IZILILO
א [Aleph]*
1 Idolobho ebeligcwele abantu+ selingamanxiwa!
Idolobho ebelilabantu abanengi kulamanye amadolobho+ selinjengomfelokazi!
Idolobho ebelinjengendlovukazi phakathi kwezabelo seliyisigqili!+
ב [Beth]
2 Likhala ezimathonsi ubusuku bonke,+ izihlathi zalo seziyimifula yezinyembezi.
Akula ngitsho lesisodwa isithandwa salo esiliduduzayo.+
Bonke abangane balo sebelihlamukele,+ sebeyizitha zalo.
ג [Gimel]
3 Abantu bakoJuda bathunjiwe+ baba yizigqili, baphethwe kabuhlungu njalo bayahlukuluzwa.+
Sekumele bahlale phakathi kwezizwe,+ abakutholi ukuphumula.
Ababahlukuluzayo babathole bephakathi kosizi.
ד [Daleth]
4 Imigwaqo yeZiyoni iyalila ngoba akulamuntu oya emadilini.*+
Wonke amagedi ayo adiliziwe,+ abaphristi bayo basebuhlungwini.
IZiyoni iphakathi kosizi, intombi zayo ziyalila.
ה [He]
5 Izitha zayo sezingamakhosi ayo, abayizondayo bachelesile.+
UJehova uyilethele usizi ngenxa yezono zayo+ ezinengi.
Abantwabayo bathunjwe yisitha.+
ו [Waw]
6 Ubuhle bendodakazi yeZiyoni+ sebuphelile.
Izikhulu zayo sezinjengomziki omduna oswele amadlelo,
Zihamba zizihudula ngenxa yokudinwa zibalekela ozixotshanisayo.
ז [Zayin]
7 Ngensuku zokuhlupheka kweJerusalema, lapho abantu bayo beswele indawo yokuhlala,
IJerusalema ikhumbula izinto zayo eziligugu eyayilazo kudala.+
Ngesikhathi abantu bayo behlaselwa yisitha, kungelamuntu ongabanceda,+
Izitha zayo ziyibonile itshabalaliswa,+ zayikhangela nje zahleka.
ח [Heth]
8 IJerusalema yonile kakhulu,+
Yikho isisenyanyeka.
Bonke ababeyihlonipha sebeyenyanya ngoba babubonile ubunqunu bayo.+
Isebuhlungwini+ futhi ifulathele ngenxa yenhloni.
ט [Teth]
9 Izigqoko zayo zingcolile.
Kayizange icabangisise ngekusasa layo.+
Iwe ngendlela ezwisa usizi, akulamuntu oyiduduzayo.
Awu Jehova, khangela ukuhlupheka kwami ngoba isitha sami sizitshaya isifuba.+
י [Yod]
10 Isitha sibuthe yonke inotho+ yeJerusalema.
Abantu beJerusalema babone abezizweni bengena ethempelini,+
Labo owawuthe akumelanga bahlangane labantu bakho.
כ [Kaph]
11 Bonke abantu bayo bayabubula, badinga ukudla.+
Bathengisa inotho yabo eligugu ukuze bathole ukudla, bangafi.
Awu Jehova, khangela ubone ukuthi senginjengowesifazana odelelwayo.
ל [Lamed]
12 Akutsho lutho kini yini lina elidlula ngendlela?
Khangelani libone!
Kambe bukhona yini ubuhlungu obedlula lobu engiphakathi kwabo,
Engibehliselwe nguJehova ngosuku lwentukuthelo yakhe evuthayo?+
מ [Mem]
13 Ungehlisele umlilo uvela ezulwini watshisa wonke amathambo ami.+
Ungithiye ngenethi wangenza ngabuyela emuva.
Ungenze ngasala ngedwa njengowesifazana ongelabani.
Seliphuma lize liyetshona ngigula.
נ [Nun]
14 Izono zami zibotshelwe entanyeni yami njengejogwe, uzibophe mfi ngezandla zakhe.
Zifakwe entanyeni yami, angiselamandla ngitsho.
