UJOWELI
1 Nanti ilizwi likaJehova elafika kuJoweli* indodana kaPhethuweli:
2 “Zwanini lokhu lina badala,
Lilalelisise lani lonke bantu belizwe.*
Into enjengale seyake yenzakala yini ezinsukwini zenu
Kumbe ezinsukwini zabokhokho benu?+
3 Tshelani abantwabenu ngakho,
Labantwabenu batshele abantwababo ngakho,
Labantwababo batshele isizukulwane esilandelayo.
4 Okutshiywe yisikhongwane* kudliwe ngumtshitshi wentethe,+
Okutshiywe ngumtshitshi wentethe kudliwe zintethe ezincane,
Lokutshiywe zintethe ezincane, inswabanda zikutshaye zakubhuqa.+
5 Vukani lina zidakwa+ likhale!
Hlabani umkhosi lina lonke abanatha iwayini,
Ngoba alisaphindi lilinambithe iwayini elimnandi.+
6 Isizwe esilamandla futhi esingeke sibalwe sifikile elizweni lami.+
Amazinyo aso ngawesilwane,+ lemihlathi yaso ngeyesilwane.
7 Sitshabalalise isihlahla sami samagilebisi njalo isihlahla sami somkhiwa sisele siyisidindi,
Uxebula amaxolo azo sawalahlela khatshana,
Satshiya ingatsha zimhlophe.
8 Hlabani umkhosi njengentombi egcweleyo egqoke isembatho sesaka
Ikhalela ijaha layo.*
9 Iminikelo yamabele+ leminikelo yokunathwayo+ kayisenziwa endlini kaJehova,
Abaphristi abenza inkonzo kaJehova bayalila.
10 Amasimu abhuqiwe, umhlabathi uyakhala+
Ngoba amabele atshabalalisiwe, iwayini elitsha kalisatholakali lamafutha awasekho.+
11 Abalimi abaselamandla, labasebenza emasimini amagilebisi bahlaba umkhosi,
Ngenxa yengqoloyi lebhali
Isivuno sitshabalele emasimini.
12 Isihlahla samagilebisi sesome qha,
Isihlahla somkhiwa sesibunile,
Lesihlahla samaharinathi leselala lesama-apula,
Zonke izihlahla sezomile+
Ukuthokoza kwabantu sekuphenduke kwaba yikudana.
Wozani njalo ligqoke izembatho zamasaka ubusuku bonke lina zinceku zikaNkulunkulu wami,
Ngoba iminikelo yamabele+ leminikelo yokunathwayo+ kayisekho endlini kaNkulunkulu wenu.
14 Memezelani ukuzila, libize umhlangano oqakathekileyo.+
Libuthanise abadala lazo zonke izakhamizi zelizwe
Endlini kaJehova uNkulunkulu wenu,+ beselikhala kuJehova licele usizo.
15 Maye ngalolosuku!
Usuku lukaJehova luseduze,+
Luzafika njengokubhujiswa okuvela kuSomandla!
16 Ukudla akuthathwanga sikhangele yini?
Injabulo lokuthaba akuphelanga yini endlini kaNkulunkulu wethu?
17 Umlimi uvumbulula amagade ngefotsholo athole inhlanyelo emilayo itshwabhene.
Izindawo zokugcinela amabele zidilikile.
Iziphala zidiliziwe ngoba akuphumanga lutho emasimini.
18 Izifuyo lazo ziyabubula!
Imihlambi yenkomo ayisakwazi ukuthi iqonde ngaphi ngoba kayilamadlelo!
Lemihlambi yezimvu ithwele nzima.
19 Ngizakhala kuwe awu Jehova+
Ngoba umlilo usuqothule amadlelo eguswini,
Lelangabi litshabalalise zonke izihlahla egangeni.
20 Izinyamazana zeganga lazo sezikhangelele kuwe,
Ngoba izifula zamanzi sezomile
Njalo umlilo usulobise amadlelo eguswini.”
2 “Tshayani uphondo eZiyoni!+
Memezelani impi entabeni yami engcwele.
