UJobe
40 UJehova waqhubeka ekhuluma loJobe esithi:
2 “Kuqondile yini ukuthi umuntu asole uSomandla njalo amphikise?+
Lowo ofuna ukumbeka icala kaphendule.”+
3 UJobe wasephendula uJehova wathi:
4 “Mina angisimuntu walutho.+
Kambe ngingakuphendula ngithini?
Sengivala umlomo wami ngesandla.+
5 Lanxa ngikhulume ngaze ngaphinda, angisoze ngiphendule futhi.
Angilawo amanye amazwi.”
6 UJehova wasekhuluma ephakathi kwesivunguzane+ wathi kuJobe:
7 “Qina ube yindoda,
Mina ngizakubuza wena ungiphendule.+
8 Kungani usola indlela engahlulela ngayo?
Kambe ungangisola ukuze wena ukhanye ulungile?+
9 Ingalo yakho iqine njengekaNkulunkulu weqiniso yini?+
Kambe ungakhwaza njengaye?+
10 Nxa kunjalo ngitshengisa inkazimulo yakho lamandla akho.
Ngitshengisa udumo lwakho lokuthi umkhulu kangakanani.
11 Lukhiphe lonke ulaka lwakho,
Khangela bonke abazigqajayo ubusubehlisa,
12 Ukhangele wonke umuntu oziphakamisayo umehlise,
Abenza okubi ubahlifize lapho abakhona,
13 Ubafihle ethulini bonke,
Ubavalele endaweni emnyama.
14 Lapho-ke lami ngizavuma
kuthi isandla sakho sokudla singakusindisa.
15 Khangela imvubu,* ngayidala njengoba lawe ngakudala.
Idla utshani njengenkomo.
16 Uyabona ukuthi imilenze yayo iqine njani?
Uyabona ukuthi imisipha esesiswini sayo iqine kangakanani?
17 Iyawuqinisa umsila wayo ube angathi yisihlahla somsedari.
Imisipha yemilenze yayo ingathi yelukiwe.
18 Amathambo ayo aqine njengekhopha.
Inyawo zayo zingathi zenziwe ngensimbi.
19 Inkulu futhi ngeyokuqala ezinyamazaneni zomhlobo wayo ezadalwa nguNkulunkulu.
UMenzi wayo nguye yedwa ongayilanda ethwele inkemba.
20 Ukudla kwayo ikuthola ezintabeni,
Lapho okudlalela khona zonke izinyamazana zeganga.
21 Ilala ngaphansi kwezihlahla eziyizithingithingi,
Icatshe phakathi kwemihlanga esexhaphozini.*
22 Izihlahla eziyizithingithingi zingumthunzi wayo,
Lezihlahla zomphophula ezisesigodini ziyigombolozele.
23 Lanxa umfula uthwele izigodo kayethuki.
Ilesibindi sokuqondana lamagagasi omfula uJodani.+
24 Ukhona yini ongayibamba yona ibukele nje,
Kumbe ayiwuke ngamakhala?