UJehova unginikele ezandleni zalabo abalamandla kulami.+
ס [Samekh]
15 UJehova uwalabhulele khatshana wonke amadoda alamandla abephakathi kwami.+
Uqoqe abantu ukuthi bazongihlasela baqede amajaha ami.+
UJehova uvoxavoxe indodakazi yakoJuda esikhamelweni sewayini.*+
ע [Ayin]
16 Ngiyakhala ngenxa yezinto lezi,+ amehlo ami agcwele izinyembezi,
Ngoba lowo obezangiduduza angiqinise ukhatshana.
Amadodana ami asephelelwe lithemba ngoba isitha sinqobile.
פ [Pe]
17 IZiyoni yelule izandla zayo+ icela uncedo kodwa akulamuntu oyiduduzayo.
UJehova wenze bonke abagombolozele uJakhobe baba yizitha zakhe.+
Sebeyenyanya+ iJerusalema.
צ [Tsade]
18 UJehova ulungile,+ mina yimi engingayilalelanga imilayo yakhe.+
Lalelani lonke lina bantu, libone ubuhlungu engikubo.
Sebethumbe izintombi zami lamajaha ami.+
ק [Qoph]
19 Ngizibizile izithandwa zami kodwa zona sezingihlamukele.+
Abaphristi labadala besizwe batshabalele edolobheni
Ngesikhathi bedinga ukudla ukuze bangafi.+
ר [Resh]
20 Awu Jehova, khangela ukuthi ngisebunzimeni obunganani.
Ngiyatsha ngaphakathi.
Inhliziyo yami ibuhlungu ngoba bengilihlongandlebe.+
Phandle inkemba iqeda abantwabami,+ laphakathi endlini abantu bayafa.
ש [Shin]
21 Abantu bangizwile ngikhala kodwa akulamuntu ongiduduzayo.
Zonke izitha zami zizwile ngomonakalo ongehleleyo.
Ziyathokoza ngoba nguwe ongehlisele wona.+
Kodwa luzafika usuku owakhuluma ngalo.+ Ngalolosuku lazo zizakuba njengami.+
ת [Taw]
22 Kwangathi ungakubona konke okubi abakwenzayo ubajezise kabuhlungu,+
Njengoba nje lami ungijezise kabuhlungu ngenxa yazo zonke izono zami.
Sengikhale kwazwela, inhliziyo yami ibuhlungu.
א [Aleph]
2 UJehova wembese indodakazi yeZiyoni ngeyezi lentukuthelo yakhe!
Ubutaklazele phansi ubuhle buka-Israyeli busuka ezulwini.+
Kazange asikhumbule isenabelo* senyawo zakhe+ ngosuku lolaka lwakhe.
ב [Beth]
2 UJehova utshabalalise zonke izindawo zokuhlala zikaJakhobe, kazange abe lozwelo.
Ngolaka lwakhe udilize wonke amadolobho endodakazi yakoJuda+ agonjolozelwe ngemiduli.
Uwisele phansi umbuso+ labakhokheli bawo,+ watshiya indodakazi yakoJuda iyangekile.
ג [Gimel]
3 Ngolaka lwakhe oluvuthayo uqede wonke amandla ako-Israyeli.
Ususe isandla sakhe sokudla ngesikhathi isitha sizohlasela.+
Njengomlilo olobisa yonke into,+ ulaka lwakhe luqhubeka luvutha kuJakhobe.
ד [Daleth]
4 Umtshoko wakhe usewukhokhile angathi yisitha, isandla sakhe sokudla sesilungele ukuhlasela;+
Uqhubeke ebulala bonke esibathandayo.+
Ulaka lwakhe oluvutha njengomlilo+ uluthululele phezu kwetende lendodakazi yeZiyoni.+
ה [He]
5 UJehova usenjengesitha kithi,+
Usemtshabalalisile u-Israyeli,
Wadiliza yonke imiphotshongo yakhe.
Ubhidlize zonke izinqaba zakhe,
Wenza ukuthi indodakazi yakoJuda ikhale kakhulu, isiqhinqe isililo.
