 Nxa indoda ingangcola ngenxa yokuphuma ubudoda ebusuku+ kumele iphume ngaphandle kwezihonqo futhi akumelanga iphenduke ezihonqweni. 11 Nxa sekuntambama kumele igeze ngamanzi ibisibuyela ezihonqweni ilanga litshona.+ 12 Khethani indawo esithekileyo* ngaphandle kwezihonqo futhi yikho okumele umuntu ayekhona nxa esiya ngaphandle. 13 Kumele libe lesimbo phakathi kwamathuluzi enu ukwenzela ukuthi nxa umuntu esiyaqutha ngaphandle esiyazinceda agebhe igodi ngaso, abesegqibela ingcekeza yakhe. 14 Phela uJehova uNkulunkulu wenu uyahambahamba phakathi kwezihonqo zenu+ ukuze alikhulule njalo anikele izitha zenu kini. Ngakho izihonqo zenu kumele zibe ngcwele+ ukuze angaboni loba yini engcolileyo, abeselitshiya ayekele ukuhamba lani.
15 “Lingabuyiseli isigqili enkosini yaso nxa singabaleka kuyo size kini. 16 Singahlala phakathi kwenu kuloba yiphi indawo esiyikhethayo kwelinye lamadolobho enu, loba ngaphi esifisa ukuhlala khona. Akumelanga lisiphathe kubi.+
17 “Phakathi kwamadodakazi ako-Israyeli kakho okumele abe liwule lethempelini,+ lasemadodaneni ako-Israyeli kakho okumele abe liwule lethempelini.+ 18 Akumelanga ulethe endlini kaJehova uNkulunkulu wakho imali ebhadalwe owesifazana oliwule loba imali ebhadalwe* owesilisa oliwule ukuze ugcwalise isifungo, ngoba bobabili bayenyanyeka kuJehova uNkulunkulu wakho.
19 “Nxa ungaboleka umfowenu imali akumelanga uthi akubuyisele isizele,+ njalo ungambhadalisi nxa umboleke ukudla loba okunye nje. 20 Umuntu wesinye isizwe nguye ongambhadalisa kulokho omboleke khona+ kodwa umfowenu akumelanga umbhadalise inzuzo+ ukuze uJehova uNkulunkulu wakho akubusise kukho konke ozakwenza elizweni elizalithatha libe ngelenu.+
21 “Nxa ungenza isifungo kuJehova uNkulunkulu wakho+ ungaphuzi ukusigcwalisa+ ngoba uJehova uNkulunkulu wakho uzasibuza kuwe, nxa ungayekela ukusigcwalisa uyabe wenze isono.+ 22 Kodwa nxa ungayekela ukwenza isifungo awusoze ube lesono.+ 23 Kumele uligcine ilizwi eliphuma emlonyeni wakho+ futhi kumele wenze lokho ozikhulumele khona, isifungo sakho sinjengomnikelo wokuzithandela kuJehova uNkulunkulu wakho.+
24 “Nxa ungangena ensimini kamakhelwane wakho yamagilebisi ungazidlela amagilebisi owafunayo uze usuthe kodwa akumelanga ufake amanye esitsheni sakho.+
25 “Nxa ungangena ensimini kamakhelwane wakho elamabele ungakha izikhwebu ezivuthiweyo ngesandla sakho kodwa akumelanga ufake isikela emabeleni kamakhelwane wakho.+