U-Isaya
28 Maye ngomqhele* wokuzikhukhumeza* wezidakwa zako-Efrayimi!+
Ubuhle bawo obukhazimulayo buliluba elibunayo nje
Elisendaweni ephezulu, esigodini esivundileyo lapho okulabantu abakhulelwa liwayini.
2 UJehova uzathuma umuntu oqinileyo njalo olamandla.
Uzawuphosela phansi ngamandla umqhele,
Njengesiphepho esilesiqhotho, umoya wesiphepho otshabalalisayo,
Lanjengezulu elinengi elilezikhukhula zamanzi ezilolaka.
4 Ubuhle obukhazimulayo buliluba elibunayo
Elisendaweni ephezulu, esigodini esivundileyo.
Buzakuba njengekhiwane elivuthwa kuqala kungakabi lihlobo.
Nxa umuntu elibona uhle alikhe alidle, aliginye masinyane.
5 Ngalelolanga uJehova wamabutho uzakuba ngumqhele okhazimulayo, abe ngumqhele wamaluba omuhle ebantwini bakhe abaseleyo.+ 6 Uzakwenza abahluleli bahlulele kuhle* njalo uzakuba ngumthombo wamandla kulabo abalwisana labahlaselayo egedini.+
7 Abaphristi labaphrofethi bayaphambuka ngenxa yewayini,
Utshwala babo benza badiyazele.
Bayaphambuka ngenxa yotshwala,
Iwayini libaphambanisa ingqondo.
Bayadiyazela ngenxa yotshwala babo,
Umbono abawubonayo wenza baphambuke,
Njalo bayakhubeka nxa besahlulela.+
8 Amatafula abo agcwele amahlanzo enyanyekayo,
Kugcwele amahlanzo yonke indawo.
9 Bathi: “Umuntu uzalupha bani ulwazi?
Uzawuchazela bani umbiko?
Uzawuchazela abalunyuliweyo yini,
Labo abasanda kukhitshwa ebeleni?
10 Ngoba ngumlayo phezu komlayo, umlayo phezu komlayo,
Umzila ngomzila, umzila ngomzila,*+
Okuncane lapha, okuncane laphaya.”*
11 Ngakho uzakhuluma labantu laba esebenzisa abagagasayo kanye labakhuluma ulimi lwezizweni.+ 12 Wake wabatshela wathi: “Le yindawo yokuphumula; odiniweyo kaphumule. Le yindawo yokubethwa ngumoya,” kodwa kabazange balalele.+ 13 Kubo ilizwi likaJehova lizakuba,
“Ngumlayo phezu komlayo, umlayo phezu komlayo,
Umzila ngomzila, umzila ngomzila,*+
Okuncane lapha, okuncane laphaya,”
14 Zwanini ilizwi likaJehova lina bantu elizitshaya izifuba,
Lina elibusa abantu laba abaseJerusalema.
15 Ngoba lina lithi:
“Sesenze isivumelwano lokufa,+
Senza isivumelwano lengcwaba.
Nxa isikhukhula esilolaka sidlula,
Kasisoze sifike kithi,
Ngoba senze amanga aba yisiphephelo sethu
Sazifihla emangeni.”+
16 Ngakho nanku okutshiwo yiNkosi Enkulu uJehova:
“Khangelani, ngibeka ilitshe elihloliweyo ukuthi libe yisisekelo eZiyoni,+
Ilitshe eliyisiqokoqela leliligugu,+ elesisekelo esiqinileyo.+
Akulamuntu otshengisa ukuthi ulokholo ozakwethuka.+
Izulu lesiqhotho lizakhukhula isiphephelo samanga,
Lamanzi agcwale endaweni yokucatsha.
18 Isivumelwano elasenza lokufa sizachithwa,
Lesivumelwano elasenza lengcwaba asisoze sime.+
Isikhukhula esilolaka sizathi sidlula,
Silitshabalalise.
19 Lapho esizadlula khona kanenginengi,
Sizalikhukhula;+
Ngoba sizadlula nsuku zonke ekuseni,
Lemini lebusuku.
Ukwesaba yikho okuzabenza bazwisise umbiko okhulunyiweyo.”*
20 Umbheda mfitshane kakhulu ukuthi umuntu azelule kuwo,
Lelembu lincane kakhulu ukuthi azigoqele ngalo.
21 UJehova uzaphakama njengasentabeni iPherazimi,
Uzakuba ledlabuzane njengasesigodini esiseduze leGibhiyoni,+
Ukuze enze isenzo sakhe, isenzo sakhe esiyisimanga,
Enze lomsebenzi wakhe, umsebenzi wakhe ongajayelekanga.+
22 Khathesi lingakhulumeli eceleni,+
Ukuze amaketane enu angaphindi aqiniswe,
Ngoba iNkosi Enkulu uJehova wamabutho
Ingitshele ukuthi isimise ukuthi itshabalalise ilizwe lonke.*+
23 Thiyani indlebe lilalele ilizwi lami;
Lalelisisani lizwe engikutshoyo.
24 Umlimi angaqhubeka elima ilanga lonke engahlanyeli yini?
Angaqhubeka ephendula umhlabathi ewulevula yini?+
25 Nxa esewulungise kuhle umhlabathi wakhe,
Kayihazi yini inhlanyelo yekhumini* emnyama ahlanyele lekhumini ejayelekileyo?
Kahlanyeli yini ingqoloyi lenyawuthi lebhali ezindaweni zazo?
Emingceleni yensimu yakhe kahlanyeli yini omunye umhlobo wengqoloyi?*+
26 UNkulunkulu uyamfundisa ngendlela eqondileyo;
UNkulunkulu wakhe uyamlaya.+
27 Phela ikhumini emnyama kayibhulwa ngesileyi sokubhula,*+
Leviri lenqola kalihanjiswa phezu kwekhumini.
Kodwa ikhumini emnyama ibhulwa ngentonga,
Ikhumini ejayelekileyo ibhulwa ngenduku.
28 Nxa umuntu ebhula ingqoloyi yokupheka isinkwa, uyayibhula ize isale iyimpuphu yini?
Hayi, kayibhuli kokuphela,+
Kanti njalo nxa ehambisa iviri lenqola yakhe edonswa ngamabhiza phezu kwayo,
Kayicholi.+
29 Lalokhu kuvela kuJehova wamabutho,
Yena ohlose okuhle
Njalo owenza izinto ezinkulu.+