U-AMOSI
1 La ngamazwi ka-Amosi* owayengomunye wabelusi bezimvu ababedabuka eThekhowa.+ Amazwi la ayephathelane labako-Israyeli njalo wawathola ngombono ngensuku zika-Uziya+ inkosi yakoJuda lasezinsukwini zenkosi yako-Israyeli uJerobhowami,+ owayeyindodana kaJowashi,+ eminyakeni emibili kungakafiki ukuzamazama komhlaba.+ 2 Wathi:
“UJehova uzabhonga eseZiyoni,
Aphakamise ilizwi lakhe eseJerusalema.
Amadlelo abelusi azalila,
Lotshani obusesiqongweni seKhameli bubune.”+
3 “Nanku okutshiwo nguJehova,
‘“Ngenxa yamacala amathathu eDamaseko loba amane, angisoze ngibuyele emuva,
4 Ngakho ngizathumela umlilo endlini kaHazayeli,+
Uzatshisa ulobise izinqaba eziqinileyo zikaBheni-hadadi.+
5 Ngizakwephula imigoqo yamagedi aseDamaseko,+
Ngibhubhise izakhamizi zeBhikhathi-aveni
Kanye lalowo obusayo* eBhethi-edeni.
Labantu beSiriya bazathunjwa baye eKhiri,”+ kutsho uJehova.’
6 Nanku okutshiwo nguJehova,
‘“Ngenxa yamacala amathathu eGaza+ loba amane, angisoze ngibuyele emuva,
Ngoba bathatha lonke iqembu labathunjiweyo+ balisa e-Edomi.
7 Ngakho ngizathumela umlilo emdulini weGaza,+
Uzatshisa ulobise izinqaba zayo eziqinileyo.
Ngizakwelula isandla sami simelane le-Ekhroni,+
Labaseleyo bamaFilisti bazatshabalala,”+ kutsho iNkosi Enkulu uJehova.’
9 Nanku okutshiwo nguJehova,
‘Ngenxa yamacala amathathu eThire+ loba amane, angisoze ngibuyele emuva,
Ngoba bathatha lonke iqembu labathunjiweyo balisa ko-Edomi,
Kabazange basikhumbule isivumelwano sobuzalwane.+
10 Ngakho ngizathumela umlilo emdulini weThire,
Uzatshisa ulobise izinqaba zayo eziqinileyo.’+
11 Nanku okutshiwo nguJehova,
‘Ngenxa yamacala amathathu ka-Edomi+ loba amane, angisoze ngibuyele emuva,
Ngoba wahlasela umfowabo wamgijimisa ngenkemba,+
Kazange abe lesihawu,
Uqhubeka ebadabudabula ngolaka langesihluku,
Njalo uhlala ebathukuthelele kokuphela.+
13 Nanku okutshiwo nguJehova,
‘“Ngenxa yamacala amathathu ama-Amoni+ loba amane, angisoze ngibuyele emuva,
Ngoba adabula izisu zabesifazana abazithweleyo baseGiliyadi ukuze aqhelise indawo yawo.+
14 Ngakho ngizathumela umlilo emdulini waseRabha,+
Uzatshisa ulobise izinqaba zayo eziqinileyo,
Ngomsindo wempi ngosuku lokulwa,
Langesiphepho esilolaka ngelanga lokuvunguza komoya olamandla,
15 Inkosi yabo izathunjwa kanye lezikhulu zayo,”*+ kutsho uJehova.’
2 “Nanku okutshiwo nguJehova,
‘“Ngenxa yamacala amathathu kaMowabi+ loba amane, angisoze ngibuyele emuva,
Ngoba watshisa amathambo enkosi yako-Edomi aba ngumlotha.
2 Ngakho ngizathumela umlilo koMowabi,
Uzatshisa ulobise izinqaba eziqinileyo zeKheriyothi.+
UMowabi uzafela phakathi kokuxokozela,
Ngomsindo wempi lowokukhala kophondo.+
4 Nanku okutshiwo nguJehova,
‘Ngenxa yamacala amathathu kaJuda+ loba amane, angisoze ngibuyele emuva,
Ngoba abawulalelanga umthetho* kaJehova,
Njalo kabazange bayigcine imilayo yakhe,+
Kodwa sebedukiswe ngamanga ayelandelwa ngokhokho babo.+
5 Ngakho ngizathumela umlilo koJuda,
Uzatshisa ulobise izinqaba eziqinileyo zeJerusalema.’+
6 Nanku okutshiwo nguJehova,
‘Ngenxa yamacala amathathu ka-Israyeli+ loba amane, angisoze ngibuyele emuva,
Ngoba bathengisa olungileyo ngesiliva,
Bathengise umyanga ngamanyathela.+
Uyise lendodana balala lentombi yinye,
Bengcolisa ibizo lami elingcwele.