ו [Waw]
6 Udilize ithempeli lakhe+ angathi ngokulidumba okusemasimini.
UJehova wenze ukuthi amadili kanye leSabatha kungasakhunjulwa eZiyoni.
Ngenxa yolaka lwakhe olwesabekayo, akaselandaba lokuthi umuntu uyinkosi loba ungumphristi.+
ז [Zayin]
7 UJehova uselikhalele i-alithare lakhe,
Wafulathela indawo yakhe engcwele.+
Unikele imiduli yezinqaba zeZiyoni ezandleni zezitha.+
Ziyamemeza endlini kaJehova+ angathi lilanga ledili.*
ח [Heth]
8 UJehova usezimisele ukudiliza umduli wendodakazi yeZiyoni.+
Welule intambo yokulinganisa.+
Kayekelanga ukubhidliza ngesandla sakhe.
Wenza ukuthi imiduli lemibundu yokuvikela kulile.
Konke akusaqinanga.
ט [Teth]
9 Amagedi ayo asetshone phansi emhlabathini.+
Wephule imigoqo yayo wayitshabalalisa.
Inkosi yayo lezikhulu zayo zithunjiwe zahanjiswa ezizweni.+
Akulamuntu olandela umthetho futhi labaphrofethi bayo abasayitholi imibono evela kuJehova.+
י [Yod]
10 Abadala bendodakazi yeZiyoni bahlezi emhlabathini bethule zwi.+
Bazithela ngenhlabathi ekhanda begqoke izembatho zamasaka.+
Izintombi zeJerusalema zikhothamise amakhanda zakhangela phansi.
כ [Kaph]
11 Sengikhale amehlo aze avuvuka.+
Ngiyatsha ngaphakathi.
Inhliziyo yami ibuhlungu* ngenxa yokuthi indodakazi* yabantu bakithi+ isitshabalele,
Izinsane labantwana bayaqaleka emagcekeni edolobho.+
ל [Lamed]
12 Baqhubeka bebuza onina besithi, “Kungaphi ukudla lewayini?”+
Bayaqaleka emagcekeni edolobho njengomuntu olimeleyo,
Bafa besezandleni zabonina.
מ [Mem]
13 Yibuphi ubufakazi engingakunika bona?
Ngingakufananisa lani, awu ndodakazi yeJerusalema?
Ngingakuqathanisa lani ukuze ngikududuze, awu ndodakazi yeZiyoni?
Inxeba lakho likhulu njengolwandle.+ Manje ngubani ongakwelapha?+
נ [Nun]
14 Abaphrofethi bakho bakutshele imibono yamanga engancedi ngalutho.+
Abazange basiveze egcekeni isono sakho ukuze bakuncede ungathunjwa,+
Kodwa baqhubeke bekutshela imibono engamanga bekwenza ulahleke.+
ס [Samekh]
15 Bonke abadlula ngomgwaqo bakuhleka baze batshaye izandla ndodakazi yeJerusalema.+
Nxa bekubona bayamangala batshaye umlozwi,+ benikina amakhanda besithi:
“Leli yilo yini idolobho okwakuthiwa lihle kakhulu futhi lenza abantu bonke emhlabeni bathokoze?”+
פ [Pe]
16 Zonke izitha zakho ziyakuhoza ngemilomo yazo.
Ziyakuchothoza zizondile zisithi: “Simtshabalalisile.+
Leli yilo ilanga ebesililindele!+ Selize lafika, salibona ngawethu!”+
ע [Ayin]
Udilizile, kazange abe lozwelo.+
Uvumele isitha sakunqoba, wasenza sathokoza; wenze abakuzondayo baba lamandla.
צ [Tsade]
18 Ndodakazi yeZiyoni, abantu bakho bayakhala kuJehova.
Inyembezi kazigeleze njengomfula ubusuku lemini.
Khala ungaphumuli, ungawaphumuzi amehlo akho.
ק [Qoph]
19 Vuka ukhale ubusuku bonke!*
Thulula inhliziyo yakho njengamanzi phambi kukaJehova.
