UHezekheli

20 Mhlaka 10 ngenyanga yesihlanu ngomnyaka wesikhombisa, abanye abadala bako-Israyeli beza kimi bafika bahlala phambi kwami bezobuza kuJehova. 2 Ilizwi likaJehova laselifika kimi lathi: 3 “Ndodana yomuntu, khuluma labadala bako-Israyeli ubatshele uthi, ‘Nanku okutshiwo yiNkosi Enkulu uJehova: “Kambe lingazobuza kimi sibili? ‘Ngifunga ngami uqobo, angisoze ngiliphendule,’+ kutsho iNkosi Enkulu uJehova.”’

4 “Usuzimisele yini ukubahlulela? Ndodana yomuntu, usuzimisele yini ukubahlulela? Batshele izinto ezenyanyekayo ezazisenziwa ngokhokho babo.+ 5 Batshele uthi, ‘Nanku okutshiwo yiNkosi Enkulu uJehova: “Ngelanga engakhetha ngalo abako-Israyeli,+ ngafunga ebantwaneni bakaJakhobe ngabenza bangazi beselizweni leGibhithe.+ Ngafunga kubo ngathi, ‘Mina nginguJehova uNkulunkulu wenu.’ 6 Ngalelolanga ngafunga ukuthi ngizabakhipha elizweni leGibhithe ngibase elizweni engangibakhethele lona, eligeleza uchago loluju.+ Ilizwe leli lalilihle kakhulu kulawo wonke amazwe. 7 Ngathi kubo, ‘Ngamunye wenu kufanele alahlele khatshana izinto ezenyanyekayo azikhonzayo. Lingazingcolisi ngezithombe ezenyanyekayo* zaseGibhithe.+ Mina nginguJehova uNkulunkulu wenu.’+

8 “‘“Kodwa bona bangihlamukela futhi babengafuni ukungilalela. Abazange bazilahle izinto ezenyanyekayo ababezikhonza njalo abazilahlanga lezithombe ezenyanyekayo zaseGibhithe.+ Ngakho ngathembisa ukuthi ngizehlisela intukuthelo yami kubo, ngithululele lonke ulaka lwami phezu kwabo elizweni leGibhithe. 9 Kodwa engakwenzayo ngangikwenzela ibizo lami ukuze lingangcoliswa ezizweni ababehlala phakathi kwazo.+ Phela ngangenze abako-Israyeli bangazi phambi kwezizwe lezo ngesikhathi ngibakhipha eGibhithe.+ 10 Ngabakhipha elizweni leGibhithe ngabakhokhela ngibasa enkangala.+

11 “‘“Ngabanika imilayo yami ngabafundisa lemithetho yami yokwahlulela+ ukuze lowo oyilandelayo athole ukuphila.+ 12 Ngabanika lamasabatha ami+ aba luphawu phakathi kwami labo+ ukuze bazi ukuthi mina Jehova yimi engibenza babe ngcwele.

13 “‘“Kodwa abako-Israyeli bangihlamukela enkangala.+ Abazange bayilandele imilayo yami futhi bayitshiya imithetho yami yokwahlulela eyenza umuntu aphile nxa eyilandela. Bawangcolisa kakhulu amasabatha ami. Yikho ngathembisa ukuthululela ulaka lwami phezu kwabo ukuze ngibatshabalalise enkangala.+ 14 Engakwenzayo ngangikwenzela ibizo lami ukuze lingangcoliswa ezizweni ezabona ngibakhipha eGibhithe.+ 15 Ngafunga kubo enkangala ukuthi angisoze ngibalethe elizweni engangibathembise lona,+ ilizwe eligeleza uchago loluju+ futhi elihle kakhulu kulawo wonke amazwe, 16 ngoba bayitshiya imithetho yami yokwahlulela bayekela ukulandela imilayo yami. Bangcolisa lamasabatha ami ngoba inhliziyo zabo zasezilandela izithombe zabo ezenyanyekayo.+