8 Bacambalala kuwo wonke ama-alithare+ begqoke izigqoko eziyisibambiso salokho okubolekiweyo,+
Iwayini abalinatha endlini yabonkulunkulu* babo balithola ngemali abayibhadalisa abantu.’
9 ‘Kodwa yimi engatshaya ngabhuqa ama-Amori phambi kwabo,+
Abantu ababebade njengemisedari njalo beqine njengezihlahla zom-okhi.
Ngatshabalalisa izithelo zabo phezulu kanye lempande zabo ngaphansi.+
10 Ngalikhipha elizweni laseGibhithe,+
Ngalikhokhela enkangala okweminyaka engu-40,+
Ukuze lithathe ilizwe lama-Amori.
Ngikhuluma amanga yini bantu bako-Israyeli?’ kutsho uJehova.
12 ‘Kodwa lalilokhu linika amaNaziri* iwayini ukuthi anathe,+
Njalo litshela abaphrofethi lisithi: “Akumelanga liphrofethe.”+
13 Ngakho ngizalichola endaweni yenu,
Njengalokho okunyathelwe yinqola egcwele amabele asanda kuvunwa.
14 Olejubane uzaswela ukuthi abalekele ngaphi,+
Oqinileyo uzaphela amandla,
Akulaqhawe elizaphunyuka lisale liphila.
15 Ophosa umtshoko kasoze ayimele impi,
Olejubane kasoze aphunyuke,
Lomgadi webhiza kasoze ayisindise impilo yakhe.
16 Lesotsha elilesibindi ukwedlula wonke amaqhawe
Lizabaleka linqunu ngalolosuku,’+ kutsho uJehova.”
3 “Zwanini ilizwi elikhulunywe nguJehova mayelana lani bantu bako-Israyeli, lonke elisemulini yakhe ayikhipha elizweni laseGibhithe:
2 ‘Yini kuphela engilazi kuhle kuzo zonke izimuli ezisemhlabeni.+
Yikho ngizalijezisa ngenxa yazo zonke izono zenu.+
3 Kambe abantu ababili bangahamba bonke bengavumelananga?*
4 Isilwane singabhonga yini eguswini kungelanyamazana esingayibamba?
Isilwane esilamandla esisebhalwini singabhonga yini singabambanga lutho?
5 Kambe inyoni ingabanjwa ngumjibila yini ingazange ithiywe?*
Umjibila osemhlabathini uyathanca yini nxa ungabambanga lutho?
6 Nxa uphondo lungatshaywa edolobheni abantu abethuki yini?
Nxa uhlupho lungehlela abantu edolobheni, luyabe lungaveli kuJehova yini?
7 INkosi Enkulu uJehova kayisoze yenze lutho
Ingazange iqale iveze imfihlo yayo ezincekwini zayo abaphrofethi.+
8 Isilwane sibhongile!+ Ngubani ongasoze esabe?
INkosi Enkulu uJehova isikhulumile! Ngubani ongasoze aphrofethe?’+
9 ‘Kumemezeleni lokhu ezinqabeni ze-Ashidodi
Lasezinqabeni zelizwe laseGibhithe.
Memezani lithi: “Buthanani ndawonye phezu kwezintaba zeSamariya,+
Libone isiphithiphithi esiphakathi kwayo
Kanye lobuqili obenziwa kuyo.+
10 Kabakwazi ukwenza okulungileyo,” kutsho uJehova,
“Sebegcwalise izinqaba zabo ngenotho abayithole ngodlakela langokubhidliza.”’
