Eyokuqala KwabaseThesalonika

1 Mina Phawuli loSilivanu*+ loThimothi,+ kini lina elisebandleni leThesalonika elimanyene loNkulunkulu uBaba kanye leNkosi uJesu Khristu:

Umusa omkhulu lokuthula akube kini.

2 Sihlala simbonga uNkulunkulu nxa siliqamba lonke emithandazweni yethu+ 3 ngoba sihlala siwukhumbula phambi kukaNkulunkulu uBaba wethu umsebenzi elawenzayo ngenxa yokholo. Siyakukhumbula lokusebenza kwenu ngenxa yothando, kanye lokuqinisela kwenu ngenxa yethemba+ elilalo eNkosini yethu uJesu Khristu. 4 Bafowethu abathandwa nguNkulunkulu, siyakwazi ukuthi yena walikhetha 5 ngoba izindaba ezinhle esizitshumayelayo azifikanga kini ngelizwi kuphela kodwa langamandla kanye lomoya ongcwele. Labona lokuthi sasingathandabuzi ukuthi esasilitshela khona kuliqiniso njengoba likwazi ukuthi saba ngabantu abanjani phakathi kwenu, sisenzela ukulinceda. 6 Lina lasilingisela,+ lalingisela leNkosi+ njengoba lemukela ilizwi ngentokozo evela emoyeni ongcwele lanxa lahlupheka kakhulu.+ 7 Lokhu kwenza laba yisibonelo kubo bonke abakholwayo abaseMakhedoniya lase-Akhaya.

8 Iqiniso elikhona yikuthi ilizwi likaJehova* elivela kini alizwakalanga eMakhedoniya lase-Akhaya kuphela, kodwa lasezindaweni zonke abantu sebezwile ngokholo lwenu kuNkulunkulu+ okokuthi akusadingeki ukuthi thina sikhulume. 9 Bona ngokwabo baqhubeka besitshela ngokubonana kwethu lani okokuqala, langendlela elaphendukela ngayo kuNkulunkulu latshiya izithombe zenu+ ukuze libe yizigqili zikaNkulunkulu ophilayo loweqiniso, 10 lilindele iNdodana yakhe evela ezulwini+ ayivusa kwabafileyo, uJesu osihlenga elakeni oluzayo.+