Phakamisela izandla zakho kuye uncengele impilo yabantwabakho
Abaqalekayo kuyo yonke imigwaqo ngenxa yendlala.+
ר [Resh]
20 Awu Jehova, khangela lowo omjezise kabuhlungu.
Kungani kumele abesifazana baqhubeke besidla abantwababo+ ababondlileyo?
Kungani kumele abaphristi labaphrofethi babulawe endaweni engcwele kaJehova?+
ש [Shin]
21 Izidumbu zamajaha lezamaxhegu zithe dandalazi emigwaqweni.+
Amajaha lezintombi babulewe ngenkemba.+
Ubabulele ngosuku lwentukuthelo yakho, wabaqeda ungelazwelo.+
ת [Taw]
22 Ubize izitha angathi ubizela abantu edilini,*+ zathutsha zivela kuzo zonke indawo.
Ngosuku lolaka lukaJehova kakho ophunyukileyo kumbe osindileyo,+
Izitha zami zitshabalalise abantwabami engabazalayo ngabondla.+
א [Aleph]
3 Ngibone abantu behlupheka ngoba uNkulunkulu usizondele wasijezisa kabuhlungu.
2 Ungixotshile wangenza ngahamba emnyameni, hatshi ekukhanyeni.+
3 Ulokhu engitshaya ngesandla sakhe ilanga lonke.+
ב [Beth]
4 Wenze umzimba wami waphela amandla lejwabu lami latshwabhana,
Wephule amathambo ami.
5 Ungivimbezele wangilethela usizi, wangigombolozela ngetshefu ebabayo.+
6 Ungenze ngahlala ezindaweni ezimnyama, njengabantu abafa kudala.
ג [Gimel]
7 Ungivalele ngomduli ukuze ngingabaleki,
Wangibopha ngamaketane ekhopha+ asindayo.
8 Nxa ngikhala kuye ngicela usizo, kawulaleli umthandazo wami.+
9 Uvimbe izindlela zami ngamatshe abaziweyo,
Wenza izindlela zami zagoba.+
ד [Daleth]
10 Uyangicathamela njengebhere, acatshe+ njengesilwane esizingelayo.
11 Ungidonsele eceleni kwendlela wangidabudabula,
Wangitshiya ngingedwa.+
12 Ugobise idandili* lakhe, wakhokha umtshoko ewuqondise kimi.
ה [He]
13 Ungigwaze izinso ngemitshoko ayikhiphe esikhwameni sakhe.
14 Sengibe yinhlekisa ebantwini bonke, bahlabela ngami ilanga lonke.
15 Ungidlise izinto ezibabayo, wanginathisa umhlonyane.*+
ו [Waw]
17 Ungincitsha ukuthula, lokuhle angisakwazi.
18 Ngakho ngithi: “Ubuhle bami buphelile, angiselathemba kuJehova.”
ז [Zayin]
19 Khumbula ukuhlupheka kwami lokuthi angilandawo yokuhlala,+ ukhumbule ukuthi ngidla umhlonyane* letshefu ebabayo.+
20 Uzangikhumbula loba sekutheni, ubusukhothama ungincede.+
21 Ngizakukhumbula lokhu, yikho ngizahlala ngilindile.+
ח [Heth]
23 Isihawu sakhe sitsha nsuku zonke ekuseni+ njalo uthembekile zikhathi zonke.+
24 Ngithe, “UJehova uyisabelo sami+ yikho ngizahlala ngimlindele.”+
ט [Teth]
25 UJehova umenzela okuhle lowo othembela kuye,+ lowo oqhubeka emdinga.+
26 Kuhle ukuthi umuntu alinde ethule,*+ alindele ukusindiswa nguJehova.+
27 Kuhle ukuthi umuntu athwale ijogwe lakhe esesemutsha.+
י [Yod]
28 Nxa uNkulunkulu elibeka phezu kwakhe,+ kahlale yedwa aqhubeke ethule.
29 Kazehlise athi mbo phansi ngobuso,+ mhlawumbe ithemba lingaba khona.+
30 Kanike lowo omtshayayo isihlathi njalo amukele ukuthethiswa.
כ [Kaph]
31 UJehova kasoze asilahle kokuphela.+
32 Lanxa esijezisile, uzakuba lesihawu ngoba uthando lwakhe oluqotho lukhulu.+
33 Akumthokozisi ukujezisa loba ukwehlisela abantu usizi.+
ל [Lamed]
34 Nxa zonke izibotshwa ezisemhlabeni zicindezelwa,+
35 Nxa abantu besahlulelwa kubi phambi koPhezukonke,+
36 Nxa umuntu eqilwa lapho kuthethwa icala
—UJehova kathokozi ngitsho.