11 Ngakho-ke nanku okutshiwo yiNkosi Enkulu uJehova,
‘Isitha sizagombolozela ilizwe+
Siwaqede du wonke amandla akho,
Lezinto ezisezinqabeni zakho zizathunjwa.’+
12 Nanku okutshiwo nguJehova,
‘Njengomelusi ohluthuna okuzinyawo okubili kumbe isiqephu sendlebe emlonyeni wesilwane,
Bazahlengwa ngaleyondlela abako-Israyeli abalutshwana,
Labo abahlezi emibhedeni emihle lasemasofeni antofontofo eSamariya.’+
13 ‘Zwana njalo uxwayise indlu* kaJakhobe,’ kutsho iNkosi Enkulu uJehova, uNkulunkulu wamabutho.
14 ‘Ngosuku engizajezisa ngalo u-Israyeli ngenxa yamacala akhe wonke,+
Ngizadiliza lama-alithare aseBhetheli,+
Impondo ze-alithare zizaqunywa ziwele phansi emhlabathini.+
15 Ngizadiliza indlu yebusika lendlu yehlobo.’
‘Izindlu eziceciswe ngempondo zendlovu zizatshabalala,+
4 “Zwanini ilizwi leli lina mankomokazi aseBhashani
Elisentabeni yeSamariya,+
Lina besifazana eliqila abantukazana+ njalo licindezele abayanga,
Elitshela omkenu lithi, ‘Ake lisiphe okunathwayo.’
2 INkosi Enkulu uJehova isifunge ngobungcwele bayo,
‘“Ziyeza insuku lapho elizaphakanyiswa khona ngamawuka okulengisa inyama,
Labaseleyo benu baphakanyiswe ngamawuka enhlanzi.
3 Omunye lomunye uzaqonda emdulini aphume ngesikhala esiphambi kwakhe,
Njalo lizaxotshelwa eHamoni,” kutsho uJehova.’
5 Tshisani umhlatshelo wokubonga wesinkwa esilemvubelo,+
Limemezele iminikelo yenu yokuzithandela!
Ngoba yikho elithanda ukukwenza lina bantu bako-Israyeli,’ kutsho iNkosi Enkulu uJehova.
6 ‘Ngabangela ukuthi kube lendlala kuwo wonke amadolobho enu
Lokuthi kuswelakale isinkwa ezindlini zenu.+
Kodwa kalizange liphenduke kimi,’+ kutsho uJehova.
7 ‘Ngalincitsha izulu sekusele izinyanga ezintathu ukuthi isikhathi sokuvuna sifike,+
Nganisa izulu kwelinye idolobho kodwa kwelinye alinanga.
Kwenye insimu izulu lalisina,
Kodwa kwenye kwakome qha kungelazulu.
8 Abantu abavela emadolobheni amabili loba amathathu babediyazela besiya edolobheni elilodwa besiyadinga amanzi okunatha,+
Kodwa babengakholwa,
Loba kunjalo kalizange liphenduke kimi.’+ kutsho uJehova.
9 ‘Ngalitshaya ngokutshisa langomkhuhlane ohlasela izilimo.+
Lalima izingadi lamasimu amagilebisi amanengi,
Kodwa intethe zatshaya zabhuqa izihlahla zenu zomkhiwa lezama-oliva;+
Lanxa kunjalo kalizange liphenduke kimi,’+ kutsho uJehova.
10 ‘Ngalithumela isifo esinjengaleso esatshaya iGibhithe,+
Ngabulala amajaha enu ngenkemba+ ngathumba lamabhiza enu.+
Ngenza ukuthi amakhala enu avaleke ngci ngenxa yephunga elaliphuma ezihonqweni zenu,+
Kodwa kalizange liphenduke kimi,’ kutsho uJehova.
11 ‘Ngalitshabalalisa
Ngendlela engatshabalalisa ngayo iSodoma leGomora.+
Laba njengokhuni oluhwatshwe emlilweni,
Kodwa kalizange liphenduke kimi,’+ kutsho uJehova.
12 Lokhu yikho kanye engizaphinda ngikwenze kuwe Israyeli.
Ngakho lungiselela ukuhlangana loNkulunkulu wakho, wena Israyeli,
Ngenxa yalokho esengizimisele ukukwenza kuwe.
13 Phela nguye owabumba izintaba,+ wadala lomoya,+
Imicabango yakhe uyayiveza emuntwini,
Atshintshe ukusa kube yibumnyama,+
Njalo unyathela izindawo eziphakemeyo zomhlaba,+
UJehova uNkulunkulu wamabutho yilo ibizo lakhe.”
