UHezekheli
24 Ilizwi likaJehova laphinda lafika kimi mhlaka 10 ngenyanga yetshumi ngomnyaka wesi-9 lathi: 2 “Ndodana yomuntu, bhala ilanga leli, libhale phansi ilanga leli ngoba inkosi yaseBhabhiloni iqale lamuhla ukuhlasela iJerusalema.+ 3 Khuluma umzekeliso lo ngabantu bako-Israyeli abahlamukayo uthi:
“‘Nanku okutshiwo yiNkosi Enkulu uJehova:
“Faka imbiza yokupheka* eziko, ifake emlilweni uthele amanzi phakathi kwayo.+
4 Faka amaqatha enyama phakathi,+ ufake wonke amaqatha amahle,
Inyama yomlenze leyomkhono, ugcwalise imbiza ngamakleza amahle.
5 Khetha imvu enone kulazo zonke emhlambini,+ ubusubasela imbiza ngenkuni emaceleni wonke,
Uxhwathise amaqatha lamathambo asembizeni.”’
6 “Nanku okutshiwo yiNkosi Enkulu uJehova:
‘Maye kulo idolobho leli elilamacala okubulala,*+ eliyimbiza elerusi engazange ikhuhlwe!
Khipha iqatha ngalinye eliphakathi kwayo,+ kodwa ungawenzeli inkatho.
7 Phela igazi abalichithayo lilokhu liphakathi kwedolobho+ ngoba balithululela phezu kwedwala.
Abazange balithululele emhlabathini baligqibele.+
8 Igazi abalichithayo ngiliyekele liphezu kwedwala
Ukuze lingagqitshelwa,
Ulaka lwami luze luvuke ngiphindisele kubo.’+
9 “Ngakho nanku okutshiwo yiNkosi Enkulu uJehova:
‘Maye kulo idolobho elilamacala okubulala!*+
Ngizakwenza ibonda lenkuni elikhulu.
10 Zifake zibe zinengi inkuni ubusulumathisa umlilo,
Uxhwathise inyama ize ibe yisiswayi, ubusucenga umsobho uyekele amathambo atshe aqhuqhumbe.
11 Beka imbiza emalahleni ingelalutho ukuze itshise,
Itshise ize ibe bomvu.
Yonke ingcekeza ephakathi kwayo izancibilika+ lerusi yayo iphele.
12 Imbiza le iyasebenzisa futhi ngeke ilunge
Ngoba irusi yayo iyala ukuphuma.+
Yiphosele emlilweni injalo ilerusi!’
13 “‘Wangcoliswa yikuziphatha kwakho okulihlazo.+ Ngazama ukukuhlambulula kodwa kwala ukuthi uhlanzeke ekungcoleni kwakho. Awusoze uhlanzeke kuze kuphele ukukuthukuthelela kwami.+ 14 Mina Jehova sengikhulumile. Konke lokhu kuzakwenzakala. Ngizakwenza engikuhlosileyo ngingathikazi. Angisoze ngizwele muntu kumbe ngizisole.+ Uzakwahlulelwa ngokufanele izenzo zakho lendlela ophatha ngayo abanye,’ kutsho iNkosi Enkulu uJehova.”
15 Ilizwi likaJehova laphinda lafika kimi lathi: 16 “Ndodana yomuntu, ngesikhatshana nje ngizasusa isithandwa sakho.+ Akumelanga ulile kumbe ukhale loba wehlise inyembezi. 17 Kumele ububule uthule njalo ungenzi imikhuba eyenziwa nxa kukhalelwa umuntu ofileyo.+ Bopha iqhiye yakho+ ugqoke lamanyathela akho+ futhi ungawuvali umlomo wakho.*+ Ungasidli isinkwa abantu abakuphathela sona.”+
18 Ngakhuluma labantu ekuseni, umkami wafa ntambama. Yikho ngelanga elilandelayo ekuseni ngenza lokho engangitshelwe ukuthi ngikwenze. 19 Abantu babesithi kimi: “Sitshele phela ukuthi izinto lezi ozenzayo zilani lathi.” 20 Ngabaphendula ngathi: “Ilizwi likaJehova lifike kimi lathi, 21 ‘Tshela abantu bako-Israyeli uthi: “Nanku okutshiwo yiNkosi Enkulu uJehova, ‘Sengizangcolisa indawo yami engcwele+ elizigqaja kakhulu ngayo leliyithandayo, eligugu ezinhliziyweni zenu. Amadodana lamadodakazi enu eliwatshiyileyo azabulawa ngenkemba.+ 22 Lapho-ke lizakwenza lokho uHezekheli akwenzileyo. Alisoze livale imilomo yenu* kumbe lidle isinkwa elisiphathelwa ngabanye.+ 23 Liyabe libophe amaqhiye emakhanda enu futhi ligqoke lamanyathela ezinyaweni zenu. Alisoze lilile loba likhale kodwa lizacaka liphele ngenxa yezono zenu+ futhi lizakhangelana libubule. 24 UHezekheli useyisibonakaliso kini.+ Lokho akwenzileyo yikho elizakwenza. Nxa sekusenzakala lizakwazi ukuthi mina ngiyiNkosi Enkulu uJehova.’”’”
25 “Kodwa wena ndodana yomuntu, ngelanga engizabathathela ngalo inqaba yabo enhle abathokoza ngayo labayithandayo njalo eligugu ezinhliziyweni zabo, ngibathathele lamadodana lamadodakazi abo,+ 26 uzakubikelwa lokho ngulowo oyabe ephunyukile wabaleka.+ 27 Ngalelolanga uzavula umlomo wakho ukhulume lalowo ophunyukileyo njalo awusoze uqhubeke uyisimungulu.+ Uzakuba yisibonakaliso kubo futhi bazakwazi ukuthi mina nginguJehova.”