ULEVI

1 UJehova wasebiza uMosi wakhuluma laye esetendeni lokuhlangana+ wathi: 2 “Khuluma labako-Israyeli* uthi kubo, ‘Nxa loba ngubani phakathi kwenu eletha umnikelo kuJehova ovela ezifuyweni, kumele umnikelo lo awuthathe emhlambini wenkomo loba owezimvu kumbe owembuzi.+

3 “‘Nxa umnikelo wakhona kungumnikelo wokutshiswa ovela emhlambini wenkomo, kumele alethe ijongosi elingelasici.+ Kumele alilethe ngokuthanda kwakhe+ phambi kukaJehova emnyango wetende lokuhlangana. 4 Kumele abeke isandla sakhe phezu kwekhanda lejongosi lomnikelo wokutshiswa njalo umnikelo lo uzakwamukelwa ukuze ahlawulelwe.

5 “‘Ngemva kwalokho ijongosi lelo kumele lihlatshwe phambi kukaJehova futhi amadodana ka-Aroni, abaphristi+ azaletha igazi lalo abeselifafaza kuwo wonke amacele e-alithare+ elisemnyango wetende lokuhlangana. 6 Umnikelo lo wokutshiswa kumele uhlinzwe ubusuqunywaqunywa ube ngamaqatha amakhulu.+ 7 Amadodana ka-Aroni, abaphristi kumele afake umlilo e-alithareni+ njalo afake lenkuni kuwo. 8 Abaphristi laba bazabeka kuhle amaqatha omnikelo+ ndawonye lenhloko yawo kanye lamafutha ezinso enkunini ezisemlilweni ose-alithareni. 9 Amathumbu awo lamangqina kumele kugeziswe ngamanzi njalo umphristi kumele awutshise wonke uthunqe phezu kwe-alithare ube ngumnikelo wokutshiswa, umnikelo oloqhatshi olumnandi otshiselwa uJehova ngomlilo.+

10 “‘Nxa umnikelo wakhe ungumnikelo wokutshiswa ovela emhlambini kungaba ngowemvana ezinduna kumbe amazinyane embuzi,+ kumele alethe eliduna elingelasici.+ 11 Umnikelo lo kumele uhlatshelwe eceleni le-alithare elisenyakatho phambi kukaJehova njalo amadodana ka-Aroni, abaphristi azafafaza igazi lomnikelo lo kuwo wonke amacele e-alithare.+ 12 Kumele uqunywaqunywe ube ngamaqatha amakhulu njalo umphristi uzawuthatha kanye lenhloko lamafutha ezinso akufake kuhle phezu kwenkuni ezisemliweni ose-alithareni. 13 Amathumbu lamangqina kumele kugeziswe ngamanzi njalo umphristi kumele alethe wonke umnikelo, awutshise uthunqe phezu kwe-alithare. Ungumnikelo wokutshiswa, umnikelo oloqhatshi olumnandi otshiselwa uJehova ngomlilo.

14 “‘Kodwa nxa anganikela ngenyoni ukuthi zibe ngumnikelo wokutshiswa oya kuJehova, kumele anikele ngamajuba kumbe ngabantwana benkwilimba.+ 15 Umphristi uzaletha inyoni leyo e-alithareni abeseyibhoboza entanyeni. Uzatshisa inyoni leyo ithunqe phezu kwe-alithare kodwa igazi layo lonke kumele lithululelwe eceleni kwe-alithare. 16 Kumele akhiphe isidlelo sayo acuthe lensiba zayo, abesephosela izinto lezi eceleni elisempumalanga kwe-alithare, lapho okulomlotha* khona.+ 17 Kumele idatshulwe phakathi laphakathi kwempiko zayo zombili kodwa akumelanga yehlukaniswe ibe zingxenye ezimbili. Ngemva kwalokho umphristi kumele ayitshise ithunqe e-alithareni phezu kwenkuni ezisemlilweni. Ingumnikelo wokutshiswa, umnikelo oloqhatshi olumnandi otshiselwa uJehova ngomlilo.

2 “‘Nxa umuntu eletha umnikelo wamabele+ kuJehova, umnikelo wakhe kumele ube ngowefulawa ecolekileyo futhi kumele ayithele amafutha afake lenhlaka yokwenza impepha* kuyo.+ 2 Kumele awulethe kumadodana ka-Aroni abaphristi. Umphristi uzacupha ifulawa ecolekileyo egcwala isandla ehlanganiswe lamafutha kanye layo yonke inhlaka yawo yokwenza impepha, abesekutshisa kuthunqe phezu kwe-alithare, kube yingxenye emela* wonke umnikelo wakhona,+ umnikelo oloqhatshi olumnandi otshiselwa uJehova ngomlilo. 3 Loba yiwuphi umnikelo wamabele oseleyo uzakuba ngoka-Aroni lamadodana akhe,+ ube yinto engcwele kakhulu+ evela eminikelweni etshiselwa uJehova ngomlilo.

4 “‘Nxa uzaletha umnikelo wamabele obhekhwe eziko,* kumele ube ngowefulawa ecolekileyo, izinkwa ezingelamvubelo eziyisigombolozi ezihlanganiswe lamafutha, kumbe izinkwa eziyisipatalala ezingelamvubelo ezigcotshwe amafutha.+

5 “‘Nxa umnikelo wakho kungumnikelo wamabele obhekhwe ngomganu wensimbi,+ kumele ube ngowefulawa ecolekileyo engelamvubelo njalo ehlanganiswe lamafutha. 6 Kumele uwuhlephuhlephune ubusuthela amafutha kuwo.+ Lo ngumnikelo wamabele.

7 “‘Nxa umnikelo wakho ungumnikelo wamabele okhanzingwe ngepani kumele wenziwe ngefulawa ecolekileyo elamafutha. 8 Umnikelo wamabele owenziwe ngezinto lezi kumele uwulethe kuJehova njalo uzanikwa umphristi abesewusondeza eduze kwe-alithare. 9 Umphristi uzacupha ingxenye ethile emnikelweni lowo ibe yingxenye emela* wonke umnikelo wakhona,+ abeseyitshisa ithunqe phezu kwe-alithare ibe ngumnikelo oloqhatshi olumnandi otshiselwa uJehova ngomlilo.+ 10 Loba yiwuphi umnikelo wamabele oseleyo uzakuba ngoka-Aroni lamadodana akhe, ube yinto engcwele kakhulu evela eminikelweni etshiselwa uJehova ngomlilo.+

11 “‘Umnikelo wamabele eliwuletha kuJehova akumelanga ufakwe imvubelo,+ ngoba akumelanga litshise ifulawa elemvubelo kumbe uluju kube ngumnikelo otshiselwa uJehova ngomlilo.

12 “‘Izinto lezi lingaziletha kuJehova zibe ngumnikelo wezithelo zokuqala+ kodwa akumelanga zilethwe e-alithareni ukuthi zibe luqhatshi olumnandi.

13 “‘Yonke iminikelo yamabele oyenzayo kumele ifakwe isawudo njalo akumelanga uyekele ukufaka isawudo lesivumelwano sikaNkulunkulu wakho emnikelweni wakho wamabele. Yonke nje iminikelo oyenzayo kumele ifakwe isawudo.+

14 “‘Nxa uletha kuJehova umnikelo wamabele wezithelo ezivuthwa kuqala, kumele ulethe amabele amatsha* akhanzingwe ngomlilo, izikhwebu ezingacholekanga zaba yimpuphu, kube ngumnikelo wamabele wezithelo ezivuthwe kuqala.+ 15 Kumele uwufake amafutha kanye lenhlaka yokwenza impepha.* Lo ngumnikelo wamabele. 16 Umphristi uzathatha amanye amabele angacholekanga aba yimpuphu kanye lamafutha layo yonke inhlaka yakhona yokwenza impepha akutshise kube yingxenye emela* wonke umnikelo,+ kube ngumnikelo otshiselwa uJehova ngomlilo.

3 “‘Nxa umnikelo wakhe ungumhlatshelo wobudlelwano*+ njalo nxa enikela ngenkomo ayithethe emhlambini kungelani lokuthi ngenduna kumbe ngensikazi, kumele alethe isifuyo esingelasici phambi kukaJehova. 2 Kumele abeke isandla sakhe phezu kwekhanda lesifuyo azanikela ngaso njalo umnikelo lo uzahlatshelwa emnyango wetende lokuhlangana. Amadodana ka-Aroni abaphristi azathatha igazi alifafaze kuwo wonke amacele e-alithare. 3 Kumele alethe enye ingxenye yomhlatshelo wobudlelwano ibe ngumnikelo otshiselwa uJehova ngomlilo.+ Uzaletha idanga*+ elembese amathumbu lawo wonke amafutha asemathunjini, 4 lezinso ezimbili lamafutha azo aseduze lezinqe. Nxa esekhipha izinso, uzakhipha lamafutha aphezu kwesibindi.+ 5 Amadodana ka-Aroni azatshisa izinto lezi zithunqe e-alithareni phezu komnikelo wokutshiswa obekwe enkunini ezisemlilweni,+ kube ngumnikelo woqhatshi olumnandi otshiselwa uJehova ngomlilo.+

6 “‘Nxa enikela umhlatshelo wobudlelwano oya kuJehova awuthethe emhlambini wakhe wezimvu kumbe owembuzi, kumele alethe isifuyo esingelasici kungelani lokuthi ngesiduna kumbe ngesisikazi.+ 7 Nxa enikela ngemvana enduna, kumele ayilethe phambi kukaJehova. 8 Kumele abeke isandla sakhe phezu kwekhanda lesifuyo azanikela ngaso njalo umnikelo lo uzahlatshelwa phambi kwetende lokuhlangana. Amadodana ka-Aroni azathatha igazi alifafaze kuwo wonke amacele e-alithare. 9 Kumele alethe amafutha awathethe emhlatshelweni wobudlelwano abe ngumnikelo otshiselwa uJehova ngomlilo.+ Uzakhipha wonke umsila ononileyo awuqumele eduze komgogodla, akhiphe ledanga* elembese amathumbu lawo wonke amafutha asemathunjini, 10 lezinso ezimbili lamafutha azo aseduze lezinqe. Nxa esekhipha izinso, uzakhipha lamafutha aphezu kwesibindi.+ 11 Umphristi uzatshisa izinto lezi zithunqe phezu kwe-alithare zibe njengokudla,* umnikelo otshiselwa uJehova ngomlilo.+

12 “‘Nxa ezanikela ngembuzi, kumele ayilethe phambi kukaJehova. 13 Kumele abeke isandla sakhe phezu kwekhanda layo njalo umnikelo lo uzahlatshelwa phambi kwetende lokuhlangana. Amadodana ka-Aroni azathatha igazi alifafaze kuwo wonke amacele e-alithare. 14 Nanku azakuletha ukuthi kube ngumnikelo otshiselwa uJehova ngomlilo, idanga* elembese amathumbu, lawo wonke amafutha asemathunjini,+ 15 lezinso ezimbili lamafutha azo aseduze lezinqe. Nxa esekhipha izinso uzakhipha lamafutha aphezu kwesibindi. 16 Umphristi uzatshisa izinto lezi zithunqe phezu kwe-alithare zibe njengokudla,* umnikelo oloqhatshi olumnandi otshiswa emlilweni. Wonke amafutha ngakaJehova.+

17 “‘Lingaqali ukudla amafutha loba igazi.+ Lo ngumlayo ozahlala ukhona kuzizukulwane zenu kuzo zonke indawo elihlala kuzo.’”

4 UJehova wasesithi kuMosi: 2 “Tshela abako-Israyeli uthi, ‘Nanku okumele kwenziwe nxa umuntu angenza isono engahlosanga,+ enze loba yini uJehova athe akumelanga yenziwe:

3 “‘Nxa umphristi ogcotshiweyo+ angenza isono+ abesebangela ukuthi abantu babe lecala, kumele alethe ijongosi elingelasici kuJehova libe ngumnikelo wesono asenzileyo.+ 4 Kalethe ijongosi lelo phambi kukaJehova emnyango wetende lokuhlangana,+ abesebeka isandla sakhe ekhanda lalo futhi kumele alihlabe phambi kukaJehova.+ 5 Ngemva kwalokho umphristi ogcotshiweyo+ uzathatha elinye igazi lejongosi lelo angene lalo etendeni lokuhlangana; 6 njalo umphristi uzagxamuza umunwe wakhe egazini lelo,+ afafaze igazi lakhona kasikhombisa+ phambi kukaJehova, phambi kwekhetheni lendawo engcwele. 7 Kanti njalo umphristi uzaninda elinye igazi empondweni ze-alithare lokutshisela impepha enukelelayo,+ eliphambi kukaJehova etendeni lokuhlangana; elinye lonke igazi lejongosi uzalithela phansi kwe-alithare lomnikelo wokutshiswa+ elisemnyango wetende lokuhlangana.

8 “‘Ngemva kwalokho uzakhipha wonke amafutha ejongosi lomnikelo wesono kanye ledanga* elembese amathumbu lamafutha asemathunjini, 9 lezinso ezimbili lamafutha azo aseduze lezinqe. Nxa esekhipha izinso, uzakhipha lamafutha aphezu kwesibindi.+ 10 Kumele kufanane lalokho okukhitshwe ejongosini lomhlatshelo wobudlelwano+ njalo umphristi uzakutshisa kuthunqe phezu kwe-alithare.

11 “‘Kodwa isikhumba sejongosi lelo lenyama yalo, lenhloko, lamangqina, lamathumbu kanye lomswane,+ 12 yonke nje inyama yalo, kumele athi ikhitshelwe ngaphandle kwezihonqo endaweni ehlanzekileyo lapho okuchithelwa khona umlotha, abeseyitshisa phezu kwenkuni ezisemlilweni.+ Kumele itshiselwe lapho okuchithelwa khona umlotha.

13 “‘Nxa bonke abako-Israyeli bangaba lecala ngenxa yesono abasenze bengahlosanga+ kodwa ibandla langananzeleli ukuthi benze lokho uJehova athe bangakwenzi,+ 14 besekusenzakala ukuthi isono leso saziwe, ibandla kumele lithathe ijongosi elizakuba ngumnikelo wesono njalo kumele lilethwe phambi kwetende lokuhlangana. 15 Abadala bebandla lako-Israyeli bazabeka izandla zabo phezu kwekhanda lejongosi lelo phambi kukaJehova njalo lizahlatshelwa phambi kukaJehova.

16 “‘Ngemva kwalokho umphristi ogcotshiweyo uzaletha elinye igazi lejongosi lelo etendeni lokuhlangana. 17 Kumele agxamuze umunwe wakhe egazini lelo, afafaze igazi lakhona kasikhombisa phambi kukaJehova, phambi kwekhetheni.+ 18 Ngemva kwalokho umphristi uzaninda elinye igazi empondweni ze-alithare+ eliphambi kukaJehova etendeni lokuhlangana, elinye lonke igazi lejongosi uzalithela phansi kwe-alithare lomnikelo wokutshiswa elisemnyango wetende lokuhlangana.+ 19 Uzakhipha wonke amafutha alo, abasewatshisa athunqe phezu kwe-alithare.+ 20 Ijongosi lelo kumele alenze lokho akwenze kwelinye ijongosi lomnikelo wesono. Lokhu yikho okumele akwenze kulo njalo umphristi uzabahlawulela+ besebethethelelwa. 21 Uzakuthi ijongosi lelo likhitshelwe ngaphandle kwezihonqo, abeselitshisa ngendlela atshise ngayo ijongosi lokuqala.+ Lo ngumnikelo wesono owenzelwa ibandla.+

22 “‘Nxa umkhokheli+ angenza isono engahlosanga, enze loba yiphi into uJehova uNkulunkulu wakhe athe akumelanga yenziwe njalo atholakale elecala, 23 kumbe nxa angananzelela ukuthi wenze isono ngokwephula umlayo, kumele alethe umnikelo wezinyane lembuzi eliduna elingelasici. 24 Uzabeka isandla sakhe phezu kwekhanda lezinyane lembuzi njalo alihlabe phambi kukaJehova endaweni okuhlatshelwa kuyo umnikelo wokutshiswa.+ Lo ngumnikelo wesono. 25 Umphristi uzathatha elinye igazi lomnikelo wesono ngomunwe wakhe alininde empondweni+ ze-alithare lomnikelo wokutshiswa; elinye lonke igazi lezinyane lelo uzalithela phansi kwe-alithare lomnikelo wokutshiswa.+ 26 Wonke amafutha alo uzawatshisa athunqe phezu kwe-alithare njengamafutha omhlatshelo wobudlelwano,+ umphristi uzamhlawulela isono sakhe, abesethethelelwa.

27 “‘Nxa loba ngubani elizweni angenza isono engahlosanga, abe lecala lokwenza loba yini uJehova athe ingenziwa,+ 28 kumbe nxa angananzelela ukuthi wenze isono, kumele alethe izinyane lembuzi elisikazi elingelasici libe ngumnikelo wesono asenzileyo. 29 Kumele abeke isandla sakhe phezu kwekhanda lezinyane lomnikelo wesono, abesehlaba umnikelo wesono lapho okuhlatshelwa khona umnikelo wokutshiswa.+ 30 Umphristi uzathatha elinye igazi lawo ngomunwe wakhe alininde empondweni ze-alithare lomnikelo wokutshiswa; elinye lonke igazi uzalithela phansi kwe-alithare.+ 31 Uzakhipha wonke amafutha alo+ ngendlela okukhitshwa ngayo amafutha omhlatshelo wobudlelwano,+ umphristi uzawatshisa athunqe e-alithareni, kube ngumnikelo oloqhatshi olumnandi kuJehova njalo umphristi uzamhlawulela isono sakhe, abesethethelelwa.

32 “‘Kodwa nxa umnikelo wakhe wesono kuyimvana, kumele alethe imvana ensikazi engelasici. 33 Kumele abeke isandla sakhe phezu kwekhanda lemvana yomnikelo wesono njalo ayihlabe ibe ngumnikelo wesono lapho okuhlatshelwa khona umnikelo wokutshiswa.+ 34 Umphristi uzathatha elinye igazi lomnikelo wesono ngomunwe wakhe alininde empondweni ze-alithare lomnikelo wokutshiswa,+ elinye lonke igazi eliseleyo uzalithela phansi kwe-alithare. 35 Uzakhipha wonke amafutha alo ngendlela okukhitshwa ngayo amafutha emvana enduna eyomhlatshelo wobudlelwano. Kanti njalo umphristi uzawatshisa athunqe e-alithareni phezu kweminikelo etshiselwa uJehova ngomlilo+ futhi umphristi uzamhlawulela isono sakhe, abesethethelelwa.+

5 “‘Nxa umuntu angabona othile esenza isono kumbe azwe lokho akwenzileyo, abesesizwa kumenyezelwa ukuthi kudingakala ubufakazi*+ kodwa ayekele ukuyabika uyabe eselesono njalo kuzamele ajeziswe ngenxa yecala lakhe.

2 “‘Kumbe nxa umuntu engabamba loba yini engcolileyo kungaba yisidumbu senyamazana yeganga engcolileyo, esenyamazana efuywayo engcolileyo kumbe esesinanakazana* esingcolileyo+ uyabe esengcolile njalo elecala lanxa engananzeleli. 3 Kumbe nxa umuntu engathinta loba yini engcolileyo+ emuntwini engananzeleli, loba yini engcolileyo engamenza angcole, abesesazi ngakho, uyabe eselecala.

4 “‘Kumbe nxa umuntu angenza iwala afunge ukuthi uzakwenza okuthile kungaba ngokuhle loba okubi, loba yini nje afunge ukuyenza futhi ekwenze engananzeleli, abesebona ukuthi ugijimele ukufunga uyabe eselecala.*+

5 “‘Nxa angaba lecala lokwenza loba yini ezintweni lezi kumele avume, atsho ukuthi woneni.+ 6 Kumele alethe lomnikelo wecala kuJehova ngenxa yesono asenzileyo.+ Uzaletha isifuyo esisikazi esivela emhlambini wakhe, kungaba yimvana ensikazi kumbe izinyane lembuzi elisikazi libe ngumnikelo wesono. Ngemva kwalokho umphristi uzamhlawulela isono sakhe.

7 “‘Kodwa nxa engenelisi ukuthola imvu kumele alethe amajuba amabili kuJehova kumbe abantwana benkwilimba ababili+ kube ngumnikelo wakhe wecala ngenxa yesono asenzileyo, okunye kube ngumnikelo wesono okunye kube ngumnikelo wokutshiswa.+ 8 Kumele alethe izinto lezi kumphristi, umphristi uzakwethula eyokuqala ibe ngumnikelo wesono njalo uzayibhoboza entanyeni kodwa angatshuphuni ikhanda layo. 9 Uzafafaza elinye igazi lomnikelo wesono eceleni kwe-alithare kodwa elinye eliseleyo uzalithululela phansi kwe-alithare.+ Lo ngumnikelo wesono. 10 Uzanikela enye yakhona ngendlela okunikelwa ngayo+ umnikelo wokutshiswa njalo umphristi uzamhlawulela isono asenzileyo, abesethethelelwa.+

11 “‘Nxa owenze isono engenelisi ukuthola amajuba amabili kumbe abantwana benkwilimba ababili, kumele alethe umnikelo wefulawa ecolekileyo eyingxenye ye-efa*+ eyodwa etshumini, yikho okuzakuba ngumnikelo wesono. Akumelanga afake amafutha loba inhlaka yokwenza impepha kuyo ngoba ingumnikelo wesono. 12 Uzayiletha kumphristi njalo umphristi uzacupha egcwala isandla ibe yingxenye emela* wonke umnikelo wakhona, abeseyitshisa ithunqe e-alithareni phezu kweminikelo etshiselwa uJehova ngomlilo. Lo ngumnikelo wesono. 13 Umphristi uzamhlawulela isono asenzileyo kulezi eziqanjiweyo, abesethethelelwa.+ Okuseleyo emnikelweni lo kuzakuba ngokomphristi+ njengalokho okwenziwa emnikelweni wamabele.’”+

14 UJehova waqhubeka ekhuluma loMosi wathi: 15 “Nxa umuntu esuke wangathembeki wona izinto zikaJehova ezingcwele+ engananzeleli, kumele athathe inqama engelasici emhlambini wakhe ayilethe kuJehova ibe ngumnikelo wecala.+ Intengo yayo yamashekheli* esiliva kumele ihambelane leshekheli yendawo engcwele.*+ 16 Uzabhadalela isono asenzileyo esimayelana lezinto zendawo engcwele njalo uzakwengezelela ingxenye eyodwa kwezinhlanu kuleyombadalo.+ Kumele anike umphristi inqama yomnikelo wecala ukuze amhlawulele+ ngayo, abesethethelelwa.+

17 “Nxa umuntu angona enze loba yiphi into uJehova athe akumelanga yenziwe, uyabe eselecala njalo uzajeziswa lanxa elenze engananzeleli.+ 18 Kumele athathe inqama engelasici emhlambini wakhe ayilethe kumphristi futhi kumele ihambelane lembadalo efunekayo, ibe ngumnikelo wecala.+ Ngemva kwalokho umphristi uzamhlawulela icala alenze engazi, abesethethelelwa. 19 Lo ngumnikelo wecala. Uyabe elecala sibili ngoba wonele uJehova.”