מ [Mem]
37 Ngubani ongakhuluma ulutho lwenzakale engatshelwanga nguJehova?
38 Emlonyeni kaNkulunkulu oPhezukonke,
Akuphumi izinto ezinhle lezimbi ngasikhathi sinye.
39 Kungani umuntu esola nxa esehlelwa yibunzima ngenxa yokona kwakhe?+
נ [Nun]
40 Kasihloleni izenzo zethu sizikhangelisise,+ sibuyele kuJehova.+
41 Kasiphakamiseleni izandla zethu kuNkulunkulu osezulwini+ ngezinhliziyo eziqotho, sithandaze sithi:
42 “Sonile sakuhlamukela,+ njalo wena awusithethelelanga.+
ס [Samekh]
44 Uvimbe imithandazo yethu ngeyezi ukuze ingafiki kuwe.+
45 Usenze safanana lemfucuza lezibi phakathi kwezizwe.”
פ [Pe]
46 Zonke izitha zethu zivule imilomo yazo zasihoza.+
47 Sesihlala sisesaba futhi siphakathi kwenhlupho,+ sichotshoziwe satshabalala.+
48 Inyembezi zami zigeleza njengamanzi omfula ngenxa yokutshabalala kwendodakazi yabantu bakithi.+
ע [Ayin]
49 Sengihlala ngikhala, kuyala ukuthi ngithule.+
50 Ngizakhala uJehova aze akhangele angibone esezulwini.+
51 Ngizwa ubuhlungu nxa ngibona okwenzakale emadodakazini edolobho lakithi.+
צ [Tsade]
52 Izitha zami zingizingele ngingelacala, angathi ngumuntu ofuna ukubamba inyoni.
53 Zizame ukungibulala, bezilokhu zingijikijela ngamatshe.
54 Ikhanda lami lisibekelwe ngamanzi ngathi: “Kuphelile ngami!”
ק [Qoph]
55 Awu Jehova, ngibize ibizo lakho ngisegodini elitshonayo.+
56 Zwana ilizwi lami, ungazivali indlebe zakho lapho ngikhala ngicela usizo.
57 Wasondela kimi ngelanga engakubiza ngalo wathi kimi: “Ungesabi.”
ר [Resh]
58 Ululwele udaba lwami Jehova, wasindisa impilo yami.+
59 Awu Jehova, ukubonile okubi engikwenziweyo, ngicela ungahlulele kuhle.+
60 Ukubonile konke ukuphindisela kwabo, wabona lawo wonke amacebo abangibumbele wona.
ש [Sin] kumbe [Shin]
61 Awu Jehova, ukuzwile ukuchothoza kwabo, wezwa lawo wonke amacebo abo ngami,+
62 Uwazwile amazwi alabo abangiphikisayo, lalokho abakunyenyezelanayo ngami ilanga lonke.
63 Ake ubakhangele, bayahlabela bengichothoza behlezi lalapho bemile!
ת [Taw]
64 Awu Jehova, uzabajezisa ngendlela ehambelana lezenzo zabo.
65 Uzabaqalekisa ngokwenza inhliziyo zabo zibe lukhuni.
66 Uzabaxotshanisa uthukuthele Jehova, ubathanyele baphele emhlabeni.
א [Aleph]
4 Igolide elihlambulukileyo futhi elicengekileyo+ alisacazimuli!
Amatshe endawo engcwele+ asegcwele imigwaqo yonke!+
ב [Beth]
2 Amadodana eZiyoni ayeligugu njengegolide
Asefaniswa lembiza zomdaka
Ezenziwe ngumbumbi!