2 Lusuku lobumnyama obukhulu,+
Usuku lwamayezi lomnyama owesabekayo,+
Njengokukhanya kokusa okusithwe zintaba.
Kulesizwe sabantu esikhulu njalo esilamandla,+
Kasikaze sibe khona esinye esinjengaso,
Kasisoze siphinde sibe khona esinjengaso
Kuzo zonke izizukulwane ezizakuba khona.
3 Phambi kwaso umlilo uyatshabalalisa,
Ngemva kwaso ilangabi litshisa lilobise konke.+
Ilizwe eliphambi kwaso linjengensimu yase-Edeni,+
Kodwa ngemva kwaso kusala kuyinkangala,
Akukho lokukodwa okusilayo.
4 Nxa usikhangele sinjengamabhiza,
Sigijima njengamabhiza empi.+
5 Umsindo waso unjengowezinqola ezigijima phezu kwezintaba,+
Unjengomsindo womlilo otshisa amahlanga.
Sinjengabantu abalamandla asebelungele ukulwa impi.+
6 Abantu bonke bazakuba sebuhlungwini ngenxa yaso.
Ubuso bomuntu wonke buzahloba.
7 Abantu baso bahlasela njengamaqhawe,
Bakhwela umduli angathi ngamasotsha,
Ngamunye uqhubeka esendleleni yakhe,
Kabaphambuki ezindleleni zabo.
8 Kabasunduzani,
Indoda ngayinye ihlasela isendleleni yayo.
Lanxa abanye bewiswa yizikhali,*
Abanye kabaphambuki endleleni.
9 Batheleka ngesiqubu edolobheni, bagijime phezu kwemiduli.
Bakhwela phezu kwezindlu, bangene ngamawindi angathi ngamasela.
10 Ilizwe liyaqhaqhazela phambi kwabo, lamazulu ayanyikinyeka.
Ilanga lenyanga sekube mnyama,+
Lokukhanya kwezinkanyezi sekufiphele.
11 UJehova uzaphakamisa ilizwi lakhe phambi kwebutho lakhe+ ngoba ibutho lakhe likhulu kakhulu.+
Kambe ngubani ongalumela?”+
12 “Lakhathesi nje,” kutsho uJehova, “phendukelani kimi ngenhliziyo yonke,+
Ngokuzila ukudla+ lokukhala langokulila.
13 Dabulani inhliziyo zenu+ hatshi izigqoko zenu,+
Libuyele kuJehova uNkulunkulu wenu,
Ngoba ulozwelo* lesihawu, uyaphuza ukuthukuthela+ futhi ugcwele uthando oluqotho,*+
Uzatshintsha ingqondo* angalehliseli uhlupho.
14 Kwazi bani? Mhlawumbe angacabanga kutsha atshintshe ingqondo*+
Alitshiyele isibusiso,
Ukuze lenze umnikelo wamabele lomnikelo wokunathwayo kaJehova uNkulunkulu wenu.
15 Tshayani uphondo eZiyoni!
Memezelani ukuzila libize umhlangano oqakathekileyo.+
16 Buthanisani abantu lingcwelise ibandla.+
Qoqani amadoda amadala,* libuthanise abantwana lezinsane ezimunyayo.+
Umyeni kaphume exhibeni lakhe, lomakoti aphume kwelakhe.
17 Abaphristi abenza inkonzo kaJehova kabakhale
Bephakathi laphakathi komphongolo le-alithare+ bathi:
‘Awu Jehova, bazwele abantu bakho
Ungalenzi inhlekisa ilifa lakho,
Ungayekeli izizwe zibuse phezu kwabo.