6 UJehova waqhubeka ekhuluma loMosi wathi: 2 “Nxa umuntu angona njalo angathembeki kuJehova+ ngokuqila umakhelwane wakhe mayelana lalokho ambambise khona kumbe lokho amgcinise khona,+ loba nxa angaqila kumbe adlelezele umakhelwane wakhe, 3 loba nxa angathola okuthile okulahlekileyo abeseqamba amanga ngakho, kumbe nxa angenza loba yisiphi isono esinjalo abesefunga eqamba amanga,+ nanku okumele akwenze: 4 Nxa angona abesetholakala elecala kumele abuyisele lokho akutshontshileyo loba lokho akuthethe ngenkani kumbe lokho akuthethe ngobuqili loba lokho akubanjisiweyo kumbe lokho obekulahlekile, 5 kumbe loba yini afunge ngayo eqamba amanga. Kumele akhiphe yonke imbadalo efunekayo+ futhi angezelele okukodwa kokuhlanu kuleyombadalo. Uzayinika umnikazi waleyonto ngelanga azabanjwa ngalo ukuthi ulecala. 6 Kanti njalo uzanika umphristi inqama engelasici ezakuba ngumnikelo wecala oya kuJehova futhi inqama leyo kumele ihambelane lembadalo efunekayo yomnikelo wecala.+ 7 Umphristi uzamhlawulela phambi kukaJehova njalo uzathethelelwa loba yiliphi icala angabe elenzile.”+

8 UJehova waqhubeka ekhuluma loMosi wathi: 9 “Tshela u-Aroni lamadodana akhe uthi, ‘Nanku umthetho ophathelane lomnikelo wokutshiswa:+ Umnikelo wokutshiswa kumele uqhubeke useziko le-alithare ubusuku bonke kuze kuse futhi umlilo kumele uhlale ubhebha e-alithareni. 10 Umphristi kumele agqoke izigqoko zelineni+ zokwenza umsebenzi wakhe, agqoke lebhulugwe lelineni elifitshane.+ Ngemva kwalokho uzabutha umlotha*+ womnikelo wokutshiswa oyabe utshiswe ngumlilo ose-alithareni awufake eceleni kwalo. 11 Kumele akhiphe lezigqoko zakhe+ agqoke ezinye, abesebutha umlotha awuse endaweni ehlanzekileyo ngaphandle kwezihonqo.+ 12 Umlilo kumele uhlale ubhebha e-alithareni akumelanga ucitshe. Nsuku zonke ekuseni umphristi kumele afake inkuni emlilweni+ njalo abeke kuhle umhlatshelo wokutshiswa phezu kwawo. Kufanele atshise lamafutha omhlatshelo wobudlelwano athunqe phezu kwawo.+ 13 Umlilo kumele ubhebhe kokuphela e-alithareni akumelanga ucitshe.

14 “‘Nanku umthetho ophathelane lomnikelo wamabele:+ Lina madodana ka-Aroni kumele liwulethe kuJehova phambi kwe-alithare. 15 Omunye wamadodana ka-Aroni uzacupha ifulawa ecolekileyo egcwala isandla eyomnikelo wamabele lamafutha ayo, layo yonke inhlaka yokwenza impepha esemnikelweni wamabele abesekutshisa konke kuthunqe phezu kwe-alithare kube ngumnikelo oloqhatshi olumnandi oyingxenye emela* wonke umnikelo oya kuJehova.+ 16 U-Aroni lamadodana akhe bazathatha okuseleyo+ emnikelweni lo bakusebenzise ukwenza isinkwa esingelamvubelo njalo bazasidlela endaweni engcwele egumeni letende lokuhlangana.+ 17 Akumelanga ufakwe loba yini elemvubelo+ nxa ubhekhwa njalo ngibanike wona ukuthi ube yisabelo sabo esivela eminikelweni yami etshiswa ngomlilo.+ Uyinto engcwele kakhulu+ njengomnikelo wesono lomnikelo wecala. 18 Bonke abesilisa abangamadodana ka-Aroni bazawudla.+ Lesi kuzahlala kuyisabelo sabo esivela eminikelweni etshiselwa uJehova ngomlilo+ kuzo zonke izizukulwane zenu. Konke okuyithintayo* kuzakuba ngcwele.’”

19 UJehova waphinda wakhuluma loMosi wathi: 20 “Nanku umnikelo ozanikelwa ngu-Aroni lamadodana akhe kuJehova ngelanga lokugcotshwa kwakhe:+ Bazanikela ngefulawa ecolekileyo eyingxenye ye-efa*+ eyodwa etshumini ibe ngumnikelo wamabele owenziwa zikhathi zonke,+ enye ingxenye yawo izanikelwa ekuseni, enye inikelwe kusihlwa. 21 Umnikelo lo kumele wenzelwe emganwini wensimbi+ ngamafutha njalo uwulethe uhlanganiswe kuhle lamafutha. Kufanele wethule umnikelo lo wamabele obhekhiweyo uhletshuhletshuniwe, ube luqhatshi olumnandi kuJehova. 22 Umnikelo lo kumele unikelwe ngumphristi ogcotshiweyo ozangena esikhundleni sika-Aroni, umphristi okhethwe phakathi kwamadodana akhe.+ Wonke umnikelo lo uzatshiswa uthunqe phambi kukaJehova. Lo ngumlayo ozahlala ukhona. 23 Wonke umnikelo wamabele olethwa ngumphristi kumele utshiswe. Akumelanga udliwe.”

24 UJehova waphinda wakhuluma loMosi wathi: 25 “Tshela u-Aroni lamadodana akhe uthi, ‘Nanku umthetho ophathelane lomnikelo wesono:+ Umnikelo wesono uzahlatshelwa+ lapho okuhlatshelwa khona umnikelo wokutshiswa phambi kukaJehova ngoba uyinto engcwele kakhulu. 26 Umphristi onikela umnikelo wesono uzakudla ingxenye yakhe.+ Kumele udlelwe endaweni engcwele egumeni letende lokuhlangana.+

27 “‘Loba yini ezathinta inyama yomnikelo lo izakuba ngcwele njalo loba ngubani ozachaphazela igazi lawo esigqokweni sakhe kumele asiwatshele endaweni engcwele. 28 Imbiza yebumba okuxhwathiswe ngayo inyama yomnikelo lo kumele iphahlazwe. Kodwa nxa ixhwathiswe ngembiza yekhopha kumele ikhuhlwe njalo igeziswe ngamanzi.

29 “‘Wonke amadoda angabaphristi kumele awudle+ ngoba uyinto engcwele kakhulu.+ 30 Kodwa akulamnikelo wesono okumele udliwe nxa kuyikuthi elinye igazi lawo lingeniswe etendeni lokuhlangana ukuze kuhlawulelwe ngalo endaweni engcwele.+ Kumele utshiswe ngomlilo.

7 “‘Nanku umlayo ophathelane lomnikelo wecala:+ Umnikelo lo ungcwele kakhulu. 2 Umnikelo wecala kumele bawuhlabele lapho okuhlatshelwa khona iminikelo yokutshiswa njalo igazi+ lawo kufanele lifafazwe kuwo wonke amacele e-alithare.+ 3 Umphristi uzanikela wonke amafutha+ awo, lamafutha asemsileni, ledanga* elembese amathumbu, 4 lezinso ezimbili lamafutha azo aseduze lezinqe. Nxa esekhipha izinso, uzakhipha lamafutha aphezu kwesibindi.+ 5 Umphristi uzatshisa izinto lezi zithunqe phezu kwe-alithare zibe ngumnikelo otshiselwa uJehova ngomlilo.+ Lo ngumnikelo wecala. 6 Kumele udliwe yiwo wonke amadoda angabaphristi+ njalo kufanele udlelwe endaweni engcwele. Umnikelo lo ungcwele kakhulu.+ 7 Umthetho osebenza emnikelweni wesono yiwo ozasebenza lasemnikelweni wecala. Inyama yawo izakuba ngeyomphristi owenze ngawo umnikelo wokuhlawulelwa.+

8 “‘Nxa umphristi anganikela umnikelo wokutshiswa olethwe ngumuntu othile, isikhumba+ somnikelo lowo sizakuba ngesakhe.

9 “‘Yonke iminikelo yamabele ebhekhwe eziko* loba eyenzelwe epanini kumbe emganwini wensimbi+ izakuba ngeyomphristi oyinikeleyo. Kumele ibe ngeyakhe.+ 10 Kodwa yonke iminikelo yamabele ehlanganiswe lamafutha+ kumbe engafakwanga lutho+ izakuba ngeyawo wonke amadodana ka-Aroni futhi wonke kumele athole okulinganayo.

11 “‘Nanku umthetho ophathelane lomhlatshelo wobudlelwano+ umuntu angawuletha kuJehova: 12 Nxa ewuletha ukuze atshengise ukuthi uyabonga,+ umhlatshelo wakhe wokubonga kufanele awulethe ndawonye lezinkwa eziyisigombolozi ezingelamvubelo ezifakwe amafutha, lezinkwa eziyisipatalala ezingelamvubelo ezigcotshwe amafutha kanye lezinkwa eziyisigombolozi ezenziwe ngefulawa ecolekileyo, evutshwe kuhle yahlanganiswa lamafutha. 13 Umnikelo wakhe uzawuletha ndawonye lezinkwa eziyisigombolozi ezifakwe imvubelo kanye lemihlatshelo yakhe yobudlelwano ayilethe ukuthi ibe ngumhlatshelo wokubonga. 14 Kumele athathe okukodwa kukho konke azanikela ngakho kube yisabelo sikaJehova esingcwele njalo kuzakuba ngokomphristi ozafafaza igazi lemihlatshelo yobudlelwano.+ 15 Inyama yomhlatshelo wokubonga, eyemihlatshelo yakhe yobudlelwano kumele idliwe ngelanga azanikela ngalo. Akumelanga agcine enye yakhona kuze kuse.+

16 “‘Nxa umhlatshelo wakhe ungumnikelo wesifungo+ asenzileyo kumbe umnikelo awukhiphe ngokuzithandela,+ umhlatshelo lowo kumele udliwe ngelanga azawunikela ngalo njalo inyama yawo eseleyo ingadliwa langelanga elilandelayo. 17 Loba yiphi inyama yomhlatshelo lo ezasala kuze kufike ilanga lesithathu kumele itshiswe ngomlilo.+ 18 Kodwa nxa inyama yomhlatshelo wakhe wobudlelwano ingadliwa ngelanga lesithathu, lowo oyinikelayo kasoze amukelwe. Kuyabe kufanana lokuthi kanikelanga futhi umhlatshelo wakhe uyabe ususenyanyeka. Umuntu ozakudla loba yiphi inyama yawo uzajeziswa ngenxa yecala lakhe.+ 19 Inyama ethinta loba yini engcolileyo akumelanga idliwe kodwa kumele itshiswe ngomlilo. Loba ngubani ohlanzekileyo ukhululekile ukudla inyama ehlanzekileyo.

20 “‘Kodwa loba ngubani ongcolileyo ozakudla inyama yomhlatshelo wobudlelwano ongokaJehova kumele abulawe.+ 21 Nxa umuntu angathinta loba yini engcolileyo, kungaba yikungcola komuntu+ loba inyamazana engcolileyo+ kumbe enye into nje engcolileyo+ eyenyanyekayo, abesesidla inyama yomhlatshelo wobudlelwano ongokaJehova, lowomuntu kumele abulawe.’”

22 UJehova waqhubeka ekhuluma loMosi wathi: 23 “Tshela abako-Israyeli uthi, ‘Akumelanga lidle loba yiwaphi amafutha+ kungaba ngawenkunzi kumbe awemvana enduna kumbe awembuzi. 24 Amafutha enyamazana ezifeleyo lamafutha enyamazana ebulewe ngenye angasetshenziswa kwezinye izinto kodwa akumelanga adliwe.+ 25 Loba ngubani odla amafutha esifuyo asilethe kuJehova ukuthi sibe ngumnikelo wokutshiswa kumele abulawe.

26 “‘Akumelanga lidle loba yiliphi igazi+ kuzo zonke indawo elihlala kuzo kungelani lokuthi ngelenyoni kumbe ngelenyamazana. 27 Loba ngubani odla loba yiliphi igazi kumele abulawe.’”+

28 UJehova waphinda wakhuluma loMosi wathi: 29 “Tshela abako-Israyeli uthi, ‘Loba ngubani oletha umhlatshelo wakhe wobudlelwano kuJehova uzaletha ingxenye yomhlatshelo wakhe ibe ngumnikelo kuJehova.+ 30 Uzabuya ethwele ngezandla zakhe amafutha+ lenyama yesifuba kube ngumnikelo otshiselwa uJehova ngomlilo, abesezunguza isifuba sibe ngumnikelo wokuzunguzwa+ phambi kukaJehova. 31 Umphristi uzatshisa amafutha athunqe phezu kwe-alithare+ kodwa isifuba sizakuba ngesika-Aroni lamadodana akhe.+

32 “‘Lizanika umphristi umlenze wesokudla ube yisabelo sakhe esingcwele esivela emihlatshelweni yenu yobudlelwano.+ 33 Indodana ka-Aroni ezanikela igazi lemihlatshelo yobudlelwano lamafutha akhona izaphiwa umlenze wesokudla ube yisabelo sayo.+ 34 Nginika u-Aroni umphristi lamadodana akhe isifuba somnikelo wokuzunguzwa lomlenze oyisabelo esingcwele esivela emihlatshelweni yobudlelwano elethwa ngabako-Israyeli. Lo ngumlayo ozahlala ukhona kuma-Israyeli.+

35 “‘Lokhu kuyisabelo esivela eminikelweni eyenzelwa uJehova ngomlilo okumele siphiwe abaphristi, u-Aroni lamadodana akhe, kusukela ngelanga ababekwa ngalo ukuthi babe ngabaphristi bakaJehova.+ 36 UJehova watshela abako-Israyeli ukuthi babanike isabelo lesi ngelanga abagcoba ngalo.+ Lo ngumlayo ozahlala ukhona kuzo zonke izizukulwane zabo.’”

37 Lo ngumthetho ophathelane lomnikelo wokutshiswa,+ lomnikelo wamabele,+ lomnikelo wesono,+ lomnikelo wecala,+ lomhlatshelo wokubekwa kwabaphristi+ kanye lomhlatshelo wobudlelwano,+ 38 uJehova awupha uMosi entabeni iSinayi+ ngelanga atshela ngalo abako-Israyeli ukuthi balethe iminikelo yabo kuJehova enkangala yeSinayi.+

8 UJehova waqhubeka ekhuluma loMosi wathi: 2 “Biza u-Aroni lamadodana akhe+ uthathe lezigqoko zabo+ zokwenza umsebenzi, lamafutha angcwele,+ lenkunzi yomnikelo wesono, lenqama ezimbili kanye lebhasikiti elesinkwa esingelamvubelo,+ 3 ubusubuthanisa bonke abantu emnyango wetende lokuhlangana.”

4 UMosi wenza khona kanye uJehova ayemtshele khona. Wabuthanisa abantu emnyango wetende lokuhlangana, 5 wasekhuluma labo wathi: “Nanku uJehova athe sikwenze.” 6 Ngakho wasondeza u-Aroni lamadodana akhe eduze wabagezisa ngamanzi.+ 7 Ngemva kwalokho wamgqokisa isigqoko eside,+ wamfaka lebhanti,+ wamgqokisa lejazi elingelamikhono,+ wamgqokisa le-efodi*+ waseyibopha yaqina ngebhanti layo elelukiweyo.*+ 8 Wamgqokisa lesikhwama sesifubeni,+ wasefaka i-Urimi leThumimi+ phakathi kwaso. 9 Wasemgqokisa iqhiye+ ekhanda wafaka icence legolide elicazimulayo phambi kwayo, uphawu lokuzinikela olungcwele,*+ njengoba nje uJehova wayetshilo kuMosi.

10 UMosi wasethatha amafutha okugcoba wagcoba ithabanikeli lakho konke okukulo+ wakungcwelisa. 11 Ngemva kwalokho wathatha amanye wawafafaza kasikhombisa phezu kwe-alithare njalo wagcoba i-alithare lazo zonke izitsha zalo lenditshi lesisekelo sayo ukuze akungcwelise konke. 12 Ekucineni wathela amanye amafutha ekhanda lika-Aroni wamgcoba ukuze amngcwelise.+

13 UMosi wasesondeza amadodana ka-Aroni eduze wawagqokisa izigqoko ezinde, wawabopha ngamabhanti njalo wawagqokisa lamaqhiye+ njengoba nje uJehova wayetshilo kuye.

14 Ngemva kwalokho waletha inkunzi yomnikelo wesono, u-Aroni lamadodana akhe babeka izandla zabo ekhanda lenkunzi yomnikelo wesono.+ 15 UMosi waseyihlaba inkunzi leyo wathatha igazi+ ngomunwe waligcoba empondweni ze-alithare kuwo wonke amacele alo njalo walihlambulula esonweni. Kodwa lonke igazi elalisele walithela phansi kwe-alithare walingcwelisa ukuze kwenzelwe kulo imihlatshelo yokuhlawulelwa. 16 Ngemva kwalokho uMosi wathatha wonke amafutha asemathunjini, lamafutha aphezu kwesibindi kanye lezinso ezimbili lamafutha azo wakutshisa kwathunqa phezu kwe-alithare.+ 17 Wasethatha inkunzi yonke lesikhumba sayo lomswane wayo wayakutshisa ngomlilo phandle kwezihonqo+ njengoba nje uJehova wayetshilo kuye.

18 Waseletha inqama yomnikelo wokutshiswa, u-Aroni lamadodana akhe babeka izandla zabo ekhanda layo.+ 19 UMosi wayihlaba wasefafaza igazi layo kuwo wonke amacele e-alithare. 20 Wayiqumaquma inqama leyo wasethatha inhloko yayo lamaqatha akhona lamafutha* wakutshisa kwathunqa phezu kwe-alithare. 21 Wasethatha amanzi wagezisa amathumbu lamangqina njalo wayitshisa yonke inqama yathunqa e-alithareni. Lo kwakungumnikelo wokutshiswa oloqhatshi olumnandi, umnikelo otshiselwa uJehova ngomlilo, njengoba nje uJehova wayetshilo kuMosi.

22 Ngemva kwalokho uMosi waletha inqama yesibili, inqama yokubekwa kwabaphristi,+ u-Aroni lamadodana akhe babeka izandla zabo ekhanda layo.+ 23 UMosi wayihlaba wasethatha elinye igazi layo walininda endlebeni ka-Aroni esesandleni sokudla, lasesithupheni sakhe sesandla sokudla kanye lasezwaneni lwakhe olukhulu enyaweni lwesokudla. 24 Ngemva kwalokho uMosi wasondeza amadodana ka-Aroni waseninda ngamunye wabo igazi endlebeni esesandleni sokudla, lasesithupheni sesandla sokudla lasezwaneni olukhulu enyaweni lwesokudla. Elinye lonke igazi eliseleyo walifafaza kuwo wonke amacele e-alithare.+

25 Wasethatha amafutha, amafutha asemsileni, lawo wonke amafutha asemathunjini, lamafutha aphezu kwesibindi, lezinso ezimbili lamafutha azo kanye lomlenze wesokudla.+ 26 Wathatha lesinkwa esisodwa esingelamvubelo esiyisigombolozi+ lesinkwa esisodwa esiyisigombolozi esigcotshwe amafutha+ lesinkwa esiyisipatalala phakathi kwebhasikiti yesinkwa esingelamvubelo ephambi kukaJehova. Wathatha izinto lezi wazibeka phezu kwamafutha lomlenze wesokudla. 27 Ngemva kwalokho wakuthatha konke lokhu wakufaka ezandleni zika-Aroni lasezandleni zamadodana akhe basebeqalisa ukukuzunguza kwaba ngumnikelo wokuzunguzwa phambi kukaJehova. 28 UMosi wasethatha izinto lezi ezandleni zabo wazitshisa zathunqa e-alithareni phezu komnikelo wokutshiswa. Kwaba ngumhlatshelo wokubekwa kwabo oloqhatshi olumnandi, umnikelo otshiselwa uJehova ngomlilo.

29 UMosi wasethatha isifuba senqama wasizunguza saba ngumnikelo wokuzunguzwa phambi kukaJehova.+ Saba yisabelo sikaMosi esithethwe enqameni yokubekwa njengoba nje uJehova wayetshilo kuye.+

30 UMosi wasethatha amanye amafutha angcwele+ lelinye igazi elalise-alithareni wakufafaza ku-Aroni lasezigqokweni zakhe lasemadodaneni akhe ayelaye lasezigqokweni zawo. Ngakho wangcwelisa u-Aroni lezigqoko zakhe kanye lamadodana akhe+ lezigqoko zawo.+

31 Ngemva kwalokho uMosi wakhuluma lo-Aroni lamadodana akhe wathi: “Xhwathisani+ inyama emnyango wetende lokuhlangana, liyidlele khonapho kanye lesinkwa esisebhasikitini yokubekwa kwabaphristi njengoba nje ngitsheliwe ukuthi, ‘U-Aroni lamadodana akhe yibo abazayidla.’+ 32 Inyama lesinkwa okuzasala kumele likutshise ngomlilo.+ 33 Akumelanga lisuke emnyango wetende lokuhlangana okwamalanga ayisikhombisa, aze aphele amalanga okubekwa kwenu ngoba kuzathatha amalanga ayisikhombisa ukuthi libekwe ukuba ngabaphristi.+ 34 UJehova uthe senze lokhu esikwenzileyo lamuhla ukuze lihlawulelwe.+ 35 Kumele lihlale emnyango wetende lokuhlangana okwamalanga ayisikhombisa,+ lenze lokho uJehova akukhangelele kini+ ukuze lingafi ngoba lokhu yikho engikutsheliweyo.”