5 “Lina ndlu ka-Israyeli, zwanini ilizwi leli engilitshela lona ngengoma yokulila:
2 ‘Intombi egcweleyo u-Israyeli isiwile,
Ngeke iphinde ivuke.
Isilahlelwe iganga elizweni layo,
Kakho loyedwa ongayivusa.’
3 “Nanku okutshiwo yiNkosi Enkulu uJehova:
‘Idolobho ebelithumela amasotsha angu-1 000 empini lizasala langu-100,
Kuthi ebelithumela angu-100 lisale langu-10 kuphela. Lokhu yikho okuzakwenzakala endlini ka-Israyeli.’+
4 “Nanku okutshiwo nguJehova kwabendlu ka-Israyeli:
‘Ngidingani ukuze liqhubeke liphila.+
5 Lingayidingi iBhetheli,+
Lingayi eGiligali+ futhi lingadluleli eBheri-shebha,+
Ngoba iGiligali izathunjwa loba sekutheni,+
LeBhetheli izachithwa iphele nya.
6 Dingani uJehova liqhubeke liphila,+
Ukuze angalavuki njengomlilo atshise indlu kaJosefa,
Atshise iBhetheli ilobe kungabi lamuntu ozayicitsha.
8 Lowo owenza iqembu lezinkanyezi okuthiwa yiKhima lelithiwa yiKhesili,+
Otshintsha ubumnyama obukhulu bube yikukhanya kokusa,
Owenza imini ibe yibusuku,+
Obiza impophoma zamanzi olwandle
Awathele phezu komhlaba.+
UJehova yilo ibizo lakhe.
9 Uzakwenza abalamandla behlelwe ngumonakalo,
Abhidlize izindawo ezilezinqaba.
10 Liyabazonda abakhuza abantu egedini ledolobho,
Labakhuluma iqiniso liyabenyanya.+
11 Licindezela umyanga ngokumbhadalisa ukulima emasimini enu*
Njalo limbhadalisa ngamabele akhe,+
Yikho lingasoze liqhubeke lihlala ezindlini elizakhe ngamatshe abaziweyo+
Kalisoze lilinathe iwayini eliphuma emasimini enu amahle amagilebisi.+
12 Ngiyakwazi ukuthi selihlamuke kangaki*
Lokuthi izono zenu zinkulu kangakanani
Lihlukuluza olungileyo,
Liyafunjathiswa,*
Njalo lithathela abayanga amalungelo abo egedini ledolobho.+
13 Yikho-ke, abalokuqedisisa bazaqhubeka bezithulele ngalesosikhathi,
Ngoba kuzabe kuyisikhathi sokuhlupheka.+
Mhlawumbe uJehova uNkulunkulu wamabutho angaba lani,
Njengoba lisithi ulani.+
Engxenye uJehova uNkulunkulu wamabutho
Uzakuba lomusa kwabaseleyo bendlu kaJosefa.’+
16 “Ngakho nanku okutshiwo nguJehova, uJehova uNkulunkulu wamabutho uthi:
‘Kuzazwakala umkhosi kuwo wonke amagceke edolobho,
Abantu bazahlaba umkhosi kuyo yonke imigwaqo besithi, “Maye babo, maye babo!”
Bazabiza abalimi ukuthi bazokhala,
Labenza umsebenzi wokukhala ukuthi bazohlaba umkhosi.’
17 ‘Kuzakuba lokukhala kuwo wonke amasimu amagilebisi+
Ngoba ngizadlula phakathi kwenu,’ kutsho uJehova.
18 ‘Maye ngalabo abafisa ukuthi usuku lukaJehova lufike!+
Pho usuku lukaJehova luzaliphathelani?+
Ubumnyama hatshi ukukhanya.+
19 Kuzafanana lomuntu othi ebalekela isilwane adibane lebhere,
Athi nxa engena endlini yakhe abambelele emdulini alunywe yinyoka.
20 Usuku lukaJehova luzakuba yibumnyama hatshi ukukhanya,
Luzakuba lusuku lobumnyama obukhulu hatshi ukukhanya.
21 Ngiyayizonda futhi ngiyayenyanya imikhosi yenu,+
Loqhatshi lwemihlangano yenu eqakathekileyo alungithokozisi ngitsho.