ג [Gimel]
3 Phela amakhanka ayabamunyisa abantwabawo,
Kodwa indodakazi yabantu bakithi yona ilolunya+ njengentshe esenkangala.+
ד [Daleth]
4 Ulimi losane olumunyayo selunamathele olwangeni ngenxa yokoma.
Abantwana bakhalela ukudla+ kodwa akulamuntu obanikayo.+
ה [He]
5 Labo ababesidla izibiliboco sebethe daca emigwaqweni ngenxa yendlala.+
Labo abakhula begqoka izigqoko ezidulayo*+ sebelala esilotheni.
ו [Waw]
6 Isijeziso esiphiwe indodakazi yabantu bakithi sikhulu kulaleso esaphiwa iSodoma+ ngenxa yokona kwayo,
Yona yabhujiswa ngomzuzwana njalo kakho owayilamulelayo.+
ז [Zayin]
7 AmaNaziri+ endodakazi yeZiyoni ayehlanzekile ukwedlula ungqwaqwane, emhlophe kulochago.
Ayebomvu ukwedlula amakhorali,* ecazimula njengesafire.
ח [Heth]
8 Khathesi asemnyama ukwedlula umsizi,
Awasakhanyi lasemigwaqweni.
Isikhumba sawo sesinamathele emathanjeni awo,+ sesome angathi yisigodo.
ט [Teth]
9 Labo ababulewe ngenkemba bangcono kulalabo ababulewe yindlala,+
Abacake baphela bebulawa yikuswela ukudla okuvela emasimini.
י [Yod]
10 Omama abalozwelo bathethe abantwababo babaxhwathisa,+
Baba yikudla kwabo ngesikhathi belilela ukuwa kwendodakazi yabantu bakithi.+
כ [Kaph]
11 UJehova uveze intukuthelo yakhe,
Wathulula ulaka lwakhe oluvuthayo.+
Ulumathise umlilo eZiyoni watshisa izisekelo zayo.+
ל [Lamed]
12 Amakhosi omhlaba lalabo abahlala elizweni babengakholwa
Ukuthi isitha sizangena emagedini eJerusalema.+
מ [Mem]
13 Kodwa lokhu kwenzakele ngenxa yezono zabaphrofethi lezabaphristi bayo,+
Ababulala abalungileyo ababehlala phakathi kwayo.+
נ [Nun]
14 Sebehamba bephumputha indlela emigwaqweni angathi bayiziphofu.+
Bagcwele igazi,+
Akulamuntu owenelisa ukuthinta izigqoko zabo.
ס [Samekh]
15 Abantu bamemeza besithi, “Sukani lapha! Lingcolile! Sukani! Hambani, lingasithinti!”
Abaselandawo yokuhlala, bayabhodabhoda bengazi lapho abaya khona.
Abantu bezinye izizwe bathi: “Ngeke bahlale lathi.+
פ [Pe]
16 UJehova nguye owenze ukuthi basabalale yonke indawo,+
Kasoze aphinde abamukele.
Abantu abasoze babahloniphe abaphristi+ kumbe babe lomusa ebadaleni besizwe.”+
ע [Ayin]
17 Amehlo ethu asediniwe ngokudinga usizo kodwa singalutholi.+
Sidinge sadinga uncedo, kanti siludinga esizweni esingeke sisisindise.+
צ [Tsade]
18 Basizingele phansi phezulu,+ sesisehluleka lokuhamba emagcekeni edolobho lethu.
Ukuphela kwethu sekusondele, insuku zethu zibaliwe, okwethu sekuphelile.
ק [Qoph]
19 Ababesixotshanisa babelejubane ukwedlula ukhozi,+
Basigijimisa ezintabeni, basicathamela enkangala.
ר [Resh]
20 Ogcotshiweyo kaJehova+ ongathi ngumoya wokuphila, ubanjiwe egodini labo elikhulu,+
Lowo esasisithi sizahlala ngaphansi komthunzi wakhe phakathi kwezizwe.