36 U-Aroni lamadodana akhe bakwenza konke uJehova ayetshele uMosi ukuthi bakwenze.

9 Ngelanga lesi-8+ uMosi wabiza u-Aroni lamadodana akhe kanye labadala bako-Israyeli. 2 Wathi ku-Aroni: “Thatha ithole lomnikelo wesono+ elingelasici lenqama yomnikelo wokutshiswa engelasici ukulethe phambi kukaJehova, 3 ubusutshela abako-Israyeli uthi: ‘Thathani impongo yomnikelo wesono lethole kanye lemvana enduna okulomnyaka owodwa futhi okungelasici kube ngumnikelo wokutshiswa. 4 Lithathe lenkunzi lenqama kube ngokwemihlatshelo yobudlelwano+ lenze umhlatshelo phambi kukaJehova, lomnikelo wamabele+ ohlanganiswe lamafutha ngoba lamuhla uJehova uzabonakala kini.’”+

5 Ngakho baletha lokho uMosi ayethe bakulethe phambi kwetende lokuhlangana. Ngemva kwalokho bonke abantu babuya bazokuma phambi kukaJehova. 6 UMosi wasesithi kubo: “Lokhu yikho uJehova athe likwenze ukuze inkazimulo kaJehova ibonakale kini.”+ 7 UMosi wasesithi ku-Aroni: “Sondela e-alithareni unikele umnikelo wakho wesono+ lomnikelo wakho wokutshiswa ukuze uzihlawulele+ njalo uhlawulele labendlu yakho. Ngemva kwalokho yethula umnikelo wabantu+ ubahlawulele+ njengoba nje uJehova etshilo.”

8 U-Aroni wahle wasondela e-alithareni wahlaba ithole lomnikelo wakhe wesono.+ 9 Amadodana akhe aseletha igazi+ kuye wagxamuza umunwe kulo walininda empondweni ze-alithare, elinye lonke igazi eliseleyo walithela phansi kwe-alithare.+ 10 Wasethatha amafutha lezinso lamafutha aphezu kwesibindi okuvela emnikelweni wesono wasekutshisa kwathunqa e-alithareni njengoba nje uJehova wayetshilo kuMosi.+ 11 Inyama lesikhumba wakutshisela ngaphandle kwezihonqo.+

12 Ngemva kwalokho u-Aroni wahlaba umnikelo wokutshiswa njalo amadodana akhe aletha igazi kuye, waselifafaza kuwo wonke amacele e-alithare.+ 13 Amnika amaqatha omnikelo wokutshiswa kanye lenhloko wakutshisa kwathunqa phezu kwe-alithare. 14 Kanti njalo wagezisa amathumbu lamangqina wakutshisa kwathunqa e-alithareni phezu komnikelo wokutshiswa.

15 Wasethatha imbuzi yomnikelo wesono eyayingeyomnikelo wabantu wayihlaba wenza ngayo umnikelo wesono njengalokho ayekwenze kweyokuqala. 16 Waletha lomnikelo wokutshiswa wawunikela ngendlela okumele unikelwe ngayo.+

17 Waseletha umnikelo wamabele,+ wacupha omunye ngesandla wawutshisa wathunqa phezu kwe-alithare engezelela emnikelweni wokutshiswa owenziwa ekuseni.+

18 Ngemva kwalokho u-Aroni wahlaba inkunzi lenqama okwakulethwe ngabantu ukuthi kube ngumhlatshelo wabo wobudlewano. Amadodana akhe aseletha igazi kuye walifafaza kuwo wonke amacele e-alithare.+ 19 Kodwa amafutha enkunzi,+ lamafutha omsila wenqama lamadanga embese ezangaphakathi, lezinso, lamafutha aphezu kwesibindi,+ 20 bakufaka konke phezu kwesifuba senkunzi lesenqama, u-Aroni wasekutshisa kwathunqa phezu kwe-alithare.+ 21 U-Aroni wazunguza izifuba lezo lomlenze wesokudla kwaba ngumnikelo wokuzunguzwa phambi kukaJehova, njengoba nje uMosi wayetshilo.+

22 Ngemva kwalokho u-Aroni waphakamisela izandla zakhe ebantwini wababusisa+ wasesehla lapho ayesenzela khona umnikelo wesono lomnikelo wokutshiswa lemihlatshelo yobudlelwano. 23 UMosi lo-Aroni basebengena etendeni lokuhlangana njalo baphuma babusisa abantu.+

Inkazimulo kaJehova yasibonakala kubo bonke abantu+ 24 njalo kwehla umlilo uvela kuJehova+ watshisa umnikelo wokutshiswa lamafutha okwakuphezu kwe-alithare. Abantu bonke bathi bekubona lokhu bamemeza futhi baguqa bathi mbo phansi.+

10 Ngokuya kwesikhathi amadodana ka-Aroni uNadabi lo-Abhihu+ athatha inkezwana zawo zokuthwala amalahle afaka umlilo lempepha+ kuzo. Aseqalisa ukutshisela uJehova impepha ngomlilo ongavunyelwayo,+ into ayengazange awatshele ukuthi ayenze. 2 Khonokho nje kwehla umlilo uvela kuJehova wabatshisa+ bafa phambi kukaJehova.+ 3 UMosi wasesithi ku-Aroni: “UJehova uthi, ‘Ngizangcweliswa phakathi kwalabo abaseduze kwami,+ ngikhazinyuliswe phambi kwabo bonke abantu.’” U-Aroni waqhubeka ethule.

4 Ngakho uMosi wabiza uMishayeli lo-Elizafani amadodana ka-Uziyeli+ uyisemncane ka-Aroni wathi kubo: “Buyani lizothwala izidumbu zabafowenu lizisuse phambi kwendawo engcwele lizise phandle kwezihonqo.” 5 Lakanye babuya bawathwala amadoda la elokhu egqoke izigqoko zawo ezinde bawasa phandle kwezihonqo njengoba nje uMosi wayetshilo.

6 UMosi wasekhuluma lo-Aroni lamanye amadodana akhe u-Eliyazari lo-Ithamari wathi: “Lingayekeli inwele zenu zingakanywanga futhi lingadabuli izigqoko zenu+ ukuze lingafi njalo uNkulunkulu angathukutheleli ibandla lonke. Bonke abanye abafowenu bako-Israyeli yibo abazakhalela labo ababulewe nguJehova ngomlilo. 7 Lina akumelanga lisuke emnyango wetende lokuhlangana ngoba lingafa. Phela uJehova uligcobile ngamafutha angcwele.”+ Lakanye bakwenza lokho uMosi ayebatshele khona.

8 UJehova wasesithi ku-Aroni: 9 “Wena lamadodana akho linganathi iwayini loba eminye imihlobo yotshwala nxa lisiza etendeni lokuhlangana+ ukuze lingafi. Lo ngumlayo ozahlala ukhona kuzo zonke izizukulwane zenu. 10 Lokhu kuzakwenza kube lomehluko phakathi kokungcwele lokungcolileyo laphakathi kokuhlanzekileyo lokungahlanzekanga,+ 11 njalo lizakwenelisa ukufundisa abako-Israyeli yonke imilayo ekhulunywe nguJehova esebenzisa uMosi.”+

12 UMosi wasekhuluma lo-Aroni lamadodana akhe ayesele u-Eliyazari lo-Ithamari wathi: “Thathani umnikelo wamabele osele eminikelweni etshiselwa uJehova ngomlilo lipheke ngawo isinkwa esingelamvubelo, lisidlele eduze kwe-alithare+ ngoba kungcwele kakhulu.+ 13 Kumele liwudlele endaweni engcwele+ ngoba lesi yisabelo sakho lamadodana akho esivela eminikelweni etshiselwa uJehova ngomlilo. Lokhu yikho engikutsheliweyo. 14 Wena lamadodana akho lamadodakazi akho+ lizakudla isifuba sokuzunguzwa lomlenze wesabelo esingcwele.+ Lizakudlela endaweni engcwele ngoba izinto lezi ziyisabelo sakho lamadodana akho esivela emihlatshelweni yobudlelwano elethwa ngabantu bako-Israyeli. 15 Bazaletha umlenze wesabelo esingcwele lesifuba somnikelo wokuzunguzwa lamafutha eminikelo etshiswa ngomlilo ukuze kube ngumnikelo wokuzunguzwa phambi kukaJehova. Lokhu kuzahlala kuyisabelo sakho lesamadodana akho+ njengoba nje uJehova etshilo.”

16 UMosi wathi esedinga imbuzi yomnikelo wesono+ wasethola ukuthi yayisitshiswe yaphela. Yikho wazondela u-Eliyazari lo-Ithamari amadodana ka-Aroni ayesele, wathi kubo: 17 “Liyekeleleni ukudla umnikelo wesono endaweni engcwele?+ Phela ungcwele kakhulu njalo liwuphiwe ukuze lithwale isiphambeko sabantu bonke futhi libahlawulele phambi kukaJehova. 18 Khangelani khathesi igazi lawo alizange lilethwe endaweni engcwele.+ Bekumele liwudlele endaweni engcwele umnikelo lo njengoba nje ngatshelwa.” 19 U-Aroni waphendula uMosi wathi: “Abantu bawulethile sibili umnikelo wabo wesono lomnikelo wabo wokutshiswa phambi kukaJehova+ kodwa uyakwazi okungehleleyo. Aluba ngiwudlile umnikelo wesono lamuhla, uJehova ubezathokoza yini?” 20 UMosi wathi ekuzwa lokho wasuthiseka.

11 UJehova wasesithi kuMosi lo-Aroni: 2 “Tshela abako-Israyeli uthi, ‘Kuzo zonke inyamazana ezisemhlabeni, nanzi elingazidla:+ 3 Zonke inyamazana ezilamasondo ehlukeneyo, avuleke phakathi laphakathi futhi ezentshisayo lingazidla.

4 “‘Kodwa akumelanga lidle inyamazana ezilandelayo lanxa zisentshisa loba zilamasondo ehlukeneyo: Lingadli ikamela ngoba liyentshisa kodwa amasondo alo kawehlukananga. Lingcolile kini.+ 5 Lingadli imbila+ ngoba iyentshisa kodwa amasondo ayo kawehlukananga. Ingcolile kini. 6 Lomvundla akumelanga liwudle ngoba uyentshisa kodwa inyawo zawo azehlukananga. Ungcolile kini. 7 Lengulube+ lingayidli ngoba ilamasondo ehlukeneyo, avuleke phakathi laphakathi kodwa ayentshisi. Ingcolile kini. 8 Akumelanga lidle inyama yazo loba lithinte izidumbu zazo ngoba zingcolile kini.+

9 “‘Kukho konke okuhlala emanzini lingadla loba yini elempiko lamaxolo kungaba selwandle kumbe emifuleni.+ 10 Kodwa loba yiziphi izidalwa ezihlala elwandle lemifuleni ezingelampiko lamaxolo, phakathi kwazo zonke ezihamba zingamaqembu lezinye nje izidalwa ezihlala emanzini, ziyenyanyeka kini. 11 Kumele lizenyanye sibili, lingadli loba yiphi inyama yazo+ njalo kumele lenyanye lezidumbu zazo. 12 Konke okuhlala emanzini okungelampiko lamaxolo kumele likwenyanye.

13 “‘Nanzi inyoni okumele lizenyanye njalo lingazidli ngoba ziyenyanyeka. Lingadli ingqungqulu,+ lokhozi oludla inhlanzi, lelinqe elimnyama,+ 14 lomzwazwa obomvu, layo yonke imihlobo yomzwazwa omnyama, 15 layo yonke imihlobo yamawabayi, 16 lentshe, lesikhova, lendwandwe, layo yonke imihlobo yohelwane, 17 lomandukulo, letshayamanzi, lesikhova esilendlebe ezinde, 18 ledada elilentamo ende, lephelikheni,* lelinqe, 19 lengabuzane, layo yonke imihlobo yamalanda, lemvenduna kanye lomalulwane. 20 Zonke izibungu ezilempiko ezihamba zingamaqembu njalo ezilenyawo ezine zingcolile kini.

21 “‘Phakathi kwezibungu eziphaphayo ezihamba zingamaqembu njalo ezilenyawo ezine lingadla lezo ezilenyawo ezinde ezeqa ngazo emhlabathini. 22 Nanzi elingazidla: imihlobo yentethe ezihamba zingumtshitshi, lezinye intethe ezidliwayo,+ lenyekevu kanye lamabhombo. 23 Zonke ezinye izibungu ezihamba zingamaqembu njalo ezilenyawo ezine ziyenyanyeka kini. 24 Nxa lingazidla lizakuba ngabangcolileyo. Wonke umuntu othinta izinto lezi nxa zifile uzakuba ngongcolileyo kuze kuhlwe.+ 25 Loba ngubani ozathwala izibungu lezi nxa sezifile kumele awatshe izigqoko zakhe+ futhi uzakuba ngongcolileyo kuze kuhlwe.

26 “‘Yonke inyamazana elamasondo ehlukeneyo, angavulekanga phakathi laphakathi njalo engentshisiyo ingcolile kini. Loba ngubani oyithintayo uzakuba ngongcolileyo.+ 27 Zonke izidalwa eziphilayo ezilenzipho enyaweni njalo ezihamba ngenyawo ezine zingcolile kini. Loba ngubani othinta izidumbu zazo uzakuba ngongcolileyo kuze kuhlwe. 28 Lowo ozathwala izidumbu zazo kumele awatshe izigqoko zakhe+ futhi uzakuba ngongcolileyo kuze kuhlwe+ ngoba zingcolile kini.

29 “‘Nanzi izinanakazana ezisemhlabeni ezingcolileyo kini: imvukuzane,* legundwane,+ layo yonke imihlobo yempankwa, 30 lesihwarahwara,* legwababa, lontulo, lesiqhuza lonwabu. 31 Izinanakazana lezi zingcolile kini.+ Loba ngubani othinta izidumbu zazo uzakuba ngongcolileyo kuze kuhlwe.+

32 “‘Loba yini ezizawela kuyo nxa zisifa izakuba ngengcolileyo kungelani lokuthi yisitsha esenziwe ngesigodo, isigqoko, isikhumba, kumbe isaka. Loba yisiphi isitsha esisetshenziswayo eziwela kuso kumele sicwiliswe emanzini njalo sizakuba ngesingcolileyo kuze kuhlwe. Ngemva kwalokho siyabe sesihlanzekile. 33 Nxa zingawela embizeni yebumba kumele iphahlazwe. Loba yini ebiphakathi kwayo iyabe isingcolile.+ 34 Konke ukudla okuthelwa ngamanzi asembizeni leyo kuyabe sekungcolile futhi konke okunathwayo okuphakathi kwayo kuyabe sekungcolile. 35 Loba yini ewelwe yizinakazana lezi ezifileyo iyabe isingcolile kungaba yi-oveni kumbe iseko. Kumele kuphahlazwe ngoba kungcolile njalo kuzahlala kungcolile kini. 36 Nxa zingawela emthonjeni loba emgodini wamanzi uzaqhubeka uhlanzekile kodwa loba ngubani othinta izidumbu zazo uyabe esengcolile. 37 Nxa izidumbu zazo zingawela phezu kwenhlanyelo okumele ihlanyelwe, iyabe ihlanzekile. 38 Nxa kungathelwa amanzi phakathi kwenhlanyelo besekuwela ingxenye yemizimba yazo kuyo, inhlanyelo leyo iyabe isingcolile kini.

39 “‘Nxa inyamazana edliwayo ingazifela, loba ngubani othinta isidumbu sayo uzakuba ngongcolileyo kuze kuhlwe.+ 40 Wonke umuntu odla inyama yayo kumele awatshe izigqoko zakhe njalo uzakuba ngongcolileyo kuze kuhlwe.+ Loba ngubani othwala isidumbu sayo kumele awatshe izigqoko zakhe njalo uzakuba ngongcolileyo kuze kuhlwe. 41 Zonke izinanakazana ezihamba zingamaqembu ziyenyanyeka.+ Akumelanga lizidle. 42 Akumelanga lidle loba yisiphi isinanakazana esihuba ngesisu, lalezo ezihamba ngenyawo ezine kumbe lezo ezilenyawo ezinengi ezihamba zingamaqembu ngoba ziyenyanyeka.+ 43 Lingazenzi lenyanyeke ngokudla loba yiziphi izinanakazana ezihamba zingamaqembu njalo lingazingcolisi ngazo libe ngabangahlanzekanga.+ 44 NginguJehova uNkulunkulu wenu,+ kumele lizingcwelise libe ngcwele+ ngoba mina ngingcwele.+ Akumelanga lizingcolise ngokudla loba yiziphi izinanakazana ezisemhlabeni ezihamba zingamaqembu. 45 NginguJehova owalikhipha elizweni leGibhithe ukuze ngitshengise ukuthi nginguNkulunkulu wenu.+ Kumele libe ngcwele+ ngoba mina ngingcwele.+

46 “‘Lo ngumthetho ophathelane lezinyamazana, lezinyoni, lezidalwa zonke ezihlala emanzini, lazo zonke izinanakazana ezisemhlabeni ezihamba zingamaqembu, 47 ukuze kube lomehluko phakathi kwezingcolileyo lezihlanzekileyo laphakathi kwezidalwa eziphilayo ezingadliwa lalezo okungamelanga zidliwe.’”+

12 UJehova waseqhubeka wathi kuMosi: 2 “Tshela abako-Israyeli uthi, ‘Nxa owesifazana angazithwala, abesebeletha umntwana ongumfana uzakuba ngongcolileyo okwamalanga ayisikhombisa, njengoba nje esiba ngongcolileyo ngamalanga akhe okuya esikhathini.+ 3 Ngelanga lesi-8 umntwana lo ozelweyo kumele asokwe.+ 4 Owesifazana uzaqhubeka ezihlambulula ekopheni kwakhe okwamalanga angu-33 alandelayo. Akumelanga athinte loba yini engcwele njalo akumelanga asondele endaweni engcwele amalanga okuhlanjululwa kwakhe aze aphele.

5 “‘Nxa angabeletha umntwana oyinkazana uzakuba ngongcolileyo okwamalanga angu-14, njengoba nje esiba ngongcolileyo ngamalanga akhe okuya esikhathini. Uzaqhubeka ezihlambulula ekopheni kwakhe okwamalanga angu-66 alandelayo. 6 Nxa amalanga akhe okuhlanjululwa esephelile kungelani lokuthi ngawomntwana ongumfana kumbe oyinkazana, owesifazana uzathatha imvana enduna elomnyaka owodwa ibe ngumnikelo wokutshiswa+ kanye lejuba loba umntwana wenkwilimba kube ngumnikelo wesono, akuhambise kumphristi emnyango wetende lokuhlangana. 7 Umphristi uzanikela izinto lezi phambi kukaJehova ukuze amhlawulele njalo uzakuba ngohlanzekileyo ekopheni kwakhe. Lo ngumthetho ophathelane lowesifazana obeletha umntwana ongumfana kumbe oyinkazana. 8 Nxa engenelisi ukunikela ngemvu kumele alethe amajuba amabili kumbe abantwana benkwilimba ababili,+ okunye kube ngumnikelo wokutshiswa, okunye kube ngumnikelo wesono njalo umphristi uzamhlawulela, abesehlanjululwa.’”

13 UJehova waqhubeka ekhuluma loMosi lo-Aroni wathi: 2 “Nxa umuntu angaba leqhubu kumbe uqweqwe loba itshatha emzimbeni wakhe elingaba ngumkhuhlane wobulephero*+ kumele ahanjiswe kumphristi u-Aroni kumbe komunye wamadodana akhe, abaphristi.+ 3 Umphristi uzahlola lokho okuphume ejwabini lalowomuntu, nxa kukhanya kutshonile ejwabini loboya obukuleyondawo sebumhlophe, kuyabe kungumkhuhlane wobulephero. Umphristi uzakuhlolisisa abasesitsho ukuthi ungcolile. 4 Kodwa nxa itshatha elisejwabini lakhe limhlophe njalo likhanya lingatshonanga, loboya obukulo bungatshintshanga babamhlophe, umphristi uzamsusa ebantwini ahlale yedwa okwamalanga ayisikhombisa.+ 5 Umphristi uzamhlola ngelanga lesikhombisa, nxa kukhanya ukuthi umkhuhlane awusekho lokuthi awumemethekanga ejwabini lakhe, umphristi uzamhlalisa yedwa okwamanye amalanga ayisikhombisa.

6 “Umphristi uzaphinda amhlole ngelanga lesikhombisa. Nxa umkhuhlane usuphelile njalo ungamemethekanga ejwabini, umphristi uzakutsho ukuthi uhlanzekile,+ bekuluqweqwe nje. Lowomuntu kumele awatshe izigqoko zakhe abe ngohlanzekileyo. 7 Kodwa nxa uqweqwe lolo lungamemetheka ejwabini lakhe umphristi eseke wambona watsho ukuthi uhlambulukile, lowomuntu kumele abuyele ayebona umphristi. 8 Umphristi uzakuhlolisisa lokho njalo nxa uqweqwe lwakhona lumemethekile ejwabini umphristi uzakuthi ungcolile, ngumkhuhlane wobulephero.+

9 “Nxa umuntu angaba lomkhuhlane wobulephero kumele alethwe kumphristi 10 amhlole.+ Nxa eleqhubu njalo selitshintshe uboya babamhlophe, kwavuleka lesilonda+ lapho elikhona, 11 kuyabe kungumkhuhlane wobulephero ongapheliyo, umphristi uzakuthi ungcolile kodwa akumelanga amhlalise yedwa+ ngoba uvele ungcolile. 12 Nxa umkhuhlane wobulephero uphume wagcwala umzimba wonke, wamemetheka kusukela ekhanda waze wayafika enyaweni kusiya ngalokho umphristi akubonayo, 13 nxa esemhlolile lowomuntu wabona ukuthi ubulephero bugcwele umzimba wonke, umphristi kumele athi uhlanzekile ngoba lonke ijwabu lakhe selimhlophe, uhlanzekile.* 14 Kodwa nxa kungaba lesilonda esivulekileyo ejwabini lakhe uyabe engcolile. 15 Nxa umphristi angasibona isilonda leso uzakuthi lowomuntu ungcolile.+ Isilonda esivulekileyo singcolile, yibulephero.+ 16 Kodwa nxa isilonda sakhona singatshintsha sibe mhlophe kumele abuyele ayebona umphristi. 17 Umphristi uzamhlola,+ besekusithi nxa isilonda sakhona singatshintsha sibe mhlophe, umphristi uzakuthi lowomuntu uhlanzekile. Uyabe ehlanzekile.

