AmaNani
12 UMiriyamu lo-Aroni baqalisa ukukhuluma kubi ngoMosi ngenxa yomfazi ongumKhushi ayemthethe, phela wayethethe inkosikazi engumKhushi.+ 2 Babesithi, “Kambe uJehova ukhulume esebenzisa uMosi kuphela yini? Angithi lathi uyasisebenzisa.”+ UJehova wayebalalele bekhuluma.+ 3 UMosi wayeyindoda emnene* kulabo bonke abantu+ emhlabeni.
4 UJehova wahle wakhuluma loMosi lo-Aroni loMiriyamu wathi: “Phumani lobathathu liye etendeni lokuhlangana.” Ngakho bobathathu baphuma bayakhona. 5 UJehova wehla ngensika yeyezi+ njalo wama emnyango wetende, wasebiza u-Aroni loMiriyamu futhi bobabili baya phambili. 6 Wasesithi kubo: “Ngicela lizwe engikutshoyo. Aluba ubekhona umphrofethi kaJehova phakathi kwenu, bengizaziveza kuye embonweni+ ukuze angazi njalo bengizakhuluma laye ephutsheni.+ 7 Kodwa akunjalo ngenceku yami uMosi. Indlu yami yonke ngiyibeke ezandleni zakhe.*+ 8 Ngikhuluma laye ubuso ngobuso,*+ ngendlela ecacileyo hatshi ephicayo futhi uJehova uyabonakala kuye. Manje lisithatha ngaphi isibindi sokukhuluma kubi ngenceku yami uMosi?” 9 Ngakho uJehova wabathukuthelela kakhulu wasesuka kubo. 10 Iyezi lasuka phezu kwetende njalo uMiriyamu watshaywa ngobulephero obumhlophe njengongqwaqwane.+ U-Aroni wathi etshibilika ekhangela uMiriyamu wabona ukuthi wayeselobulephero.+ 11 U-Aroni wahle wakhuluma loMosi wathi: “Ngiyakuncenga nkosi yami, ngicela ungasibeki icala ngesono lesi esisenzileyo! Senze ubuthutha. 12 Ngicela ungavumeli ukuthi uMiriyamu aqhubeke enjengofileyo, ozelwe elenyama edlekileyo komunye umhlubulo!” 13 UMosi waqala ukukhala kuJehova wathi: “Awu Nkulunkulu ngicela umelaphe! Ngiyacela!”+
14 UJehova wasemphendula uMosi wathi: “Kambe nxa uyise ubengamkhafulela ebusweni ubengasoze athwale ihlazo okwamalanga ayisikhombisa yini? Kahlaliswe yedwa ngaphandle kwezihonqo+ okwamalanga ayisikhombisa, ngemva kwalokho usengabuyiselwa.” 15 Ngakho uMiriyamu wahlaliswa yedwa phandle kwezihonqo okwamalanga ayisikhombisa,+ njalo abantu abazange baqhubeke ngohambo uMiriyamu waze wabuyiselwa ezihonqweni. 16 Ngemva kwalokho abantu basuka eHazerothi+ bayakhempa enkangala yePharani.+