UHezekheli

3 Wathi kimi: “Ndodana yomuntu, dlana lokhu okuphambi kwakho. Dlana incwadimgoqwa le ubusuhamba uyekhuluma labantu bako-Israyeli.”+

2 Ngavula umlomo wami wasenginika incwadimgoqwa ukuthi ngiyidle. 3 Wasesithi kimi: “Ndodana yomuntu, dlana incwadimgoqwa le engikunike yona ugcwalise isisu sakho ngayo.” Yikho ngaqalisa ukuyidla futhi emlonyeni wami yayimnandi njengoluju.+

4 Waphinda wathi kimi: “Ndodana yomuntu, hamba ebantwini bako-Israyeli ufike ubatshele amazwi ami. 5 Angikuthumi ebantwini abakhuluma ulimi olunzima kumbe ongalwaziyo kodwa ngikuthuma ebantwini bako-Israyeli. 6 Angikuthumi ezizweni ezikhuluma ulimi olunzima kumbe ongalwaziyo ongasoze uluzwisise. Aluba bengikuthuma ebantwini bakulezozizwe, bona bebezakulalela.+ 7 Kodwa abantu bako-Israyeli abasoze bakulalele ngoba vele abafuni ukungilalela.+ Bonke balenkani futhi bayiziqholo.+ 8 Lawe sengikwenze waba yisiqholo njengabo,* ngenza lesiphaqa sakho saqina njengeziphaqa zabo.+ 9 Isiphaqa sakho sengisenze saqina njengedayimana, saqina ukwedlula ilitshe elilukhuni.+ Ungabesabi futhi ungethuswa bubuso babo+ ngoba bangabahlamuki.”

10 Waqhubeka wathi kimi: “Ndodana yomuntu, ngicela ulalele njalo uwagcine enhliziyweni yakho wonke amazwi engizakutshela wona. 11 Hamba ebantwini bakini abathunjiweyo+ ufike uthi kubo: ‘Nanku okutshiwo yiNkosi Enkulu uJehova.’ Akulandaba ukuthi bazalalela kumbe abasoze balalele.”+

12 Umoya wasungithwala,+ ngezwa umsindo omkhulu ngemva kwami lelizwi lisithi: “Inkazimulo kaJehova kayidunyiswe endaweni yakhe.” 13 Kwakulomsindo wempiko zezidalwa eziphilayo zitshayanisa impiko zazo,+ lomsindo wamaviri ayeseceleni kwazo+ kanye lomdumo omkhulu. 14 Umoya wasungithwala wahamba lami. Ngahamba ngikhathazekile futhi ngifuthelene, njalo umoya kaJehova wawusebenza ngamandla kimi. 15 Ngakho ngaya eTheli-abhibhi ebantwini abathunjiweyo ababehlala duze komfula uKhebhari,+ ngafika ngahlala labo okwamalanga ayisikhombisa kodwa ngangilesithuli.+

16 Insuku eziyisikhombisa zathi ziphela ilizwi likaJehova lafika kimi lathi:

17 “Ndodana yomuntu, sengikubeke ukuthi ube ngumlindi wabantu bako-Israyeli.+ Nxa ungezwa amazwi aphuma emlonyeni wami kumele ubaxwayise ubatshele engikukhulumileyo.+ 18 Nxa ngingathi emuntwini owenza okubi, ‘Uzakufa sibili,’ kodwa wena ubusuyekela ukumxwayisa lokumtshela ukuthi atshiye ukwenza okubi ukuze aqhubeke ephila,+ yena uzafela isono sakhe ngoba ubesenza okubi+ kodwa igazi lakhe ngizalithonisa kuwe.*+ 19 Nxa wena ungamxwayisa umuntu owenza okubi kodwa angatshiyi okubi akwenzayo lendlela yakhe embi, yena uzakufa ngenxa yesono sakhe kodwa wena uyabe uyisindisile impilo yakho.+ 20 Nxa umuntu olungileyo angatshiya ukwenza okuhle abesesenza okubi ngizabeka isikhubekiso phambi kwakhe futhi uzakufa.+ Nxa wena ungamxwayisanga, yena uzakufa ngenxa yezono zakhe njalo konke okulungileyo ayekwenza akusoze kukhunjulwe kodwa igazi lakhe ngizalithonisa kuwe.*+ 21 Kodwa nxa ungamxwayisa umuntu olungileyo ukuthi angoni, abesekulalela angenzi isono, uzaqhubeka ephila ngoba ukulalele umxwayisa+ futhi lawe uyabe uyisindisile impilo yakho.”

22 Isandla sikaJehova saba phezu kwami ngikhonapho wasesithi kimi: “Suka uye emagcekeni ngizakhuluma lawe khonale.” 23 Yikho ngasuka ngaya emagcekeni. Inkazimulo kaJehova yayikhonapho+ njalo yayifanana lenkazimulo engayibona duze komfula uKhebhari.+ Ngazilahla phansi ngathi mbo ngobuso emhlabathini. 24 Umoya wafika kimi wangisukumisa ngama.+ UNkulunkulu wasekhuluma lami wathi:

“Hamba uyezivalela endlini yakho. 25 Wena ndodana yomuntu bazakubopha ngemichilo ukuze ungahambi phakathi kwabo. 26 Ngizakwenza ulimi lwakho lunamathele elwangeni, ube yisimungulu ukuze ungabakhuzi ngoba bangabahlamuki. 27 Kodwa nxa sengikhuluma lawe ngizavula umlomo wakho njalo kumele uthi kubo:+ ‘Nanku okutshiwo yiNkosi Enkulu uJehova.’ Ofuna ukulalela uzalalela+ kodwa ongafuniyo kasoze alalele ngoba vele bangabahlamuki.+