Eyokuqala EyemiLando
17 UDavida wathi esehlala endlini yakhe* wathi kuNathani+ umphrofethi: “Mina ngihlala endlini eyakhiwe ngemisedari+ kodwa ibhokisi lesivumelwano sikaJehova lihlala etendeni.”+ 2 UNathani waphendula uDavida wathi: “Yenza loba yini esenhliziyweni yakho ngoba uNkulunkulu weqiniso ulawe.”
3 Ngalobobusuku ilizwi likaNkulunkulu lafika kuNathani lathi: 4 “Hamba uyetshela inceku yami uDavida uthi, ‘Nanku okutshiwo nguJehova: “Ayisuwe ozangakhela indlu engizahlala kuyo.+ 5 Phela mina angikaze ngihlale endlini kusukela ngakhipha abantu bako-Israyeli eGibhithe kuze kube lamuhla. Bengilokhu ngisuka kwelinye itende ngiye kwelinye, ngisuke kwelinye ithabanikeli ngiye kwelinye.*+ 6 Isikhathi sonke leso ngihamba labako-Israyeli ngake ngababuza yini ngathi, ‘Kungani lingangakhelanga indlu yemisedari?’ Ngake ngababuza umbuzo lo yini abahluleli bako-Israyeli engababeka ukuthi beluse abantu bami?”’
7 “Ngakho tshela inceku yami uDavida uthi, ‘Nanku okutshiwo nguJehova wamabutho: “Ngakuthatha emadlelweni uselusa izimvu ukuze ube ngumkhokheli wabantu bami bako-Israyeli.+ 8 Ngizakuba lawe loba ngaphi lapho oya khona+ futhi ngizaziqeda zonke izitha zakho phambi kwakho.+ Ngizakwenza ibizo lakho laziwe njengamabizo abantu abadumileyo emhlabeni.+ 9 Abantu bami bako-Israyeli ngizabakhethela indawo ngibahlalise kuyo. Bazahlala lapho njalo akulamuntu ozabahlupha. Abantu ababi abasoze baphinde babathwalise nzima njengalokho ababekwenza kudala,+ 10 kusukela ngelanga engabeka ngalo abahluleli ukuthi bakhokhele abantu bami bako-Israyeli.+ Ngizazinqoba zonke izitha zakho.+ Phezu kwalokho ngithi kuwe, ‘UJehova uzakwakhela indlu.’*
11 “‘“Nxa insuku zakho sezifike ekucineni, usufile,* ngizabeka omunye wabantwabakho,* indodana yakho,+ ukuthi abe yinkosi njalo ngizakwenza umbuso wakhe uqine.+ 12 Nguye ozangakhela indlu+ futhi ngizasiqinisa isihlalo sakhe sobukhosi kuze kube nini lanini.+ 13 Ngizakuba nguyise yena abe yindodana yami.+ Uthando lwami oluqotho angisoze ngilususe kuye+ njengalokho engakwenza kulowo owayebusa ngaphambi kwakho.+ 14 Ngizambeka endlini yami ngimhlalise esihlalweni sami sobukhosi kuze kube nini lanini+ futhi umbuso wakhe uzahlala kuze kube phakade.”’”+
15 UNathani watshela uDavida wonke amazwi la kanye lakho konke ayekubone embonweni.
16 INkosi uDavida yathi isizwa lokho yangena yahlala phambi kukaJehova yathi: “Awu Jehova Nkulunkulu, kambe mina ngingubani futhi labendlu yami bayini ukuthi usungaze ungenzele konke lokhu?+ 17 Lanxa ungenzele izinto ezinengi kangaka Nkulunkulu, usuphinde wakhuluma ngokuthi indlu yenceku yakho izahlala isikhathi eside,+ njalo ungibona ngingumuntu ofanele ukuphakanyiswa kakhulu* awu Jehova Nkulunkulu. 18 Phela wena uyazi ngcono inceku yakho uDavida.+ Manje kuyini okunye engingakutsho ngodumo lolu onginike lona? 19 Awu Jehova, wenze izinto zonke lezi ezinkulu njalo waveza ubukhulu bakho ngenxa yenceku yakho, langenxa yokuthi lokhu kuvumelana lenhliziyo* yakho.+ 20 Kakho onjengawe Jehova+ futhi ngaphandle kwakho akula omunye uNkulunkulu.+ Konke esikuzwe ngendlebe zethu kuyakufakazela lokhu. 21 Kambe yisiphi esinye isizwe emhlabeni esinjengabantu bakho bako-Israyeli?+ Wena Nkulunkulu weqiniso wahamba wayabakhulula baba ngabantu bakho.+ Wenza ibizo lakho laziwa ngokwenza izinto ezinkulu lezimangalisayo.+ Waxotsha izizwe phambi kwabantu bakho+ owabakhulula eGibhithe. 22 Abantu bako-Israyeli wabenza baba ngabantu bakho kuze kube nini lanini,+ njalo wena Jehova waba nguNkulunkulu wabo.+ 23 Khathesi-ke Jehova kwangathi lokho okuthembise inceku yakho labendlu yayo kungagcwaliseka kuze kube nini lanini, njalo kwangathi ungakwenza lokho okuthembisileyo.+ 24 Ibizo lakho kaliphakanyiswe+ futhi lihlale kuze kube phakade ukuze abantu bathi, ‘UJehova wamabutho uNkulunkulu ka-Israyeli, unguNkulunkulu ka-Israyeli.’ Kwangathi indlu yenceku yakho uDavida ingahlala kuze kube nini lanini.+ 25 Phela wena Nkulunkulu wami, uyitshelile inceku yakho ukuthi uhlose ukuyakhela indlu.* Lokhu yikho okwenza inceku yakho ikhululeke ukuthandaza kuwe ngalindlela. 26 Awu Jehova, wena unguNkulunkulu weqiniso njalo uthembise zonke izinto lezi ezinhle mayelana lenceku yakho. 27 Kwangathi kungakuthokozisa ukubusisa indlu yenceku yakho, iqhubeke iphambi kwakho kuze kube phakade ngoba wena Jehova uyibusisile njalo izahlala ibusisekile kuze kube nini lanini.”