UHezekheli

21 Ilizwi likaJehova laphinda lafika kimi lathi: 2 “Ndodana yomuntu, tshibilika ukhangele eJerusalema ukhulume ngezindawo ezingcwele njalo uphrofethe ngelizwe lako-Israyeli. 3 Khuluma labantu bako-Israyeli uthi, ‘Nanku okutshiwo nguJehova: “Sengiyisitha senu. Ngizakhipha inkemba yami esikhwameni sayo+ ngibulale abalungileyo labenza okubi. 4 Ngizahwatsha inkemba yami esikhwameni sayo ukuze ngibulale abalungileyo labenza okubi. Ngizabulala bonke abantu kusukela eningizimu kusiya enyakatho. 5 Bonke abantu bazakwazi ukuthi mina Jehova ngiyihwatshile inkemba yami esikhwameni sayo. Angisoze ngiyibuyisele futhi.”’+

6 “Wena ndodana yomuntu, bubula uqhaqhazele, bubula okuzwisa ubuhlungu phambi kwabo.+ 7 Nxa bengakubuza bathi, ‘Kungani ububula?’ ubatshele uthi, ‘Kungenxa yombiko ozayo.’ Uyeza sibili futhi bonke abantu bazakwesaba, lezandla zabo ziphele amandla. Abantu bonke bazahlulukelwa njalo amadolo abo azajuluka amanzi.*+ ‘Kuyeza sibili futhi kuzakwenzakala,’ kutsho iNkosi Enkulu uJehova.”

8 Ilizwi likaJehova laphinda lafika kimi lathi: 9 “Ndodana yomuntu, phrofetha uthi, ‘Nanku okutshiwo nguJehova: “Inkemba! Inkemba+ iloliwe yalolongwa! 10 Ilolelwe ukuthi ibulale abantu abanengi, yalolongwa ukuze iphazime njengombane.”’”

“Akumelanga sithokoze yini?”

“‘Kambe izadelela* intonga yendodana yami+ ngendlela edelela ngayo zonke izihlahla?

11 “‘Inkemba iphiwe omunye umuntu ukuthi ayilolonge abesebulala ngayo abantu. Iyalolwa ilolongwe ukuze iphiwe lowo ozabulala abantu.+

12 “‘Khala uhlabe umkhosi+ ndodana yomuntu ngoba isibaficile abantu bami. Isibaficile bonke abakhokheli bako-Israyeli.+ Bazadliwa yinkemba ndawonye labantu bami. Ngakho zitshaye umlenze ngenxa yosizi. 13 Sengibahlolile abantu bami.+ Manje kuzakwenzakalani nxa inkemba ingadelela intonga? Intonga izahle itshabalale ingabi khona,’+ kutsho iNkosi Enkulu uJehova.

14 “Wena ndodana yomuntu, phrofetha uqakeze izandla, ukhulume kathathu uthi, ‘Inkemba!’ Bahanqwe yinkemba ebulalayo, inkemba ezabulala abantu abanengi.+ 15 Bazaphela amandla ngenxa yokwesaba+ futhi kuzakuwa abantu abanengi emagedini edolobho. Ngizabulala abantu abanengi ngenkemba. Inkemba iphazima njengombane futhi ilolongelwe ukubulala. 16 Kayibulale isiya esandleni sokudla iphinde ibulale isiya kwesenxele. Yana loba ngaphi okukhangele khona inkemba yakho. 17 Lami ngizaqakeza izandla, ulaka lwami lubohle.+ Mina Jehova sengikhulumile.”

18 Ilizwi likaJehova laphinda lafika kimi lathi: 19 “Wena ndodana yomuntu, dweba indlela ezimbili inkemba yenkosi yeBhabhiloni ezabuya ngazo. Zonke kumele zisuke elizweni linye njalo kumele ufake ibhakane lapho umgwaqo owehlukana khona ususiya emadolobheni amabili. 20 Kumele udwebe indlela inkemba ezabuya ngayo izomelana leRabha+ yama-Amoni, udwebe leyinye indlela inkemba ezabuya ngayo izomelana leJerusalema+ yakoJuda egonjolozelwe ngemiduli emikhulu. 21 Inkosi yeBhabhiloni izakuma lapho okwehlukana khona indlela ukuze ihlahlule, lapho indlela eyehlukana khona ibe zindlela ezimbili. Izakhuhluza imitshoko yayo, ibuze izithombe zayo,* ihlole lesibindi.* 22 Okusesandleni sayo sokudla kutshengisa ukuthi kumele iye eJerusalema iyefaka izigodo zokudiliza umduli, imemezele ukuthi kubulawe abantu, kube lokuhlokoma kwempi. Kutshengisa lokuthi kumele ifake izigodo zokudiliza amagedi, kwakhiwe idundulu lokuhlasela lomduli wokuvimbezela.+ 23 Kuzakhanya angathi inkosi ihlahlule amanga kulabo abafunga kuyo.*+ Kodwa izakhumbula icala labo ibisibathumba.+

24 “Ngakho nanku okutshiwo yiNkosi Enkulu uJehova: ‘Lenze icala lenu lakhunjulwa ngokuveza egcekeni iziphambeko zenu lokwenza izono zenu zibonakale kukho konke ebelikwenza. Khathesi njengoba selikhunjuliwe, lizathathwa ngenkani.’

25 “Kodwa usuku lwakho selufikile wena mkhokheli wako-Israyeli+ owenza okubi lolimele kakhulu. Usuku lokujeziswa kwakho kokucina selufikile. 26 Nanku okutshiwo yiNkosi Enkulu uJehova: ‘Khipha iqhiye wethule lomqhele.+ Lokhu akusoze kuhlale kunje.+ Phakamisa ophansi,+ wehlise ophakemeyo.+ 27 Ngizawuchitha, ngizawuchitha, ngizawuchitha umbuso!* Awusoze uphiwe omunye umuntu kuze kufike lowo olelungelo lokuwuthola+ futhi nguye engizamupha wona.’+

28 “Wena ndodana yomuntu, phrofetha uthi, ‘Nanku okutshiwo yiNkosi Enkulu uJehova ngama-Amoni kanye lokuthuka kwawo.’ Watshele uthi, ‘Inkemba! Inkemba isihwatshiwe ukuze ibulale abantu, ilolongelwe ukubulala lokuthi iphazime njengombane. 29 Lanxa abahlahlulayo phakathi kwenu bebona imibono yamanga futhi behlahlula amanga ngani, lizabulawa izidumbu zenu zibe yinqumbi. Usuku lwabantu ababi selufikile, isikhathi sokujeziswa kwabo kokucina sesifikile. 30 Buyisela inkemba esikhwameni sayo. Lina ngizalahlulela endaweni elivela kuyo,* elizweni elidabuka kulo. 31 Ngizakwehlisela intukuthelo yami phezu kwenu futhi ulaka lwami luzalitshisa njengomlilo. Ngizalinikela ezandleni zabantu abalolunya, abazingcitshi zokutshabalalisa.+ 32 Lizakuba zinkuni zokubasa umlilo+ njalo igazi lenu lizachitheka elizweni. Alisoze liphinde likhunjulwe ngoba mina Jehova ngikhulumile.’”