UJobe
23 UJobe waphendula wathi:
2 “Ngitsho lalamuhla ngizakhonona ngingathuli.+
Sengibubule ngaze ngaphela amandla.
3 Ngabe ngiyakwazi ukuthi uNkulunkulu ungaphi,+
Bengizakuya lapho ahlala khona,+
4 Ngifike ngethule udaba lwami kuye,
Ngikhulume konke okusenhliziyweni yami ngizivikela.
5 Bengizezwa ukuthi uzangiphendula athini,
Ngilalele lokho akutshoyo.
6 Kambe uzangiphikisa ethembe amandla akhe amakhulu?
Ngitsho sibili uzangilalela.+
7 Lapho-ke oqotho ubezalungisa udaba lwakhe loNkulunkulu,
UMahluleli wami ubezangikhulula angaphindi ukungibeka icala.
8 Kodwa nxa ngingaya empumalanga angimtholi,
Ngiphenduke angimboni.
9 Nxa esebenza enyakatho angimboni,
Angaphenduka aye eningizimu lakho angimtholi.
10 Kodwa uyayazi indlela engihambe ngayo.+
Uzathi esengihlolile ngiphume nginjengegolide elicengekileyo.+
11 Ngizilandele eduze izinyathelo zakhe,
Angizange ngiphambuke endleleni yakhe.+
12 Angizange ngiyitshiye imithetho yakhe.
Amazwi akhe aligugu kimi futhi ngenze okwedlula lokho abekukhangelele.+
13 Nxa esezimisele ngubani ongaphikisana laye?+
Lokho afuna ukukwenza uyakwenza.+
14 Uzakwenza konke akuhlosileyo ngami,
Njalo kunengi okunjalo akucabangayo.
15 Yikho ngikhathazekile ngenxa yakhe.
Nxa ngingacabanga ngaye ngiyesaba kakhulu.
16 UNkulunkulu ungiqede amandla,
USomandla ungethusile.
17 Kodwa ubumnyama abungithulisanga,
Ubumnyama lobu obugubuzele ubuso bami.