UHezekheli
5 “Kodwa wena ndodana yomuntu, thatha inkemba ebukhali uphuce ngayo ikhanda. Phuca ikhanda lakho lendevu ubusuthatha isikali ulinganise inwele zakho, uzehlukanise zibe zingxenye ezintathu. 2 Nxa insuku zakho zokuvimbezela idolobho seziphelile, kumele utshise ingxenye yokuqala phakathi kwedolobho.+ Ngemva kwalokho kumele uthathe ingxenye yesibili uyiqume ngenkemba kuwo wonke amacele edolobho,+ besekusithi ingxenye yesithathu uyihaze emoyeni. Mina ngizahwatsha inkemba yami ngibaxotshanise.+
3 “Kumele uthathe inwele ezilutshwana nje uzigoqele esembathweni sakho, 4 ubusuthatha ezinye uziphosele emlilweni zitshe ziphele du. Umlilo lo uzasabalala kubo bonke abantu bako-Israyeli.+
5 “Nanku okutshiwo yiNkosi Enkulu uJehova: ‘Le yiJerusalema engiyifake phakathi kwezizwe, yahanqwa ngamazwe emaceleni wonke. 6 Abantu bedolobho leli bayitshiyile imithetho yami yokwahlulela lemilayo yami, benza izinto ezimbi kakhulu ukwedlula izizwe abakhelane lazo.+ Bayifulathele imithetho yami bayekela ukulandela imilayo yami.’
7 “Ngakho nanku okutshiwo yiNkosi Enkulu uJehova: ‘Lina lihlamuke kakhulu ukwedlula izizwe elakhelane lazo njalo alizange liyilandele imilayo yami. Lephule imithetho yami yokwahlulela, lalandela imithetho yezizwe ezingomakhelwane benu,+ 8 yikho nanku okutshiwo yiNkosi Enkulu uJehova: “Ngizakulwa lawe wena dolobho,+ mina ngokwami ngizakwahlulela phambi kwezizwe zonke.+ 9 Ngizakwenza kuwe into engingakaze ngiyenze njalo engingasoze ngiphinde ngiyenze ngoba ziyenyanyeka izinto ozenzayo.+
10 “‘“Obaba bazakudla amadodana abo,+ lamadodana adle oyise. Ngizakwahlulela besengichithachitha abaseleyo bakho basabalale kuyo yonke indawo.”’+
11 “‘Ngakho ngifunga ngami uqobo,’ kutsho iNkosi Enkulu uJehova uNkulunkulu ophilayo, ‘ngenxa yokuthi indawo yami engcwele liyingcolise ngezithombe zenu ezenyanyekayo langezenzo zenu ezimbi kakhulu,+ lami ngizalilahla. Angisoze ngilizwele* futhi angisoze ngibe lesihawu kini.+ 12 Ingxenye eyodwa izabulawa ngumkhuhlane otshabalalisayo kumbe iqedwe yindlala phakathi kwedolobho. Eyinye ingxenye izabulawa ngenkemba phandle kwedolobho,+ besekusithi ingxenye yesithathu ngiyichithe isabalale yonke indawo, ngiphinde ngiyixotshanise ngiphethe inkemba.+ 13 Lapho-ke ulaka lwami luzaphela futhi angisoze ngiqhubeke ngibathukuthelele, ngizabe sengisuthisekile ngengikwenzileyo.+ Nxa sengiqedile ukuthululela ulaka lwami phezu kwabo, bazakwazi ukuthi mina Jehova, ngakhuluma labo ngoba ngifuna bazinikele kimi kuphela.+
14 “‘Ngizakwenza ube lunxiwa njalo ube yinhlekisa ezizweni owakhelane lazo lakubo bonke abantu abadlulayo.+ 15 Nxa sengikwahlulele ngathululela ulaka lwami phezu kwakho njalo ngakujezisa kabuhlungu, izizwe ezakhelane lawe zizakuchothoza zikuhleke,+ futhi okwenzakale kuwe kuzakuba yisixwayiso kuzo njalo kuzazethusa. Mina Jehova sengikhulumile.
16 “‘Ngizakwehlisela phezu kwakho indlala ezaba buhlungu angathi yimitshoko ukuze ngikutshabalalise. Imitshoko engizayithumela izakuqeda du.+ Ngizakwenza indlala ibenkulu ngokuqeda konke ukudla kwakho.+ 17 Ngizathumela kuwe indlala enkulu lenyamazana zeganga eziyingozi+ ezizabulala abantwabakho. Kuzamemetheka isifo esibi njalo abantu abanengi bazabulawa futhi mina ngizakuhlasela ngenkemba.+ Mina Jehova sengikhulumile.’”