UHezekheli
23 Ilizwi likaJehova laphinda lafika kimi lathi: 2 “Ndodana yomuntu, kwakulabesifazana ababili ababezalwa ngumama munye.+ 3 Baba ngamawule eGibhithe+ kusukela besesebancane. Izifuba zabo zabanjwabanjwa khonale, lamabele abo ayengakaze athintwe abotobotozwa. 4 Omdala kwakuthiwa ngu-Ohola,* umnawakhe kungu-Oholibha.* Baba ngabami bazala amadodana lamadodakazi. U-Ohola yiSamariya,+ u-Oholibha yiJerusalema.
5 “U-Ohola waqalisa ukuwula+ ngesikhathi esesengowami. Wafisa ukulala lezithandwa zakhe ezazitshisekela ukuya laye emacansini,+ omakhelwane bakhe ama-Asiriya.+ 6 Izithandwa zakhe kwakungababusi* ababegqoka izembatho eziluhlaza okwesibhakabhaka kanye labasekeli babo. Bonke babengamajaha amahle ayegada amabhiza. 7 Waqhubeka ewula lamajaha amahle ase-Asiriya futhi ezingcolisa+ ngezithombe ezenyanyekayo* zalabo ayefuna ukulala labo. 8 Kazange abutshiye ubuwule ayebenza eGibhithe ngoba balala laye kusukela esesemncane, bambambabamba amabele akhe ayengakaze athintwe, baqedela yonke inkanuko yabo phezu kwakhe.+ 9 Ngakho ngamnikela ezandleni zezithandwa zakhe ezingama-Asiriya+ ezazifuna ukulala laye, lezo laye ayetshisekela ukuya lazo emacansini. 10 Zamnqunula+ zathatha amadodana lamadodakazi akhe,+ zambulala ngenkemba. Wayeliwule elidumileyo phakathi kwabo bonke abesifazana yikho wajeziswa.
11 “Kodwa udadewabo u-Oholibha wathi ekubona lokho watshisekela ukuya emacansini ukwedlula udadewabo njalo wawula kakhulu kulaye.+ 12 Watshisekela ukulala labomakhelwane bakhe ama-Asiriya,+ ababusi* labasekeli babo ababegqoka impahla ezinhle futhi begada amabhiza. Bonke babengamajaha amahle. 13 Wathi esezingcolisile ngabona ukuthi bobabili babenyathela nyawo lunye.+ 14 Kodwa yena waqhubeka engezelela ubuwule bakhe. Wabona kudwetshwe imifanekiso yamadoda emdulini, imifanekiso yamaKhaledi eyayipendwe ngependa ebomvu gebhu. 15 Amadoda ayedwetshwe emdulini ayebophe amabhanti ekhalweni ebophe lamaqhiye emakhanda. Ayengathi ngamaqhawe njalo wonke ayefana labantu beBhabhiloni abadabuka elizweni lamaKhaledi. 16 Wathi ebona imifanekiso yamadoda la wahle watshisekela ukulala lawo, wasethuma izithunywa kuwo elizweni lamaKhaledi.+ 17 Ngakho amadoda eBhabhiloni ayelokhu ebuya ezolala laye embhedeni wakhe futhi amngcolisa ngokuqedela inkanuko zawo kuye. Athi esemngcolisile, wawatshiya esewenyanya.
18 “Waqhubeka ngobuwule bakhe engelanhloni futhi esembula ubunqunu bakhe,+ yikho mina ngamtshiya sengimenyanya njengoba nje lodadewabo ngamtshiya esengenyanyisa.+ 19 Waqhubeka engezelela ubuwule bakhe,+ esekhumbula izinsuku esesemutsha ewula elizweni leGibhithe.+ 20 Watshisekela ukulala lezithandwa zakhe njengabafazi beceleni abafuna ukulala lamadoda abo alezitho zensitha ezinjengezikababhemi lezinjengezebhiza. 21 Wena wakhanuka ukwenza izinto ezilihlazo owawuzenza eGibhithe+ usesemutsha, ngesikhathi bekubambabamba amabele wena usesemncane.+
22 “Ngakho wena Oholibha, nanku okutshiwo yiNkosi Enkulu uJehova: ‘Ngizavusa izithandwa zakho+ owazitshiyayo usuzenyanya futhi ngizakwenza ukuthi zikuhlasele zivela kuyo yonke indawo.+ 23 Ngizaletha amadoda eBhabhiloni+ lawo wonke amaKhaledi,+ lamadoda asePhekhodi+ lawaseShowa leKhowa kanye lawo wonke amadoda e-Asiriya. Bonke ngamajaha amahle, ngababusi* labasekeli babo, amaqhawe lamadoda aqakathekileyo futhi bonke bagada amabhiza. 24 Bazakuhlasela belezinqola zempi ezinengi kakhulu lexuku lamabutho eliphethe amahawu amakhulu lamancane,* eligqoke lezingwane zempi. Bazafika bakuhanqe, besengibavumela ukuthi bakujezise. Bazakujezisa ngendlela abafuna ngayo.+ 25 Ngizatshengisa ukuthi ngikuthukuthelele njalo bazakuhlasela ngolaka. Bazakuquma amakhala lendlebe futhi abazasala bazabulawa ngenkemba. Bazathatha amadodana lamadodakazi akho njalo abazaphunyuka bazatshiswa ngomlilo.+ 26 Bazakuhlubula izigqoko+ bakuthathele lemiceciso yakho emihle.+ 27 Ngizaqeda ukuziphatha kwakho okulihlazo kanye lobuwule+ owabuqalisa elizweni laseGibhithe.+ Uzacina ukubakhangela futhi awusoze uphinde uyikhumbule iGibhithe.’