Kungani kumele abantu bathi, “Kanti ungaphi uNkulunkulu wabo?”’+
18 Lapho-ke uJehova uzalitshisekela ilizwe lakhe
Abe lozwelo ebantwini bakhe.+
19 UJehova uzaphendula abantu bakhe athi:
‘Sengilithumela amabele lamafutha lewayini elitsha,
Lizakudla lisuthe nti!+
Angisoze ngiphinde ngenze izizwe zilichothoze.+
20 Ovela enyakatho ngizamxotshela khatshana lani,
Ngizamxotshela elizweni elomileyo eliyinkangala,
Ibutho lakhe eliphambili ngizalixotshela elwandle olusempumalanga*
Kuthi elisemuva ngilise elwandle olusentshonalanga.*
Iphunga elibi elivela kuye lizaphakama,
Umnuko omubi ovela kuye uzaqhubeka usenyuka,+
Ngoba ngizakwenza izinto ezinkulu.’
21 Ungesabi wena lizwe,
Thaba ujabule ngoba uJehova uzakwenza izinto ezinkulu.
22 Lingesabi lina zinyamazana zeganga,
Ngoba amadlelo aseguswini azakuba luhlaza,+
Lezihlahla zizathela izithelo,+
Akube lezithelo ezinengi esihlahleni somkhiwa lesamagilebisi.+
23 Madodana aseZiyoni thokozani lijabule ngoJehova uNkulunkulu wenu,+
Ngoba uzalinika izulu lokuqala* eleneleyo.
Uzalithumela izulu elinengi,
Izulu lokuqala kanye lelokucina njengoba kwakunjalo.+
24 Indawo zokubhulela zizagcwala amabele,
Izikhamelo zokuvoxela amagilebisi zigcwale iwayini elitsha lamafutha.+
25 Ngizalibhadala okwadliwa ngaleyominyaka,
Okwadliwa ngumtshitshi wentethe, lentethe ezincane, lenswabanda kanye lesikhongwane,*
Ibutho lami elikhulu engalithumela kini.+
Abantu bami kabasoze baphinde bayangiswe.+
Abantu bami kabasoze baphinde bayangiswe.
28 Ngemva kwalokho ngizathululela umoya wami+ kuyo yonke imihlobo yabantu,
Amadodana lamadodakazi enu azaphrofetha,
Amaxhegu enu azaphupha amaphupho,
Lamajaha azabona imibono.+
29 Ngalezonsuku umoya wami ngizawuthululela
Laphezu kwezigqili lezigqilikazi zami.
30 Ngizakwenza izimanga emazulwini lasemhlabeni,
Kuzakuba legazi lomlilo lentuthu enengi.+
31 Ilanga lizatshintsha libe mnyama lenyanga itshintshe ibe ligazi+
Lungakafiki usuku lukaJehova olukhulu njalo olwesabekayo.+
32 Wonke umuntu obiza ibizo likaJehova uzasindiswa,+
Entabeni iZiyoni laseJerusalema kuzakuba labasindileyo+ njengoba nje uJehova etshilo,
Abasindileyo ababizwe nguJehova.”
3 “Zwanini! Ngalezonsuku langalesosikhathi,
Lapho sengibuyisela abathunjiweyo bakoJuda labaseJerusalema,+
2 Ngizaqoqela izizwe zonke ndawonye
Ngizise esigodini sikaJehoshafathi.*
Ngizazahlulela khona+
Ngenxa yabantu bami bako-Israyeli, abalilifa lami,
Ngoba zabahlakazela ezizweni,
Zabelana ilizwe lami.+
3 Zazisenza inkatho ngabantu bami,+
Zithengisa umntwana ongumfana ukuze zithenge isifebe
Zithengisa loyinkazana ukuze zithole iwayini.
4 Kanti lingibangisani
Wena Thire leSidoni lezabelo zonke zamaFilisti?
Kukhona yini elikuphindiselayo kimi?
Nxa kuyikuthi liyaphindisela,
Masinyane nje, ngizaphanga ngibuyisele ukuphindisela kwenu phezu kwamakhanda enu.+
5 Ngoba lithethe isiliva legolide lami,+
Lathatha amagugu ami amahle kakhulu lawasa emathempelini enu,
6 Lithethe abantu bakoJuda labeJerusalema labathengisela amaGrikhi,+
Ukuze libaxotshele khatshana lelizwe labo,
7 Khathesi sengibenza basukume, basuke endaweni elabathengisela kuyo,+
Ngizabuyisela ukuphindisela kwenu phezu kwamakhanda enu.
