UHezekheli
6 Ilizwi likaJehova laphinda lafika kimi lathi: 2 “Ndodana yomuntu, khangela ezintabeni zako-Israyeli ubusuphrofetha ngazo. 3 Kumele uthi, ‘Lina zintaba zako-Israyeli, zwanini ilizwi elivela eNkosini Enkulu uJehova: INkosi Enkulu uJehova ithi ezintabeni lemaqaqeni lasezifuleni lezigodini: “Ngizalihlasela ngenkemba, ngidilize izindawo zenu eziphakemeyo.* 4 Ama-alithare enu azadilizwa njalo ama-alithare enu okutshisela impepha azakwephulwa.+ Izidumbu zabantu bakini ababuleweyo ngizaziphosela phambi kwezithombe zenu ezenyanyekayo.*+ 5 Izidumbu zabantu bako-Israyeli ngizaziphosela phambi kwezithombe zabo ezenyanyekayo njalo amathambo abo ngizawahaza emaceleni wonke ama-alithare abo.+ 6 Ezindaweni zonke elihlala kuzo, amadolobho enu azadilizwa+ lezindawo eziphakemeyo zizabhidlizwa zisale zingamanxiwa.+ Ama-alithare enu azadilizwa aphele lezithombe zenu zizatshabalala. Ama-alithare enu okutshisela impepha azakwephulwa futhi elikwenzileyo kuzatshabalala. 7 Bonke ababulewe ngenkemba bazakuwa phakathi kwenu+ njalo lizakwazi ukuthi mina nginguJehova.+
8 “‘“Kodwa ngizavumela ukuthi abanye basale. Abanye benu bazasila, abasoze babulawe yinkemba ngesikhathi lisabalele ezizweni.+ 9 Abazasila bazangikhumbula sebesezizweni ezizabathumba.+ Bazananzelela ukuthi inhliziyo yami yayibuhlungu ngoba babengathembekanga kimi,* bangifulathela+ balandela izithombe zabo ezenyanyekayo ababezihawukela.+ Bazayangeka bazizonde kakhulu zonke izinto ezimbi lezinyanyisayo ababezenza.+ 10 Bazakwazi ukuthi mina nginguJehova lokuthi ngangiqinisile lapho ngisithi ngizabehlisela umonakalo.”’+
11 “Nanku okutshiwo yiNkosi Enkulu uJehova: ‘Qakeza izandla utshaye phansi ngonyawo, ulile ngenxa yazo zonke izinto ezimbi lezinyanyisayo ezenziwa ngabantu bako-Israyeli ngoba bazabulawa ngenkemba njalo baqedwe yindlala lesifo.+ 12 Okhatshana uzabulawa yisifo, oseduze abulawe yinkemba. Loba ngubani ozasila ezintweni lezi uzabulawa yindlala. Ngizathululela ulaka lwami lonke phezu kwabo.+ 13 Bazakwazi ukuthi mina nginguJehova+ nxa izidumbu zabantu bakibo ababuleweyo sezithe dandalazi phambi kwezithombe zabo ezenyanyekayo, lasemaceleni wonke ama-alithare abo,+ lasemaqaqeni wonke aphakemeyo, lakuzo zonke iziqongo zezintaba langaphansi kwazo zonke izihlahla eziyizithingithingi, langaphansi kwezihlahla ezilengatsha ezinkulu, lapho ababesenzela khona iminikelo enukelelayo befuna ukuthabisa zonke izithombe zabo ezenyanyekayo.+ 14 Ngizakwelula isandla sami ngibajezise, ngenze ilizwe libe yinkangala. Zonke izindawo abahlala kuzo zizasala zilugwadule ukwedlula inkangala eseduze leDibhila. Bazakwazi ukuthi mina nginguJehova.’”