UHezekheli
29 Mhlaka 12 ngenyanga yetshumi ngomnyaka wetshumi, ilizwi likaJehova lafika kimi lathi: 2 “Ndodana yomuntu, tshibilika ukhangele kuFaro inkosi yaseGibhithe, uphrofethe ngaye leGibhithe yonke,+ 3 uthi kuye: ‘Nanku okutshiwo yiNkosi Enkulu uJehova:
“Ngizakulwa lawe wena Faro nkosi yaseGibhithe,+
Wena silo solwandle esikhulu esicambaleleyo ezifuleni zeNayili,*+
Esithi, ‘Umfula uNayili ngowami.
Ngazenzela wona.’+
4 Ngizakufaka amawuka emihlathini, ngenze lenhlanzi zeNayili yakho zinamathele emaxolweni akho.
Ngizakukhipha eNayili yakho kanye lenhlanzi zonke ezilapho ezinamathele emaxolweni akho,
5 Ngikulahlele enkangala lazo zonke inhlanzi zeNayili yakho.
Uzawela endaweni eligceke futhi awusoze udojwe kumbe ubuthwe.+
Ngizakwenza ube yikudla kwezinyamazana zeganga lezinyoni ezisemkhathini.+
6 Lapho-ke bonke abantu baseGibhithe bazakwazi ukuthi mina nginguJehova,
Ngoba ukusekela kwabo abantu bako-Israyeli kwakufanana lokujeka into ngomhlanga.+
7 Babesithi nxa bebamba isandla sakho wena wephuke,
Ubalimaze ihlombe.
Bethi beseyama kuwe uqamuke,
Wenze amadolo abo axege.”+
8 “‘Ngakho nanku okutshiwo yiNkosi Enkulu uJehova: “Ngizakwenza izitha zenu zilihlasele ngenkemba+ njalo ngizabulala abantu lezinyamazana. 9 Ilizwe laseGibhithe lizasala lingamanxiwa futhi liyinkangala+ njalo bazakwazi ukuthi mina nginguJehova. Phela wena* uthe, ‘Umfula uNayili ngowami, yimi engawenzayo.’+ 10 Sengiyisitha sakho leseNayili yakho njalo ngizatshabalalisa ilizwe laseGibhithe ngilenze libe yinkangala logwadule,+ kusukela eMigidoli+ kuze kuyefika eSiyene+ lasemngceleni waseTopiya. 11 Akulamuntu loba inyamazana ezadabula phakathi kwalo+ njalo lizahlala lingelamuntu okweminyaka engu-40. 12 Ngizakwenza iGibhithe ibe yinkangala ukwedlula wonke amazwe futhi amadolobho ayo azakuba ngamanxiwa ukwedlula wonke okweminyaka engu-40.+ AmaGibhithe ngizawachithachitha aye ezizweni zonke, asabalale emazweni wonke.”+
13 “‘Nanku okutshiwo yiNkosi Enkulu uJehova: “Ngemva kweminyaka engu-40 ngizaqoqa abantu baseGibhithe ezizweni abazabe besabalele kuzo.+ 14 AmaGibhithe athunjiweyo ngizawabuyisela elizweni lasePhatrosi,+ elizweni adabuka kulo. Azakuba ngumbuso omncane. 15 IGibhithe ngizayenza ibe ngumbuso omncane kuleminye imibuso futhi ayisoze iqhubeke ikhonya phezu kwezinye izizwe.+ AmaGibhithe ngizawenza abe yisizwe esincane okokuthi awasoze enelise ukubusa ezinye izizwe.+ 16 Abako-Israyeli abasoze baphinde bathembe iGibhithe+ kodwa izabenza bakhumbule icala labo lokucela uncedo kuyo. Lapho-ke bazakwazi ukuthi mina ngiyiNkosi Enkulu uJehova.”’”
17 Mhlaka 1 ngenyanga yokuqala ngomnyaka wesi-27, ilizwi likaJehova lafika kimi lisithi: 18 “Ndodana yomuntu, uNebhukhadinezari*+ inkosi yeBhabhiloni lebutho lakhe basebenza nzima ngesikhathi besilwa leThire.+ Wonke amakhanda abo asala eselempabanga lamahlombe abo ahluzuka. Kodwa yena lebutho lakhe ababhadalwanga lanxa basebenza nzima eThire.
19 “Ngakho nanku okutshiwo yiNkosi Enkulu uJehova, ‘Ngizanika uNebhukhadinezari inkosi yeBhabhiloni+ ilizwe leGibhithe futhi uzathatha inotho yalo lempahla enengi. Yikho okuzakuba yimbadalo yebutho lakhe.’
20 “‘Ngizamnika ilizwe leGibhithe libe yimbadalo yakhe ngenxa yokuthi yena lebutho lakhe bangisebenzela besilwa leThire,’+ kutsho iNkosi Enkulu uJehova.
21 “Ngalelolanga ngizakwenza ukuthi kumile uphondo ko-Israyeli*+ futhi ngizakunika ithuba lokuthi ukhulume labo. Lapho-ke bazakwazi ukuthi mina nginguJehova.”