22 Lanxa lingangenzela iminikelo yokutshiswa egcweleyo kanye leyezipho,
Ayisoze ingithabise,+
Lemihlatshelo yenu yobudlelwano eyezifuyo ezinonileyo kangisoze ngiyamukele.+
23 Yekelani ukungibangela umsindo ngezingoma zenu,
Angifuni lakuwuzwa umculo weziginci zenu.+
24 Ukwahlulela kuhle akugeleze njengamanzi,+
Lokulunga kube njengesifula esihlala sigeleza.
25 Lina ndlu ka-Israyeli langilethela yini imihlatshelo leminikelo yezipho
Okweminyaka engu-40 lisenkangala?+
26 Khathesi sekumele lithwale uSakhuthi inkosi yenu loKhayiwane,*
Izithombe elizenzele zona, ezenkanyezi kankulunkulu wenu.
27 Ngakho ngizalisa ekuthunjweni ngale kweDamaseko,’+ kutsho lowo obizo lakhe nguJehova uNkulunkulu wamabutho.”+
6 “Maye kini elinganaki lutho* eZiyoni,
Lani elizibona livikelekile entabeni yeSamariya,+
Lina bakhokheli besizwe esidumileyo,
Abathenjiweyo endlini ka-Israyeli.
2 Hambani eKhaline liyebona.
Lisuke lapho liye eHamathi Enkulu,+
Lihambe lize liyefika eGathi kwelamaFilisti.
Izindawo lezi zingcono yini kulemibuso* le?
Zinkulu yini kulendawo yenu?
4 Lilala emibhedeni ececiswe ngempondo zendlovu,+ licambalale emasofeni,+
Lisidla inyama yenqama ezithethwe emihlambini kanye lenyama yamajongosi anonileyo,+
5 Libumba izingoma elizihlabela litshaya ihabhu,*+
Lilungise amachacho amatsha njengoDavida,+
6 Linatha iwayini ngezikali ezinkulu*+
Ligcobe amafutha ohlobo oluphezulu,
Kodwa kalizihluphi ngosizi lukaJosefa.+
7 Lizaqalela abanye ukuya ekuthunjweni,+
Uhleko eliluqhunsa licambalele luzaphela nya.
8 ‘INkosi Enkulu uJehova isifunge ngayo ngokwayo,’+ kutsho uJehova uNkulunkulu wamabutho,
‘“Ngiyakwenyanya ukuzigqaja kukaJakhobe,+
Ngiyazizonda izinqaba zakhe,+
Ngizanikela idolobho ezitheni kanye lakho konke okuphakathi kwalo.+
9 “‘“Nxa kulabantu abalitshumi abasele endlini eyodwa, labo bazakufa. 10 Isihlobo sizabuya sibakhiphele phandle sitshise munye ngamunye. Sizakhipha izidumbu zabo* endlini, besesisithi kuloba ngubani ongabe esezindlini ezingaphakathi, ‘Basesekhona yini abanye?’ Yena uzaphendula athi, ‘Akuselamuntu.’ Isihlobo besesisithi kuye, ‘Vala umlomo! Lesi kayisiso sikhathi sokukhuluma ngebizo likaJehova.’”
11 UJehova nguye ozabeka umlayo,+
Indlu enkulu uzayitshaya ayitshiye iyinqwaba yezibi,
Lendlu encinyane ayitshiye iyizicucu.+
12 Amabhiza angagijima edwaleni yini?
Kambe umuntu angalima ngenkomo edwaleni?
Selitshintshe ukwahlulela kuhle kwaba yisihlahlakazana esibulalayo,
14 Yikho-ke ngizathumela isizwe sizokuhlasela wena ndlu ka-Israyeli,’+ kutsho uJehova uNkulunkulu wamabutho,
‘Labobantu bazalihlukuluza kusukela eLebho-hamathi+ kuze kuyefika esihotsheni* se-Arabha.’”