17 “‘“Kodwa ngabazwela yikho ngingasababulalanga njalo ngingabatshabalalisanga enkangala. 18 Ngakhuluma labantwababo enkangala ngathi,+ ‘Lingenzi lokho obekusenziwa ngoyihlo+ njalo lingalandeli imilayo yabo* loba lizingcolise ngezithombe zabo ezenyanyekayo. 19 Mina nginguJehova uNkulunkulu wenu. Landelani imilayo yami ligcine lemithetho yami yokwahlulela futhi liyilalele,+ 20 lenze amasabatha ami abe ngcwele.+ Azakuba luphawu phakathi kwami lani oluzalikhumbuza ukuthi mina nginguJehova uNkulunkulu wenu.’+

21 “‘“Kodwa abantwababo baqalisa ukungihlamukela.+ Abazange bayilandele imilayo yami njalo abayigcinanga lemithetho yami yokwahlulela eyenza umuntu aphile nxa eyilandela. Amasabatha ami bawangcolisa. Yikho ngathembisa ukuthi ngizehlisela intukuthelo yami kubo, ngithululele ulaka lwami lonke phezu kwabo ngesikhathi besenkangala.+ 22 Kodwa ngazibamba+ ngenxa yebizo lami+ ukuze lingangcoliswa phambi kwezizwe ezabona ngibakhipha eGibhithe. 23 Ngaphinda ngafunga kubo enkangala ukuthi ngizabachithachithela ezizweni, basabalale emazweni wonke+ 24 ngoba abazange balandele imithetho yami yokwahlulela. Batshiya imilayo yami+ bangcolisa lamasabatha ami. Balandela izithombe ezenyanyekayo ezazikhonzwa ngokhokho babo.+ 25 Ngabatshiya balandela imilayo engalunganga lemithetho yokwahlulela eyayingasoze ibenze baphile.+ 26 Ngabayekela bangcoliswa yiminikelo yabo ngesikhathi benikela ngamazibulo abo wonke bewatshisa emlilweni,+ ukuze ngibatshabalalise njalo bakwazi ukuthi mina nginguJehova.”’

27 “Ngakho ndodana yomuntu, khuluma labako-Israyeli uthi kubo, ‘Nanku okutshiwo yiNkosi Enkulu uJehova: “Okhokho benu bangithuka njengani ngoba babengathembekanga kimi. 28 Ngabaletha elizweni engangifunge ukuthi ngizabapha lona.+ Kodwa bathi bebona wonke amaqaqa aphakemeyo lezihlahla eziyizithingithingi+ baqalisa ukwenza imihlatshelo leminikelo engithukuthelisayo. Benza iminikelo enukelelayo bathululela leminikelo yabo yokunathwayo khonapho. 29 Yikho ngababuza ngathi, ‘Kanti liyabe lisiyakwenzani endaweni le ephakemeyo? (Lalamuhla indawo leyo ilokhu ibizwa ngokuthi yiNdawo Ephakemeyo.)’”’+

30 “Khathesi khuluma labantu bako-Israyeli uthi, ‘Nanku okutshiwo yiNkosi Enkulu uJehova: “Kungani lizingcolisa njengabokhokho benu lilandela izithombe zabo ezenyanyekayo ukuze lizikhonze?*+ 31 Lakhathesi lilokhu liqhubeka lizingcolisa ngokwenza imihlatshelo kuzo zonke izithombe zenu ezenyanyekayo, langokutshisa amadodana enu ngomlilo.+ Manje libona angani ngingaliphendula yini bantu bako-Israyeli?”’+

“‘Ngifunga ngami uqobo,’ kutsho iNkosi Enkulu uJehova, ‘angisoze ngiliphendule.+ 32 Lalokho elikucabangayo nxa lisithi, “Lathi sifuna ukuba njengabanye abantu lanjengezinye izizwe ezikhonza izigodo lamatshe,”+ akusoze kwenzakale.’”

