UHezekheli
46 “Nanku okutshiwo yiNkosi Enkulu uJehova: ‘Igedi leguma elingaphakathi elikhangele empumalanga+ kumele lihlale livaliwe+ ngamalanga ayisithupha okusebenza.+ Kodwa ngelanga leSabatha lelokuthwasa kwenyanga kumele livulwe. 2 Umkhokheli uzangena ngevurandi elisegedini+ evela egumeni elingaphandle, abesesima eceleni komgubazi wegedi. Abaphristi bazanikela umnikelo wokutshiswa ogcweleyo obuye lomkhokheli, banikele lemihlatshelo yakhe yobudlelwano. Uzakhothama esitubhini segedi abesephuma, kodwa igedi akumelanga livalwe kuze kube ntambama. 3 Abantu bazakhothama entubeni yegedi lelo phambi kukaJehova ngelanga leSabatha lelokuthwasa kwenyanga.+
4 “‘Ngelanga leSabatha umkhokheli kumele anikele kuJehova umnikelo wokutshiswa ogcweleyo ogoqela imvana ezinduna eziyisithupha ezingelasici lenqama eyodwa engelasici.+ 5 Nxa esenikela ngenqama kumele alethe umnikelo wamabele oyi-efa* eyodwa njalo nxa esenikela ngemvana ezinduna uzaletha loba yini ayenelisayo. I-efa ngayinye yefulawa uzayinikela lehini* eyodwa yamafutha.+ 6 Ngelanga lokuthwasa kwenyanga uzanikela ngejongosi elingelasici alithethe emhlambini, lemvana ezinduna eziyisithupha kanye lenqama. Konke lokhu kufanele kungabi lasici.+ 7 Nxa esenikela ngejongosi kumele alethe lomnikelo wamabele oyi-efa eyodwa njalo nxa esenikela ngenqama kumele alethe i-efa yefulawa. Uzaletha loba yini ayenelisayo nxa esenikela ngemvana ezinduna. I-efa ngayinye yefulawa uzayinikela lehini eyodwa yamafutha.
8 “‘Nxa umkhokheli esengena kumele angene ngevurandi elisegedini aphinde aphume ngalo.+ 9 Nxa abantu bengabuya phambi kukaJehova bezokhonza ngezikhathi zemikhosi,+ labo abangene ngegedi elisenyakatho+ kumele baphume ngegedi eliseningizimu,+ besekusithi labo abangene ngegedi eliseningizimu baphume ngegedi elisenyakatho. Akulamuntu okumele aphume ngegedi angene ngalo, kumele baphume ngegedi elikhangelane lalelo abangene ngalo. 10 Umkhokheli ophakathi kwabo kumele angene labo nxa bengena njalo aphume labo nxa sebephuma. 11 Ngezikhathi zemikhosi lamadili, nxa umkhokheli enikela ngejongosi uzaletha lomnikelo wamabele oyi-efa eyodwa. Nxa esenikela ngenqama uzaletha le-efa yefulawa njalo uzaletha loba yini ayenelisayo nxa esenikela ngemvana ezinduna. I-efa ngayinye yefulawa uzayinikela lehini eyodwa yamafutha.+
12 “‘Nxa umkhokheli eseletha umnikelo wakhe wokutshiswa ogcweleyo+ loba imihlatshelo yobudlelwano ukuthi ibe yiminikelo yokuzithandela ayipha uJehova, uzavulelwa igedi elikhangele empumalanga. Uzanikela umnikelo wakhe wokutshiswa ogcweleyo lemihlatshelo yobudlelwano njengoba nje esenza nxa kulilanga leSabatha.+ Nxa angaphuma igedi kumele livalwe.+
13 “‘Nsuku zonke kumele unikele kuJehova ngemvana enduna engelasici elomnyaka owodwa. Lo kuzakuba ngumnikelo wokutshiswa ogcweleyo+ futhi kumele uwunikele nsuku zonke ekuseni. 14 Nxa usuletha umnikelo lo nsuku zonke ekuseni kumele ulethe lengxenye yesithupha ye-efa ukuthi ibe ngumnikelo wamabele kanye lengxenye yesithathu yehini yamafutha azafafazwa phezu kwefulawa ecolekileyo. Lokhu kuzakuba ngumnikelo wamabele onikwa uJehova zikhathi zonke. Umthetho lo uzahlala ukhona. 15 Nsuku zonke ekuseni kumele banikele ngemvana enduna kanye lomnikelo wamabele lamafutha ukuthi kube ngumnikelo wokutshiswa ogcweleyo owenziwa zikhathi zonke.’
16 “Nanku okutshiwo yiNkosi Enkulu uJehova: ‘Nxa umkhokheli anganika amadodana akhe isipho ukuthi sibe lilifa lawo, isipho leso sizakuba yimpahla yawo. Sizakuba ngesawo ngoba sililifa lawo. 17 Kodwa nxa anganika esinye isisebenzi sakhe isipho ukuthi sibe lilifa laso, sizakuba ngesaso kuze kube ngumnyaka wenkululeko,+ ngemva kwalokho sizabuyela sibe ngesomkhokheli. Isipho asinike amadodana akhe yiso kuphela esizahlala singesamadodana akhe. 18 Umkhokheli akumelanga athathele abantu ilifa labo ngokubaxotsha endaweni yabo. Kufanele anike amadodana akhe ilifa alithethe empahleni yakhe ukuze kungabi lomuntu wami oxotshwa endaweni yakhe.’”
19 Indoda engayibona embonweni yangingenisa ngomnyango+ owawuseceleni kwegedi, okwakungenwa ngawo nxa usiya ezindlini zokudlela ezingcwele ezazingezabaphristi, ezazikhangele enyakatho.+ Ngabona enye indawo khonapho eyayingemuva ngokuya entshonalanga. 20 Indoda le yathi kimi: “Lapha yikho abaphristi abaphekela khona iminikelo yecala leyesono lesinkwa esenziwa ngomnikelo wamabele+ ukuze bangathwali lutho baphume lalo besiya egumeni elingaphandle, bacine besenza abantu babengcwele.”*+
21 Yaphuma lami yangisa egumeni elingaphandle yangidlulisa emakhoneni womane eguma. Ngananzelela ukuthi kwakuleguma ekhoneni ngalinye leguma elingaphandle. 22 Emakhoneni womane eguma elingaphandle kwakulamaguma amancane ayezingalo ezingu-40* ubude lezingu-30 ububanzi futhi womane ayelingana. 23 Wonke ayelezitubhu emaceleni womane njalo emaceleni ezitubhu kwakulamaziko okuphekela iminikelo. 24 Yasisithi kimi: “Lezi yizo izindlu labo abasebenza ethempelini abaphekela kuzo imihlatshelo elethwa ngabantu.”+