7 Nanku engakutshengiswa yiNkosi Enkulu uJehova: Ngabona umtshitshi wentethe ngesikhathi amabele amuva eseqala ukumila.* La ngamabele ayehlanyelwa utshani benkosi sebusikiwe. 2 Kwathi umtshitshi wentethe usutshaye walobisa okumilayo elizweni, ngathi: “Awu Nkosi Enkulu Jehova ngicela uxole!+ Kambe uJakhobe angasila yini? Phela kalamandla!”+
3 Ngakho uJehova watshintsha ingqondo.*+ UJehova wathi: “Akusoze kwenzakale.”
4 Nanku engakutshengiswa yiNkosi Enkulu uJehova: Ngabona iNkosi Enkulu uJehova imemezela ukuthi ilizwe lijeziswe ngomlilo. Umlilo watshisa ulwandle loma qha walobisa lengxenye yelizwe. 5 Yikho mina ngathi: “Awu Nkosi Enkulu Jehova ngicela ungakwenzi lokhu!+ Kambe uJakhobe angasila yini? Phela kalamandla!”+
6 Ngakho uJehova watshintsha ingqondo.*+ INkosi Enkulu uJehova yathi: “Lalokhu akusoze kwenzakale.”
7 Nanku angitshengisa khona: Ngabona uJehova emi emdulini owakhiwe kusetshenziswa intambo yokuqondisa njalo wayephethe intambo yokuqondisa. 8 UJehova wathi kimi: “Ubonani Amosi?” Mina ngathi: “Ngibona intambo yokuqondisa.” UJehova wasesithi: “Sengifaka intambo yokuqondisa ebantwini bami bako-Israyeli. Angisoze ngiphinde ngibaxolele.+ 9 Izindawo eziphakemeyo zika-Isaka+ zizadilizwa, lezindawo ezingcwele zako-Israyeli zizabhidlizwa+ njalo indlu kaJerobhowami ngizayihlasela ngenkemba.”+
10 U-Amaziya umphristi waseBhetheli+ wathumela ilizwi enkosini yako-Israyeli uJerobhowami+ wathi: “U-Amosi ubumba icebo lokukuhlasela khona kanye endlini yako-Israyeli.+ Ilizwe ngeke liwamele wonke amazwi akhe. + 11 U-Amosi uthi, ‘UJerobhowami uzabulawa ngenkemba futhi loba sekutheni abako-Israyeli bazathunjwa baphume elizweni labo.’”+
12 U-Amaziya wasesithi ku-Amosi: “Suka lapha wena mboni, baleka uye elizweni lakoJuda, uyesebenzela isinkwa* sakho khonale futhi uyephrofetha khona.+ 13 Ungaphindi uphrofethe futhi eBhetheli+ ngoba le yindawo engcwele yenkosi+ njalo yindlu yombuso.”
14 U-Amosi wamphendula wathi: “Mina ngangingasimphrofethi njalo kangisiyo ndodana yomphrofethi kodwa ngangingumelusi+ njalo ngigcina izihlahla zomkhiwa wesikhamori. 15 Kodwa uJehova wangisusa emsebenzini wokwelusa umhlambi njalo uJehova wathi kimi, ‘Hamba uyephrofetha ebantwini bami bako-Israyeli.’+ 16 Ngakho zwana ilizwi likaJehova: ‘Wena uthi, “Ungaphrofethi kubi ngo-Israyeli+ njalo ungatshumayeli+ okubi ngendlu ka-Isaka.” 17 Yikho-ke nanku okutshiwo nguJehova: “Inkosikazi yakho izakuba liwule edolobheni, amadodana lamadodakazi akho azabulawa ngenkemba. Ilizwe lakho lizakwabiwa ngentambo yokulinganisa njalo wena uzafela elizweni elingcolileyo futhi loba sekutheni abako-Israyeli bazathunjwa baphume elizweni labo.”’”+
8 Nanku engakutshengiswa yiNkosi Enkulu uJehova: Ngabona ibhasikiti eyayilezithelo zehlobo. 2 UNkulunkulu wathi kimi, “Ubonani Amosi?” Ngaphendula ngathi, “Ngibona ibhasikiti elezithelo zehlobo.” UJehova wasesithi kimi: “Ukuphela sekubaficile abantu bami bako-Israyeli. Angisoze ngiphinde ngibaxolele.+ 3 ‘Ngalolosuku izingoma ezihlatshelwa ethempelini zizatshintsha zibe yikulila,’+ kutsho iNkosi Enkulu uJehova. ‘Izidumbu zizatshiywa zigcwele indawo yonke+ kusale kuthule zwi!’
