UHezekheli
28 Ilizwi likaJehova laphinda lafika kimi lathi: 2 “Ndodana yomuntu, khuluma lenkosi yeThire uthi: ‘Nanku okutshiwo yiNkosi Enkulu uJehova:
“Ngenxa yokuthi inhliziyo yakho iyazikhukhumeza,+ uqhubeka usithi, ‘Mina ngingunkulunkulu.
Ngihlala esihlalweni sobukhosi sikankulunkulu phakathi kolwandle.’+
Kodwa ungumuntu nje, awusuye nkulunkulu,
Lanxa enhliziyweni yakho uzitshela ukuthi ungunkulunkulu.
3 Phela wena ucabanga ukuthi uhlakaniphile kuloDanyeli,+
Lokuthi akulamfihlo ongayaziyo.
4 Uzenze wanotha ngenxa yokuhlakanipha lokuqedisisa kwakho,
Uqhubeka ubuthelela igolide lesiliva eziphaleni zakho.+
5 Ukuhlakanipha kwakho kwezokuthengiselana kukwenze wanotha kakhulu,+
Inhliziyo yakho yasiqala ukuzikhukhumeza ngenxa yenotho yakho.”’
6 “‘Ngakho nanku okutshiwo yiNkosi Enkulu uJehova:
“Ngenxa yokuthi enhliziyweni yakho uzitshela ukuthi ungunkulunkulu,
7 Ngizaletha abantu besinye isizwe bazokuhlasela, abesizwe esilesihluku ukwedlula zonke.+
Bazakuhlasela ngenkemba batshabalalise zonke izinto ezinhle ozithole ngokuhlakanipha kwakho,
Batshaphaze ubuhle bakho.+
9 Uzamtshela yini lowo okubulalayo ukuthi wena ungunkulunkulu?
Uyabe ungumuntu nje hatshi unkulunkulu ezandleni zalabo abakungcolisayo.”’
10 ‘Uzabulawa ngabantu besinye isizwe, ufe njengabantu abangasokanga,
Ngoba mina sengikhulumile,’ kutsho iNkosi Enkulu uJehova.”
11 Ilizwi likaJehova laphinda lafika kimi lathi: 12 “Ndodana yomuntu, hlabela ingoma yokulila ngenkosi yeThire uthi kuyo, ‘Nanku okutshiwo yiNkosi Enkulu uJehova:
13 Wawuse-Edeni insimu kaNkulunkulu,
Ucece ngawo wonke amatshe aligugu,
Irubhi, lethophazi, lejaspa, lekhrisolithe, le-onekisi, lejedi, lesafire, lethekhoyisi+ le-emeraldi.
Amatshe la aligugu ayenanyekwe phezu kwegolide,
Njalo alungiswa ngelanga owadalwa ngalo.
14 Ngakubeka ukuthi ube likherubhi eligcotshiweyo elisebenza ukuvikela.
Wawusentabeni kaNkulunkulu engcwele,+ uhamba phakathi kwamatshe avuthayo.
15 Wawungelasici kukho konke okwenzayo kusukela ngelanga owadalwa ngalo,
Kwaze kwaba yisikhathi uqalisa ukwenza okubi.+
Yikho ngizakuxotsha entabeni kaNkulunkulu ngikutshabalalise ngoba usungcolile.+
Ngizakususa endaweni yakho ephakathi kwamatshe avutha umlilo, wena kherubhi elivikelayo.
17 Inhliziyo yakho yaqala ukuzikhukhumeza ngenxa yobuhle bakho.+
Udumo lwakho lwenza ukuhlakanipha kwakho kwangasebenzi.+
Ngizakuphosela phansi emhlabathini,+
Ngikwenze umbukiso phambi kwamakhosi.
18 Ngenxa yamacala akho amanengi lobuqili owawubenza uthengisa, usungcolise indawo zakho ezingcwele,
Ngizavusa umlilo phakathi kwakho ukutshise ulobe.+
Uzakutsha usale ungumlotha phambi kwabo bonke abakukhangeleyo.
19 Bonke abantu abakwaziyo bazakukhangela bebambe owangaphansi.+
Uzatshabalala kabuhlungu ngesikhatshana nje,
Kube yikuphela kwakho, ungaphindi ube khona.”’”+
20 Ilizwi likaJehova laphinda lafika kimi lathi: 21 “Ndodana yomuntu, tshibilika ukhangele eSidoni+ uphrofethe mayelana layo, 22 uthi kuyo, ‘Nanku okutshiwo yiNkosi Enkulu uJehova:
“Ngizakulwa lawe wena Sidoni futhi ngizakhazinyuliswa phakathi kwakho.
Abantu bazakwazi ukuthi mina nginguJehova nxa sengiyijezisa iSidoni njalo sengingcweliswa phakathi kwayo.
23 Ngizathumela isifo phakathi kwayo futhi igazi lizageleza emigwaqweni yayo.
Kuzakufa abanengi phakathi kwayo nxa inkemba isigadla yonke indawo.
Lapho-ke bazakwazi ukuthi mina nginguJehova.+
24 “‘“Abantu bako-Israyeli bayabe bengasagonjolozelwanga ngomakhelwane ababachothozayo, abanjengameva amabi lezihlahla zameva.+ Abantu bazakwazi ukuthi mina ngiyiNkosi Enkulu uJehova.”’
25 “‘Nanku okutshiwo yiNkosi Enkulu uJehova: “Nxa sengiqoqa abantu bako-Israyeli ezizweni abasabalele kuzo,+ ngizangcweliswa phakathi kwabo izizwe zikhangele.+ Bazahlala elizweni labo+ engalinika inceku yami uJakhobe.+ 26 Bazahlala kulo bevikelekile+ futhi bazakwakha izindlu balime lamasimu amagilebisi.+ Bazahlala bevikelekile nxa sengisahlulela bonke omakhelwane babo ababachothozayo.+ Lapho-ke bazakwazi ukuthi mina nginguJehova uNkulunkulu wabo.”’”