UHezekheli
30 Ilizwi likaJehova laphinda lafika kimi lathi: 2 “Ndodana yomuntu, phrofetha uthi, ‘Nanku okutshiwo yiNkosi Enkulu uJehova:
“Khalani lithi, ‘Maye usuku seluseduze!’
3 Usuku lukaJehova seluseduze, selusondele sibili,+
Usuku lwamayezi amnyama+ lesikhathi sokwahlulelwa kwezizwe.+
4 IGibhithe izahlaselwa ngenkemba kubulawe abantu, abaseTopiya bethuke baphaphatheke.
Inotho yeGibhithe izathathwa lezisekelo zayo zidilizwe.+
5 Abantu beTopiya,+ labePhuthi,+ labeLudi, labezinye izizwe,
LabeKhubi kanye lamadodana elizwe lesivumelwano,*
Bonke bazabulawa ngenkemba.”’
6 Nanku okutshiwo nguJehova:
‘Abasekela iGibhithe labo bazabulawa,
Amandla ayo ezigqaja ngawo azaqedwa.’+
“‘Abantu abaselizweni bazabulawa ngenkemba kusukela eMigidoli+ kuze kuyefika eSiyene,’+ kutsho iNkosi Enkulu uJehova. 7 ‘Ilizwe labo lizatshabalaliswa ukwedlula wonke amazwe, lamadolobho abo azakuba ngamanxiwa ukwedlula wonke amadolobho.+ 8 Nxa sengithungele iGibhithe ngomlilo, ngatshabalalisa bonke abangane bayo, bazakwazi ukuthi mina nginguJehova. 9 Ngalolosuku ngizathumela izithunywa ngemikhumbi ukuthi ziyekwethusa abantu beTopiya abazithembayo. Bazakwethuka kakhulu ngosuku lokutshabalaliswa kweGibhithe ngoba lolosuku luzafika loba sekutheni.’
10 “Nanku okutshiwo yiNkosi Enkulu uJehova: ‘Ngizawaqeda wonke amaxuku aseGibhithe ngisebenzisa uNebhukhadinezari* inkosi yaseBhabhiloni.+ 11 Yena lamabutho akhe awesizwe esilesihluku ukwedlula zonke izizwe,+ bazahlasela ilizwe balitshabalalise. Bazagadla ngenkemba eGibhithe babulale abantu abanengi kakhulu.+ 12 Imisele yomfula uNayili+ ngizayenza ibe yizikwakwa njalo ilizwe ngizalithengisela abantu abenza okubi. Ngizathuma abantu bezinye izizwe ukuthi batshabalalise ilizwe kanye lakho konke okukulo.+ Mina Jehova sengikhulumile.’
13 “Nanku okutshiwo yiNkosi Enkulu uJehova: ‘Ngizaziqeda izithombe zabo ezenyanyekayo* kanye labonkulunkulu baseNofi* abangelancedo.+ Akusoze kuphinde kube lenkosana* elizweni laseGibhithe futhi ngizakwenza abantu beGibhithe bahlale besesaba.+ 14 Ngizatshabalalisa iPhatrosi,+ ngithungele iZowani ngomlilo ngahlulele ledolobho leNo.*+ 15 Ngizathululela ulaka lwami phezu kweSini inqaba yeGibhithe, ngithanyele bonke abantu beNo. 16 Ngizathungela iGibhithe ngomlilo, iSini yesabe ithuthumele. Amabutho azafohlela eNo futhi iNofi* izahlaselwa emini libalele. 17 Amajaha ase-Oni* lawePhibhesethi azabulawa ngenkemba, abantu abasemadolobheni bathunjwe. 18 EThehaphanesi kuzaba mnyama emini nxa sengisephula amajogwe eGibhithe.+ Amandla iGibhithe ezigqaja ngawo azaphela+ futhi izasibekelwa ngamayezi, abantu abasemadolobheni ayo bathunjwe.+ 19 Ngizakwahlulela iGibhithe futhi bazakwazi ukuthi mina nginguJehova.’”
20 Mhlaka 7 ngenyanga yokuqala ngomnyaka wesi-11, ilizwi likaJehova lafika kimi lathi: 21 “Ndodana yomuntu, sengephule ingalo kaFaro inkosi yaseGibhithe. Kayisoze ibotshwe ukuze iphole loba ibhanditshwe ukuze iqine yenelise ukuthwala inkemba.”
22 “Ngakho nanku okutshiwo yiNkosi Enkulu uJehova: ‘Ngizakulwa loFaro inkosi yaseGibhithe.+ Ngizakwephula ingalo zakhe zombili, eqinileyo leyephukileyo,+ futhi ngizakwenza inkemba iphunyuke esandleni sakhe iwele phansi.+ 23 AmaGibhithe ngizawachithachitha aye ezizweni zonke, asabalale emazweni wonke.+ 24 Ngizaqinisa ingalo zenkosi* yeBhabhiloni+ ngiyibambise inkemba yami.+ Kodwa ingalo zikaFaro ngizazephula, abubule phambi kwenkosi yeBhabhiloni njengomuntu osesifa. 25 Ngizaqinisa ingalo zenkosi yeBhabhiloni kodwa ingalo zikaFaro zizaphela amandla. Lapho-ke bazakwazi ukuthi mina nginguJehova nxa senginika inkosi yeBhabhiloni inkemba yami, ibisiyiphakamisa ihlasele iGibhithe.+ 26 AmaGibhithe ngizawachithachitha aye ezizweni zonke, asabalale emazweni wonke.+ Lapho-ke azakwazi ukuthi mina nginguJehova.’”