4 Zwanini lokhu lina elicindezela abayanga,
Elichitha abamnene belizwe,+
5 Lina elithi, ‘Kanti umkhosi wokuthwasa kwenyanga uyaphela nini+ siyethengisa amabele ethu?
LeSabatha+ liyaphela nini ukuze sithengise amabele ethu?
Phela sifuna ukwenza i-efa* libe lincane,
Sikhulise lesisindo seshekheli,*
Ukuze senze ubuqili ngezikali zamanga,+
6 Sithenge abaswelayo ngesiliva,
Sithenge umyanga ngamanyathela,+
Njalo sithengise amakhoba.’
7 UJehova usefunge ngokuziphakamisa kukaJakhobe wathi,+
‘Kangisoze ngikukhohlwe konke abakwenzileyo.+
Ilizwe lonke alisoze liphakame njengeNayili yini?
Kalisoze liphithizele lisiyale lale, liphinde libohle njengeNayili yaseGibhithe na?’+
9 ‘Ngalolosuku,’ kutsho iNkosi Enkulu uJehova,
‘Ngizakwenza ilanga litshone emini ligwaze umhlaba,
Ngenze ilizwe libe mnyama emini libalele.+
10 Ngizatshintsha imikhosi yenu ibe yikulila+
Lazo zonke izingoma zenu zibe ngezokulila.
Ngizathandela zonke inkalo ngamasaka njalo ngiphuce wonke amakhanda,
Ngenze kube angathi yisililo sokukhalela indodana eyiyo yodwa,
Isiphetho salolosuku sizabe sibaba gamu.’
11 ‘Zwanini! Ziyeza insuku,’ kutsho iNkosi Enkulu uJehova,
‘Lapho engizathumela khona indlala elizweni,
Hatshi indlala yokuswela ukudla kumbe eyokomela amanzi,
Kodwa eyokulambela ukuzwa amazwi kaJehova.+
12 Bazadiyazela besuka kolunye ulwandle besiya kolunye
Besuka enyakatho besiya empumalanga.
Bazazulazula indawo yonke bedinga ilizwi likaJehova kodwa kabasoze balithole.
13 Ngalolosuku intombi ezinhle zizaqaleka,
Lamajaha azaqaleka ngenxa yokoma,
14 Labo abafunga ngecala leSamariya+ besithi,
“Ingqe nje unkulunkulu wakho ephila wena Dani!”+
“Lanjengoba nje indlela yaseBheri-shebha+ isesekhona!”
Bazakuwa bangaphindi bavuke futhi.’”+
9 Ngabona uJehova+ emi phezu kwe-alithare njalo wathi: “Tshaya phezu kwezinsika, izakhiwo zinyikinyeke. Uqume izihloko zezinsika. Abokucina ngizababulala ngenkemba, akula obalekayo ozasila njalo kakho ozama ukuphunyuka ozaphumelela.+
2 Nxa bangagebha bayecatsha engcwabeni,
Ngizabadonsa ngesandla sami ngibakhiphe
Nxa bangaqansa baye emazulwini,
Ngizabethula ngibalethe phansi.
3 Nxa bangayacatsha esiqongweni seKhameli,
Ngizabadinga ngibakhiphele egcekeni.+
Nxa bangangicatshela enzikini yolwandle,
Ngizathuma inyoka ukuthi ibalume.
4 Nxa bangathunjwa baye elizweni lezitha zabo,
Lakhonale ngizatshela inkemba ukuthi ibabulale,+
Amehlo ami ngizawathi nhlo kubo ngihlose okubi hatshi okuhle.+
5 INkosi Enkulu uJehova wamabutho yiyo ethinta ilizwe*
Lincibilike+ njalo zonke izakhamizi zalo zizakhala,+
Ilizwe lonke lizaphakama njengeNayili,
Liphinde libohle njengeNayili yaseGibhithe.+
6 ‘Lowo owakha amasitephisi akhe emazulwini
Amise isakhiwo sakhe phezu komhlaba,
Lowo obiza amanzi olwandle,
Ukuze awathele phezu komhlaba,+
UJehova yilo ibizo lakhe.’+
7 ‘Lina bantu bako-Israyeli, kalifanani lamaKhushi yini phambi kwami?’ kutsho uJehova.