18 “Nxa umuntu angaphuma ithumba emzimbeni beseliphola, 19 besekusithi lapho obekulethumba khona kumile iqhubu elimhlophe kumbe itshatha elilokumhlotshana lokubomvana, lowomuntu kumele ayebona umphristi. 20 Umphristi uzalihlola,+ nxa likhanya litshonile ejwabini loboya obukulo sebumhlophe, umphristi uzakuthi lowomuntu ungcolile. Ngumkhuhlane wobulephero ophume lapho obekulethumba khona. 21 Kodwa nxa umphristi angalihlola, abesebona ukuthi akulaboya obumhlophe kulo, alitshonanga ejwabini futhi likhanya seliphela, umphristi uzamhlalisa yedwa okwamalanga ayisikhombisa.+ 22 Nxa kusegcekeni ukuthi liyamemetheka ejwabini lakhe umphristi uzakuthi ungcolile, kuyabe kuyibulephero. 23 Kodwa nxa itshatha lakhona lilokhu likuleyondawo njalo lingaqhelanga, kuyabe kuyikuvuvuka nje okubangelwe lithumba, umphristi uzakuthi uhlanzekile.+

24 “Nxa umuntu angatshiswa ngumlilo abe lenxeba, inxeba lelo beselisiba letshatha elilokumhlotshana lokubomvana kumbe libe mhlophe, 25 umphristi uzalihlola. Nxa uboya obukulo sebumhlophe njalo likhanya litshonile ejwabini, kuyabe kungumkhuhlane wobulephero ophume phezu kwenxeba, umphristi uzakuthi lowomuntu ungcolile. Ngumkhuhlane wobulephero. 26 Kodwa nxa umphristi angalihlola, abesebona ukuthi akulaboya obumhlophe kulo lokuthi alitshonanga ejwabini futhi likhanya seliphela, umphristi uzamhlalisa yedwa okwamalanga ayisikhombisa.+ 27 Ngelanga lesikhombisa umphristi uzamhlola futhi, nxa kusegcekeni ukuthi selimemethekile ejwabini lakhe, umphristi uzakuthi ungcolile, kuyabe kungumkhuhlane wobulephero. 28 Kodwa nxa itshatha lakhona lilokhu lisendaweni efananayo, lingamemethekanga ejwabini futhi seliphela, umphristi uzakuthi uhlanzekile ngoba linxeba nje elivuvukileyo.

29 “Nxa umuntu wesilisa loba owesifazana angaba lesilonda ekhanda loba esilevini, 30 umphristi uzasihlola isilonda leso.+ Nxa sikhanya sitshonile ejwabini, lenwele ezikuso sezilithanga futhi sezilutshwana, umphristi uzakuthi lowomuntu ungcolile, ngumkhuhlane ophuma ekhanda kumbe endevini. Yibulephero bekhanda kumbe obesilevu. 31 Kodwa nxa umphristi ebona ukuthi isilonda sakhona asitshonanga ejwabini lokuthi akulanwele ezimnyama kuso, umphristi kumele amhlalise yedwa okwamalanga ayisikhombisa.+ 32 Ngelanga lesikhombisa umphristi uzahlola isilonda leso. Nxa sikhanya singamemethekanga njalo kungaphumanga inwele ezilithanga kuso futhi kusegcekeni ukuthi asitshonanga ejwabini, 33 umuntu lowo kumele aphucwe ikhanda kodwa akumelanga aphucwe lapho okulesilonda khona. Ngemva kwalokho umphristi kumele amhlalise yedwa okwamalanga ayisikhombisa.

34 “Umphristi uzaphinda ahlole indawo elomkhuhlane ngelanga lesikhombisa. Nxa isilonda esisekhanda loba esisendevini singamemethekanga njalo sikhanya singatshonanga ejwabini, umphristi uzakuthi uhlanzekile. Umuntu lowo kumele awatshe izigqoko zakhe abe ngohlanzekileyo. 35 Kodwa nxa umkhuhlane ungamemetheka ejwabini, umphristi esethe uhlanzekile, 36 uzaphinda amhlole. Nxa umkhuhlane usumemethekile ejwabini lakhe, umphristi akusamelanga adinge ukuthi ulenwele ezilithanga yini, lowomuntu ungcolile. 37 Kodwa nxa angahlolwa besekubonakala ukuthi isilonda asimemethekanga njalo sekumile inwele ezimnyama kuso, isilonda leso siyabe sesipholile. Umuntu lo usehlanzekile njalo umphristi uzakuthi uhlanzekile.+

38 “Nxa umuntu wesilisa loba owesifazana engaphuma amatshatha amhlophe ejwabini lakhe, 39 umphristi uzawahlola.+ Nxa amatshatha la esephela njalo emhlophe, kuyabe kuyikuqubuka nje okusejwabini. Umuntu lo uhlanzekile.

40 “Nxa inwele zendoda zingaphela ekhanda, isale isilempabanga ihlanzekile. 41 Nxa ingaphela inwele phambili ekhanda ibe lempabanga khonapho, ihlanzekile. 42 Kodwa nxa ingaba lesilonda esilokubomvu lokumhlotshana lapho okulempabanga khona loba ebunzini, kuyabe kuyibulephero obuqalisayo ekhanda layo loba ebunzini. 43 Umphristi uzayihlola, nxa ileqhubu elilokubomvu lokumhlotshana ekhanda kumbe ebunzini njalo kukhanya angathi ngumkhuhlane wobulephero, 44 iyabe ilobulephero, ingcolile njalo umphristi kumele athi ingcolile ngenxa yomkhuhlane osekhanda layo. 45 Umuntu olomkhuhlane wobulephero kumele agqoke izigqoko ezidabukileyo, ayekele lenwele zakhe zimahlikilili, avale indevu zakhe futhi amemeze athi, ‘Ngingcolile, ngingcolile.’ 46 Nxa umkhuhlane ungakapheli uzahlala engcolile ngaso sonke isikhathi. Kahlale yedwa ngoba ungcolile. Kumele ahlale ngaphandle kwezihonqo.+

47 “Nxa umkhuhlane wobulephero unganamathela esigqokweni kungelani lokuthi ngesewulu loba ngeselineni, 48 loba phezu kohali lwelembu lelineni kumbe olwalokho okwelukwe ngewulu loba phezu kwesikhumba kumbe kwenye nje into eyenziwe ngesikhumba, 49 loba nxa kungaba letshatha elilombala olithanga loluhlaza kumbe obomvana esigqokweni, esikhumbeni, ehalini lwelembu loba kwenye nje into enziwe ngesikhumba, kuyabe kungumkhuhlane wobulephero futhi kumele kuyetshengiswa umphristi. 50 Umphristi uzawuhlola umkhuhlane lowo njalo kumele athathe lokho okulomkhuhlane akubeke kodwa okwamalanga ayisikhombisa.+ 51 Ngelanga lesikhombisa umphristi uzawuhlola umkhuhlane lo, nxa angabona ukuthi umemethekile esigqokweni loba ehalini lwelembu, kumbe esikhumbeni (kungelani lokuthi isikhumba leso sisetshenziswani), kuyabe kungumkhuhlane wobulephero oyingozi, leyonto ingcolile.+ 52 Kumele akutshise kungelani lokuthi yisigqoko loba luhali olukulokho okwelukwe ngewulu kumbe oluselenjini kumbe enye nje into enziwe ngesikhumba engabe isilomkhuhlane ngoba yibulephero obuyingozi. Kumele kutshiswe ngomlilo.

53 “Kodwa nxa umphristi angahlola abone ukuthi umkhuhlane awumemethekanga esigqokweni loba ehalini lwelembu elelukiweyo kumbe kulokho okwenziwe ngesikhumba, 54 umphristi uzakuthi lokho okuhlaselwe ngumkhuhlane kuwatshwe futhi uzakubeka kodwa okwamanye amalanga ayisikhombisa. 55 Umphristi uzaphinda akuhlole lokho okuhlaselwe ngumkhuhlane nxa sekuwatshwe kwahlambuluka. Kodwa nxa itshatha lakhona lingatshintshanga lomkhuhlane ungamemethekanga kuyabe kungcolile. Kumele kutshiswe ngomlilo ngoba kuyabe kudlekile ngaphakathi loba ngaphandle.

56 “Nxa umphristi esehlolile wabona ukuthi itshatha lakhona liphelile ngemva kokuwatshwa kwaleyonto, kumele asike leyongxenye ebiletshatha kungaba sesigqokweni, esikhumbeni loba ehalini oluselenjini. 57 Kodwa nxa lingabonakala kwenye indawo esigqokweni loba ehalini oluselenjini kumbe kwenye nje into eyenziwe ngesikhumba, liyabe limemetheka njalo kumele kutshiswe loba yini esilomkhuhlane.+ 58 Kodwa nxa itshatha lingaphela esigqokweni kumbe ehalini oluselenjini loba kokunye nje okwenziwe ngesikhumba nxa sekuwatshiwe, leyonto kumele iwatshwe okwesibili futhi izakuba ngehlanzekileyo.

59 “Lo ngumthetho ophathelane lomkhuhlane wobulephero oba khona esigqokweni eselukwe ngewulu loba ngelineni, kumbe ehalini oluselenjini loba kokunye nje okwenziwe ngesikhumba, umthetho wokutsho ukuthi into ihlanzekile loba ingcolile.”

14 UJehova waqhubeka ekhuluma loMosi wathi: 2 “Lo ngumthetho ophathelane lomuntu olobulephero okumele ulandelwe ngelanga lokuhlanjululwa kwakhe, nxa sekumele ahanjiswe kumphristi.+ 3 Umphristi uzaphuma phandle kwezihonqo ayemhlola. Nxa umuntu lo olobulephero esesilile, 4 umphristi uzamtshela ukuthi alethe inyoni ezimbili eziphilayo ezihlanzekileyo, logatsha lomsedari, lohali olubomvu, lehisophi* ukuze ahlanjululwe ngezinto lezi.+ 5 Umphristi uzalaya ukuthi inyoni eyodwa ibulawelwe phezu kwamanzi ahlanzekileyo asembizeni yebumba. 6 Kodwa kumele athathe inyoni ephilayo, logatsha lomsedari, lohali olubomvu lehisophi akugxamuze konke egazini lenyoni ayibulalele phezu kwamanzi ahlanzekileyo. 7 Ngemva kwalokho uzachela igazi layo kasikhombisa kulowo ozozihlambulula ubulephero, atsho ukuthi usehlanzekile, abeseyekela inyoni ephilayo iphaphe iye egangeni.+

8 “Lowo ozozihlambulula kumele awatshe izigqoko zakhe, aphuce zonke inwele zakhe, ageze ngamanzi, ngakho uzakuba ngohlanzekileyo. Ngemva kwalokho kumele abuye ezihonqweni, kodwa uzahlala phandle kwetende lakhe okwamalanga ayisikhombisa. 9 Ngelanga lesikhombisa kufanele aphuce zonke inwele ekhanda futhi agele zonke indevu lentshiya. Nxa esephuce zonke inwele zakhe kumele awatshe izigqoko zakhe njalo ageze ngamanzi. Ngakho uzakuba ngohlanzekileyo.

10 “Ngelanga lesi-8 uzathatha imvana ezinduna ezimbili ezingelasici, lensikazi+ eyodwa elomnyaka owodwa engelasici, lezilinganiso ezintathu ze-efa* yefulawa ecolekileyo ehlanganiswe lamafutha kube ngumnikelo wamabele+ kanye lenkomitsho eyodwa* yamafutha.+ 11 Umphristi ozakutsho ukuthi lowo ozozihlambulula uhlanzekile nguye ozabuya laye kanye leminikelo yakhe phambi kukaJehova emnyango wetende lokuhlangana. 12 Umphristi uzathatha imvana eyodwa enduna anikele ngayo ibe ngumnikelo wecala.+ Uzayinikela kanye lenkomitsho yamafutha, akuzunguze kube ngumnikelo wokuzunguzwa phambi kukaJehova.+ 13 Ngemva kwalokho uzahlaba imvana enduna endaweni engcwele lapho okujayele ukuhlatshelwa khona+ umnikelo wesono lomnikelo wokutshiswa, ngoba umnikelo wecala lawo ngowomphristi+ njengomnikelo wesono, ungcwele kakhulu.+

14 “Umphristi uzathatha elinye igazi lomnikelo wecala alininde endlebeni esesandleni sokudla yalowo ozozihlambulula, lasesithupheni sakhe sesandla sokudla lasezwaneni lwakhe olukhulu olusenyaweni lwesandla sokudla. 15 Umphristi uzathatha amanye amafutha asenkomitshini+ awathele esandleni sakhe senxele, 16 abesegxamuza umunwe wakhe wesandla sokudla emafutheni asesandleni sakhe senxele, awafafaze kasikhombisa phambi kukaJehova. 17 Ngemva kwalokho umphristi uzathatha amafutha aseleyo awaninde endlebeni esesandleni sokudla yalowo ozozihlambulula, lasesithupheni sakhe sesandla sokudla lasezwaneni lwakhe olukhulu olusenyaweni lwesandla sokudla phezu kwegazi lomnikelo wecala. 18 Umphristi uzathatha amafutha aseleyo esandleni sakhe awagcobe ekhanda lalowo ozozihlambulula njalo umphristi uzamhlawulela phambi kukaJehova.+

19 “Umphristi uzanikela umnikelo wesono+ ukuze ahlawulele lowo ozozihlambulula ekungcoleni kwakhe. Ngemva kwalokho uzahlaba umnikelo wokutshiswa. 20 Umphristi uzanikela umnikelo wokutshiswa lomnikelo wamabele+ e-alithareni ahlawulele lowomuntu,+ abe ngohlanzekileyo.+

21 “Kodwa nxa engumyanga futhi engenelisi ukuletha izinto lezi, kalethe imvana enduna eyodwa ibe ngumnikelo wesono ozazunguzwa ukuze azihlawulele, kanye lengxenye ye-efa* eyodwa etshumini yefulawa ecolekileyo ehlanganiswe lamafutha kube ngumnikelo wamabele, lamafutha agcwele inkomitsho,* 22 lamajuba amabili kumbe abantwana benkwilimba ababili kusiya ngalokho enelisa ukukuthola. Okunye kuzakuba ngumnikelo wesono okunye kube ngumnikelo wokutshiswa.+ 23 Ngelanga lesi-8+ uzaletha izinto lezi kumphristi emnyango wetende lokuhlangana phambi kukaJehova+ ukuze umphristi atsho ukuthi uhlanzekile.

24 “Umphristi uzathatha imvana enduna yomnikelo wecala+ lamafutha agcwele inkomitsho,* abesekuzunguza kube ngumnikelo wokuzunguzwa phambi kukaJehova.+ 25 Ngemva kwalokho umphristi uzahlaba imvana enduna eyomnikelo wecala, abesethatha elinye igazi lomnikelo wecala alininde endlebeni esesandleni sokudla yalowo ozozihlambulula, lasesithupheni sakhe sesandla sokudla, lasezwaneni lwakhe olukhulu olusenyaweni lwesandla sokudla.+ 26 Umphristi uzathela amanye amafutha esandleni sakhe senxele,+ 27 abesefafaza amanye amafutha asesandleni sakhe senxele kasikhombisa phambi kukaJehova, ngomunwe wakhe wesandla sokudla. 28 Ngemva kwalokho umphristi uzathatha amafutha aseleyo awaninde endlebeni esesandleni sokudla yalowo ozozihlambulula, lasesithupheni sakhe sesandla sokudla, lasezwaneni lwakhe olukhulu olusenyaweni lwesandla sokudla lapho aninde khona igazi lomnikelo wecala. 29 Umphristi uzathatha amafutha asele esandleni sakhe awagcobe ekhanda lalowo ozozihlambulula ukuze amhlawulele phambi kukaJehova.

30 “Umphristi uzanikela elinye ijuba kumbe enye inkwilimba kusiya ngokuthi ozozihlambulula wenelisani+ 31 kulokho angakuthola, okunye kuzakuba ngumnikelo wesono okunye kube ngumnikelo wokutshiswa+ kanye lomnikelo wamabele njalo umphristi uzahlawulela lowo ozozihlambulula phambi kukaJehova.+

32 “Lo ngumthetho ophathelane lomuntu obelobulephero kodwa ongenelisiyo ukukhipha lokho okufunekayo ukuze ahlanjululwe.”

33 UJehova wasesithi kuMosi lo-Aroni: 34 “Nxa selingenile elizweni leKhenani+ engilinika lona ukuthi libe ngelenu+ futhi nxa ngingenza enye yezindlu ezikhona elizweni ibe lomkhuhlane wobulephero,+ 35 umnikazi wendlu leyo kumele aye kumphristi athi kuye, ‘Ngibone okuthile okungathi ngumkhuhlane endlini yami.’ 36 Umphristi uzakuthi konke okusendlini leyo kukhitshelwe phandle engakabuyi ukuzohlola umkhuhlane lowo ukuze angathi konke okusendlini kungcolile. Ngemva kwalokho uzangena ayihlole indlu leyo. 37 Uzahlola leyondawo elomkhuhlane njalo nxa umduli wendlu ulamatshatha alithanga laluhlaza kumbe abomvana futhi ekhanya etshonile emdulini, 38 umphristi uzaphuma endlini leyo ame emnyango njalo uzabeka umlayo wokuthi kungabi lomuntu ozangena kuyo okwamalanga ayisikhombisa.+

39 “Ngelanga lesikhombisa umphristi uzaphenduka azoyihlola indlu leyo. Nxa kuyikuthi umkhuhlane umemethekile emdulini wendlu, 40 umphristi uzakuthi amatshe alomkhuhlane wobulephero akhitshwe ayelahlelwa phandle kwedolobho, endaweni engcolileyo. 41 Ngemva kwalokho umphristi uzakuthi indlu leyo iphalwe okuzwayo ngaphakathi njalo udaka olukhitshiweyo kumele luyelahlelwa phandle kwedolobho, endaweni engcolileyo. 42 Bazafaka amanye amatshe lapho okukhitshwe khona amanye njalo kumele kusetshenziswe olunye udaka futhi indlu leyo kufanele igudulwe.

43 “Kodwa nxa umkhuhlane lowo ungaphinda uphenduke endlini leyo isike yakhitshwa amatshe, yaphalwa futhi yagudulwa kutsha, 44 umphristi uzangena ayihlole. Nxa umkhuhlane umemethekile kuyo kuyabe kuyibulephero obuyingozi,+ indlu leyo ingcolile. 45 Umphristi kumele athi indlu leyo idilizwe, amatshe ayo lamapulanka ayo lalo lonke udaka lwayo kuthathwe kuhanjiswe phandle kwedolobho, endaweni engcolileyo.+ 46 Loba ngubani ozangena endlini leyo ngamalanga eyabe ivalwe ngawo+ uzakuba ngongcolileyo kuze kuhlwe.+ 47 Loba ngubani ozalala endlini leyo kumele awatshe izigqoko zakhe futhi loba ngubani ozadlela kuyo kumele awatshe izigqoko zakhe.

48 “Kodwa nxa umphristi angabuya abesebona ukuthi umkhuhlane awumemethekanga endlini leyo ngemva kokugudulwa kwayo kutsha, umphristi uzakuthi indlu leyo ihlanzekile ngoba umkhuhlane uyabe usuphelile. 49 Kumele athathe inyoni ezimbili, logatsha lomsedari, lohali olubomvu lehisophi+ ukuze ahlambulule ukungcola kwendlu* leyo. 50 Kumele abulalele inyoni eyodwa embizeni yebumba phezu kwamanzi ahlanzekileyo. 51 Ngemva kwalokho kumele athathe inyoni ephilayo, logatsha lomsedari, lohali olubomvu lehisophi akugxamuze konke egazini lenyoni ebulawelwe emanzini ahlanzekileyo njalo kumele afafaze igazi layo kasikhombisa+ endlini leyo. 52 Ngakho uzahlambulula indlu leyo ekungcoleni* kwayo esebenzisa igazi lenyoni lamanzi ahlanzekileyo, lenyoni ephilayo, logatsha lomsedari, lehisophi lohali olubomvu. 53 Ngemva kwalokho uzayekela inyoni ephilayo iphaphe iye egangeni, phandle kwedolobho njalo uzahlawulela indlu leyo ibe ngehlanzekileyo.

54 “Lo ngumthetho ophathelane lemihlobo yonke yobulephero engaba khona ekhanda, endevini,+ 55 loba ezigqokweni+ kumbe endlini,+ 56 kanye lamaqhubu, loqweqwe lamatshatha,+ 57 umthetho ozasetshenziswa ukuze kwaziwe ukuthi into ethile ingcolile yini kumbe ihlanzekile.+ Lo ngumthetho ophathelane lobulephero.”+

15 UJehova waqhubeka ekhuluma loMosi lo-Aroni wathi: 2 “Khuluma labako-Israyeli uthi kubo, ‘Nxa indoda iphuma ubomvu esithweni sayo sensitha, iyabe isingcolile ngenxa yalokho.+ 3 Iyabe ingcolile ngenxa yobomvu obuphuma esithweni sayo kungelani lokuthi buqhubeka buphuma kumbe abusaphumi, ingcolile.

