UHezekheli

42 Indoda engayibona embonweni yangikhokhela yangisa egumeni elingaphandle ngokuya enyakatho.+ Yangingenisa esakhiweni esasilezindlu zokudlela esasiseduze lendawo eligceke+ esegumeni lethempeli. Isakhiwo lesi sasisenyakatho kwendlu eyayingemuva kwethempeli.*+ 2 Sasizingalo ezingu-50 ububanzi futhi ubude baso ngasenyakatho babuzingalo* ezingu-100. 3 Isakhiwo lesi sasiphahlwe liguma elingaphakathi elalizingalo ezingu-20 ububanzi,+ lendawo egandelwe ngamatshe esegumeni elingaphandle. Izindlu zaso zazikhangelene futhi zazakhiwe zaba yizitezi ezintathu. 4 Phambi kwezindlu zokudlela kwakulendlela+ eyayizingalo ezilitshumi ububanzi lezingu-100 ubude.* Iminyango yezindlu lezi yayikhangele enyakatho. 5 Izindlu zokudlela eziphezulu zazizincane kulalezo eziphakathi laphakathi leziphansi ngenxa yokuthi imikhandlu yayithethe indawo enengi. 6 Izindlu zokudlela zazakhiwe zaba yizitezi ezintathu kodwa zazingelansika ezinjengalezo ezazisegumeni. Yikho izindlu eziphezulu zazilendawo encane kulalezo ezazisesitezi esiphansi lesiphakathi laphakathi.

7 Kwakulomduli wangaphandle owawakhiwe ngamatshe owawuseduze lezindlu zokudlela ngokuya egumeni elingaphandle, elaliphambi kwezindlu zokudlela. Umduli lo wawuzingalo ezingu-50 ubude. 8 Izindlu zokudlela ezaziseduze leguma elingaphandle zazizingalo ezingu-50 ubude kodwa lezo ezaziseduze lendawo engcwele zazizingalo ezingu-100. 9 Isakhiwo sezindlu zokudlela sasilomnyango owawusempumalanga abantu ababengena ngawo nxa bevela egumeni elingaphandle.

10 Kwakulezinye izindlu zokudlela ezaziseceleni komduli weguma futhi umduli lo wawusempumalanga kwazo. Izindlu lezi zaziseduze lendawo eligceke kanye lesakhiwo esasingemuva kwethempeli.*+ 11 Phambi kwazo kwakulendlela eyayifanana laleyo eyayiphambi kwezindlu zokudlela ezazisenyakatho.+ Izindlu lezi zazilingana ubude lobubanzi, zileminyango efananayo futhi zakhiwe zafanana. Iminyango yazo 12 yayinjengeminyango yezindlu zokudlela ezaziseningizimu. Phambi komduli wamatshe owawusempumalanga kwakulomnyango okwakungenwa ngawo futhi wawusekuqaliseni kwendlela eyayihamba phakathi kwezindlu lezi.+

13 Indoda engayibona embonweni yathi kimi: “Izindlu zokudlela ezisenyakatho lezindlu zokudlela eziseningizimu eziseduze kwendawo eligceke+ yizindlu ezingcwele, lapho abaphristi abama phambi kukaJehova abadlela khona iminikelo engcwele kakhulu.+ Yikho lapho abafaka khona iminikelo engcwele kakhulu, iminikelo yamabele, leminikelo yesono, leminikelo yecala ngoba indawo leyo ingcwele.+ 14 Nxa abaphristi bangangena endaweni engcwele akumelanga baphume baye egumeni elingaphandle, bengazange baqale bakhiphe izembatho zabo abazigqoka nxa besenza imisebenzi yabo ngoba zingcwele.+ Kumele bagqoke ezinye izembatho nxa sebesiya ezindaweni okuvunyelwa khona ukuthi abantu bafike kuzo.”

15 Yathi isiqedile ukulinganisa indawo engaphakathi yethempeli,* yaphuma lami ngendlela eqonda egedini elikhangele empumalanga,+ yasilinganisa yonke indawo.

16 Yalinganisa icele elisempumalanga ngomhlanga wokulinganisa.* Laliyimihlanga engu-500 ubude kusukela lapho umduli oqalisela khona kusiya lapho ocina khona.

17 Yalinganisa icele elisenyakatho, laliyimihlanga engu-500 ubude.

18 Yalinganisa lecele eliseningizimu, laliyimihlanga engu-500 ubude.

19 Yabhoda yaya eceleni elisentshonalanga yalilinganisa ngomhlanga wokulinganisa. Laliyimihlanga engu-500 ubude.

20 Yalinganisa indawo leyo amacele ayo womane. Yayigonjolozelwe ngumduli+ owawuyimihlanga engu-500 ubude+ lengu-500 ububanzi. Umduli lo yiwo owawusehlukanisa indawo engcwele lengangcwele.+