KuFilimoni
1 Mina Phawuli engiyisibotshwa+ ngenxa kaKhristu uJesu kanye loThimothi+ umfowethu, kuwe Filimoni othandekayo esisebenza sonke, 2 lodadewethu u-Afiya lo-Akhiphu+ isotsha elikanye lathi, lasebandleni elibuthana emzini wakho:+
3 Umusa omkhulu lokuthula okuvela kuNkulunkulu uBaba wethu laseNkosini uJesu Khristu akube kini.
4 Ngihlala ngimbonga uNkulunkulu wami nxa ngikuqamba emithandazweni yami,+ 5 njengoba ngiqhubeka ngisizwa ngokholo lwakho langendlela oyithanda ngayo iNkosi uJesu labo bonke abangcwele. 6 Ngithandazela ukuthi ukholo olalo wena kanye labanye lukwenze unanzelele konke okuhle esilakho ngenxa kaKhristu. 7 Ngathokoza kakhulu futhi ngaduduzeka ngisizwa ngothando lwakho ngoba inhliziyo zabangcwele zivuselelwe ngenxa yakho mfowethu.
8 Ngakho lanxa kuKhristu ngilenkululeko enkulu yokukhuluma futhi ngisenelisa ukukutshela ukuthi wenze okufaneleyo, 9 ngibona kungcono ukuthi ngikuncenge ngenxa yothando olalo, njengoba mina Phawuli ngiyindoda endala futhi ngibotshelwe uKhristu uJesu. 10 Ngiyamncengela umntanami u-Onesimu+ engaba nguyise+ ngisejele. 11 Wayengelancedo kuwe kodwa khathesi useluncedo kimi lakuwe. 12 Sengimbuyisela kuwe lowo engimthanda kakhulu.
13 Ngiyafisa ukuthi aqhubeke elami lapha engincedisa esikhundleni sakho njengoba ngisejele ngibotshelwe izindaba ezinhle.+ 14 Loba kunjalo, angifuni ukwenza loba yini ungangiphanga imvumo ukuze isenzo leso esihle ungasenzi ubanjwa ngamandla kodwa usenze ngokuthanda kwakho.+ 15 Mhlawumbe yikho wakutshiya okwesikhatshana ukuze uphinde ube laye kokuphela 16 engaseyiso sigqili+ kodwa esengcono kulesigqili, esengumfowethu othandekayo.+ Ngiyamthanda okwamagama kodwa wena nguwe omthanda kakhulu, enyameni laseNkosini. 17 Yikho nxa ungibona ngingumngane wakho, mamukele ngazo zombili ngendlela obuzangamukela ngayo. 18 Phezu kwalokho, nxa kukhona akonela khona loba nxa elesikwelede sakho, kuthonise kimi. 19 Mina Phawuli ngibhala ngesami isandla ngithi ngizakubhadala konke akukweleda khona. Singasabali ukuthi wena ungikweleda ukuphila kwakho uqobo. 20 Mfowethu, ngiyakucela ukuthi ungincede ngalokhu njengoba simunye leNkosi, vuselela inhliziyo yami njengoba umunye loKhristu.
21 Ngikwazi mhlophe ukuthi uzangilalela, yikho ngikubhalela nje ngisazi ukuthi uzakwenza okwedlula engikutshoyo. 22 Kodwa ngaphezu kwalokho, ngilungisela lendawo yokuhlala ngoba ngilethemba lokuthi ngizabuyiselwa kini*+ ngenxa yemithandazo yenu.
23 Uyakubingelela u-Ephafrasi+ engibotshwe laye futhi esimanyeneyo kuKhristu uJesu, 24 loMakho, lo-Aristakhu,+ loDemasi+ loLukha,+ amadoda engisebenza lawo ayakubingelela.