UHezekheli
27 Ilizwi likaJehova laphinda lafika kimi lathi: 2 “Ndodana yomuntu, hlabelela iThire ingoma yokulila+ 3 uthi kuyo,
‘Wena osesangweni lolwandle,
Othengisela abantu bezihlenge ezinengi,
Nanku okutshiwo yiNkosi Enkulu uJehova:
“Maye Thire! ngoba wena uthe umuhle awulasici.+
4 Izindawo zakho ziphakathi kolwandle,
Abakhi bakho bakucecise waba muhle kakhulu.
5 Ungumkhumbi owenziwe ngezigodo zomjunipha waseSeniri,+
Isigodo sokubamba amaseyili akho ngesomsedari waseLebhanoni.
6 Izigodo zakho zokugwedla zenziwe ngemi-okhi yaseBhashani,
Isifuba sakho sona senziwe ngezigodo zomsayiphresi eziceciswe ngempondo zendlovu zasezihlengeni zeKhithimu.+
7 Amaseyili akho enziwe ngelineni emibalabala yaseGibhithe,
Amaseyili okusitha ilanga wona athungwe ngamalembu aluhlaza langewulu eyibubende* yasezihlengeni ze-Elisha.+
8 Izakhamizi zeSidoni leze-Arivadi+ yizo ezazingabagwedli bakho.
Izingcitshi zakho wena Thire yizo ezazingabatshayeli bakho.+
9 Izingcitshi zaseGebhali+ eziwazi kuhle umsebenzi zazivala izikhala zakho ukuze ungangeni amanzi.+
Yonke imikhumbi yaselwandle labagadi bayo babesiza kuwe bezothengiselana lawe.
10 Amadoda asePhesiya leLudi lePhuthi+ ayengamabutho akho athenjiweyo empini.
Ayelengisa ingwane zawo zempi lamahawu kuwe futhi ayekwenza ubatshazwe.
11 Amadoda ase-Arivadi ayesebuthweni lakho ayesima emidulini yakho akugombolozele,
Amadoda alesibindi yiwo ayelinda imiphotshongo yakho.
Ayelengisa amahawu ayisigombolozi emidulini yakho yonke,
Akwenze ube muhle kakhulu.
12 “‘“Abantu beThashishi+ babethengiselana lawe ngoba inotho yayibuzwa kuwe.+ Babethenga impahla yakho ngesiliva, lensimbi, lethini kanye lomnuso.+ 13 Abantu beJavani labeThubhali+ labeMeshekhi+ labo babethengiselana lawe. Babethenga impahla yakho ngezigqili+ langezinto ezenziwe ngekhopha. 14 Izizukulwane zikaThogama+ zona zazithenga impahla yakho ngezimbongolo* lamabhiza empi lawokwenza eminye imisebenzi. 15 Abantu baseDedani+ labo babethengiselana lawe. Wawuqhatshe abantu ezihlengeni ezinengi ukuthi bakuthengisele impahla yakho njalo babekunika impondo zendlovu+ lezigodo ezinhle ezimnyama. 16 Labako-Edomi babethengiselana lawe ngoba impahla yakho yayinengi kakhulu. Babethenga impahla yakho ngethekhoyisi,* lewulu eyibubende, langamalembu acecisiweyo, lamalembu amahle, lamakhorali* kanye lamarubhi.*
17 “‘“Abantu bakoJuda labako-Israyeli labo babethengiselana lawe. Babethenga impahla yakho+ ngengqoloyi yaseMinithi,+ langokudla okulomsoco, loluju+ lamafutha langebhalisamu.+
18 “‘“Abantu beDamaseko+ labo babethengiselana lawe ngoba wawulempahla enengi futhi unothe kakhulu. Babekunika iwayini laseHelibhoni lewulu yaseZahari. 19 Abantu baseVedani leJavani ese-Uzali babethenga impahla yakho ngezinto ezenziwe ngensimbi lekhasiya* lekhalamusi.* 20 IDedani+ yayithengiselana lawe ngamalembu afakwa phezu kwenyamazana ezigadwayo. 21 Waqhatsha ama-Arabhu labo bonke abakhokheli baseKhedari+ ukuthi bakuthengisele imvana zakho, lenqama lembuzi.+ 22 Abathengisi beShebha labeRema+ babethengiselana lawe. Babethenga impahla yakho ngayo yonke imihlobo yamakha anukelelayo, lamatshe aligugu langegolide.+ 23 Abantu beHarani,+ labeKhane, labe-Edeni,+ labathengisi beShebha,+ labe-Ashuri+ labeKhilimadi babethengiselana lawe. 24 Emakethe yakho kwakuthengiswa izigqoko ezinhle, lamajazi elembu eliluhlaza okwesibhakabhaka lelilemiceciso emibalabala, lamakhaphethi alemibala etshiyeneyo. Konke lokhu kwakubuthelelwa ndawonye kubotshwe ngezintambo kuqine.
25 Imikhumbi yeThashishi+ yiyo eyayithwala impahla yakho ethengiswayo.
Yikho wawuhlala ugcwele futhi usindwa phakathi kolwandle.
26 Abagwedli bakho bakungenise elwandle olulamagagasi esabekayo.
Umoya wempumalanga ukutshaye wakwephula uphakathi laphakathi kolwandle.
27 Inotho yakho lempahla yakho lakho konke okuthengisayo, labagwedli bakho, labatshayeli,
Lalabo abavala izikhala zakho, labathengisa impahla yakho,+ lawo wonke amabutho akho,+
Bonke nje abantu abaphakathi kwakho,
Bazatshona enzikini yolwandle ngelanga lokutshabalala kwakho.+
28 Abatshayeli bakho bazahlaba umkhosi, indawo eziseduze kolwandle zizamazame.
29 Bonke abagwedli bemikhumbi, labatshayeli labaqondisi bayo
Bazakwehla emikhunjini yabo bame emhlabathini.
30 Bazahlaba umkhosi bakukhalele okuzwisa usizi,+
Bazithele ngenhlabathi emakhanda, bazigiqe emlotheni.
31 Bazaphuca amakhanda bagqoke izembatho zamasaka,
Baqhinqe isililo bakukhalele kabuhlungu.
32 Bazakulilela behlabela ingoma yokulila besithi:
‘Ngubani onjengeThire, idolobho eselithule cwaka phakathi kolwandle?+
33 Ngesikhathi impahla zakho zifika zivela elwandle, wawusuthisa abantu abanengi.+
Inotho yakho enengi lempahla owawuzithengisa kwanothisa amakhosi omhlaba.+
34 Kodwa khathesi wephukile phakathi kolwandle, watshona enzikini yamanzi,+
Ucwile labantu bakho lempahla yakho yonke owawuyithengisa.+
35 Bonke abantu abahlala ezihlengeni bazakukhangela bebambe owangaphansi,+
Amakhosi abo azakwethuka athuthumele,+ ubuso babo bubike uvalo.
36 Abathengisi bezinye izizwe bazatshaya ukhwelo bababaze lokho okukwehleleyo.
Uzatshabalala kabuhlungu ngesikhatshana nje
Kube yikuphela kwakho, ungaphindi ube khona.’”’”+