UHezekheli
8 Mhlaka 5 ngenyanga yesithupha, ngomnyaka wesithupha, ngathi ngihlezi endlini yami labadala bakoJuda behlezi phambi kwami, isandla seNkosi Enkulu uJehova sangibamba. 2 Ngathi ngisakhangele ngabona okwakungathi ngumuntu futhi kwakunjengomlilo. Kusukela lapho okwakukhanya angathi lukhalo lwakhe kusiya phansi kwakungathi kuvutha amalangabi.+ Kusukela ekhalweni kusiya phezulu wayekhazimula angathi yinsimbi eyenziwe ngegolide lesiliva.+ 3 Welulela kimi okwakungathi yisandla sakhe wangibamba ngenwele. Umoya wangiphakamisela esibhakabhakeni wangisa eJerusalema ngemibono evela kuNkulunkulu. Wangisa egedini leguma eliphakathi+ elikhangele enyakatho lapho okwakulesithombe esivusa ubukhwele.+ 4 Khonapho kwakulenkazimulo kaNkulunkulu ka-Israyeli+ eyayinjengalokho engangikubone emagcekeni.+
5 Wasesithi kimi: “Ndodana yomuntu, ngicela ukhangele enyakatho.” Yikho ngakhangela enyakatho ngabona kulesithombe esivusa ubukhwele, simi ngasenyakatho kwegedi le-alithare lapho okungenwa khona. 6 Waphinda wathi kimi: “Ndodana yomuntu, uyazibona yini izinto ezimbi futhi ezenyanyekayo ezenziwa ngabantu bako-Israyeli endaweni le?+ Izinto lezi yizo ezenza ngisuke ngiye khatshana lendawo yami engcwele.+ Kodwa uzabona izinto ezenyanyekayo, ezimbi kakhulu kulalezi.”
7 Ngemva kwalokho wangiletha egedini leguma. Ngathi ngikhangela ngabona isikhala emdulini. 8 Wasesithi kimi: “Ndodana yomuntu, ngicela uvule isikhala leso esisemdulini.” Ngakho ngasivula isikhala esasisemdulini ngabona umnyango. 9 Wathi kimi: “Ngena phakathi ubone izinto ezimbi futhi ezinyanyisayo abazenzayo.” 10 Ngakho ngangena phakathi ngakhangela, ngabona emdulini kulemifanekiso yezinanakazana leyezinyamazana ezenyanyekayo+ lazo zonke izithombe ezenyanyekayo* zabantu bako-Israyeli.+ 11 Phambi kwazo kwakumi abadala bako-Israyeli abangu-70 futhi uJazaniya indodana kaShafani+ laye wayekhona. Ngamunye wabo wayethwele umganu wakhe wokutshisela impepha, kuthunqa intuthu yempepha enukelelayo.+ 12 Wasesithi kimi: “Ndodana yomuntu, uyakubona yini okwenziwa ngabadala bako-Israyeli emnyameni, ngamunye wabo esendlini yakhe engaphakathi lapho okulezithombe zakhe khona?* Phela bathi: “UJehova kasiboni. UJehova uselitshiyile ilizwe leli.’”+
13 Waqhubeka wathi kimi: “Uzabona izinto ezimbi, ezenyanyekayo kulalezi abazenzayo.” 14 Wasengiletha egedini elisenyakatho lethempeli likaJehova, ngabona abesifazana behlezi bekhalela unkulunkulu wabo uThamuzi.
15 Ngakho wathi kimi: “Uyakubona yini lokhu ndodana yomuntu? Uzabona izinto ezenyanyekayo futhi ezimbi kakhulu kulalezi.”+ 16 Wasengithatha wangisa egumeni lendlu kaJehova elingaphakathi.+ Emnyango wethempeli likaJehova phakathi laphakathi komphotshongo le-alithare, kwakulamadoda angaba ngu-25 ayefulathele ithempeli likaJehova ekhangele empumalanga, ekhothamele ilanga.+
17 Wathi kimi: “Ndodana yomuntu, uyakubona yini lokhu? Kambe yinto encane yini le eyenziwa ngabantu bakoJuda? Phela benza izinto ezenyanyekayo futhi bagcwalise lonke ilizwe ngodlakela+ njalo baqhubeka bengithukuthelisa. Baphakamisela ugatsha* emakhaleni ami. 18 Ngakho ngizavuka ngolaka, angisoze ngibazwele futhi angisoze ngibe lesihawu kubo.+ Lanxa bangaze bakhale kimi baze baklabalale angisoze ngibalalele.”+