UHezekheli
4 “Ndodana yomuntu, thatha isitina usibeke phambi kwakho, udwebe idolobho leJerusalema kuso, 2 ubususenza angathi uyalivimbezela.+ Yakha umduli wokulivimbezela,+ ledundulu lokuhlasela,+ umise izinkamba njalo uligombolozele ngezigodo zokudiliza umduli.+ 3 Thatha izenge ulifake phakathi kwakho ledolobho libe njengomduli wensimbi. Ngemva kwalokho, khangela idolobho ulivimbezele, libe lidolobho elivinjezelweyo. Lesi yisibonakaliso ebantwini bako-Israyeli.+
4 “Nxa usukwenzile lokhu kumele ulale ngomhlubulo wenxele uthwale icala labako-Israyeli.+ Wonke amalanga ulele ngomhlubulo uzabe uthwele icala labo. 5 Kumele ulale okwamalanga angu-390 alingana leminyaka yokona kwabako-Israyeli,+ uthwale icala labo. 6 Nxa amalanga lawo angaphela kumele ulale okwesibili.
“Uzalala ngomhlubulo wesokudla, uthwale icala labakoJuda+ okwamalanga angu-40. Ilanga elilodwa limela umnyaka owodwa, lo yiwo umthetho engikupha wona, ilanga elilodwa limela umnyaka owodwa. 7 Kumele ukhangele iJerusalema leyo evinjezelweyo+ ugoqe imikhono yesembatho sakho ubusuphrofetha ngayo.
8 “Ngizakubopha ngemichilo ukuze ungatshibiliki utshintshe umhlubulo aze aphele amalanga okuvimbezela idolobho.
9 “Kumele uthathe ingqoloyi, lebhali, lendumba, lamalentili,* lenyawuthi, lesipelithi* ukufake esitsheni esisodwa ubususenza isinkwa ngakho. Okwamalanga angu-390 ulele ngomhlubulo uzabe usidla khonokho.+ 10 Isinkwa lesi uzasikala udle esingamashekheli angu-20* ngelanga. Uzasidla ngezikhathi ezibekiweyo.
11 “Uzanatha amanzi akaliweyo. Ngelanga uzanatha ingxenye yelitha* njalo uzawanatha ngezikhathi ezibekiweyo.
12 “Isinkwa leso uzasidla angathi udla isinkwa sebhali futhi kumele usipheke bekhangele. Uzasipheka ngomlilo owubase ngobulongwe bomuntu.” 13 UJehova waqhubeka wathi: “Le yiyo indlela abantu bako-Israyeli abazakudla ngayo isinkwa esingcolileyo ezizweni engizabachithachitha baye kuzo.”+
14 Ngaphendula ngathi: “Hatshi bo, Nkosi Enkulu Jehova! Kusukela ngisesemutsha kuze kube lamuhla angikaze ngizingcolise ngokudla inyama yenyamazana ezifeleyo kumbe ebulewe ngezinye inyamazana+ futhi angikaze ngidle inyama engcolileyo.”+
15 Ngakho wangiphendula wathi: “Kulungile, ngizakuvumela ukuthi usebenzise ubulongwe benkomo kulokuthi usebenzise obomuntu. Ubulongwe lobo yibo ozabasa ngabo umlilo wokupheka isinkwa.” 16 Waphinda wathi kimi: “Ndodana yomuntu, sengiqeda konke ukudla eJerusalema+ futhi bazakudla isinkwa esikaliweyo+ bekhathazeke kakhulu, banathe amanzi akaliweyo+ beyethukile. 17 Lokhu kuzakwenzakala abantu baze bakhangelane sebephelelwe ngenxa yokuswela isinkwa lamanzi. Bazacaka babe mathambothambo ngenxa yezono zabo.