‘U-Israyeli kangimkhiphanga elizweni leGibhithe yini?+
AmaFilisti kangiwakhiphanga yini eKhrethe,+ ngakhipha lamaSiriya eKhiri?’+
8 ‘Amehlo eNkosi Enkulu uJehova akhangele umbuso owonayo,
Uzawutshaya awubhuqe awususe emhlabeni.+
Kodwa indlu kaJakhobe angisoze ngiyitshabalalise yonke,’+ kutsho uJehova.
9 ‘Zwana! Sengibeka umlayo,
Ngizanyikinya indlu ka-Israyeli phakathi kwazo zonke izizwe,+
Njengomuntu ohlungula amabele ngokhomane,
Kungabi ngitsho lelilodwa ilitshe eliwela phansi.
10 Bonke abonayo phakathi kwabantu bami bazabulawa ngenkemba,
Labo abathi, “Akulahlupho oluzafika eduze kwethu kumbe oluzasehlela.”’
11 ‘Ngalolosuku ngizavusa idumba* likaDavida+ eseliwile,
Ngivale izikhala zalo,*
Ngivuselele amanxiwa alo,
Ngilakhe kutsha libe njengasezinsukwini zakudala,+
12 Ukuze bathathe okuseleyo ko-Edomi kube ngokwabo,+
Lakho konke okusezizweni zonke ezibizwa ngebizo lami,’ kutsho uJehova okwenzayo lokhu.
13 ‘Ziyeza insuku,’ kutsho uJehova,
‘Lapho olimayo azafica khona ovunayo,
Lovoxa amagilebisi aficwe ngohlanyelayo,+
Ezintabeni kuzagobhoza iwayini elimnandi,+
Lizageleza emaqaqeni wonke.+
14 Bonke abako-Israyeli abathunjiweyo ngizabaqoqa ngibaphendukise,+
Bazawakha kutsha amadolobho ayedilikile bahlale kuwo,+
Bazalima amasimu amagilebisi banathe iwayini lawo,+
Balime izingadi badle izithelo zazo.’+
15 ‘Ngizabahlanyela elizweni labo.
Kabasoze baphinde basitshunwe
Elizweni engibanike lona,’+ kutsho uJehova uNkulunkulu wenu.”
Ibizo leli litsho ukuthi, “Ukuba ngumthwalo” kumbe “Ukuthwala umthwalo.”
Khangela iNgcazelo Yamabala ebaleni elithi, “Ukubhula; Indawo yokubhulela.”
NgesiHebheru, “ophethe intonga.”
NgesiHebheru, “ophethe intonga.”
Ezinye inguqulo zithi, “lamakhosana ayo.”
NgesiHebheru, “umahluleli.”
Kumbe, “wonke amakhosana akhe.”
Kumbe, “umlayo.”
Kumbe, “ethempelini labonkulunkulu.”
Khangela iNgcazelo Yamabala.
Khangela iNgcazelo Yamabala.
Kumbe, “bengazange bahlele.”
Ezinye inguqulo zithi, “kungelakudla ethiywe ngakho.”
Kumbe, “ufakaze endlini.”
Ezinye inguqulo zithi, “ezinengi.”
Kumbe, “lizohlamuka.”
Kumbe, “yisihlahlakazana esibaba gamu.”
Kumbe, “umthelo wamasimu.”
Kumbe, “amacala enu mangaki.”
Kumbe, “Liphiwa isivalamlomo.”
Onkulunkulu laba bengabe besitsho iplanethi okuthiwa yi-Saturn, eyayikhonzwa ngabantu.
Kumbe, “abahlezi pekle.”
Kukhanya le yimibuso yakoJuda lako-Israyeli.
Ihabhu lichacho elilentambo ezifanana lezekatali.
Kumbe, “ngamankomitsho amakhulu.”
NgesiHebheru, “amathambo abo.”
Kumbe, “ngumhlonyane.”
NgesiHebheru, “Asizithathelanga impondo.”
Khangela iNgcazelo Yamabala.
NgoJanuary langoFebruary.
Kumbe, “wazisola ngalokhu.”
Kumbe, “wazisola ngalokhu.”
NgesiHebheru, “udle isinkwa.”
Khangela iSengezo ku-B14.
Khangela iSengezo ku-B14.
Kumbe, “umhlaba uzathuthumela.”
Kumbe, “umhlaba.”
Kumbe, “itende.”
Kumbe, “zabo.”