4 “‘Loba yiwuphi umbheda indoda ephuma ubomvu elala kuwo uzakuba ngongcolileyo futhi loba yini ezahlala phezu kwayo izakuba ngengcolileyo. 5 Umuntu ozathinta umbheda wayo kumele awatshe izigqoko zakhe, ageze ngamanzi futhi uzakuba ngongcolileyo kuze kuhlwe.+ 6 Loba ngubani ozahlala phezu kwalokho okuke kwahlalwa yindoda ephuma ubomvu kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 7 Loba ngubani othinta indoda leyo kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 8 Nxa indoda ephuma ubomvu ingakhafulela umuntu ohlanzekileyo, umuntu lowo kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 9 Loba yisiphi isihlalo esifakwa phezu kwesifuyo ezahlala kuso sizakuba ngesingcolileyo. 10 Loba ngubani othinta loba yini ebingaphansi kwayo uzakuba ngongcolileyo kuze kuhlwe futhi loba ngubani ozathwala izinto lezo kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 11 Nxa indoda ephuma ubomvu+ ingathinta omunye umuntu ingagezanga izandla, umuntu lowo kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 12 Loba yisiphi isitsha esenziwe ngebumba esizathintwa yindoda leyo kumele siphahlazwe. Nxa ingathinta esenziwe ngesigodo kumele sigeziswe ngamanzi.+

13 “‘Nxa isipholile ubomvu bungasaphumi, izabala amalanga ayisikhombisa okuhlanjululwa kwayo njalo kumele iwatshe izigqoko zayo, igeze ngamanzi agelezayo njalo izakuba ngehlanzekileyo.+ 14 Ngelanga lesi-8 kumele ithathe amajuba amabili loba abantwana benkwilimba ababili+ iye lakho phambi kukaJehova emnyango wetende lokuhlangana ikunike umphristi. 15 Umphristi uzanikela izinto lezi, okunye kube ngumnikelo wesono, okunye kube ngumnikelo wokutshiswa njalo umphristi uzayihlawulela phambi kukaJehova ngenxa yobomvu obuphuma kuyo.

16 “‘Nxa indoda ingaphuma ubudoda kumele igeze ngamanzi umzimba wonke njalo izakuba ngengcolileyo kuze kuhlwe.+ 17 Kumele iwatshe loba yisiphi isigqoko loba isikhumba esilobudoda futhi lokhu kuzakuba ngokungcolileyo kuze kuhlwe.

18 “‘Nxa indoda ingaya emacansini lowesifazana ibisiphuma ubudoda, bobabili kumele bageze ngamanzi njalo bazakuba ngabangcolileyo kuze kuhlwe.+

19 “‘Nxa owesifazana esopha ngenxa yokuthi usesikhathini uzakuba ngongcolileyo okwamalanga ayisikhombisa.+ Loba ngubani ozamthinta uzakuba ngongcolileyo kuze kuhlwe.+ 20 Loba yini alala kuyo nxa esesikhathini izakuba ngengcolileyo njalo yonke into ahlala phezu kwayo izakuba ngengcolileyo.+ 21 Loba ngubani othinta umbheda wakhe kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe. 22 Loba ngubani othinta loba yini abehlezi phezu kwayo kumele awatshe izigqoko zakhe, ageze ngamanzi, njalo uzakuba ngongcolileyo kuze kuhlwe. 23 Nxa ebehlezi embhedeni loba phezu kwenye into, lowo ozakuthinta lokhu uzakuba ngongcolileyo kuze kuhlwe.+ 24 Nxa indoda ingalala lowesifazana lo ibisithinta ukungcola kwakhe+ okubangelwa yikuba sesikhathini, izakuba ngengcolileyo okwamalanga ayisikhombisa futhi loba yiwuphi umbheda elala phezu kwawo uzakuba ngongcolileyo.

25 “‘Nxa owesifazana engopha okwamalanga amanengi+ kungasiwo malanga akhe okuya esikhathini,+ kumbe nxa engopha ukwedlula isikhathi sakhe sokuya esikhathini, uzakuba ngongcolileyo kuwo wonke amalanga okopha kwakhe, njengalokhu okwenzakala ngamalanga akhe okuya esikhathini. 26 Loba yiwuphi umbheda alala kuwo ngamalanga okopha kwakhe uzakuba ngongcolileyo njengombheda alala kuwo nxa esesikhathini+ futhi loba yiphi into ahlala kuyo izakuba ngengcolileyo njengalokho okwenzakala nxa esesikhathini. 27 Loba ngubani omthintayo uzakuba ngongcolileyo futhi kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe.+

28 “‘Nxa ukopha kwakhe sekuphelile kumele abale amalanga ayisikhombisa, ngemva kwalokho uzakuba ngohlanzekileyo.+ 29 Ngelanga lesi-8 kumele athathe amajuba amabili kumbe abantwana benkwilimba ababili+ aye lakho kumphristi emnyango wetende lokuhlangana.+ 30 Umphristi uzathatha okunye kube ngumnikelo wesono, okunye kube ngumnikelo wokutshiswa njalo uzamhlawulela phambi kukaJehova ngenxa yokopha kwakhe.+

31 “‘Kumele uncede abako-Israyeli ukuthi bahlale behlanzekile ukuze bangafi ngenxa yokungcolisa ithabanikeli lami eliphakathi kwabo.+

32 “‘Lo ngumthetho ophathelane lendoda ephuma ubomvu esithweni sensitha, lendoda engcoliswe yikuphuma ubudoda,+ 33 lowesifazana osesikhathini,+ laye wonke owesifazana owophayo loba owesilisa ophuma okuthile okungcolileyo+ kanye lendoda elala lowesifazana ongcolileyo.’”

16 UJehova wakhuluma loMosi ngemva kokufa kwamadodana ka-Aroni amabili ayefe ngenxa yokusondela kuJehova ngendlela engafanelanga.+ 2 UJehova wathi kuMosi: “Tshela umfowenu u-Aroni ukuthi angaphongungena nje loba ngasiphi isikhathi endaweni engcwele,+ ngale kwekhetheni+ phambi kwesivalo sebhokisi ukuze angafi+ ngoba ngizabonakala phezu kwesivalo+ ngiseyezini.+

3 “Nanku okumele u-Aroni abuye lakho nxa ezongena endaweni engcwele, ijongosi lomnikelo wesono+ kanye lenqama yomnikelo wokutshiswa.+ 4 Kumele agqoke isigqoko selineni esingcwele+ lebhulugwe lelineni elifitshane+ avale umzimba wakhe, athandele ibhanti+ agqoke leqhiye+ ekhanda. Lezi yizigqoko ezingcwele.+ Kumele ageze+ abasezigqoka.

5 “Kumele athathe ebantwini bako-Israyeli+ amazinyane embuzi amabili amaduna abe ngumnikelo wesono lenqama eyodwa ibe ngumnikelo wokutshiswa.

6 “Ngemva kwalokho u-Aroni kumele alethe ijongosi libe ngumnikelo wakhe wesono, ahlawulele yena+ labendlu yakhe.

7 “Abesethatha imbuzi ezimbili azimise phambi kukaJehova emnyango wetende lokuhlangana. 8 U-Aroni uzakwenza inkatho ehlukanise imbuzi lezi ezimbili, enye imbuzi ibe ngekaJehova, enye ibe ngeye-Azazeli.* 9 U-Aroni uzaletha imbuzi ekhethwe ngenkatho+ ukuthi ibe ngekaJehova anikele ngayo ibe ngumnikelo wesono. 10 Kodwa imbuzi ekhethwe ngenkatho ukuthi ibe ngeye-Azazeli kumele ilethwe phambi kukaJehova iphila ukuze kuhlawulelwe ngayo izono. Ngemva kwalokho imbuzi ye-Azazeli kumele iqhutshwe iye enkangala.+

11 “U-Aroni uzaletha ijongosi lomnikelo wesono ukuze azihlawulele yena+ labendlu yakhe, abeselihlaba ijongosi lakhe lomnikelo wesono.

12 “Ngemva kwalokho uzathatha ukhezwana lokuphatha amalahle+ olugcwele amalahle avuthayo athethwe e-alithareni+ phambi kukaJehova kanye lempepha+ enukelelayo ecolekileyo egcwala izandla ezimbili, angene lakho ngale kwekhetheni.+ 13 Uzafaka-ke impepha emlilweni phambi kukaJehova+ njalo iyezi lentuthu yempepha lizasibekela isivalo+ esiphezu kwebhokisi loBufakazi+ ukuze angafi.

14 “Uzathatha elinye igazi lejongosi lelo+ alifafaze ngomunwe wakhe phambi kwesivalo eceleni elisempumalanga njalo elinye uzalifafaza ngomunwe wakhe kasikhombisa phambi kwesivalo.+

15 “Ngemva kwalokho uzahlaba imbuzi yomnikelo wesono yabantu bonke,+ abasengena legazi layo ngale kwekhetheni+ enze lokho akwenze ngegazi lejongosi, kumele afafaze igazi+ layo eduze kwesivalo laphambi kwaso.

16 “Kumele ahlawulele indawo engcwele ngenxa yokungcola kwabantu bako-Israyeli leziphambeko zabo kanye lezono zabo+ futhi lokhu yikho okumele akwenzele itende lokuhlangana eliphakathi kwabo ngenxa yokungcola kwabo.

17 “Akulamuntu okumele abe setendeni lokuhlangana ngesikhathi u-Aroni engena endaweni engcwele esiyahlawulela izono aze aphume. Uzazihlawulela yena, ahlawulele labendlu yakhe+ kanye lebandla lonke lako-Israyeli.+

18 “Ngemva kwalokho uzaphuma ayehlawulela i-alithare+ eliphambi kukaJehova. Uzathatha elinye igazi lenkunzi lelinye igazi lembuzi alininde empondweni ze-alithare emaceleni wonke. 19 Kanti njalo uzafafaza elinye igazi ngomunwe kasikhombisa phezu kwe-alithare, alihlambulule i-alithare njalo alingcwelise ekungcoleni kwabantu bako-Israyeli.

20 “Nxa eseqedile ukuhlawulela+ indawo engcwele letende lokuhlangana kanye le-alithare,+ uzaletha-ke imbuzi ephilayo.+ 21 U-Aroni uzabeka izandla zakhe zombili phezu kwekhanda lembuzi ephilayo, avume phezu kwayo wonke amacala abantu bako-Israyeli leziphambeko zabo zonke kanye lazo zonke izono zabo njalo uzazifaka ekhanda layo,+ abaseyixotshela enkangala iqhutshwa ngumuntu onikwe lowomsebenzi. 22 Kufanele aqhube imbuzi leyo njalo kumele ithwale wonke amacala abo+ iye enkangala.+

23 “Ngemva kwalokho u-Aroni uzangena etendeni lokuhlangana, akhiphe izigqoko zelineni abezigqokile ngesikhathi engena endaweni engcwele futhi uzazibeka phansi khonapho. 24 Kumele ageze umzimba ngamanzi+ endaweni engcwele agqoke izigqoko zakhe+ zomsebenzi wobuphristi, abesephuma anikele umnikelo wakhe wokutshiswa+ lomnikelo wokutshiswa+ wabantu bonke, azihlawulele yena njalo ahlawulele labantu bonke.+ 25 Uzatshisa amafutha omnikelo wesono athunqe phezu kwe-alithare.

26 “Indoda eqhube imbuzi ye-Azazeli+ iyixotshela enkangala kumele iwatshe izigqoko zayo njalo igeze ngamanzi, ibisingena-ke ezihonqweni.

27 “Ijongosi lomnikelo wesono lembuzi yomnikelo wesono, okuthethwe igazi lakho langeniswa endaweni engcwele ukuze kuhlawulelwe ngalo izono, kumele kuthathwe kuhanjiswe phandle kwezihonqo njalo izikhumba zakho lenyama yakho lomswane wakho kufanele kutshiswe ngomlilo.+ 28 Ozatshisa izinto lezi kumele awatshe izigqoko zakhe njalo ageze ngamanzi, ngemva kwalokho usengangena ezihonqweni.

29 “Lo kuzakuba ngumlayo ozahlala ukhona kini: Mhlaka 10 ngenyanga yesikhombisa kumele lizihlukuluze* njalo akulamuntu okumele enze loba yiwuphi umsebenzi+ kungelani lokuthi yisizalwane kumbe ngowesinye isizwe ohlala phakathi kwenu. 30 Ngalelilanga lizahlawulelwa+ ukuze kuthiwe lihlanzekile. Lizahlanzeka kuzo zonke izono zenu phambi kukaJehova.+ 31 Leli lisabatha lokuphumula okupheleleyo kini futhi kumele lizihlukuluze.+ Lo ngumlayo ozahlala ukhona.

32 “Umphristi ogcotshiweyo+ obekwe ukuthi abe ngumphristi+ esikhundleni sikayise,+ nguye ozanikela imihlatshelo yokuhlawulelwa njalo uzagqoka izigqoko zelineni,+ izigqoko ezingcwele.+ 33 Uzahlawulela indawo engcwele+ letende lokuhlangana+ kanye le-alithare+ njalo uzahlawulela abaphristi kanye lalo lonke ibandla.+ 34 Lo kuzakuba ngumlayo ozahlala ukhona+ ukuze kanye ngomnyaka+ abantu bako-Israyeli bahlawulelwe ngenxa yazo zonke izono zabo.”

Ngakho u-Aroni wenza khona kanye uJehova ayekutshilo kuMosi.

17 UJehova wasesithi kuMosi: 2 “Khuluma lo-Aroni lamadodana akhe labo bonke abako-Israyeli uthi kubo, ‘Nanku okutshiwo nguJehova:

3 “‘“Loba ngubani endlini yako-Israyeli ozahlaba inkunzi kumbe imvana enduna loba imbuzi ezihonqweni kumbe akuhlabele phandle kwezihonqo, 4 kulokuthi akulethe emnyango wetende lokuhlangana kube ngumnikelo wokutshiswa kuJehova, phambi kwethabanikeli likaJehova, lowomuntu uzakuba lecala legazi. Kumele abulawe asuswe phakathi kwabantu bakibo ngoba uchithe igazi. 5 Lokhu kwenzelwa ukuthi abako-Israyeli bangaphindi bahlabele izifuyo zabo egangeni kodwa kumele bazilethe kuJehova emnyango wetende lokuhlangana, bazinike umphristi. Kumele banikele ngazo kuJehova zibe yimihlatshelo yobudlelwano.+ 6 Umphristi uzafafaza igazi e-alithareni likaJehova emnyango wetende lokuhlangana njalo atshise amafutha athunqe kube luqhatshi olumnandi kuJehova.+ 7 Ngakho abasoze baphinde banikele imihlatshelo emadimonini anjengembuzi,+ abafeba lawo ngokuwakhonza.+ Lo kuzakuba ngumlayo ozahlala ukhona kuzo zonke izizukulwane zenu.”’

8 “Kumele uthi kubo, ‘Loba nguphi umuntu endlini yako-Israyeli kumbe owesinye isizwe ohlala phakathi kwenu ozanikela umnikelo wokutshiswa kumbe umhlatshelo, 9 angawulethi emnyango wetende lokuhlangana ukuze awunikele kuJehova, kumele abulawe asuswe phakathi kwabantu bakibo.+

10 “‘Loba nguphi umuntu endlini yako-Israyeli loba owesinye isizwe ohlala phakathi kwenu ozakudla loba yiliphi igazi,+ ngizamjezisa sibili umuntu odla igazi njalo ngizambulala ngimsuse ebantwini bakibo. 11 Phela ukuphila kwezidalwa kusegazini+ njalo mina ngokwami ngilinike lona ukuthi lisetshenziswe e-alithareni+ ukuze lizihlawulele ngalo ngoba igazi yilo elihlawulela izono+ ngenxa yokuphila okukulo. 12 Yikho ngithe ebantwini bako-Israyeli: “Kakho phakathi kwenu okumele adle igazi njalo kakho owesinye isizwe ohlala phakathi kwenu+ okumele adle igazi.”+

13 “‘Nxa umuntu wako-Israyeli loba owesinye isizwe ohlala phakathi kwenu angazingela abambe inyamazana loba inyoni edliwayo, kumele athululele igazi layo phansi+ aligqibele ngenhlabathi. 14 Phela ukuphila kwezidalwa zonke ligazi lazo ngoba ukuphila kusegazini. Yikho ngithe kwabako-Israyeli: “Akumelanga lidle igazi laloba yisiphi isidalwa ngoba ukuphila kwezidalwa zonke ligazi lazo. Loba ngubani olidlayo uzabulawa.”+ 15 Loba nguphi umuntu wako-Israyeli kumbe owesinye isizwe ozakudla inyamazana ezifeleyo loba ebulewe yinyamazana yeganga+ kumele awatshe izigqoko zakhe, ageze ngamanzi njalo uzakuba ngongcolileyo kuze kuhlwe.+ Ngemva kwalokho uzakuba ngohlanzekileyo. 16 Kodwa nxa angayekela ukuwatsha izigqoko zakhe lokugeza uzajeziswa ngenxa yecala lakhe.’”+

18 UJehova waqhubeka ekhuluma loMosi wathi: 2 “Khuluma labako-Israyeli uthi kubo, ‘NginguJehova uNkulunkulu wenu.+ 3 Akumelanga lenze okwenziwa ngabantu beGibhithe, lapho ebelihlala khona njalo akumelanga lenze lokho okwenziwa ngabantu beKhenani lapho engilisa khona.+ Akumelanga lilandele imikhuba yabo. 4 Kumele lilandele imithetho yami yokwahlulela njalo kumele ligcine imilayo yami lihambe kuyo.+ NginguJehova uNkulunkulu wenu. 5 Kumele ligcine imilayo yami lemithetho yami yokwahlulela. Loba ngubani okwenzayo lokhu uzaphila ngakho,+ nginguJehova.

6 “‘Akulamuntu phakathi kwenu okumele aye emacansini lesihlobo sakhe.*+ NginguJehova. 7 Akumelanga uye emacansini loyihlo njalo akumelanga uye emacansini lonyoko. Akumelanga ulale laye ngoba ngunyoko.

8 “‘Akumelanga uye emacansini lomkayihlo.+ Lokho kulethela uyihlo ihlazo.*

9 “‘Akumelanga uye emacansini lodadewenu, kungaba yindodakazi kayihlo loba indodakazi kanyoko kungelani lokuthi lizalwa lonke kumbe lizalizelwe.+

10 “‘Akumelanga uye emacansini lendodakazi yendodana yakho loba indodakazi yendodakazi yakho ngoba bayibunqunu bakho.

11 “‘Akumelanga uye emacansini lendodakazi yomkayihlo ezelwe nguyihlo ngoba ingudadewenu.

12 “‘Akumelanga uye emacansini lodadewabo kayihlo ngoba uyisihlobo sikayihlo segazi.+

13 “‘Akumelanga uye emacansini lodadewabo kanyoko ngoba uyisihlobo sikanyoko segazi.

14 “‘Akumelanga ulethele umfowabo kayihlo ihlazo* ngokulala lomkakhe ngoba ungunyoko.+

15 “‘Akumelanga uye emacansini lomalukazana wakho+ ngoba ungumfazi wendodana yakho, akumelanga ulale laye.

16 “‘Akumelanga uye emacansini lomfazi womfowenu+ ngoba lokho kulethela umfowenu ihlazo.*

17 “‘Akumelanga uye emacansini lowesifazana lendodakazi yakhe.+ Akumelanga uthathe indodakazi yendodana yakhe kumbe indodakazi yendodakazi yakhe ulale layo. Lokho kulihlazo* ngoba bayizihlobo zakhe eziseduze.

18 “‘Akumelanga uthathe umlamu wakho abe ngumfazi wakho wesibili+ ubususiya laye emacansini udadewabo esaphila.

19 “‘Akumelanga uye emacansini lowesifazana ngesikhathi sokungcola kwakhe nxa esesikhathini.+

20 “‘Akumelanga uzingcolise ngokuya emacansini lomfazi kamakhelwane wakho.*+

21 “‘Akumelanga uvume ukuthi loba nguphi umntanakho anikelwe* kuMolekhi.+ Akumelanga ungcolise ibizo likaNkulunkulu wakho ngaleyondlela,+ nginguJehova.

22 “‘Akumelanga uye emacansini lomuntu wesilisa, ulale laye angathi ulele lomuntu wesifazana.+ Lokho kuyenyanyeka.

23 “‘Indoda akumelanga iye emacansini lenyamazana ngoba lokhu kuyayingcolisa, lowesifazana akumelanga aye emacansini lenyamazana.+ Lokhu akuhambelani lemvelo.

24 “‘Lingazingcolisi ngaloba yini ezintweni lezi ngoba izizwe engizazidudula phambi kwenu zizingcolisile ngezinto zonke lezi.+ 25 Ngakho-ke ilizwe lingcolile njalo ngizalijezisa ngenxa yecala lalo futhi lizabahlanza abahlala kulo.+ 26 Kodwa lina kumele ligcine imilayo yami lemithetho yami yokwahlulela+ njalo kakho okumele enze loba yikuphi ezintweni lezi ezenyanyekayo, kungelani lokuthi ngum-Israyeli kumbe ngowesinye isizwe ohlala phakathi kwenu.+ 27 Ngoba abantu ababehlala elizweni leli lina lingakafiki babezenza zonke izinto lezi ezenyanyekayo+ njalo khathesi ilizwe lingcolile. 28 Ngakho ilizwe alisoze lilihlanze ngendlela elizahlanza ngayo izizwe ezafika kulo lina lingakafiki ngoba liyabe lingazange lilingcolise. 29 Loba ngubani ozakwenza enye yalezizinto ezenyanyekayo, bonke nje abazenzayo kumele babulawe basuswe ebantwini bakibo. 30 Kumele ligcwalise umlandu wenu kimi, lingenzi loba yiwuphi umkhuba owenyanyekayo owawusenziwa lingakafiki+ ukuze lingazingcolisi ngawo. NginguJehova uNkulunkulu wenu.’”

19 UJehova waqhubeka ekhuluma loMosi wathi: 2 “Khuluma lebandla lonke lako-Israyeli uthi, ‘Kumele libe ngcwele ngoba mina Jehova uNkulunkulu wenu ngingcwele.+

3 “‘Ngamunye wenu kumele ahloniphe* uyise lonina+ njalo kumele ligcine amasabatha ami.+ NginguJehova uNkulunkulu wenu. 4 Lingakhonzi onkulunkulu abangelancedo+ kumbe lizenzele onkulunkulu abenziwe ngensimbi.+ NginguJehova uNkulunkulu wenu.