33 “‘Ngifunga ngami uqobo,’ kutsho iNkosi Enkulu uJehova, ‘mina ngizaba yinkosi yenu ngilibuse ngesandla esilamandla langengalo eyeluliweyo futhi ngizathululela ulaka lwami phezu kwenu.+ 34 Ngizalikhipha ezizweni ngiliqoqe lasemazweni elisabalale kuwo, ngilibuthe ngesandla esilamandla langengalo eyeluliweyo, ngithululele ulaka lwami phezu kwenu.+ 35 Ngizaliletha enkangala yabantu bezizweni besengilithonisisa sikhangelene.+

36 “‘Ngizalithonisisa ngendlela engathonisisa ngayo okhokho benu enkangala yelizwe laseGibhithe,’ kutsho iNkosi Enkulu uJehova. 37 ‘Ngizalidlulisa ngaphansi kodondolo lukamelusi,+ ngilenze lisigcine isivumelwano. 38 Kodwa ngizasusa phakathi kwenu abahlamukayo labangalaleli imilayo yami.+ Ngizabasusa elizweni abahlala kulo kodwa abasoze bafike elizweni lako-Israyeli.+ Lapho-ke lizakwazi ukuthi mina nginguJehova.’

39 “Nanku okutshiwo yiNkosi Enkulu uJehova kini bantu bako-Israyeli: ‘Ngamunye wenu kahambe ayekhonza izithombe zakhe ezenyanyekayo.+ Kodwa ngemva kwalokho nxa lingangilaleli alisoze liphinde lenelise ukungcolisa ibizo lami elingcwele ngemihlatshelo yenu langezithombe zenu ezenyanyekayo.’+

40 “‘Bonke abako-Israyeli abaselizweni bazangikhonza+ entabeni yami engcwele, intaba yako-Israyeli ephakemeyo,’+ kutsho iNkosi Enkulu uJehova, ‘lapho yikho engizabamukela khona. Ngizafuna ukuthi lingenzele iminikelo futhi linikele langezithelo zokuqala, langakho konke okwenu okungcwele.+ 41 Nxa sengilikhipha ezizweni njalo sengiliqoqa kuwo wonke amazwe elisabalale kuwo,+ ngizalamukela ngenxa yeminikelo yenu enukelelayo. Ngizangcweliswa phakathi kwenu phambi kwezizwe.’+

42 “‘Lizakwazi ukuthi mina nginguJehova+ nxa sengililetha elizweni lako-Israyeli,+ ilizwe engafunga ukuthi ngizalinika okhokho benu. 43 Selilapho lizakhumbula indlela elaliziphatha ngayo lakho konke okubi elalikwenza lizingcolisa+ njalo lizazenyanya ngenxa yazo zonke izinto ezimbi elazenzayo.+ 44 Ngakho bantu bako-Israyeli, lizakwazi ukuthi mina nginguJehova nxa sengilenzela lokhu ngenxa yebizo lami,+ hatshi ngenxa yezenzo zenu ezimbi lokuziphatha kwenu okulihlazo,’ kutsho iNkosi Enkulu uJehova.”

45 Ilizwi likaJehova laphinda lafika kimi lathi: 46 “Ndodana yomuntu, tshibilika ukhangele iningizimu ukhulume layo, uphrofethe ngegusu eliseningizimu. 47 Tshela igusu eliseningizimu uthi, ‘Zwana ilizwi likaJehova. Nanku okutshiwo yiNkosi Enkulu uJehova: “Ngizakuthungela ngomlilo+ ozalobisa zonke izihlahla eziluhlaza lazo zonke izihlahla ezomileyo eziphakathi kwakho. Ilangabi lawo alisoze licitsheke+ futhi uzatshisa bonke abantu kusukela eningizimu kusiya enyakatho. 48 Bonke abantu bazabona ukuthi mina Jehova yimi engithungele igusu ngomlilo ukuze lingacitsheki.”’”+

49 Ngakho ngathi: “Awu, Nkosi Enkulu Jehova! Abantu laba bathi mina ngikhuluma imizekeliso kuphela.”