28 “Nanku okutshiwo yiNkosi Enkulu uJehova: ‘Sekuseduze ukuthi ngikunikele kulabo obazondayo, labo owabatshiyayo usubenyanya.+ 29 Bazakuphatha ngolunya, bathathe konke owakusebenzela nzima+ bakutshiye uhamba nqunu. Ubunqunu bakho obuyangisayo lokuziphatha kwakho okulihlazo kanye lobuwule bakho kuzavela egcekeni.+ 30 Izinto lezi zizakwenziwa kuwe ngenxa yokuthi waxotshana lezizwe angathi uliwule,+ wazingcolisa ngezithombe zazo ezenyanyekayo.+ 31 Ulandele indlela kadadewenu+ yikho ngizafaka inkomitsho yakhe esandleni sakho.’+
32 “Nanku okutshiwo yiNkosi Enkulu uJehova:
‘Uzanatha enkomitshini kadadewenu enkulu futhi ende,+
Uzahlekwa futhi uchothozwe ngoba lokhu yikho okugcwele enkomitshini leyo.+
33 Uzakhulelwa yikudakwa losizi,
Unathe inkomitsho ebangela ukwesaba lokutshabalala,
Inkomitsho kadadewenu iSamariya.
34 Uzayinatha uyibhije+ njalo uhlafune lezicucu zayo zomdaka,
Ubusutshuphuna amabele akho,
“Ngoba mina sengikhulumile,” kutsho iNkosi Enkulu uJehova.’
35 “Ngakho nanku okutshiwo yiNkosi Enkulu uJehova: ‘Uzawuthola umvuzo wokuziphatha kwakho okulihlazo lobuwule bakho ngoba usungikhohliwe futhi awuselandaba lami.’”*+
36 UJehova wathi kimi: “Ndodana yomuntu uzamahlulela yini u-Ohola lo-Oholibha+ ubatshele ngezenzo zabo ezenyanyekayo? 37 Bafebile*+ futhi izandla zabo zigcwele igazi. Phezu kokufeba lezithombe zabo ezenyanyekayo, baphinde batshisa lamadodana abangizalela wona ukuze abe yikudla kwezithombe zabo.+ 38 Phezu kwalokho nanku okunye abaphinde bakwenza: Bangcolise indawo yami engcwele ngalelolanga, bangcolisa lamasabatha ami. 39 Bathi sebebulele amadodana abo futhi sebenikele ngawo ezithombeni zabo ezenyanyekayo,+ bangena endaweni yami engcwele ngalelolanga bayingcolisa.+ Lokhu yikho abakwenzayo endlini yami. 40 Bathuma isithunywa ukuthi siyebiza amadoda ahlala khatshana.+ Athi esendleleni wena wageza wazicombacomba amehlo, waceca langemiceciso emihle.+ 41 Wasuhlala phansi esihlalweni esintofontofo,+ kwafakwa itafula phambi kwaso,+ wena wasubeka impepha yami+ lamafutha ami kuyo.+ 42 Khonapho kwazwakala umsindo wamadoda amanengi ayethokoza futhi phakathi kwawo kwakulezidakwa ezazithethwe enkangala. Amadoda la afaka abesifazana laba amasongo ezandleni abagqokisa lemiqhele emihle emakhanda.
43 “Ngakhuluma ngalowo owayesegugiswe yibufebe ngathi: ‘Uzaqhubeka efeba.’ 44 Baqhubeka besiya kuye njengabantu abaya ewuleni. Le yiyo indlela ababehamba ngayo ku-Ohola lo-Oholibha, abesifazana abangaziphathanga. 45 Kodwa amadoda alungileyo azamnika isijeziso esifanele ubufebe bakhe+ lamacala akhe okubulala.+ Phela abesifazana laba bayizifebe futhi izandla zabo zigcwele igazi.+
46 “Nanku okutshiwo yiNkosi Enkulu uJehova: ‘Kuzabuya ibutho libahlasele libenze into eyesabekayo futhi libathathele lempahla.+ 47 Ibutho lizabajikijela ngamatshe+ libaqume ngezinkemba. Lizabulala amadodana lamadodakazi abo,+ lithungele izindlu zabo ngomlilo.+ 48 Ngizaqeda ukuziphatha okulihlazo elizweni. Bonke abesifazana bazafunda isifundo njalo abasoze balandele ukuziphatha kwabo okulihlazo.+ 49 Bazakujezisela ukuziphatha kwakho okulihlazo lezono owazenza lezithombe zakho ezenyanyekayo. Lapho-ke uzakwazi ukuthi mina ngiyiNkosi Enkulu uJehova.’”+