8 Amadodana lamadodakazi enu ngizawathengisela abantu bakoJuda,*+
Bona bazawathengisela amadoda aseShebha, isizwe esikhatshana kakhulu,
UJehova yena ngokwakhe usekhulumile.
9 Memezelani lokhu ezizweni:+
‘Lungiselelani impi! Wafakeni idlabuzane amadoda alamandla.
Wonke amasotsha kawasondele ahlasele!+
10 Khandani amakhuba enu abe zinkemba, lengqamu zenu zokuthena izihlahla zibe yimikhonto.
Lowo ongelamandla kathi: “Ngilamandla.”
11 Buyani lizoncedisa lina lonke zizwe eziseduze, buthanani ndawonye!’”+
Awu Jehova, thumela amabutho akho endaweni leyo.
12 “Izizwe kaziphakame zize esigodini sikaJehoshafathi,
Ngoba ngizahlala khona ukuze ngahlulele zonke izizwe eziseduze.+
13 Thelani isikela ngoba sezilungele ukuvunwa.
Wozani lizovoxa amagilebisi ngoba asegcwele esikhamelweni sewayini.*+
Iwayini seligcwele emagodini eligelezela kuwo ngoba ububi bezizwe bukhulu kakhulu.
14 Amaxuku abuthene esigodini sesinqumo,
Ngoba usuku lukaJehova seluzafika esigodini sesinqumo.+
15 Ilanga lenyanga kuzakuba mnyama,
Lokukhanya kwezinkanyezi kuzafiphala.
16 UJehova uzabhonga eseZiyoni,
Uzaliphakamisa ilizwi lakhe eseJerusalema.
Izulu lomhlaba kuzazamazama,
Kodwa uJehova uzakuba yisiphephelo sabantu bakhe,+
Abe yinqaba yabantu bako-Israyeli.
17 Lizakwazi ukuthi nginguJehova uNkulunkulu wenu, ngihlala entabeni yami engcwele iZiyoni.+
18 Ngalelolanga iwayini elimnandi lizageleza ezintabeni,+
Uchago lugeleze emaqaqeni,
Amanzi azageleza kuzo zonke izifula zakoJuda.
Umthombo uzampompoza endlini kaJehova amanzi ageleze,+
Athelele isigodi sezihlahla zesinga.
19 Kodwa iGibhithe izakuba lunxiwa,+
Le-Edomi izakuba yinkangala,+
Ngenxa yodlakela olwenziwe ebantwini bakoJuda,+
Langenxa yokubulawa kwabantu abangelacala okwenziwe elizweni labo.+
20 Kodwa koJuda kuzahlala kulabantu,
Kanye laseJerusalema kuzo zonke izizukulwane ezizayo.+
Ibizo leli litsho ukuthi, “UJehova unguNkulunkulu.”
Kumbe, “bomhlaba.”
Lo ngumhlobo wentethe otshaya ubhuqe izilimo emasimini.
Kumbe, “umyeni wobutsha bayo.”
Kumbe, “lizitshaye ezifubeni.”
Kumbe, “zomhlaba.”
Kumbe, “yimitshoko.”
Ezinye inguqulo zithi, “Lowo ogcwalisa ilizwi likaNkulunkulu ulamandla.”
Kumbe, “ulomusa.”
Kumbe, “ulothando oluqotho.”
Kumbe, “Uzazisola.”
Kumbe, “azisole.”
Kumbe, “abadala.”
Lapha kutshiwo uLwandle Lwesawudo.
Lapha kutshiwo uLwandle lweMedithera.
Kumbe, “insewula.”
Lo ngumhlobo wentethe otshaya ubhuqe izilimo emasimini.
Ibizo leli litsho ukuthi, “UJehova unguMahluleli.”
NgesiHebheru, “esandleni sabantu bakoJuda.”
Lapha kutshiwo indawo okuvoxelwa kuyo amagilebisi.
NgesiHebheru, “Ngizakuthi igazi labo alilacala.”