IVangeli Elabhalwa NguMathewu
15 Ngemva kwalokho abaFarisi lababhali+ beza kuJesu bevela eJerusalema bafika bathi: 2 “Kungani abafundi bakho besephula isiko labokhokho? Ngokwesibonelo abagezi izandla* nxa besidla.”+
3 Yena wabaphendula wathi: “Lina kungani lisephula umlayo kaNkulunkulu ngenxa yesiko lenu?+ 4 Ngokwesibonelo uNkulunkulu wathi, ‘Hlonipha uyihlo lonyoko,’+ waphinda wathi, ‘Lowo okhuluma kubi ngoyise kumbe ngonina* kumele abulawe.’+ 5 Kodwa lina lithi, ‘Loba ngubani othi kuyise kumbe kunina: “Loba kuyini engilakho ebengingakuncedisa ngakho sengikunikele kuNkulunkulu,”+ 6 akumelanga amhloniphe ngitsho uyise.’ Ngakho selenze ilizwi likaNkulunkulu laba yinto engelancedo ngenxa yesiko lenu.+ 7 Lina bazenzisi, u-Isaya wayeqinisile sibili lapho ephrofetha ngani esithi:+ 8 ‘Abantu laba bangidumisa ngezindebe zabo* kuphela kodwa inhliziyo zabo zikhatshana kakhulu lami. 9 Akuncedi ngalutho ukuthi baqhubeka bengikhonza ngoba bafundisa izinto ezithethwe emilayweni yabantu.’”+ 10 Ngemva kwalokho wabizela abantu eduze wathi kubo: “Lalelani lizwisise:+ 11 Okungena emlonyeni womuntu ayisikho okumngcolisayo, kodwa okuphuma emlonyeni wakhe yikho okumngcolisayo.”+
12 Abafundi basebemlanda bathi kuye: “Uyakwazi yini ukuthi abaFarisi bacaphukile* besizwa okukhulumileyo?”+ 13 Wabaphendula wathi: “Loba yisiphi isilimo esingahlanyelwanga nguBaba osezulwini sizasitshunwa. 14 Batshiyeni benjalo, bangabakhokheli abayiziphofu. Manje nxa isiphofu sikhokhela esinye isiphofu, zombili zizawela egodini.”+ 15 UPhetro wasesithi: “Sichasisele umzekeliso owukhulumileyo.” 16 Yena wathi: “Kanti lani lilokhu lingazwisisi?+ 17 Alikwazi yini ukuthi konke okungena emlonyeni kudlula esiswini besekusiyalahlwa esambuzini? 18 Kodwa zonke izinto eziphuma emlonyeni zivela enhliziyweni, izinto lezo yizo ezingcolisa umuntu.+ 19 Ngokwesibonelo enhliziyweni kuphuma imicabango emibi:+ Ukubulala, lokufeba,* lobusela, lokufakaza amanga, lokuthuka. 20 Lezi yizo izinto ezingcolisa umuntu kodwa ukudla ngezandla ezingagezwanga* akumngcolisi umuntu.”
21 UJesu wasuka lapho waya emangweni weThire leSidoni.+ 22 Kwasekufika owesifazana weFenikhiya owayehlala kulowomango wamemeza wathi: “Woba lesihawu kimi Nkosi, Ndodana kaDavida. Indodakazi yami iledimoni eliyihlukuluzayo.”+ 23 Kodwa yena wathula zwi, kazange amphendule. Ngakho abafundi bakhe bamlanda bathi kuye: “Mtshele ahambe ngoba ulokhu esilandela ememeza.” 24 Waphendula wathi: “Kangithunywanga kuloba ngubani ngaphandle kwasezimvini ezilahlekileyo zesizwe sako-Israyeli.”+ 25 Kodwa owesifazana wasondela wamkhothamela wathi: “Nkosi, nginceda bo!” 26 Wamphendula wathi: “Akuqondanga ukuthatha isinkwa sabantwana usiphosele imidlwane.” 27 Owesifazana wathi: “Kunjalo Nkosi, kodwa phela lemidlwane iyadla imvuthu ezikhithika etafuleni yabanikazi bayo.”+ 28 UJesu wasemphendula wathi: “Ukholo lwakho lukhulu wena mama! Lokho okufisayo kakwenzakale kuwe.” Indodakazi yakhe yahle yasila ngalesosikhathi.
29 Esuka lapho uJesu waya duze koLwandle lweGalile,+ wasekhwela entabeni wahlala phansi. 30 Walandwa ngamaxuku amakhulu abantu. Babuya labagogekileyo, labakhubazekileyo, labayiziphofu, labayizimungulu labanye abanengi, bababeka phambi kwakhe wasebelapha.+ 31 Ngakho abantu bonke bamangala bebona abayizimungulu sebekhuluma, abakhubazekileyo sebesilile, abagogekileyo sebehamba, labayiziphofu sebebona, basebekhazimulisa uNkulunkulu ka-Israyeli.+
32 UJesu wabiza abafundi bakhe wathi kubo: “Ngiyabazwela abantu+ laba ngoba sebehlale lami amalanga amathathu bengazange badle lutho. Angifuni ukubatshela ukuthi bahambe bona belambile ngoba bangaphela amandla endleleni.”+ 33 Kodwa abafundi bakhe bathi kuye: “Siyasithatha ngaphi isinkwa esingenela abantu abanengi kangaka+ thina sikhatshana lemizi?” 34 Sebetsho njalo uJesu wathi kubo: “Lilezinkwa ezingaki?” Bona bathi: “Eziyisikhombisa lenhlanzi ezincane ezilutshwana.” 35 Wathi esetshele abantu ukuthi bahlale phansi, 36 wathatha izinkwa lezo eziyisikhombisa lenhlanzi wasebonga uNkulunkulu. Ngemva kwalokho wazihlephuna wazinika abafundi, abafundi basebezinika abantu.+ 37 Bonke badla basutha, abafundi basebebutha iziqephu ezazisele, bagcwalisa amabhasikiti amakhulu* ayisikhombisa.+ 38 Abadlayo kwakungamadoda angu-4 000 kanye labesifazana labantwana abancane. 39 UJesu wathi esetshele abantu ukuthi bahambe, wangena esikepeni waya endaweni okuthiwa yiMagadani.+