ש [Sin]
21 Thokoza kakhulu ndodakazi yako-Edomi,+ wena ohlala elizweni le-Uzi.
Kodwa lawe uzayiphiwa inkomitsho le,+ unathe udakwe uze ukhiphe izigqoko usale unqunu.+
ת [Taw]
22 Isijeziso sesono sakho ndodakazi yeZiyoni sesiphelile.
Kasoze aphinde akuse ekuthunjweni.+
Kodwa khathesi usejezisa wena ndodakazi yako-Edomi ngenxa yokona kwakho.
Uzazichaya egcekeni izono zakho.+
5 Awu Jehova, khumbula okusehleleyo.
Khangela ubone ihlazo lethu.+
2 Ilifa lethu selinikwe abantu esingabaziyo, lezindlu zethu zaphiwa abantu bezinye izizwe.+
3 Sesizintandane ezingelaboyise, omama bethu sebefana labafelokazi.+
4 Sesibhadalela amanzi okunatha lanxa engawethu+ futhi sesithenga inkuni zona zingezethu.
5 Abasixotshanisayo sebezasibamba,
Sesifile ngokudinwa kodwa asiliphiwa ithuba lokuphumula.+
6 Selulele isandla sethu kwabaseGibhithe+ labe-Asiriya+ ukuze sithole ukudla okweneleyo.
7 Okhokho bethu okuyibo abonayo abasekho, kodwa thina sesijeziselwa izono zabo.
8 Izinceku yizo esezisibusa futhi akulamuntu ongasikhulula esandleni sazo.
9 Sifaka impilo zethu engozini ukuze sithole ukudla+ ngoba enkangala kulabantu abahlome ngenkemba.
10 Isikhumba sethu sesitshisa angathi yisithando somlilo ngenxa yokubulawa yindlala.+
11 Bawayangisile* amakhosikazi aseZiyoni lezintombi ezisemadolobheni akoJuda.+
12 Izikhulu zilengiswe ngezandla,+ labadala besizwe abazange bahlonitshwe.+
13 Amajaha athwele amatshe okuchola, abafana bayakhubeka ngenxa yokusindwa zinkuni.
14 Abadala besizwe abasekho egedini ledolobho,+ lamajaha awasatshayi iziginci.+
15 Inhliziyo zethu azisathokozi, lokugida kwethu sekuphenduke kwaba yikulila.+
16 Umqhele obusemakhanda ethu usuwile. Maye kithi ngoba sonile!
18 Intaba iZiyoni isingamanxiwa,+ amakhanka asezihambela santando.
19 Kodwa wena Jehova uzahlala esihlalweni sakho sobukhosi kuze kube nini lanini.
Ubukhosi bakho buzahlala bukhona izizukulwane ngezizukulwane.+
20 Kungani usikhohlwa kokuphela futhi usilahla okwesikhathi eside kangaka?+
21 Siphendukise kuwe awu Jehova, sizabuyela kuwe ngokuphangisa.+
Vuselela amalanga ethu abe njengakuqala.+
22 Wena usilahlile wakhohlwa ngathi.
Ulokhu usizondele kakhulu.+
Izahluko zokuqala ezine zibhalwe kulandelwa i-alfabhethi yesiHebheru.
Kumbe, “emikhosini.”
Lapha kutshiwo indawo okuvoxelwa kuyo amagilebisi.
Isenabelo kulapho umuntu abeka khona inyawo zakhe nxa ehlezi esitulweni.
Kumbe, “Useyimisile imikhosi yakhe.”
Kumbe, “lomkhosi.”
NgesiHebheru, “Isibindi sami sithululelwe emhlabathini.”
Lokhu yikwenziwa samuntu kwedolobho leJerusalema, mhlawumbe okuveza uzwelo.
NgesiHebheru, “lapho kuqalisa imilindo.”
Kumbe, “emkhosini.”
Khangela iNgcazelo Yamabala.
Kumbe, “isihlahlakazana esibaba gamu.”
Kumbe, “ukhethe.”
Kumbe, “isihlahlakazana esibaba gamu.”
Kumbe, “abekezele.”
NgesiHebheru, “eziyibubende.”
Khangela iNgcazelo Yamabala.
Kumbe, “Bawabambe iganyavu.”