IVangeli Elabhalwa NguMathewu
8 Wathi eseyehlile entabeni walandelwa ngabantu abanengi kakhulu. 2 Kwasekuthutsha indoda eyayilobulephero yafika yamkhothamela yathi: “Nkosi, ngiyakwazi ukuthi nxa ufuna ungangenza ngihlambuluke.”+ 3 Ngakho welula isandla sakhe wayibamba wathi kuyo: “Ngiyafuna, hlambuluka.”+ Masinyane nje ubulephero bayo baphela, yasala isihlambulukile.+ 4 UJesu wasesithi kuyo: “Ungatsheli muntu ukuthi kwenzakaleni.+ Kodwa hamba uyeziveza kumphristi,+ unikele ngesipho uMosi athi kumele kunikelwe ngaso,+ ukuze kube yibufakazi kubo.”
5 Wathi esengene eKhaphenawume kweza kuye umkhokheli webutho wamncenga+ 6 esithi: “Mnumzana, inceku yami ilele phansi endlini, yome umhlubulo futhi ithwele nzima kakhulu.” 7 Yena wathi kuye: “Nxa ngingafika khona ngizamelapha.” 8 Umkhokheli webutho waphendula wathi: “Mnumzana, kambe ngiyini mina ukuthi ungangena ngaphansi kophahla lwami? Wena tshono ilizwi nje kuphela, inceku yami izasila. 9 Lami nginje kulabanye engingaphansi kwabo futhi ngilamasotsha angaphansi kwami. Ngiyathi kwelinye, ‘Hamba!’ lakanye lihambe, ngithi kwelinye, ‘Buya lapha!’ libuye, njalo ngithi encekwini yami, ‘Yenza lokhu!’ ikwenze.” 10 UJesu wathi esizwa lokhu wamangala wathi kulabo ababemlandela: “Ngilitshela iqiniso, kulo lonke elako-Israyeli angikamtholi umuntu olokholo olukhulu kangaka.+ 11 Ngilitshela ukuthi abanengi bazakuza bevela empumalanga lentshonalanga, bahlale etafuleni lo-Abrahama lo-Isaka kanye loJakhobe eMbusweni wamazulu.+ 12 Kodwa amadodana oMbuso wona azaphoselwa phandle emnyameni. Yikho lapho azakhalela khona atshayanise amazinyo.”+ 13 UJesu wasesithi kumkhokheli webutho: “Hamba. Lokho okucelileyo kakwenzakale ngoba utshengise ukuthi ulokholo.”+ Inceku yakhe yahle yasila ngalesosikhathi.+
14 UJesu wathi engena endlini kaPhetro wabona uninazala kaPhetro+ elele phansi egula. Umzimba wakhe wawutshisa.+ 15 Ngakho uJesu wamthinta isandla+ ukutshisa komzimba kwaphela, wasevuka wamlungisela ukudla. 16 Kwathi sekuntambama abantu baletha kuye abanengi ababelamadimoni, wasebakhipha amadimoni ngelizwi nje. Welapha bonke ababegula 17 ukuze kugcwaliseke okwakhulunywa nguNkulunkulu esebenzisa umphrofethi u-Isaya, owathi: “Yena ngokwakhe wathatha ukugula kwethu, wathwala lemikhuhlane yethu.”+
18 UJesu uthe ebona ixuku labantu elalimgombolozele, watshela abafundi bakhe ukuthi bahambe laye ngaphetsheya.+ 19 Kwasekufika umbhali wathi kuye: “Mfundisi, ngizakulandela loba ngaphi lapho oya khona.”+ 20 Kodwa uJesu wathi kuye: “Amakhanka alemilindi lenyoni zilezidleke, kodwa iNdodana yomuntu yona ayilandawo yokubeka ikhanda.”+ 21 Omunye wabafundi wasesithi kuye: “Nkosi, ngivumela ukuthi ngiqale ngiyengcwaba ubaba.”+ 22 UJesu wathi kuye: “Qhubeka ungilandela, uyekele abafileyo bangcwabe abafileyo babo.”+
23 UJesu wangena esikepeni abafundi bakhe bamlandela.+ 24 Kusenjalo kwaqubuka isiphepho esikhulu elwandle okokuthi isikepe sasesisibekelwa ngamagagasi, kodwa yena wayelele.+ 25 Abafundi baya kuye bamvusa besithi: “Nkosi, sisindise sesisifa!” 26 Kodwa yena wathi kubo: “Kungani lisesaba* kangaka lina elilokholo oluncane?”+ Wasesukuma wakhuza umoya lolwandle, kwathula kwathi cwaka.+ 27 Ngakho amadoda la amangala athi: “Ngumuntu bani yenalo? Phela umoya lolwandle lakho kuyamlalela.”
28 Uthe efika ngaphetsheya esabelweni samaGadarini, wahlangabezwa ngamadoda amabili ayelamadimoni evela emangcwabeni.+ Ayelodlakela olwesabekayo okokuthi kakho owayelesibindi sokudlula ngalowomgwaqo. 29 Amemeza esithi: “Kanti ufunani kithi Ndodana kaNkulunkulu?+ Ulande ukuzosihlukuluza+ isikhathi esibekiweyo singakafiki yini?”+ 30 Khatshana labo kwakulomhlambi wengulube ezinengi ezazisidla.+ 31 Yikho amadimoni aqalisa ukumncenga esithi: “Nxa usikhipha sixotshele emhlambini wengulube.”+ 32 Wasesithi kuwo: “Hambani!” Ngakho aphuma ayangena ezingulubeni, umhlambi wonke waphaphatheka uqonda eliweni wayazithela elwandle, wafela emanzini. 33 Kodwa abelusi babaleka baya edolobheni bafika babika konke okwakwenzakele, lendaba yamadoda ayelamadimoni. 34 Kwaqubuka idolobho lonke lizobona uJesu. Bathi bembona bamncenga ukuthi asuke esabelweni sabo.+