Eyesibili EyamaKhosi
12 Ngomnyaka wesikhombisa wokubusa kukaJehu,+ uJehowashi+ waba yinkosi futhi wabusa eJerusalema okweminyaka engu-40. Unina kwakunguZibhiya weBheri-shebha.+ 2 UJehowashi waqhubeka esenza okulungileyo phambi kukaJehova ngesikhathi uJehoyada umphristi engumeluleki wakhe. 3 Kodwa izindawo eziphakemeyo*+ azizange zidilizwe futhi abantu babelokhu betshisa imihlatshelo njalo benikela ezindaweni eziphakemeyo.
4 UJehowashi wakhuluma labaphristi wathi: “Thathani yonke imali yeminikelo engcwele+ elethwa endlini kaJehova, imali okumele ikhitshwe ngumuntu ngamunye+ lemali ekhitshwa ngabantu abenze izifungo, layo yonke imali abantu abayinikela endlini kaJehova ngokuzithandela.+ 5 Abaphristi yibo abazayithatha kulabo abaletha imali* bayisebenzise ukulungisa indlu kaNkulunkulu loba ngaphi lapho okufanele ilungiswe khona.”*+
6 Kodwa kwaze kwafika umnyaka wesi-23 wokubusa kweNkosi uJehowashi abaphristi belokhu bengakayilungisi indlu kaNkulunkulu.+ 7 Ngakho iNkosi uJehowashi yabiza uJehoyada+ labanye abaphristi yathi kubo: “Kungani lingakayilungisi indlu kaNkulunkulu? Lingasathathi imali ebantwini nxa lingasoze liyisebenzise ukulungisa indlu.”+ 8 Abaphristi bavuma ukuthi abasoze baphinde bathathe imali ebantwini lokuthi ayisibo abazakhangela umsebenzi wokulungisa indlu kaNkulunkulu.
9 UJehoyada umphristi wathatha ibhokisi+ wabhoboza isikhala esivalweni salo, waselifaka eceleni kwe-alithare. Nxa umuntu engena endlini kaJehova, ibhokisi lelo lalisesandleni sokudla. Lapho yikho abaphristi ababengabalindi beminyango ababefaka khona yonke imali eyayilethwa endlini kaJehova.+ 10 Unobhala wenkosi lomphristi omkhulu babesithi bangabona ukuthi imali elethwe endlini kaJehova isinengi kakhulu ebhokisini, babebuya bazoyithatha* bayibale.+ 11 Babesithi bangayibala bayinike labo ababekhangela umsebenzi owawusenziwa endlini kaJehova. Ababekhangela umsebenzi bona babeyisebenzisa ukubhadala labo ababesenza umsebenzi wokubaza lowokwakha endlini kaJehova,+ 12 lalabo ababesakha ngamatshe lababebaza amatshe. Bathenga amapulanka lamatshe abaziweyo ukuze kulungiswe indlu kaJehova futhi enye imali bayisebenzisa ukubhadala lezinye izindleko ezazisiba khona kulungiswa indlu.
13 Kodwa imali eyayilethwa endlini kaJehova ayizange isetshenziswe ukuthenga izinto zokwenza inditshi zesiliva, lezigelo zokuquma intambo zezibane, lemiganu, lamacilongo+ loba ezinye izitsha zegolide kumbe ezesiliva ezazisetshenziswa endlini kaJehova.+ 14 Imali leyo yayiphiwa labo ababesenza umsebenzi kuphela futhi bayisebenzisa ukulungisa indlu kaJehova. 15 Labo ababephiwa imali ukuthi babhadale izisebenzi babengabuzwa ukuthi imali bayisebenzise njani ngoba babethembekile.+ 16 Kodwa imali yeminikelo yecala+ leyeminikelo yesono yayingalethwa endlini kaJehova, yona yayingeyabaphristi.+
17 Kungalesosikhathi lapho uHazayeli+ inkosi yeSiriya asuka khona wayahlasela iGathi+ wayithumba. Ngemva kwalokho wacabanga ukuthi ayehlasela leJerusalema.+ 18 Ngakho uJehowashi inkosi yakoJuda wathatha yonke iminikelo engcwele eyayinikelwe ngokhokho bakhe uJehoshafathi loJehoramu lo-Ahaziya, amakhosi akoJuda, wayithumela kuHazayeli inkosi yeSiriya.+ Wathumela leminikelo yakhe engcwele, lalo lonke igolide elalisezindlini zokugcinela inotho yendlu kaJehova lasezindlini zokugcinela inotho yendlu yenkosi.* Yikho-ke uHazayeli wayekela ukuhlasela iJerusalema.
19 Yonke imbali kaJehowashi lakho konke akwenzayo kubhaliwe ebhukwini lembali yamakhosi akoJuda. 20 Izinceku zakhe zabumba icebo lokumhlamukela,+ zambulala endlini yoqaqa,*+ endleleni eya eSila. 21 Wabulawa yizinceku zakhe uJozakhari indodana kaShimeyathi loJehozabhadi indodana kaShomeri.+ Bamngcwaba emangcwabeni abokhokho bakhe edolobheni likaDavida, indodana yakhe u-Amaziya yasisiba yinkosi esikhundleni sakhe.+