UHezekheli

18 Ilizwi likaJehova laphinda lafika kimi lathi: 2 “Sitshoni isaga lesi elisikhulumayo elizweni lako-Israyeli esithi, ‘Obaba badle amagilebisi amunyu kodwa amazinyo abantwana yiwo atshelelayo’?+

3 “‘Ngifunga ngami uqobo,’ kutsho iNkosi Enkulu uJehova, ‘alisoze liqhubeke lisisebenzisa isaga lesi ko-Israyeli. 4 Yonke imiphefumulo* ngeyami, umphefumulo kababa ngowami lomphefumulo wendodana ngowami. Umphefumulo* owonayo yiwo ozakufa.

5 “‘Ake sithi kulomuntu olungileyo owenza okufaneleyo lokulungileyo. 6 Umuntu lo kadli ukudla okunikelwe ezithombeni ezintabeni+ njalo kathembelanga ezithombeni ezenyanyekayo* zabantu bako-Israyeli. Kalali lomfazi* kamakhelwane wakhe+ kumbe lowesifazana osesikhathini.+ 7 Akulamuntu amphatha kubi+ futhi uyabuyisela isibambiso abesiphiwe ngumuntu olesikwelede sakhe.+ Kaqilibezeli muntu+ kodwa uthatha ukudla kwakhe aphe abalambileyo+ njalo uyabanika izigqoko labo abahamba nqunu.+ 8 Kabhadalisi inzuzo njalo kabolekisi ehlose ukuthola inzuzo eyedlulisileyo.+ Kenzi okungalunganga+ futhi wahlulela kuhle phakathi kwabantu abaphikisanayo.+ 9 Uqhubeka elandela imilayo yami futhi egcina imithetho yami yokwahlulela ukuze ahlale ethembekile. Umuntu onjalo uzaqhubeka ephila ngoba ulungile,’+ kutsho iNkosi Enkulu uJehova.

10 “‘Kodwa ake sithi ulendodana eyisigebenga+ kumbe engumbulali+ loba eyenza okunye kwalokhu, 11 (lanxa uyise engazange enze okunye kwalokhu). Indodana le idla ukudla okunikelwe ezithombeni phezu kwezintaba njalo ilala lomfazi* kamakhelwane wayo. 12 Iphatha kubi abaswelayo labayanga+ futhi ithathela abantu impahla yabo. Kayibuyiseli isibambiso sesikwelede, ithembele ezithombeni ezenyanyekayo+ futhi yenza izenzo ezenyanyekayo.+ 13 Ibolekisa abantu imali ukuze ithole inzuzo eyedlulisileyo njalo ibhadalisa inzuzo.+ Yikho kayisoze iqhubeke iphila. Izabulawa ngenxa yokuthi yenze zonke izinto lezi ezenyanyekayo, futhi yiyo eyabe izibulalisile.*

14 “‘Kodwa ake sithi kulendodana ezibonayo zonke izono ezenziwa nguyise kodwa yona ingazenzi izinto lezo. 15 Indodana le ayidli ukudla okunikelwe ezithombeni ezintabeni futhi kayithembelanga ezithombeni ezenyanyekayo zabantu bako-Israyeli. Kayilali lomfazi* kamakhelwane wayo. 16 Akulamuntu emphatha kubi njalo kayiyali lesibambiso somuntu olesikwelede sayo futhi ayithatheli muntu impahla yakhe. Inika abalambileyo ukudla kwayo, iphe labahamba nqunu izigqoko. 17 Kayiqali ukucindezela abayanga futhi kayibhadalisi inzuzo kumbe ibolekise imali ihlose ukuthola inzuzo eyedlulisileyo. Iyayigcina imithetho yami yokwahlulela futhi iyayilandela imilayo yami. Umuntu onje kasoze afele isono sikayise, uzaqhubeka ephila. 18 Kodwa uyise uzakufa ngenxa yamacala akhe ngoba wayeqilibezela abantu, ethathela abafowabo impahla njalo esenza izinto ezimbi ebantwini bakibo.

19 “‘Kodwa lina lizakuthi: “Kungani indodana ingetheswa icala ngenxa yezono zikayise?” Indodana izaqhubeka iphila+ ngoba yenze okufaneleyo lokulungileyo, yagcina yonke imithetho yami njalo yayilandela. 20 Umphefumulo owonayo yiwo ozakufa.*+ Indodana ayisoze yetheswe icala ngenxa yezono zikayise, lobaba kasoze etheswe icala ngenxa yezono zendodana yakhe. Umvuzo womuntu olungileyo uzakuba ngowakhe yedwa, lomuntu owenze izinto ezimbi uzajeziswa yedwa.+

21 “‘Nxa umuntu owenza okubi angatshiya zonke izono zakhe abesegcina imithetho yami futhi enze okufaneleyo lokulungileyo uzaqhubeka ephila, kasoze afe.+ 22 Kasikho ngitsho lesisodwa isono azasithonisiswa.*+ Uzaqhubeka ephila ngoba wenze okulungileyo.’+

23 “‘Ngiyathokoza yini ngokufa komuntu owenza okubi?’+ kutsho iNkosi Enkulu uJehova. ‘Mina engikufunayo yikuthi umuntu omubi atshiye konke okubi akwenzayo aqhubeke ephila.’+

24 “‘Kodwa nxa umuntu olungileyo angatshiya ukwenza okuhle abesesenza okubi, enze zonke izinto ezenyanyekayo ezenziwa ngabantu ababi, kambe uzaphila? Akula ngitsho lokukodwa okulungileyo ayekwenza okuzakhunjulwa.+ Uzakufa ngenxa yokuthi wenze isono njalo kathembekanga.+

25 “‘Kodwa lina lizakuthi: “Okwenziwa nguJehova akulunganga.”+ Ngakho ngicela lilalele lina bantu bako-Israyeli. Izenzo zami yizo ezingalunganga yini+ kumbe ngezenu?+

26 “‘Nxa umuntu olungileyo angatshiya ukwenza okuhle enze izinto ezimbi abesesifa, uyabe efele izenzo zakhe ezimbi.

27 “‘Kodwa nxa umuntu owenza okubi angatshiya konke okubi akwenzayo abeseqalisa ukwenza okufaneleyo lokulungileyo, uyabe eyisindisile impilo yakhe.*+ 28 Nxa angananzelela ukuthi ubesenza okubi abesetshiya konke okubi abekwenza, uzaqhubeka ephila, kasoze afe.

29 “‘Kodwa abako-Israyeli bazakuthi: “Okwenziwa nguJehova akulunganga.” Bantu bako-Israyeli, izenzo zami yizo ezingalunganga yini+ kumbe ngezenu?’

30 “‘Ngakho bantu bako-Israyeli, ngizakwahlulela ngamunye wenu ngezenzo zakhe,’+ kutsho iNkosi Enkulu uJehova. ‘Phendukani litshiye zonke izono zenu ukuze zingabi yisikhubekiso esenza libe lecala. 31 Tshiyani zonke izono zenu,+ litshintshe inhliziyo zenu lendlela elicabanga ngayo.+ Kanti kungani kumele life+ bantu bako-Israyeli?’

32 “‘Angithokozi ngokufa kwaloba ngubani,’+ kutsho iNkosi Enkulu uJehova. ‘Yikho phendukani liphile.’”+