5 “‘Nxa linikela umhlatshelo wobudlelwano kuJehova+ kumele liwunikele ngendlela ezakwenza ukuthi lamukelwe.+ 6 Kumele udliwe ngelanga ozanikelwa ngalo langelanga elilandelayo. Loba yini ezasala kuze kufike ilanga lesithathu kumele itshiswe ngomlilo.+ 7 Kodwa nxa inyama eseleyo kuwo ingadliwa ngelanga lesithathu uyabe ususenyanyeka, ngeke wamukelwe. 8 Umuntu ozawudla uzajeziswa ngenxa yecala alenzileyo ngoba uyabe engcolise umnikelo kaJehova ongcwele njalo lowomuntu kumele abulawe.

9 “‘Nxa livuna emasimini enu lingavuni konke okusemaphethelweni amasimu njalo lingadobhi lokho okusele ngesikhathi livuna.+ 10 Kanti njalo akumelanga libuthe amagilebisi asele emasimini enu amagilebisi kumbe lawo akhithikele phansi. Kumele liwatshiyele abayanga+ labezinye izizwe. NginguJehova uNkulunkulu wenu.

11 “‘Lingatshontshi,+ lingenzi ubuqili+ njalo lingadlelezelani. 12 Lingafungi into engamanga ngebizo lami,+ lingcolisa ibizo likaNkulunkulu wenu. NginguJehova. 13 Akumelanga uqile umakhelwane wakho*+ futhi ungamtshontsheli.+ Ungabambeli isisebenzi umholo waso ubusuku bonke kuze kube sekuseni.+

14 “‘Akumelanga uthethise umuntu oyisacuthe kumbe ufake loba yini ezagwenxa umuntu oyisiphofu,+ kumele umesabe uNkulunkulu wakho.+ NginguJehova.

15 “‘Akumelanga lahlulele kubi. Akumelanga ubandlulule umyanga kumbe ube lomusa emuntwini onothileyo nxa usahlulela.+ Yahlulela kuhle abantu bakini.

16 “‘Akumelanga uhambe ufafaza amanga phakathi kwabantu bakini unyundisela abanye.+ Akumelanga wenze loba yini ezafaka impilo yomunye wakho+ engozini. NginguJehova.

17 “‘Ungamzondi umfowenu enhliziyweni yakho.+ Ungayekeli ukukhuza umakhelwane wakho+ ukuze ungabi lesono njengaye.

18 “‘Akumelanga uphindisele+ kumbe ubambele abantu bakini isikhwili, njalo kumele uthande umakhelwane wakho ngendlela ozithanda ngayo.+ NginguJehova.

19 “‘Kumele ligcine imilayo yami: Akumelanga uzalanise imihlobo emibili yezifuyo zakho. Akumelanga uhlanyele imihlobo emibili yenhlanyelo+ ensimini yakho njalo akumelanga ugqoke isigqoko esithungwe ngemihlobo emibili yamalembu atshiyeneyo.+

20 “‘Nxa indoda ingaya emacansini lowesifazana oyincekukazi othenjiswe enye indoda, ngapha yena engakahlengwa kumbe engakaphiwa inkululeko, bobabili kumele bajeziswe. Kodwa akumelanga babulawe ngoba owesifazana ubengakanikwa inkululeko. 21 Indoda leyo kumele ilethe umnikelo wecala kuJehova emnyango wetende lokuhlangana, kumele ilethe inqama yomnikelo wecala.+ 22 Umphristi uzayihlawulela ngenqama yomnikelo wecala phambi kukaJehova ukuze ihlawulelwe isono esenzileyo njalo izathethelelwa isono sayo.

23 “‘Nxa lingafika elizweni eliya kulo beselihlanyela izihlahla ezidliwayo, izithelo zazo zizakuba ngezingcolileyo futhi akumelanga lizithinte. Akumelanga lizithinte kuze kudlule iminyaka emithathu njalo lingazidli. 24 Kodwa ngomnyaka wesine zonke izithelo zezihlahla lezo zizakuba ngcwele njalo kuzaba yisikhathi sokuthokoza phambi kukaJehova.+ 25 Ngomnyaka wesihlanu lingadla izithelo zazo ukuze lingezelele isivuno senu. NginguJehova uNkulunkulu wenu.

26 “‘Akumelanga lidle loba yini elegazi.+

“‘Akumelanga lihlahlule* kumbe lenze amasalamusi.+

27 “‘Akumelanga ligele inwele ezisemaceleni kwamakhanda enu kumbe ligele imikhawulo yendevu zenu.+

28 “‘Akumelanga lizisikasike emizimbeni lizilela umuntu ofileyo+ njalo akumelanga lizidwebadwebe* emizimbeni yenu. NginguJehova.

29 “‘Ungayangisi indodakazi yakho ngokuyenza ibe liwule+ ukuze ilizwe lingangcoliswa yibuwule futhi ligcwale ukungaziphathi.+

30 “‘Kumele ligcine amasabatha ami+ njalo lihloniphe* indawo yami engcwele. NginguJehova.

31 “‘Lingayi kwabalamadlozi+ njalo lingabuzi kwabalomoya wokutshela abantu ngekusasa+ ukuze lingazingcolisi ngabo. NginguJehova uNkulunkulu wenu.

32 “‘Kumele usukumele umuntu oseluphele+ njalo uhloniphe umuntu omdala+ futhi kumele umesabe uNkulunkulu wakho.+ NginguJehova.

33 “‘Nxa umuntu wesinye isizwe ehlala phakathi kwenu akumelanga limphathe kubi.+ 34 Umuntu wesinye isizwe ohlala phakathi kwenu kumele limphathe njengomuntu wakini+ njalo kumele limthande ngendlela elizithanda ngayo ngoba lani lake laba ngabezizweni elizweni laseGibhithe.+ NginguJehova uNkulunkulu wenu.

35 “‘Akumelanga lisebenzise izilinganiso zobuqili nxa lilinganisa ubude, ububanzi loba nxa lilinganisa izinto ezikalwayo.+ 36 Kumele lisebenzise izikali eziqondileyo lezisindo eziqondileyo kanye lezilinganiso eziqondileyo* nxa likala izinto ezomileyo kumbe ezingamanzi.+ NginguJehova uNkulunkulu wenu owalikhipha elizweni laseGibhithe. 37 Ngakho kumele ligcine yonke imilayo yami, layo yonke imithetho yami yokwahlulela njalo liyilandele.+ NginguJehova.’”

20 UJehova waqhubeka ekhuluma loMosi wathi: 2 “Khuluma labantu bako-Israyeli uthi kubo, ‘Loba nguphi umuntu wako-Israyeli kumbe owesinye isizwe ohlala ko-Israyeli ozanikela umntanakhe kuMolekhi kumele abulawe loba sekutheni.+ Abantu abahlala elizweni kumele bamkhande ngamatshe aze afe. 3 Mina ngokwami ngizamthukuthelela lowomuntu njalo ngizambulala ngenxa yokuthi unikele abanye abantwabakhe kuMolekhi futhi wangcolisa indawo yami engcwele+ kanye lebizo lami elingcwele. 4 Nxa abantu abahlala elizweni bangenza angathi abakuboni okwenziwa ngumuntu lowo onikela abantwabakhe kuMolekhi njalo bayekele ukumbulala,+ 5 mina ngokwami ngizamthukuthelela sibili lowomuntu kanye lemuli yakhe.+ Ngizambulala yena kanye labo bonke ababambane laye besenza ukungathembeki* ngokukhonza uMolekhi.

6 “‘Kanti njalo umuntu owenza ukungathembeki* ngokuya kwabalamadlozi+ loba kwabalomoya wokutshela abantu ngekusasa,+ ngizamthukuthelela sibili njalo ngizambulala.+

7 “‘Kumele lizihlambulule* libe ngcwele+ ngoba mina nginguJehova uNkulunkulu wenu. 8 Kumele ligcine imilayo yami liyilandele.+ NginguJehova, lowo olihlambululayo.+

9 “‘Loba ngubani othuka uyise kumbe unina kumele abulawe loba sekutheni.+ Nguye oyabe ezilethele ukufa ngenxa yokuthi uthuke uyise kumbe unina.

10 “‘Nanku okumele kwenziwe nxa indoda ingalala lomfazi womunye umuntu: Indoda elele lomfazi womunye umuntu kumele ibulawe loba sekutheni, bobabili kumele babulawe yona kanye lomfazi lowo efebe laye.+ 11 Loba ngubani olala lomfazi kayise, uyabe enzele uyise into elihlazo.+ Yena lomfazi lowo kumele babulawe, yibo abazilethele ukufa. 12 Nxa umuntu angalala lomalukazana wakhe, bobabili kumele babulawe loba sekutheni ngoba benze into elihlazo. Yibo abazilethele ukufa.+

13 “‘Nxa indoda ingaya emacansini lenye indoda njengalokho ekwenza nxa ilele lowesifazana, bobabili kumele babulawe loba sekutheni, benze into enyanyekayo.+ Yibo abazilethele ukufa.

14 “‘Nxa indoda ingathatha umfazi kanye loninazala, lelo lihlazo elikhulu.+ Bobathathu kumele batshiswe ngomlilo+ ukuze ihlazo elinjalo lingabi khona phakathi kwenu.

15 “‘Nxa umuntu angalala lenyamazana kumele abulawe loba sekutheni njalo lenyamazana leyo kufanele ibulawe.+ 16 Nxa owesifazana angaya enyamazaneni ukuze alale layo,+ owesifazana lowo kumele abulawe kanye lenyamazana leyo. Kumele limbulale loba sekutheni, libulale lenyamazana yakhona. Phela yibo abazilethele ukufa.

17 “‘Nxa umuntu angalala lodadewabo, indodakazi kayise loba indodakazi kanina, abone ubunqunu bayo layo ibone ubunqunu bakhe, lokhu kulihlazo.+ Kumele babulawe phambi kwabantu bakibo. Wenze into elihlazo kudadewabo* kumele ajeziswe ngenxa yecala lakhe.

18 “‘Nxa indoda ingaya emacansini lowesifazana osesikhathini bobabili bembule umthombo wegazi lakhe.+ Bonke kumele babulawe.

19 “‘Akumelanga ulale lodadewabo kanyoko kumbe ubabakazi wakho ngoba uyabe usenza into elihlazo ezihlotsheni zakho zegazi.+ Abazakwenza lokhu kumele bajeziswe ngenxa yecala labo. 20 Umuntu olala lomfazi womfowabo kayise uyabe enzele umfowabo kayise into elihlazo.*+ Bobabili kumele bajeziswe ngenxa yesono sabo. Bazakufa bengelabantwana. 21 Nxa umuntu angathatha umfazi womfowabo uyabe enze into eyenyanyekayo.+ Wenzele umfowabo into elihlazo.* Abasoze babe labantwana.

22 “‘Kumele ligcine yonke imilayo yami, layo yonke imithetho yami yokwahlulela+ njalo liyilandele+ ukuze ilizwe engilisa ukuthi liyehlala kulo lingalihlanzi.+ 23 Akumelanga lilandele imikhuba yezizwe engizidudula phambi kwenu,+ ngoba abantu bazo benza zonke izinto lezi futhi ngiyazenyanya.+ 24 Yikho ngathi kini: “Lizathatha ilizwe labo njalo ngizalinika lona libe ngelenu, ilizwe eligeleza uchago loluju.+ NginguJehova uNkulunkulu wenu olehlukanise lezinye izizwe.”+ 25 Kumele linanzelele umehluko phakathi kwenyamazana ehlanzekileyo lenyamazana engcolileyo, lenyoni engcolileyo kanye lehlanzekileyo.+ Akumelanga lizingcolise ngenyamazana loba inyoni kumbe ngaloba yisiphi isinanakazana esihamba emhlabathini engilehlukanisele sona ngalitshela ukuthi singcolile.+ 26 Kumele libe ngcwele ngoba mina Jehova ngingcwele+ njalo ngiyalehlukanisa phakathi kwezinye izizwe ukuze libe ngabami.+

27 “‘Loba nguphi umuntu wesifazana kumbe owesilisa oyisangoma kumbe olomoya wokutshela abantu ngekusasa kumele abulawe loba sekutheni.+ Abantu abahlala elizweni kumele bamkhande ngamatshe aze afe. Phela nguye ozilethele ukufa.’”

21 UJehova waphinda wathi kuMosi: “Khuluma labaphristi amadodana ka-Aroni uthi kubo, ‘Kakho okumele azingcolise ngokuthinta isidumbu* phakathi kwabantu bakini.+ 2 Kodwa lokhu angakwenza nxa kufe umuntu oyisihlobo sakhe segazi kungaba ngunina, uyise, indodana yakhe, indodakazi yakhe, loba umfowabo, 3 njalo angazingcolisa nxa kungudadewabo ahlala laye,* oyintombi egcweleyo futhi engakendi. 4 Kodwa akumelanga azingcolise nxa kufe owesifazana othethwe ngenye indoda ebantwini bakibo. 5 Abaphristi akumelanga baphuce amakhanda abo+ kumbe bagele imikhawulo yendevu zabo kumbe bazisikasike emzimbeni.+ 6 Kumele babe ngcwele kuNkulunkulu wabo+ njalo akumelanga bangcolise ibizo likaNkulunkulu wabo+ ngoba yibo abatshisa iminikelo kaJehova, isinkwa* sikaNkulunkulu wabo futhi kumele babe ngcwele.+ 7 Umphristi akumelanga athathe owesifazana oliwule+ kumbe owesifazana osengcolisiwe loba owesifazana odivosileyo+ ngoba umphristi ungcwele kuNkulunkulu wakhe. 8 Kumele limphathe njengongcwele+ ngoba nguye onikela isinkwa sikaNkulunkulu wenu. Kumele abe ngcwele kini ngoba mina Jehova ngingcwele futhi yimi engilenza libe ngcwele.+

9 “‘Nxa indodakazi yomphristi ingazingcolisa ngokuba liwule iyabe ingcolisa ibizo likayise. Kumele itshiswe ngomlilo.+

10 “‘Umphristi omkhulu phakathi kwabafowabo ogcotshwe ngamafutha angcwele ekhanda lakhe+ njalo wabekwa ukuthi agqoke izigqoko zobuphristi,+ akumelanga ayekele inwele zakhe zingamahlahla kumbe adabule izigqoko zakhe.+ 11 Akumelanga asondele kuloba nguphi umuntu ofileyo+ njalo akumelanga azingcolise lanxa kungabe kufe uyise loba unina. 12 Akumelanga aphume endaweni engcwele njalo akumelanga angcolise indawo engcwele kaNkulunkulu wakhe+ ngoba uphawu lokuzinikela, okutsho amafutha angcwele kaNkulunkulu wakhe,+ luphezu kwakhe. NginguJehova.

13 “‘Nxa ethatha kumele athathe intombi egcweleyo.+ 14 Akumelanga athathe umfelokazi kumbe owesifazana odivosileyo loba owesifazana osengcolisiwe kumbe oliwule. Kodwa kumele athathe intombi egcweleyo ebantwini bakibo ibe ngumkakhe. 15 Akumelanga angcolise abantwabakhe phakathi kwabantu bakibo+ ngoba mina nginguJehova omenza abe ngcwele.’”

16 UJehova waqhubeka ekhuluma loMosi wathi: 17 “Tshela u-Aroni uthi, ‘Loba ngubani phakathi kwabantwabakho lakuzo zonke izizukulwane zabo olobulima obuthile, akumelanga anikele isinkwa sikaNkulunkulu wakhe. 18 Loba yiphi indoda elobulima obuthile akumelanga isondele e-alithareni kungaba ngengaboniyo, eyisigoga, elobulima ebusweni, eqhugezelayo, elengalo emfitshane kulenye, 19 indoda eyephuke unyawo loba isandla, 20 edundubeleyo emhlane kumbe engakhuliyo* loba elobulima elihlweni kumbe elezikhwekhwe, elentembuzane kumbe elimele amasende.+ 21 Loba ngubani olobulima obuthile phakathi kwabantwana baka-Aroni umphristi akumelanga asondele ukuze atshisele uJehova iminikelo. Kasoze anikele isinkwa sikaNkulunkulu wakhe ngoba ulobulima obuthile. 22 Angadla isinkwa sikaNkulunkulu wakhe esithethwe ezintweni ezingcwele kakhulu+ lakulezo ezingcwele.+ 23 Kodwa akumelanga asondele eduze kwekhetheni+ njalo akumelanga asondele e-alithareni+ ngenxa yokuthi ulobulima. Akumelanga angcolise indawo yami engcwele+ ngoba mina nginguJehova obenza babe ngcwele.’”+

24 Ngakho uMosi wakhuluma lo-Aroni lamadodana akhe labo bonke abako-Israyeli.

22 UJehova waqhubeka ekhuluma loMosi wathi: 2 “Tshela u-Aroni lamadodana akhe ukuthi bananzelele indlela abaphatha ngayo iminikelo engcwele elethwa ngabako-Israyeli kimi njalo bangangcolisi ibizo lami+ elingcwele nxa benikela iminikelo le.+ NginguJehova. 3 Batshele uthi, ‘Loba ngubani kuzo zonke izizukulwane zenu ozakuthi engcolile, abesesondela ezintweni ezingcwele ezinikelwe ngabako-Israyeli kuJehova kumele abulawe asuswe phambi kwami.+ NginguJehova. 4 Kakho phakathi kwamadodana ka-Aroni olobulephero+ kumbe ophuma ubomvu+ esithweni sensitha okumele adle izinto ezingcwele, aze abe ngohlanzekileyo.+ Kunjalo langomuntu ongcoliswe yikuthinta isidumbu somuntu+ loba ophuma ubudoda esithweni sakhe,+ 5 loba othinte isinanakazana esingcolileyo+ loba othinte umuntu ongcoliswe yiloba yini ebangela ukuthi abe ngongcolileyo.+ 6 Umuntu ozathinta loba yini ezintweni lezi uzakuba ngongcolileyo kuze kuhlwe njalo akumelanga adle loba yini ezintweni ezingcwele, kodwa kufanele ageze ngamanzi.+ 7 Nxa ilanga lingatshona, uzakuba ngohlanzekileyo futhi usengadla izinto ezingcwele ngoba yikho ukudla kwakhe.+ 8 Kanti njalo akumelanga adle inyamazana ezifeleyo kumbe ebulewe zinyamazana zeganga ukuze angazingcolisi ngayo.+ NginguJehova.

9 “‘Kumele benze lokho engibatshela khona ukuze bangabi lesono, besebebulawa ngenxa yokungcolisa izinto ezingcwele. NginguJehova obenza babe ngcwele.

10 “‘Umuntu ongasiwemuli yabaphristi akumelanga adle loba yini engcwele.+ Lomuntu wesinye isizwe ovakatshele umphristi loba oyisisebenzi esiqhatshiweyo akumelanga adle loba yini engcwele. 11 Kodwa nxa umphristi ethenge isigqili ngemali yakhe singadla izinto lezi. Lezigqili ezizalelwe emzini wakhe lazo zingadla ukudla kwakhe.+ 12 Nxa indodakazi yomphristi ingendela emuntwini ongasimphristi, akumelanga idle iminikelo yezinto ezingcwele. 13 Kodwa nxa indodakazi yomphristi ingaba ngumfelokazi kumbe idivose ingelabantwana, ibisibuyela iyehlala emzini kayise njengasebutsheni bayo, ingadla ukudla kukayise.+ Kodwa umuntu ongasiwemuli yabaphristi akumelanga akudle.

14 “‘Nxa umuntu angenza iphutha adle loba yini engcwele, kumele abuyisele umnikelo lowo kumphristi njalo angezelele amaphesenti angu-20 phezu kwawo.+ 15 Yikho akumelanga bangcolise izinto ezingcwele ezilethwe ngabantu bako-Israyeli bezonikela kuJehova,+ 16 besebebangela ukuthi abantu bajeziswe ngenxa yecala lokudla izinto ezingcwele ngoba mina nginguJehova obenza babe ngcwele.’”

17 UJehova waqhubeka ekhuluma loMosi wathi: 18 “Khuluma lo-Aroni lamadodana akhe labo bonke abantu bako-Israyeli uthi kubo, ‘Nxa umuntu wako-Israyeli loba owesinye isizwe ohlala ko-Israyeli eletha umnikelo wokutshiswa+ kuJehova ukuze agcwalise izifungo zakhe kumbe nxa ezokwenza umnikelo wokuzithandela,+ 19 kumele alethe inkunzi engelasici,+ ethethwe emhlambini wakhe kumbe imvana ezinduna loba imbuzi ukuze amukelwe nguNkulunkulu. 20 Akumelanga lilethe loba yini elesici+ ngoba iminikelo enjalo ayisoze yenze ukuthi lamukelwe.

21 “‘Nxa umuntu eletha umhlatshelo wobudlelwano+ kuJehova ukuze agcwalise isifungo sakhe kumbe nxa enikela ngokuthanda kwakhe, kumele anikele ngesifuyo esingelasici esivela emhlambini wakhe wenkomo, owezimvu loba owembuzi ukuze amukelwe. Kumele kube yisifuyo esingelasici ngitsho. 22 Akumelanga linikele ngesifuyo esiyisiphofu, esephukileyo, esilenxeba, esilensumpa, esilesikhwekhwe loba esilentembuzane. Lingalethi izifuyo ezinjalo kuJehova kumbe linikele ngazo e-alithareni likaJehova. 23 Nxa linikela ngokuthanda kwenu lingaletha inkunzi loba imvu elonyawo olude kumbe olufitshane kulezinye kodwa isifuyo esinjalo ngeke samukelwe nxa kungumnikelo wesifungo. 24 Akumelanga lilethe kuJehova isifuyo esilamasende alimeleyo, achotshoziweyo kumbe aqunyiweyo loba esitheniweyo futhi akumelanga linikele ngezifuyo ezinjalo elizweni lenu. 25 Akumelanga linikele ngezifuyo ezinjalo lanxa zilethwe ngabezinye izizwe ukuthi zibe yikudla kukaNkulunkulu wenu, ngenxa yokuthi zingcolisiwe futhi zilesici. Iminikelo enjalo ngeke yenze ukuthi lamukelwe.’”

