AmaNani
19 UJehova waphinda wakhuluma loMosi lo-Aroni wathi: 2 “Nanku umthetho ovela kuJehova, ‘Tshela abako-Israyeli ukuthi bakuthathele inkomokazi ebomvu engelasici+ futhi engakaze ifakwe ejogweni. 3 Kumele uyinike u-Eliyazari umphristi abeseyiqhuba aye layo ngaphandle kwezihonqo futhi izahlatshwa phambi kwakhe. 4 Ngemva kwalokho u-Eliyazari umphristi uzathatha elinye igazi layo agxamuze umunwe wakhe kulo abeselifafaza kasikhombisa eliqondise phambi kwetende lokuhlangana.+ 5 Inkomokazi leyo izatshiswa phambi kwakhe. Kuzatshiswa konke, isikhumba sayo, lenyama yayo, legazi layo kanye lomswane wayo.+ 6 Umphristi uzathatha isigodo somsedari lehisophi*+ lewulu ebomvu akuphosele emlilweni okutshiswa ngawo inkomokazi leyo. 7 Ngemva kwalokho umphristi uzawatsha izigqoko zakhe njalo ageze ngamanzi, lapho-ke usengabuyela ezihonqweni kodwa uzaqhubeka engongcolileyo kuze kuhlwe.
8 “‘Lowo otshise inkomokazi leyo uzawatsha izigqoko zakhe ageze ngamanzi njalo uzaqhubeka engongcolileyo kuze kuhlwe.
9 “‘Indoda ehlanzekileyo izabutha umlotha wenkomo+ leyo iyewuthela endaweni ehlanzekileyo ngaphandle kwezihonqo njalo abantu bako-Israyeli kumele bawugcine ukuze bawuhlanganise lamanzi okuhlambulula.+ Lo ngumnikelo wesono. 10 Leyo ndoda ezabutha umlotha wenkomokazi kumele iwatshe izigqoko zayo njalo izakuba ngengcolileyo kuze kuhlwe.
“‘Lo kuzakuba ngumlayo ozahlala ukhona ebantwini bako-Israyeli lasemuntwini wesinye isizwe ohlala phakathi kwabo.+ 11 Loba ngubani ozathinta isidumbu somuntu uzakuba ngongcolileyo okwamalanga ayisikhombisa.+ 12 Umuntu lowo kumele azihlambulule ngamanzi ngelanga lesithathu njalo uzakuba ngohlanzekileyo ngelanga lesikhombisa. Kodwa nxa angayekela ukuzihlambulula ngelanga lesithathu kasoze abe ngohlanzekileyo ngelanga lesikhombisa. 13 Wonke umuntu ozathinta isidumbu somuntu ofileyo abeseyekela ukuzihlambulula uyabe engcolisa ithabanikeli likaJehova+ futhi lowomuntu kumele abulawe.+ Uzaqhubeka engcolile ngenxa yokuthi kazange afafazwe ngamanzi okuhlambulula.+ Ukungcola kwakhe kuzaqhubeka kuphezu kwakhe.
14 “‘Lo ngumthetho ozasebenza nxa umuntu efele etendeni: Loba ngubani ozangena kulo futhi wonke umuntu ozakuba ephakathi kwalo uzakuba ngongcolileyo okwamalanga ayisikhombisa. 15 Loba yisiphi isitsha esivulekileyo esiyabe singabotshelwanga isivalo singcolile.+ 16 Loba ngubani ozakuthi esegangeni athinte umuntu obulewe ngenkemba, loba isidumbu kumbe ithambo lomuntu ofileyo loba ingcwaba uzakuba ngongcolileyo okwamalanga ayisikhombisa.+ 17 Lowo ongcolileyo kumele bamthathele umlotha womnikelo wesono otshisiweyo bawufake esitsheni bathele amanzi ahlanzekileyo kuwo. 18 Ngemva kwalokho umuntu ohlanzekileyo+ uzathatha ihisopi*+ ayigxamuze emanzini lawo abesewafafaza etendeni, lakuzo zonke izitsha, lasebantwini akade bekhonapho, lakulowo othinte ithambo lomuntu ofileyo, loba umuntu obuleweyo kumbe isidumbu loba ingcwaba. 19 Umuntu ohlanzekileyo uzafafaza amanzi lawo emuntwini ongcolileyo ngelanga lesithathu langelanga lesikhombisa njalo uzamhlambulula esonweni sakhe ngelanga lesikhombisa.+ Ngemva kwalokho lowomuntu kumele awatshe izigqoko zakhe abesegeza ngamanzi futhi uzakuba ngohlanzekileyo kusihlwa.
20 “‘Kodwa nxa umuntu angayekela ukuzihlambulula yena engcolile kumele abulawe asuswe ebandleni+ ngoba uyabe engcolise indawo kaJehova engcwele. Ungcolile ngoba kazange afafazwe ngamanzi okuhlambulula.
21 “‘Lo kuzakuba ngumlayo ozahlala ukhona kubo: Lowo ofafaza amanzi okuhlambulula+ kumele awatshe izigqoko zakhe njalo lowo othinta amanzi okuhlambulula kumele abe ngongcolileyo kuze kuhlwe. 22 Yonke into ezathintwa ngumuntu ongcolileyo izangcola njalo umuntu ozathinta leyonto uzakuba ngongcolileyo kuze kuhlwe.’”+