Eyesibili EyamaKhosi

8 U-Elisha wakhuluma lomama womntwana ayemvusile+ wathi: “Suka lapha lemuli yakho liye kwelinye ilizwe lihlale loba ngaphi lapho elingahlala khona, ngoba uJehova uthi kuzakuba lendlala+ elizweni leli okweminyaka eyisikhombisa.” 2 Ngakho owesifazana lo wenza lokho umuntu kaNkulunkulu weqiniso ayemtshele khona, wasuka lemuli yakhe wayahlala elizweni lamaFilisti+ okweminyaka eyisikhombisa.

3 Iminyaka eyisikhombisa yathi iphela owesifazana lo wasuka elizweni lamaFilisti wabuyela kibo. Waya enkosini esiyacela ukuthi abuyiselwe indlu yakhe lensimu yakhe. 4 Ngalesosikhathi inkosi yayixoxa loGehazi inceku yomuntu kaNkulunkulu weqiniso. Inkosi yathi: “Ngicela ungilandisele zonke izimanga ezenziwe ngu-Elisha.”+ 5 UGehazi wathi esalandisela inkosi ukuthi u-Elisha wavusa umuntu owayefile,+ unina womntwana owayevusiwe wafika enkosini ezocela ukuthi abuyiselwe indlu yakhe lensimu yakhe.+ UGehazi wahle wathi: “Nkosi yami, nangu owesifazana wakhona futhi le yiyo indodana yakhe eyavuswa ngu-Elisha.” 6 Yikho inkosi yabuza owesifazana ngendaba le, yena waseyilandisela okwakwenzakele. Inkosi yasibiza isiphathamandla sesigodlweni yathi kuso: “Buyisela owesifazana lo yonke impahla yakhe lawo wonke amabele avunwa emasimini akhe kusukela ngelanga asuka ngalo kuze kube lamuhla.”

7 U-Elisha wafika eDamaseko+ ngesikhathi uBheni-hadadi+ inkosi yeSiriya egula. UBheni-hadadi watshelwa ukuthi kwakufike umuntu kaNkulunkulu weqiniso.+ 8 Ngakho inkosi yathi kuHazayeli:+ “Thatha isipho uye kumuntu kaNkulunkulu weqiniso umcele ukuthi akubuzele kuJehova ukuthi ngizasila yini emkhuhlaneni lo.”+ 9 UHazayeli wasesuka waya ku-Elisha elezipho. Wayethwele zonke izinto ezinhle zeDamaseko ezazingathwalwa ngamakamela angu-40. Wafika wama phambi kwakhe wathi kuye: “Indodana yakho uBheni-hadadi inkosi yeSiriya ithe ngizobuza ukuthi izasila yini emkhuhlaneni wayo.” 10 U-Elisha wamphendula wathi: “Hamba uyemtshela ukuthi uzasila. Kodwa uJehova ungitshengisile ukuthi uzakufa loba sekutheni.”+ 11 Umuntu kaNkulunkulu weqiniso waqhubeka ekhangele uHazayeli waze waba lenhloni. Umuntu kaNkulunkulu waqalisa ukukhala, 12 uHazayeli wathi: “Inkosi yami ikhalelani?” U-Elisha waphendula wathi: “Ngikhaliswa yikuthi ngiyabazi ubunzima ozabehlisela abako-Israyeli.+ Uzatshisa amadolobho abo avikelwe ngemiduli, ubulale amabutho abo athenjiweyo, utaklazele phansi abantwababo futhi udabule lezisu zabesifazana abazithweleyo.”+ 13 UHazayeli wasesithi: “Kambe inceku yakho ingakwenza njani lokho njengoba izifananela lenja engelancedo?” Kodwa u-Elisha wathi: “UJehova ungitshengise ukuthi wena uzakuba yinkosi yeSiriya.”+

14 Ngemva kwalokho uHazayeli wasuka ku-Elisha wabuyela enkosini yakhe. Inkosi yathi kuye: “U-Elisha utheni kuwe?” Yena wasesithi: “Uthe uzasila loba sekutheni.”+ 15 Kodwa ngelanga elilandelayo uHazayeli wathatha ingubo wayigxamuza emanzini, wavala inkosi ubuso ngayo yaze yafa.+ UHazayeli wasesiba yinkosi.+

16 Ngomnyaka wesihlanu wokubusa kukaJehoramu+ indodana ka-Ahabi inkosi yako-Israyeli, ngesikhathi uJehoshafathi ebusa koJuda, uJehoramu indodana yeNkosi uJehoshafathi waba yinkosi koJuda.+ 17 Wayeleminyaka engu-32 ngesikhathi esiba yinkosi njalo wabusa eJerusalema okweminyaka engu-8. 18 Wenza lokho okwakusenziwa ngamakhosi ako-Israyeli,+ walandela izenzo zabendlu ka-Ahabi+ ngoba wayethethe indodakazi ka-Ahabi.+ Waqhubeka esenza okubi phambi kukaJehova.+ 19 Lanxa kunjalo uJehova wayengafuni ukutshabalalisa abakoJuda ngenxa yenceku yakhe uDavida+ ayeyithembise ukuthi kuzahlala kulomuntu wosendo lwayo obusayo+ eJerusalema.*

20 Ngensuku zikaJehoramu abako-Edomi bahlamukela abakoJuda+ babeka eyabo inkosi.+ 21 Ngakho wasuka lamabutho akhe lazo zonke izinqola zakhe zempi waya eZayiri. Abako-Edomi bamhanqa yena lezinduna zamabutho akhe ahamba ngezinqola, kodwa wavuka ebusuku wabahlasela wabanqoba. Amabutho ako-Edomi abaleka aya ematendeni awo. 22 Abako-Edomi bahlamukela abakoJuda kusukela ngalesosikhathi kuze kube lamuhla. ILibhina+ layo yahlamuka ngalesosikhathi.

23 Yonke imbali kaJehoramu lakho konke akwenzayo kubhaliwe ebhukwini lembali yamakhosi akoJuda. 24 UJehoramu wafa wangcwatshwa emangcwabeni abokhokho bakhe edolobheni likaDavida.+ Indodana yakhe u-Ahaziya+ yaba yinkosi esikhundleni sakhe.

25 Ngomnyaka wesi-12 wokubusa kukaJehoramu indodana ka-Ahabi inkosi yako-Israyeli, u-Ahaziya indodana kaJehoramu inkosi yakoJuda waba yinkosi.+ 26 U-Ahaziya wayeleminyaka engu-22 ngesikhathi esiba yinkosi futhi wabusa eJerusalema okomnyaka owodwa. Unina kwakungu-Athaliya,+ umzukulu* ka-Omri+ inkosi yako-Israyeli. 27 Walandela okwakusenziwa ngabendlu ka-Ahabi,+ waqhubeka esenza okubi phambi kukaJehova njengabendlu ka-Ahabi ngoba uyise wayethethe emulini ka-Ahabi.+ 28 Wahamba loJehoramu indodana ka-Ahabi besiyakulwa loHazayeli inkosi yeSiriya eRamothi-giliyadi.+ AmaSiriya amlimaza uJehoramu.+ 29 Ngakho wabuyela eJeziriyeli+ ukuze amanxeba akhe aphole njengoba amaSiriya ayemlimazile eRama ngesikhathi esilwa loHazayeli inkosi yeSiriya.+ U-Ahaziya indodana kaJehoramu inkosi yakoJuda waya eJeziriyeli esiyabona uJehoramu indodana ka-Ahabi ngoba wayelimele.*