26 UJehova waphinda wakhuluma loMosi wathi: 27 “Nxa kungazalwa ithole eliduna kumbe imvana enduna loba izinyane lembuzi eliduna lizaqhubeka lilonina okwamalanga ayisikhombisa.+ Kodwa kusukela ngelanga lesi-8 kusiyaphambili selingamukelwa ukuthi libe ngumnikelo, umnikelo wokutshiswa owenzelwa uJehova. 28 Akumelanga uhlabe inkomo loba imvu kanye lomntanayo langa linye.+

29 “Nxa linikela umhlatshelo wokubonga kuJehova,+ kumele liwunikele ngendlela ezakwenza ukuthi lamukelwe. 30 Kumele udliwe ngelanga onikelwe ngalo. Akumelanga litshiye loba yini yawo kuze kuse.+ NginguJehova.

31 “Kumele ligcine imithetho yami njalo liyilandele.+ NginguJehova. 32 Akumelanga lingcolise ibizo lami elingcwele+ njalo kumele ngingcweliswe phakathi kwabantu bako-Israyeli.+ NginguJehova olenza libe ngcwele,+ 33 lowo owalikhipha elizweni laseGibhithe ukuze ngitshengise ukuthi nginguNkulunkulu wenu.+ NginguJehova.”

23 UJehova waqhubeka ekhuluma loMosi wathi: 2 “Khuluma labantu bako-Israyeli uthi kubo, ‘Imikhosi+ kaJehova ezakwenziwa ngezikhathi ezimisiweyo okumele liyimemezele,+ iyimihlangano engcwele. Nansi imikhosi yakhona:

3 “‘Lingasebenza okwamalanga ayisithupha kodwa ilanga lesikhombisa lizakuba lisabatha, ilanga lokuphumula okupheleleyo,+ umhlangano ongcwele. Akumelanga lenze loba yiwuphi umsebenzi. Kumele kube lisabatha elenzelwa uJehova loba ngaphi lapho elihlala khona.+

4 “‘Le yimikhosi kaJehova ezakwenziwa ngezikhathi ezimisiweyo, imihlangano engcwele okumele liyimemezele ngezikhathi zayo ezimisiweyo: 5 Mhlaka 14+ kusihlwa, ngenyanga yokuqala kuzakuba liPhasika+ likaJehova.

6 “‘Mhlaka 15 ngaleyonyanga kuzakuba loMkhosi Wesinkwa Esingelamvubelo owenzelwa uJehova.+ Kumele lidle isinkwa esingelamvubelo okwamalanga ayisikhombisa.+ 7 Ngelanga lokuqala lizakwenza umhlangano ongcwele.+ Akumelanga lenze loba yiwuphi umsebenzi onzima. 8 Kodwa kumele litshisele uJehova umnikelo okwamalanga ayisikhombisa. Ngelanga lesikhombisa kuzakuba lomhlangano ongcwele. Akumelanga lenze loba yiwuphi umsebenzi onzima.’”

9 UJehova waqhubeka ekhuluma loMosi wathi: 10 “Khuluma labako-Israyeli uthi kubo, ‘Nxa selifikile elizweni engizalinika lona, beselivuna isivuno salo kumele lilethe kumphristi isithungo samabele enu ayizithelo zokuqala+ zesivuno senu.+ 11 Umphristi uzazunguza isithungo leso phambi kukaJehova ukuze lamukelwe. Kumele asizunguze ngelanga elilandela eleSabatha. 12 Ngelanga okuzazunguzwa ngalo isithungo, kumele linikele ngemvana enduna elomnyaka owodwa futhi engelasici, ibe ngumnikelo wokutshiswa owenzelwa uJehova. 13 Umnikelo wamabele elizawunikela kanye layo kumele ube zingxenye ze-efa* ezimbili etshumini zefulawa ecolekileyo, ehlanganiswe lamafutha, umnikelo oloqhatshi olumnandi otshiselwa uJehova ngomlilo. Umnikelo walo wokunathwayo kumele ube yingxenye yehini* eyodwa kwezine. 14 Akumelanga lidle loba yisiphi isinkwa, loba amabele akhanzingiweyo kumbe amabele amatsha ilanga leli lingakafiki, kuze kube yilapho selilethe umnikelo kaNkulunkulu wenu. Lo ngumlayo ozahlala ukhona kuzo zonke izizukulwane zenu loba ngaphi lapho elihlala khona.

15 “‘Kumele libale amasabatha ayisikhombisa kusukela ngelanga elilandela eleSabatha, kusukela ngelanga elilethe ngalo isithungo somnikelo wokuzunguzwa.+ Kumele kube ngamaviki agcweleyo. 16 Kumele libale amalanga angu-50+ kuze kufike ilanga elilandela iSabatha lesikhombisa, beseliletha-ke umnikelo wamabele amatsha kuJehova.+ 17 Kumele lithathe izinkwa ezimbili endaweni elihlala kuzo libuye lazo zibe ngumnikelo wokuzunguzwa. Kumele zibhekhwe ngefulawa ecolekileyo ezingxenye ze-efa* ezimbili etshumini. Kufanele zifakwe imvubelo,+ zibe yizithelo zokuqala eziphiwa uJehova.+ 18 Okunye okumele likulethe lezinkwa lezo zimvana ezinduna eziyisikhombisa ezingelasici ezilomnyaka owodwa lejongosi elilodwa kanye lenqama ezimbili.+ Lokhu kuzakuba ngumnikelo wokutshiswa owenzelwa uJehova ndawonye lomnikelo wamabele kanye leminikelo yokunathwayo, kube ngumnikelo oloqhatshi olumnandi otshiselwa uJehova ngomlilo. 19 Kumele linikele ngezinyane lembuzi elilodwa libe ngumnikelo wesono,+ lemvana ezinduna ezimbili ezilomnyaka owodwa zibe ngumhlatshelo wobudlelwano.+ 20 Umphristi uzazunguza imvana lezo ezimbili kanye lezinkwa zezithelo zokuqala, kube ngumnikelo wokuzunguzwa phambi kukaJehova. Kumele kube ngumnikelo ongcwele kuJehova ozaphiwa umphristi.+ 21 Ngelanga leli kumele limemezele+ ukuthi kube lomhlangano ongcwele. Akumelanga lenze loba yiwuphi umsebenzi onzima. Lo ngumlayo ozahlala ukhona kuzo zonke izizukulwane zenu endaweni zonke elihlala kuzo.

22 “‘Nxa selivuna elizweni lenu, akumelanga livune liqede konke okusemaphethelweni amasimu enu njalo akumelanga lidobhe okukhithikayo nxa livuna.+ Kufanele likutshiyele abayanga+ labezinye izizwe.+ NginguJehova uNkulunkulu wenu.’”

23 UJehova waqhubeka ekhuluma loMosi wathi: 24 “Khuluma labako-Israyeli uthi kubo, ‘Mhlaka 1 ngenyanga yesikhombisa, kumele kube lilanga lokuphumula okupheleleyo, ilanga elizamenyezelwa ngokutshaya icilongo+ ukuze likhumbule ukuthi ngumhlangano ongcwele. 25 Alisoze lenze loba yiwuphi umsebenzi onzima njalo kufanele lilethe umnikelo ozatshiselwa uJehova ngomlilo.’”

26 UJehova waqhubeka ekhuluma loMosi wathi: 27 “Kodwa mhlaka 10 ngenyanga le yesikhombisa kuzakuba liLanga Lokuhlawulelwa.+ Kumele lenze umhlangano ongcwele njalo lizihlukuluze*+ futhi lilethe umnikelo ozatshiselwa uJehova ngomlilo. 28 Akumelanga lenze loba yiwuphi umsebenzi ngelanga leli ngoba lilanga lokuhlawulelwa, ilanga elizahlawulelwa+ ngalo phambi kukaJehova uNkulunkulu wenu. 29 Loba ngubani ongasoze azihlukuluze* ngelanga leli uzabulawa.+ 30 Kanti njalo ngizatshabalalisa wonke umuntu ozakwenza loba yiwuphi umsebenzi ngelanga leli. 31 Akumelanga lenze loba yiwuphi umsebenzi. Lo ngumlayo ozahlala ukhona kuzo zonke izizukulwane zenu loba ngaphi lapho elihlala khona. 32 Leli lisabatha lokuthi liphumule ngokupheleleyo njalo mhlaka 9 kusihlwa ngaleyonyanga, kumele lizihlukuluze.+ Kufanele linanze isabatha kusukela kusihlwa kuze kuhlwe ngelanga elilandelayo.”

33 UJehova waqhubeka ekhuluma loMosi wathi: 34 “Khuluma labako-Israyeli uthi kubo, ‘Mhlaka 15 ngenyanga le yesikhombisa kuzakuba nguMkhosi Wezihonqo,* ozakwenzelwa uJehova okwamalanga ayisikhombisa.+ 35 Ngelanga lokuqala kuzakuba lomhlangano ongcwele futhi akumelanga lenze loba yiwuphi umsebenzi onzima. 36 Okwamalanga ayisikhombisa kumele lilethe umnikelo ozatshiselwa uJehova ngomlilo. Ngelanga lesi-8 kufanele lenze umhlangano ongcwele+ njalo lilethe umnikelo ozatshiselwa uJehova ngomlilo. Lo ngumhlangano oqakathekileyo. Akumelanga lenze umsebenzi onzima.

37 “‘Le yimikhosi+ kaJehova ezakwenziwa ngezikhathi ezimisiweyo okufanele liyimemezele ibe yimihlangano engcwele,+ ukuze lilethe umnikelo otshiselwa uJehova ngomlilo: umnikelo wokutshiswa,+ lomnikelo wamabele+ ozanikelwa lomhlatshelo kanye leminikelo yokunathwayo+ kusiya ngalokho okuhleliweyo ilanga ngalinye. 38 Iminikelo le izanikelwa phezu kwaleyo enikelwa ngamasabatha+ kaJehova laphezu kwezipho zenu,+ leminikelo yenu yezifungo,+ leminikelo yenu yokuzithandela,+ iminikelo okufanele liyinike uJehova. 39 Kodwa mhlaka 15 ngenyanga yesikhombisa nxa selivunile isivuno elizweni lenu, kufanele linanze umkhosi kaJehova okwamalanga ayisikhombisa.+ Ilanga lokuqala lizakuba ngelokuphumula okupheleleyo futhi lelanga lesi-8 lizakuba ngelokuphumula okupheleleyo.+ 40 Ngelanga lokuqala lizathatha izithelo zezihlahla ezinhle, lamahlamvu ezihlahla zelala,+ lengatsha zezihlala ezilamahlamvu amanengi kanye lezezihlahla zomphophula ezisesigodini njalo lizathokoza+ phambi kukaJehova uNkulunkulu wenu okwamalanga ayisikhombisa.+ 41 Kumele linanze umkhosi kaJehova okwamalanga ayisikhombisa ngomnyaka+ njalo kufanele liwunanze ngenyanga yesikhombisa. Lo ngumlayo ozahlala ukhona kuzo zonke izizukulwane zenu. 42 Kumele lihlale ezihonqweni okwamalanga ayisikhombisa.+ Bonke abako-Israyeli kumele bahlale ezihonqweni, 43 ukuze izizukulwane ezizayo zikwazi+ ukuthi ngenza abako-Israyeli bahlala ezihonqweni ngesikhathi ngibakhipha elizweni laseGibhithe.+ NginguJehova uNkulunkulu wenu.’”

44 Ngakho uMosi watshela abako-Israyeli mayelana lemikhosi kaJehova okumele yenziwe ngezikhathi ezimisiweyo.

24 UJehova waqhubeka ekhuluma loMosi esithi: 2 “Tshela abako-Israyeli ukuthi balethe kuwe amafutha ama-oliva acengekileyo, azafakwa phakathi kwezibane ukuze ziqhubeke zikhanya ngaso sonke sikhathi.+ 3 U-Aroni kumele ahlele ukuthi izibane ziqhubeke zikhanya phambi kukaJehova ngaso sonke isikhathi, phandle kwekhetheni loBufakazi, etendeni lokuhlangana kusukela kusihlwa kuze kube sekuseni. Lo ngumlayo ozahlala ukhona kuzo zonke izizukulwane zenu. 4 Kumele abe leqiniso lokuthi izibane eziseluthini lwesibane+ olwenziwe ngegolide elicengekileyo zisebenza kuhle ngaso sonke isikhathi phambi kukaJehova.

5 “Kumele uthathe ifulawa ecolekileyo upheke izinkwa ezingu-12 eziyisigombolozi. Ngasinye kumele siphekwe ngefulawa elingana lengxenye ze-efa* ezimbili etshumini. 6 Kufanele uzifake phezu kwetafula yegolide elicengekileyo+ phambi kukaJehova, ugadanise eziyisithupha zibe zodwa,+ ugadanise lezinye eziyisithupha zibe zodwa. 7 Kumele ufake inhlaka ecolekileyo yokwenza impepha phezu kwezinkwa lezo ezigadanisiweyo njalo izakuba ngumnikelo otshiselwa uJehova esikhundleni* sezinkwa lezo.+ 8 Ngelanga ngalinye leSabatha kumele afake izinkwa lezo phambi kukaJehova.+ Lesi yisivumelwano esizahlala sikhona engisenza labako-Israyeli. 9 Isinkwa leso sizakuba ngesika-Aroni lamadodana akhe+ njalo bazasidlela endaweni engcwele+ ngoba siyinto engcwele kakhulu ephiwe yena, evela eminikelweni etshiselwa uJehova ngomlilo. Lo ngumlayo ozahlala ukhona.”

10 Phakathi kwabantu bako-Israyeli kwakulendodana ezalwa ngowesifazana ongum-Israyeli lendoda engumGibhithe+ njalo indodana leyo yalwa lendoda engum-Israyeli ezihonqweni. 11 Indodana yowesifazana ongum-Israyeli yaqalisa ukuhlambalaza ibizo likaNkulunkulu njalo yalithuka.+ Ngakho bayithatha bayisa kuMosi.+ Ibizo likanina kwakunguShelomithi indodakazi kaDibhiri owesizwana sakoDani. 12 Bayithatha bayivalela kwaze kwaba yilapho uJehova ebacacisela ukuthi uthini ngendaba leyo.+

13 UJehova wasesithi kuMosi: 14 “Lowo obethuka mkhipheleni phandle kwezihonqo njalo bonke abamuzwe ethuka kumele babeke izandla zabo ekhanda lakhe futhi lonke ibandla kumele limkhande ngamatshe.+ 15 Tshela abako-Israyeli ukuthi loba ngubani ozathuka uNkulunkulu wakhe uzajeziswa ngenxa yesono sakhe. 16 Ngakho umuntu ozahlambalaza ibizo likaJehova kumele abulawe loba sekutheni.+ Lonke ibandla kufanele limkhande ngamatshe. Umuntu othuka ibizo likaNkulunkulu kumele abulawe kungelani lokuthi ngowesinye isizwe loba ngum-Israyeli.

17 “‘Nxa umuntu angabulala omunye umuntu kumele abulawe loba sekutheni.+ 18 Loba ngubani ozatshaya isifuyo somunye asibulale kumele asibhadale, kufanele abhadale ukuphila ngokuphila.* 19 Nxa umuntu angalimaza umakhelwane wakhe,* khonokho akwenzileyo kumele kwenziwe lakuye.+ 20 Ukwephula ngokwephula, ilihlo ngelihlo, izinyo ngezinyo, indlela alimaze ngayo omunye laye kumele alinyazwe ngayo.+ 21 Umuntu ozatshaya isifuyo somunye aze asibulale kumele asibhadale,+ kodwa lowo otshaya umuntu aze ambulale kumele abulawe.+

22 “‘Kuzasebenza umthetho ofananayo kini kungelani lokuthi ngumuntu wesinye isizwe kumbe ngum-Israyeli+ ngoba nginguJehova uNkulunkulu wenu.’”

23 UMosi wasekhuluma labantu bako-Israyeli njalo bathatha lowo owayezwakale ethuka bamkhiphela phandle kwezihonqo, bamkhanda ngamatshe.+ Ngakho abako-Israyeli benza khona kanye uJehova ayekutshele uMosi.

25 UJehova waqhubeka ekhuluma loMosi entabeni iSinayi wathi: 2 “Khuluma labantu bako-Israyeli uthi kubo, ‘Nxa selifikile elizweni engizalinika lona,+ ilizwe lelo kumele ligcine isabatha likaJehova.+ 3 Kumele lihlanyele inhlanyelo emasimini enu okweminyaka eyisithupha njalo lithene izihlahla zamagilebisi emasimini enu okweminyaka eyisithupha futhi lizabutha isivuno selizwe.+ 4 Kodwa ngomnyaka wesikhombisa kumele kube lisabatha lokuthi ilizwe liphumule ngokupheleleyo, isabatha likaJehova. Ngalowo mnyaka akumelanga lihlanyele inhlanyelo emasimini enu kumbe lithene izihlahla zamagilebisi emasimini enu. 5 Akumelanga livune amabele azimilele wodwa kulokho okwakhithika ngesikhathi livuna njalo lingakhi izithelo ezihlahleni zenu zamagilebisi ezingathenwanga. Kumele kube lomnyaka wokuthi ilizwe liphumule ngokupheleleyo. 6 Loba kunjalo, lingadla izilimo ezizimilele zodwa ngesikhathi kulisabatha lelizwe, lina lezigqili zenu lezigqilikazi zenu, lezisebenzi zenu eziqhatshiweyo labezinye izizwe abahlala lani, 7 lezifuyo zenu kanye lenyamazana zeganga eziselizweni lenu. Lingadla konke nje okuzimilele kodwa emasimini.

8 “‘Kumele libale iminyaka yamasabatha eyisikhombisa, iminyaka eyisikhombisa ephindwe kasikhombisa njalo iminyaka le yamasabatha ayisikhombisa izakuba yiminyaka engu-49. 9 Ngakho mhlaka 10 ngenyanga yesikhombisa, ngeLanga Lokuhlawulelwa+ kuzamele litshaye uphondo luzwakale ukuze umsindo walo uzwakale kuzo zonke indawo elizweni lenu. 10 Kumele lenze umnyaka wesi-50 ube ngcwele njalo limemezele inkululeko kubo bonke abantu abahlala elizweni,+ leli kuzakuba liJubhili* kini. Umuntu ngamunye kumele abuyele elifeni lakhe futhi umuntu ngamunye kumele abuyele emulini yakhe.+ 11 Umnyaka wesi-50 uzakuba liJubhili kini. Alisoze lihlanyele kumbe livune lokho okuzimilele kodwa, kulokho okwakhithika ngesikhathi livuna loba likhe izithelo ezihlahleni zenu zamagilebisi ezingathenwanga.+ 12 Phela leli liJubhili njalo kumele libe ngcwele kini. Ngakho lingadla kuphela lokho okuzimilele kodwa emasimini.+

13 “‘Ngomnyaka lo weJubhili ngamunye wenu kumele abuyele elifeni lakhe.+ 14 Nxa ungathengisela umakhelwane wakho* loba yini kumbe uthenge okuthile kuye lingaqilani.+ 15 Nxa uthenga ulutho kumakhelwane wakho kumele ubale ukuthi sekuleminyaka emingaki iJubhili ledlula njalo yena kumele akuthengisele ekhangela ukuthi mingaki iminyaka eseleyo yokuvuna izilimo.+ 16 Nxa kusasele iminyaka eminengi angakhweza intengo yayo kodwa nxa kusele iminyaka emilutshwana kumele ehlise intengo ngoba uyabe ekuthengisela okuhambelana lesivuno esingatholakala. 17 Phakathi kwenu akungabi lomuntu ozaqila umakhelwane wakhe+ njalo kufanele limesabe uNkulunkulu wenu+ ngoba nginguJehova uNkulunkulu wenu.+ 18 Nxa lingalandela imilayo yami njalo ligcine imithetho yami yokwahlulela lizahlala elizweni lingesabi lutho.+ 19 Ilizwe lizathela izithelo zalo+ futhi lizakudla lisuthe, lihlale kulo lingesabi lutho.+

20 “‘Nxa lingabuza lithi, “Pho sizakudlani ngomnyaka wesikhombisa njengoba singasoze sihlanyele kumbe sivune izilimo zethu?”+ 21 Lapho-ke ngizathumela isibusiso sami kini ngomnyaka wesithupha njalo ilizwe lizathela amabele azakwenela iminyaka emithathu.+ 22 Nxa lingahlanyela amabele ngomnyaka wesi-8 lizaqhubeka lisidla amabele elawavuna ngomnyaka wesithupha njalo lizabe lisidla wona kuze kufike isikhathi sokuvuna ngomnyaka wesi-9.

23 “‘Umhlabathi* akumelanga uthengiswe ube ngowomunye umuntu kokuphela+ ngoba ilizwe ngelami,+ ngenxa yokuthi mina ngilibona lingabezizweni kulo, abantu abaphiwe indawo yokuhlala.+ 24 Kulo lonke ilizwe lenu kumele linike lowo othengise umhlabathi ilungelo lokuthi awuthenge kutsha.

25 “‘Nxa umfowenu angaba ngumyanga abesethengisa elinye ilifa lakhe, isihlobo sakhe esiseduze esilelungelo lokuhlenga kumele sibuye sizothenga lokho umfowabo ayekuthengisile.+ 26 Nxa umuntu engelaye ongahlenga ilifa lakhe kodwa abesenotha athole imali yokuhlenga ilifa ayelithengisile, 27 kumele abale inzuzo yesivuno esatholakala ngeminyaka ayethengise ngayo insimu leyo, abesenika lowo ayemthengisele insimu leyo imali eseleyo, ayikhiphe kuleyo ayemthengisele ngayo. Ngemva kwalokho usengabuyela elifeni lakhe.+

28 “‘Kodwa nxa engenelisi ukulithenga ukuze libuyele kuye, lizaqhubeka likulowo owalithengayo kuze kufike umnyaka weJubhili.+ Ilifa lakhe lizabuyiselwa kuye ngomnyaka weJubhili futhi uzabuyela elifeni lakhe.+

29 “‘Nxa umuntu angathengisa indlu edolobheni eligonjolozelwe ngomduli, uzaqhubeka elelungelo lokuyihlenga kuze kuphele umnyaka kusukela ngesikhathi ayithengise ngaso. Uzakuba lelungelo lokuyihlenga+ okomnyaka wonke. 30 Kodwa nxa ehlulekile ukuyihlenga kwaze kwaphela umnyaka, indlu leyo esedolobheni eligonjolozelwe ngomduli izahle ibe yimpahla yalowo owayithengayo, izakuba ngeyakhe lezizukulwane zakhe kuze kube nini lanini. Akumelanga ibuyiselwe kumnikazi ngomnyaka weJubhili. 31 Kodwa izindlu ezisezindaweni ezingagonjolozelwanga ngemiduli kumele zibalwe ndawonye lamasimu asemaphandleni. Ilungelo lokuzihlenga kumele lihlale likhona futhi kumele zibuyiselwe kubanikazi ngomnyaka weJubhili.

