UHezekheli
22 Ilizwi likaJehova laphinda lafika kimi lathi: 2 “Wena ndodana yomuntu, usuzimisele yini ukwahlulela idolobho leli elilecala+ lokubulawa kwabantu? Usuzimisele yini lokulitshela zonke izenzo ezenyanyekayo+ ezenzakala phakathi kwalo? 3 Kumele uthi, ‘Nanku okutshiwo yiNkosi Enkulu uJehova: “Wena dolobho elilecala lokubulawa kwabantu,+ elizingcolise ngokwenza izithombe ezenyanyekayo*+ futhi osekuseduze ukuthi isikhathi salo sifike,+ 4 usulecala lokubulala abantu+ njalo izithombe zakho ezenyanyekayo sezikungcolisile.+ Wenze insuku zakho zaphela masinyane futhi iminyaka yakho isifike ekucineni. Ngakho ngizakwenza ube yinhlekisa ezizweni njalo uzachothozwa emazweni wonke.+ 5 Izizwe eziseduze lezikhatshana zizakuchothoza+ wena odume ngokwenza okubi logcwele isiphithiphithi. 6 Bonke abakhokheli bako-Israyeli abaphakathi kwakho basebenzisa izikhundla zabo ukuze babulale abantu.+ 7 Phakathi kwakho abantu badelela oyise labonina,+ baqilibezela abantu bezinye izizwe njalo baphatha kubi izintandane labafelokazi.”’”+
8 “‘Udelela indawo zami ezingcwele njalo ungcolisa amasabatha ami.+ 9 Phakathi kwakho kulabantu abanyundiselayo behlose ukubulala*+ futhi kulabantu abadla imihlatshelo enikelwa ezintabeni labaqhubeka beziphatha ngendlela elihlazo.+ 10 Phakathi kwakho kulabantu abalala lamakhosikazi aboyise,*+ labalala labesifazana abangcolileyo ngoba besesikhathini.+ 11 Phakathi kwakho indoda ilala lomkamakhelwane wayo,+ enye yenza ihlazo ngokulala lomalukazana wayo,+ enye ilala lodadewabo, indodakazi kayise.+ 12 Phakathi kwakho kulabantu abafunjathiswayo ukuze babulale abanye+ njalo kulababolekisa imali behlose ukuthola inzuzo,+ labathathela omakhelwane babo imali.+ Usungikhohliwe sibili,’ kutsho iNkosi Enkulu uJehova.
13 “‘Ngiqakeza izandla zami ngenxa yokuthi ngiyayenyanya inzuzo oyithole ngokwenza okubi futhi ngiyakwenyanya lokubulawa kwabantu okwenzakala phakathi kwakho. 14 Kambe uzaqhubeka ulesibindi yini lezandla zakho ziqinile nxa sengizokuhlasela?+ Mina Jehova sengikhulumile futhi ngizakwenza lokho. 15 Ngizalichithachithela ezizweni lisabalale emazweni wonke.+ Ukungcola kwenu ngizakuqeda.+ 16 Lizayangiswa phambi kwezizwe. Lapho-ke lizakwazi ukuthi mina nginguJehova.’”+
17 Ilizwi likaJehova laphinda lafika kimi lathi: 18 “Ndodana yomuntu, abantu bako-Israyeli sebefanana lezibi kimi. Bonke banjengekhopha, lethini, lensimbi lomnuso okusesithandweni somlilo. Sebefanana lengcekeza ephuma nxa kutshiswa insimbi.+
19 “Ngakho nanku okutshiwo yiNkosi Enkulu uJehova: ‘Sengiliqoqela phakathi kweJerusalema ngenxa yokuthi lonke selifanana lengcekeza, yona engasizi ngalutho.+ 20 Njengoba nje isiliva, lekhopha, lensimbi, lomnuso, lethini kufakwa esithandweni somlilo ukuze kutshiswe ngomlilo ovuthayo kuncibilike, lami ngizathukuthela ngiliqoqe ngolaka, besengilitshisa lincibilike.+ 21 Ngizaliqoqa lonke ngilitshise ngolaka lwami oluvuthayo,+ lincibilike phakathi kwedolobho lenu.+ 22 Njengoba isiliva sincibilika nxa sisesithandweni somlilo, lani lizancibilika phakathi kwedolobho lenu. Lapho-ke lizakwazi ukuthi mina Jehova ngithululele ulaka lwami phezu kwenu.’”
23 Ilizwi likaJehova laphinda lafika kimi lathi: 24 “Ndodana yomuntu, khuluma leJerusalema uthi, ‘Awusoze uhlanjululwe futhi izulu alisoze line kuwe ngosuku lwentukuthelo yami. 25 Abaphrofethi bakho bayahlangana babumbe amacebo okwenza okubi.+ Banjengesilwane esibhongayo sidabudabula inyamazana esiyibambileyo,+ baqeda abantu. Bathathela abantu inotho yabo lezinto zabo eziligugu. Benze abesifazana abanengi edolobheni baba ngabafelokazi. 26 Abaphristi bakho bephula umthetho wami+ futhi baqhubeka bengcolisa izindawo zami ezingcwele.+ Abehlukanisi phakathi kwezinto ezingcwele lezinto ezingekho ngcwele.+ Bayehluleka ukufundisa abantu ukuthi yikuphi okungcolileyo lokungangcolanga+ futhi abafuni lokugcina amasabatha ami. Ngingcolisiwe phakathi kwabo. 27 Abakhokheli abaphakathi kwakho banjengamaganyana adabudabula inyamazana ayibambileyo. Bahlasela abantu bababulale ukuze banothe.+ 28 Kodwa abaphrofethi bakho bagudula izono zabo ngekalaga. Babona imibono yamanga, bahlahlule lezinto ezingamanga+ besithi: “Nanku okutshiwo yiNkosi Enkulu uJehova,” uJehova yena engatshongo lutho. 29 Abantu belizwe bathathela abanye impahla yabo futhi bangamaqili.+ Baphatha kubi abayanga labaswelayo njalo bathathela umuntu wesinye isizwe impahla yakhe futhi abamahluleli kuhle.’
30 “‘Bengidinga umuntu phakathi kwabo ongavuselela umduli wamatshe kumbe ongama lapho umduli odilike khona, emele ilizwe phambi kwami ukuze lingatshabalaliswa,+ kodwa angimtholanga. 31 Yikho ngizathululela ulaka lwami phezu kwabo njalo ngizabaqeda ngentukuthelo yami evutha njengomlilo. Ngizakwehlisela phezu kwamakhanda abo isijeziso esifanele izenzo zabo,’ kutsho iNkosi Enkulu uJehova.”