32 “‘Kanti njalo amaLevi azahlala elelungelo lokuhlenga izindlu zawo ezisemadolobheni awo.+ 33 Nxa umLevi ehlulekile ukuhlenga indlu ayeyithengisile kwelinye lamadolobho awo, indlu leyo kumele ibuyiselwe kumnikazi ngomnyaka weJubhili+ ngoba izindlu zamaLevi ezisemadolobheni awo zililifa lawo phakathi kwama-Israyeli.+ 34 Kanti njalo lamadlelo+ asemaceleni kwamadolobho awo akumelanga athengiswe ngoba azahlala elilifa lawo kokuphela.

35 “‘Nxa umfowenu oseduze lawe angaba ngumyanga aswele okokuziphilisa, kumele umncede+ ngendlela onceda ngayo owesinye isizwe kanye lalowo obuye wazohlala phakathi kwenu,+ mncede ukuze aqhubeke ephila kanye lawe. 36 Ungenzi inzuzo ngaye kumbe uzalise imali omboleke yona.+ Kumele wesabe uNkulunkulu wakho+ njalo umfowenu uzaqhubeka ephila kanye lawe. 37 Akumelanga umboleke imali ezalayo+ kumbe umnike ukudla kwakho ukuze uthole inzuzo. 38 NginguJehova uNkulunkulu wenu owalikhipha elizweni laseGibhithe+ ukuthi ngilinike ilizwe laseKhenani ukuze ngitshengise ukuthi nginguNkulunkulu wenu.+

39 “‘Nxa umfowenu ohlezi eduze lawe angaba ngumyanga, abe sezithengisela kuwe,+ akumelanga umbambe ngamandla ukuthi enze umsebenzi owenziwa yizigqili.+ 40 Kumele umphathe njengesisebenzi esiqhatshiweyo+ loba njengomuntu ovela kwelinye ilizwe. Kufanele akusebenzele kuze kuyefika umnyaka weJubhili. 41 Ngemva kwalokho uzasuka kuwe kanye labantwabakhe abuyele emulini yakibo. Kumele abuyele elifeni labokhokho bakhe.+ 42 Ngenxa yokuthi abako-Israyeli bayizigqili zami engazikhipha elizweni laseGibhithe,+ akumelanga bazithengise ngendlela isigqili esithengiswa ngayo. 43 Akumelanga umphathe ngokhahlo+ umfowenu njalo kumele umesabe uNkulunkulu wakho.+ 44 Izigqili lezigqilikazi zenu kumele zivele emazweni angomakhelwane, yikho lapho okumele lithenge khona isigqili loba isigqilikazi. 45 Kanti njalo lingazithenga lasebantwini bezinye izizwe abahlala phakathi kwenu,+ lingazithenga kubo kumbe lithenge amadodana abo azalelwe elizweni lenu njalo bazakuba yizigqili zenu. 46 Lingazinika abantwabenu abazalandela ngemva kwenu zibe lilifa labo kokuphela. Zingaba yizisebenzi zenu kodwa akumelanga liphathe kubi abafowenu abangama-Israyeli.+

47 “‘Nxa umuntu wesinye isizwe kumbe lowo obuye wazohlala phakathi kwenu anganotha kodwa umfowenu oseduze laye abe ngumyanga aze azithengise kulowomuntu kumbe kulowo obuye wazohlala phakathi kwenu loba esihlotsheni somuntu wesinye isizwe, 48 uzaqhubeka elelungelo lokuhlengwa lanxa eyabe esezithengisile. Omunye wabafowabo angamhlenga,+ 49 kumbe ahlengwe ngumfowabo kayise loba indodana yomfowabo kayise kumbe ahlengwe ngomunye nje umuntu oyisihlobo sakhe esiseduze* emulini yangakibo.

“‘Ikanti laye angenelisa ukuzihlenga nxa kuyikuthi uyabe esenothile.+ 50 Yena lomuntu owamthengayo kumele babale ukuthi sekudlule iminyaka emingaki kusukela ngesikhathi azithengisa ngaso kuze kufike umnyaka weJubhili.+ Imali ayethengwe ngayo kumele ihambelane leminyaka leyo.+ Imali yamalanga akhe okusebenza kumele ihambelane lemali ebhadalwa isisebenzi esiqhatshiweyo.+ 51 Nxa kusasele iminyaka eminengi, imali yokuhlengwa kwakhe azayibhadala kumele ihambelane leminyaka leyo eseleyo. 52 Kodwa nxa sekusele iminyaka emilutshwana ukuthi kufike umnyaka weJubhili, kumele azibalele yena iminyaka yakhona, abesebhadala imali yokuzihlenga ehambelana leminyaka leyo eseleyo. 53 Kufanele aqhubeke emsebenzela umnyaka ngomnyaka njengesisebenzi esiqhatshiweyo njalo kumele ube leqiniso lokuthi kamphathi kubi.+ 54 Kodwa nxa engenelisi ukuzihlenga ngezindlela lezi, usezakhululwa ngomnyaka weJubhili,+ yena kanye labantwabakhe.*

55 “‘Phela abantu bako-Israyeli bayizigqili zami. Izigqili zami engazikhipha elizweni laseGibhithe.+ NginguJehova uNkulunkulu wenu.

26 “‘Lingazenzeli onkulunkulu abangelancedo+ njalo akumelanga limise isithombe esibaziweyo+ kumbe insika elizayikhonza. Akumelanga limise ilitshe elibaziweyo+ elizweni lenu ukuze likhothame kulo+ ngoba nginguJehova uNkulunkulu wenu. 2 Kumele ligcine amasabatha ami njalo litshengise ukuthi liyayihlonipha indawo yami engcwele. NginguJehova.

3 “‘Nxa lingaqhubeka lilandela imilayo yami, ligcina lemithetho yami futhi lisenza lokho ekutshoyo,+ 4 ngizalinisela izulu ngesikhathi salo+ njalo lomhlabathi uzathela izithelo zawo+ kuthi lezihlahla zeganga zilinike izithelo zazo. 5 Isikhathi senu sokubhula sizaqhubeka kuze kufike isikhathi sokuvuna amagilebisi njalo isikhathi sokuvuna amagilebisi sizaqhubeka kuze kufike isikhathi sokulima, lizakudla ukudla kwenu lisuthe futhi lihlale livikelekile elizweni lenu.+ 6 Ngizakwenza kube lokuthula elizweni,+ lizalala kungabi lomuntu ozalenza lesabe+ njalo ngizaxotsha zonke inyamazana zeganga eziyingozi elizweni futhi inkemba yempi ayisoze idabule phakathi kwelizwe lenu. 7 Lizazixotshanisa sibili izitha zenu njalo lizibulale ngenkemba. 8 Abantu benu abahlanu bazaxotshanisa abangu-100, abangu-100 baxotshanise abangu-10 000, lizazibulala ngenkemba izitha zenu.+

9 “‘Ngizakuba lomusa kini, ngilenze lizalane, ngilandise libe banengi+ futhi ngizasigcina isivumelwano engisenze lani.+ 10 Lizakuthi lisadla isivuno elisithole ngomnyaka ophelileyo, besekudingeka ukuthi likhiphe isivuno esidala ukuze lifake amabele amatsha. 11 Angisoze ngililahle njalo ngizafaka ithabanikeli lami phakathi kwenu.+ 12 Ngizahamba phakathi kwenu, ngibe nguNkulunkulu wenu+ njalo lina lizakuba ngabantu bami.+ 13 NginguJehova uNkulunkulu wenu owalikhipha elizweni laseGibhithe ukuze lingasabi yizigqili zabo futhi ngephula ijogwe lenu ngenza ukuthi lihambe liphakamise amakhanda.*

14 “‘Kodwa nxa lingayekela ukungilalela kumbe liyekele ukugcina yonke imithetho le+ 15 njalo lingamukeli imilayo yami,+ lenyanye lemithetho yami yokwahlulela futhi lehluleke ukugcina yonke imithetho yami lephule isivumelwano sami,+ 16 nanku engizakwenza kini: Ngizalijezisa ngomkhuhlane wofuba loqhuqho lokukhathazeka, ngenze amehlo enu afiphale njalo liphele amandla. Lizahlanyela kodwa lingatholi lutho ngoba amabele akhona azadliwa yizitha zenu.+ 17 Ngizalithukuthelela njalo lizanqotshwa yizitha zenu+ futhi labo abalizondayo bazaligxobagxoba.+ Lizabaleka kungelamuntu olixotshanisayo.+

18 “‘Nxa lalokhu kungasoze kwenze ukuthi lingilalele ngizalijezisa kasikhombisa ngenxa yezono zenu. 19 Ngizakuqeda du ukuzikhukhumeza kwenu elikwenza ngobuqholo njalo ngizakwenza amazulu enu abe njengensimbi+ lomhlaba wenu ube njengekhopha. 20 Lizaqeda amandla enu lisebenzela ize ngoba ilizwe lenu alisoze lithele isivuno salo,+ lezihlahla eziselizweni azisoze zithele izithelo.

21 “‘Kodwa nxa lingaqhubeka lingihlamukela njalo lingafuni ukungilalela ngizalijezisa kasikhombisa ngokuhambelana lezono zenu. 22 Ngizathumela inyamazana zeganga phakathi kwenu,+ zizabulala abantwabenu+ zitshaye zivale lezifuyo zenu njalo lizasala libalutshwana, lemigwaqo yenu izasala ingelabantu abahamba kuyo.+

23 “‘Nxa lingabe lilokhu lingafuni ukuthi ngiliqondise+ futhi liqhubeka lingihlamukela lanxa sengilehlisele konke lokhu, 24 lami ngizakuba yisitha senu njalo ngizalijezisa kasikhombisa ngenxa yezono zenu. 25 Ngizakwenza izitha zenu zilihlasele ngenkemba ukuze ngilijezise ngenxa yokwephula isivumelwano sami.+ Nxa lingabuthana emadolobheni enu ngizathumela umkhuhlane phakathi kwenu+ futhi ngizalinikela esandleni sesitha senu.+ 26 Nxa sengidilize izinto* eligcinela kuzo isinkwa senu,*+ abesifazana abalitshumi bazapheka isinkwa eziko elilodwa,* bazakala+ isinkwa senu balinike okuncane njalo lizakudla kodwa alisoze lisuthe.+

27 “‘Nxa lingabe lilokhu lingafuni ukungilalela futhi liqhubeke lingihlamukela lanxa sengilehlisele izinto zonke lezi, 28 lami ngizakuba yisitha senu esikhulu+ futhi ngizalijezisa kasikhombisa ngenxa yezono zenu. 29 Lapho-ke lizakudla inyama yamadodana enu, lidle lenyama yamadodakazi enu.+ 30 Ngizatshabalalisa indawo zenu eziphakemeyo elikhonzela kuzo,+ ngidilize lezinto elitshisela kuzo impepha. Ngizabuthelela izidumbu zenu phezu kwenqumbi yezithombe zenu ezenyanyekayo*+ futhi ngizalifulathela ngoba liyabe lingenyanyisa.+ 31 Ngizakwenza ukuthi amadolobho enu ahlaselwe ngenkemba,+ ngidilize lendawo zenu ezingcwele futhi angisoze ngihogele uqhatshi olumnandi lwemihlatshelo yenu. 32 Mina ngokwami ngizakwenza ilizwe lisale liyindawo engelalutho,+ okokuthi izitha zenu eziyabe zihlala kulo zizabamba owangaphansi nxa zikhangele ilizwe.+ 33 Ngizalichithachitha liye kwezinye izizwe+ njalo ngizahwatsha inkemba ngilixotshanise.+ Ilizwe lenu lizakuba yindawo engelalutho+ futhi amadolobho enu azatshabalaliswa.

34 “‘Ngalesosikhathi lapho lina seliselizweni lezitha zenu, ilizwe lenu lizabhadala amasabatha alo ngazo zonke insuku liyindawo engelalutho. Ngalesosikhathi ilizwe lizaphumula* njengoba kuyabe kumele libhadale amasabatha alo.+ 35 Ilizwe lizaphumula ngazo zonke insuku seliyindawo engelalutho ngoba alizange liphumule ngesikhathi samasabatha enu, ngesikhathi lisahlala kulo.

36 “‘Labo abazasala bephila+ ngizakwenza inhliziyo zabo zibe lokwesaba okukhulu bekhonale emazweni ezitha zabo. Bazabalekela umsindo wehlamvu eliphetshulwa ngumoya, bazabaleka njengomuntu obalekela inkemba njalo bawe kungelamuntu obaxotshanisayo.+ 37 Bazagwenxana bawe njengabantu ababalekela inkemba lanxa kungelamuntu obaxotshanisayo. Alisoze lenelise ukulwisana lezitha zenu.+ 38 Lizaphelela phakathi kwezizwe+ njalo lizabhujiswa lilizwe lezitha zenu. 39 Labo abazasala bephila phakathi kwenu bazabolela emazweni ezitha zenu+ ngenxa yecala lenu. Bazabola sibili ngenxa yamacala aboyise.+ 40 Lapho-ke bazavuma icala labo,+ bavume lecala laboyise kanye lokungathembeki kwabo njalo bazavuma ukuthi benze ukungathembeki ngokungihlamukela.+ 41 Yikho-ke lami ngaba yisitha sabo+ ngabasa elizweni lezitha zabo.+

“‘Lokhu kwakusenzelwa ukuthi mhlawumbe bazazithoba,*+ besebebhadala icala abalenzileyo. 42 Ngizasikhumbula isivumelwano sami loJakhobe+ lesivumelwano sami lo-Isaka.+ Ngizakhumbula lesivumelwano sami lo-Abrahama+ futhi ngikhumbule lelizwe. 43 Ngesikhathi betshiye ilizwe lingelalutho lalibhadala amasabatha alo+ njalo lalisele lilunxiwa bengekho kulo, labo babebhadala amacala abo ngoba bala ukulandela imithetho yami yokwahlulela futhi benyanya imilayo yami.+ 44 Lanxa kunjalo angisoze ngibalahle kokuphela+ ngesikhathi beselizweni lezitha zabo kumbe ngibadele baze baphele nya. Phela lokhu bekungephula isivumelwano sami+ labo ngoba nginguJehova uNkulunkulu wabo. 45 Ngenxa yabo ngizakhumbula isivumelwano engasenza labokhokho babo+ engabakhipha elizweni laseGibhithe izizwe zikhangele+ ukuze ngitshengise ukuthi nginguNkulunkulu wabo. NginguJehova.’”

46 Le yimilayo lemithetho kanye lemithetho yokwahlulela uJehova ayinika abantu bako-Israyeli esebenzisa uMosi entabeni iSinayi.+

27 UJehova waqhubeka ekhuluma loMosi wathi: 2 “Khuluma labako-Israyeli uthi kubo, ‘Nxa umuntu angenza isifungo esiqakathekileyo+ sokunikela kuJehova ngemali elingana lenani elibekiweyo elikhitshelwa umuntu, 3 nxa kungumuntu wesilisa oleminyaka engu-20 kusiya kwengu-60, kumele kube ngamashekheli esiliva angu-50 nxa kulinganiswa ngeshekheli yendawo engcwele.* 4 Kodwa nxa kungumuntu wesifazana, kumele kube ngamashekheli angu-30. 5 Nxa kungumuntu oleminyaka emihlanu kusiya kwengu-20, inani elibekiweyo okumele likhitshelwe umuntu wesilisa lizakuba ngamashekheli angu-20 ikanti elowesifazana lizakuba ngamashekheli angu-10. 6 Nxa kungumntwana olenyanga eyodwa kusiya koleminyaka emihlanu, ongumfana kumele akhitshelwe amashekheli esiliva amahlanu, oyinkazana kumele akhitshelwe amashekheli esiliva amathathu.

7 “‘Nxa kungumuntu oleminyaka engu-60 kusiya phezulu, owesilisa kumele akhitshelwe amashekheli angu-15 ikanti owesifazana uzakhitshelwa amashekheli angu-10. 8 Kodwa nxa umuntu engumyanga futhi engenelisi ukukhipha inani elibekiweyo,+ uzakuma phambi komphristi njalo umphristi uzamtshela ukuthi akhiphe okunganani. Umphristi uzamtshela inani okumele alikhiphe kusiya ngokuthi owenze isifungo wenelisa okunganani.+

9 “‘Nxa umuntu enze isifungo sokuthi uzanikela ngesifuyo esamukelekayo kuJehova, loba yini enikwe uJehova izakuba ngengcwele. 10 Kangeke alethe esinye esikhundleni saso kumbe atshintshe esihle ngesibi loba esibi ngesihle. Kodwa nxa angatshintsha isifuyo ngesinye isifuyo, zonke zizakuba ngcwele, esakuqala laleso atshintshise ngaso. 11 Nxa kuyisifuyo esingcolileyo+ esingeke sibe ngumnikelo ophiwa uJehova, kumele asimise phambi komphristi. 12 Umphristi uzakutsho ukuthi kumele sikhitshelwe intengo enganani kusiya ngokuthi sihle yini loba hatshi. Imali ezaqanjwa ngumphristi yiyo okuzamele ikhitshwe. 13 Kodwa nxa lowomuntu efuna ukusithenga kutsha siphinde sibe ngesakhe, kumele angezelele amaphesenti angu-20 phezu kwentengo ebekiweyo.+

14 “‘Nxa umuntu anganikela ngendlu yakhe ukuthi ibe yinto engcwele kuJehova, umphristi uzakutsho intengo yayo kungelani lokuthi inhle yini loba hatshi. Intengo yayo kumele ihambelane lenani eliqanjwe ngumphristi.+ 15 Kodwa nxa lowo onikele ngendlu esefuna ukuyithenga kutsha iphinde ibe ngeyakhe, kumele angezelele amaphesenti angu-20 phezu kwentengo ebekiweyo, indlu leyo ibisisiba ngeyakhe.

16 “‘Nxa umuntu anganikela ingxenye yensimu yakhe kuJehova, intengo yayo izakuya ngokuthi kudingakala inhlanyelo enganani ukuze kuhlanyelwe kuyo: inhlanyelo yebhali egcwala ihomeri* eyodwa izakuba ngamashekheli esiliva angu-50. 17 Nxa anganikela ngensimu yakhe ngomnyaka weJubhili,+ intengo efunekayo ayisoze itshintshe. 18 Nxa anganikela ngensimu yakhe iJubhili selidlulile, umphristi uzambalela intengo yayo njalo amehlisele intengo ebekiweyo kusiya ngokuthi sekusele iminyaka emingaki ukuthi kufike iJubhili elilandelayo.+ 19 Kodwa nxa lowo onikele ngensimu esefuna ukuyithenga iphinde ibe ngeyakhe, kumele angezelele amaphesenti angu-20 phezu kwentengo ebekiweyo njalo insimu izakuba ngeyakhe. 20 Nxa engazange ayithenge kutsha insimu leyo ibisithengiselwa omunye umuntu, ngeke aphinde ayithenge kutsha. 21 Nxa insimu ingakhululwa ngomnyaka weJubhili, izakuba yinto engcwele kuJehova, insimu enikelwe kuye. Izakuba yimpahla yabaphristi.+

22 “‘Nxa umuntu anganikela kuJehova ngensimu ayithengileyo, insimu engasingxenye yelifa lakhe,+ 23 umphristi uzambalela intengo yayo kusiya ngokuthi sekusele iminyaka emingaki ukuthi kufike umnyaka weJubhili njalo kumele abhadale leyomali eqanjiweyo ngalolosuku.+ Le yinto engcwele kuJehova. 24 Ngomnyaka weJubhili insimu leyo izabuyela kulowo ayithenga kuye, izabuyela kumnikazi wayo.+

25 “‘Yonke intengo eyenziwayo kumele ilinganiswe ngeshekheli yendawo engcwele. Ishekheli kumele lilingane lamagera angu-20.*

26 “‘Loba kunjalo akulamuntu okumele angcwelise amazibulo ezifuyo ngoba amazibulo ezifuyo ngakaJehova.+ Avele ngakaJehova kungelani lokuthi yinkunzi kumbe yimvu.+ 27 Kodwa nxa kungesinye sezifuyo ezingcolileyo njalo nxa efuna ukusithenga kutsha, kumele abhadale intengo ebekiweyo abesengezelela amaphesenti angu-20 phezu kwentengo yakhona.+ Kodwa nxa engazange asithenge kutsha, sizathengiswa ngemali eqanjiweyo.

28 “‘Nxa umuntu angathatha loba yini ezintweni alazo ayinikele ukuthi ibe ngekaJehova kokuphela, into leyo ayisoze ithengiswe kumbe ithengwe kutsha kungelani lokuthi ngumuntu loba yisifuyo kumbe ngamasimu. Konke nje okwehlukaniselwe uJehova kungcwele kakhulu.+ 29 Kanti njalo akulamuntu ophiwe isigwebo sokufa* okumele ahlengwe.+ Kumele abulawe loba sekutheni.+

30 “‘Konke okwetshumi+ kwelizwe ngokukaJehova kungelani lokuthi yisivuno esivela emasimini kumbe yizithelo ezivela ezihlahleni. Kuyinto engcwele kuJehova. 31 Nxa umuntu efuna ukuthenga kutsha okwetshumi akulethileyo kuphinde kube ngokwakhe, kumele angezelele amaphesenti angu-20 phezu kwentengo yakho ebekiweyo. 32 Konke nje okwetshumi okuvela emhlambini wenkomo, owezimvu loba owembuzi, sonke isifuyo setshumi esidlula ngaphansi kwentonga yomelusi kumele sibe ngesingcwele kuJehova. 33 Akumelanga ahlole ukuthi sihle yini loba hatshi njalo akumelanga asitshintshe. Kodwa nxa angazama ukusitshintsha, sona kanye laleso atshintshe ngaso zizakuba yinto engcwele.+ Akumelanga zithengwe kutsha.’”

34 Le yimithetho uJehova ayinika uMosi entabeni iSinayi+ ukuze ayinike abantu bako-Israyeli.