UNAHUME
1 Nansi isimemezelo salokho okuzakwehlela iNiniva:+ Ibhuku lombono kaNahume* um-Elikhoshi:
2 UJehova nguNkulunkulu ofuna sizinikele kuye kuphela+ njalo uyaphindisela,
UJehova uyaphindisela futhi ukulungele ukutshengisa ulaka lwakhe.+
UJehova uyaphindisela ezitheni zakhe,
Ulaka lwakhe ulugcinela izitha zakhe.
3 UJehova uyaphuza ukuthukuthela+ njalo ulamandla amakhulu,+
Kodwa loba sekutheni uJehova kasoze ayekele ukujezisa labo okumele bajeziswe.+
Endleleni yakhe kuqubuka isivunguzane lesiphepho,
Amayezi aluthuli lwezinyawo zakhe.+
4 Uyalukhuza ulwandle+ alwenze lome qha!
Enze yonke imifula itshe.+
IBhashani leKhameli kuyabuna,+
Lamaluba aseLebhanoni ayabuna.
5 Izintaba ziyanyikinyeka ngenxa yakhe,
Lamaqaqa ayancibilika.+
Umhlaba uzagedezela ngenxa yobuso bakhe,
Kugedezele lelizwe kanye lalabo abahlala kulo.+
6 Ngubani ongayimela intukuthelo yakhe?+
Ngubani ongakumela ukuvutha kolaka lwakhe?+
Ulaka lwakhe luzalavuka njengomlilo,
Amatshe aqhekezeke ngenxa yakhe.
7 UJehova muhle+ njalo uyinqaba* ngesikhathi sokuhlupheka.+
Uyabazi* labo abaphephela kuye.+
8 Uzalitshabalalisa kokuphela idolobho lelo* ngesikhukhula esikhulu,
Ubumnyama buzakwembesa izitha zakhe.
9 Likhona yini icebo ongalibumba elingamelana loJehova?
Phela yena utshabalalisa kokuphela,
Uhlupho alusoze lubuye okwesibili.+
10 Abantu beNiniva banxibene njengameva,
Bafanana labantu abadakwe butshwala,
Kodwa bazaphela njengamahlanga awomileyo atshiswe ngumlilo.
11 Kuwe* kuzavela lowo obumba amacebo amabi ngoJehova,
Ekunika amacebo angelancedo.
12 Nanku okutshiwo nguJehova:
“Lanxa abantu laba bebanengi futhi beqine saka,
Bazabhujiswa banyamalale.
Ngakwehlisela uhlupho* kodwa kangisoze ngiphinde ngikwenze lokho.
13 Ngizakwephula ijogwe akuthwalise lona,+
Ngiqume lamaketane akubophe ngawo.
14 Nanku uJehova akutshoyo ngawe,*
‘Ibizo lakho kalisoze liqhubeke likhona.
Ngizadiliza izithombe ezibaziweyo lezibunjwe ngensimbi ezisendlini yabonkulunkulu* bakho.
Ngizakwenzela ingcwaba ngoba uyenyanyeka.’
15 Khangelani ezintabeni libone inyawo zalowo oletha izindaba ezinhle,
Lowo omemezela ukuthula.+
Nanza imikhosi yakho+ awu Juda, ugcwalise izifungo zakho,
Umuntu ongelancedo kasoze aphinde adlule kuwe,
Uzabhujiswa ngokupheleleyo.”
2 Lowo ochithizayo usebuyile ukuzomelana lawe.*+
Linda izinqaba,
Ulinde lomgwaqo.
Zilungiseleleni, liqine libe lamandla.
2 UJehova uzabuyisela ukuziqhenya kukaJakhobe,
Abuyisele lokuziqhenya kuka-Israyeli,
Ngoba ababhidlizayo bambhidlizile,+
Baqeda amahlumela akhe.
3 Amadoda akhe alamandla alamahawu apendwe aba bomvu,
Amaqhawe akhe agqoke okubomvu gebhu!
Insimbi zezinqola zakhe zempi ziphazima njengomlilo
Ngelanga alungiselela ngalo ukuyakulwa,
Lemikhonto yakhe yomjunipha iphakanyisiwe.
4 Izinqola zempi zigijima okokuhlanya emigwaqweni.
Zigijima zisiya le lale emagcekeni edolobho.
Zicwebezela njengezibane futhi ziphazima njengombane.
5 Uzabiza amabutho akhe athenjiweyo,
Azahamba ekhubeka,
Azagijimela emidulini yakhe,
Ayemisa isivikelo.
6 Amasango emifula azavuleka,
Isigodlo sizancibilika.*
7 Nanku osekumisiwe: Indlovukazi isinqunuliwe,
Sebeyithethe njalo izigqilikazi zayo ziyakhala,
Zikhala njengamajuba ngapha zizitshaya ezifubeni.
8 Kusukela kudala iNiniva+ ibinjengechibi lamanzi,
Kodwa khathesi abantu sebebaleka.
“Manini! Manini!”
Kodwa kakho loyedwa otshibilikayo.+
9 Thathani isiliva lithathe legolide!
Inotho yakhona kayipheli.
Igcwele yonke imihlobo yezinto eziligugu.
10 Idolobho selitshaya umoya, selilunxiwa njalo libhidlikile!+
Inhliziyo zabo ziphela amandla ngokwesaba, amadolo abo ayatshayana lenyonga ziyaqhaqhazela,
Ubuso bomuntu wonke buhlobile.
11 Lungaphi ubhalu lwezilwane,+ lapho okudlela khona izilwane ezilamandla,
Lapho isilwane esiphuma khona sikhokhele umdlwane waso,
Kungela loyedwa ozethusayo?
12 Isilwane sasibambela imidlwane yaso inyama eyeneleyo
Sibulalela lezinsikazi zaso.
Sasihlala sigcwalise izindawo zaso ngenyama,
Sigcwalisa lembalu zaso ngenyamazana ezibuleweyo.
13 “Zwana! Ngimelane lawe,” kutsho uJehova wamabutho,+
“Ngizatshisa izinqola zakho zempi ziphele nya!+
Inkemba izaqeda izilwane zakho ezilamandla.
Ngizasusa zonke inyamazana ozidlayo emhlabeni,
Ilizwi lezithunywa zakho kalisoze liphinde lizwakale.”+
3 Maye kulo idolobho elichitha igazi!
Eligcwele ubuqili lobugebenga.
Lihlala lithumbile njalonje!
2 Kuzwakala ukukhala komchilo lokugedlezela kwamaviri,
Lokugijima kwebhiza kanye lenqola egijimayo.
3 Kulomgadi webhiza, lokuphazima kwenkemba lokucazimula komkhonto,
Banengi kakhulu ababuleweyo njalo kulenqwaba zezidumbu
—Ayisibunengi bezidumbu!
Abantu balokhu behamba bekhutshwa yizidumbu.
4 Lokhu kungenxa yezenzo ezinengi zesifebe,
Siyakhanga, siyahuga njalo singumthakathi oyingcitshi,
Othiya izizwe ngobufebe bakhe lezimuli ngobuthakathi bakhe.
5 “Lalela! Ngimelene lawe,”* kutsho uJehova wamabutho,+
“Ngizaphakamisela izidwaba zakho ebusweni bakho,
Ngenze izizwe zibone ubunqunu bakho,
Lemibuso ibone ihlazo lakho.
7 Bonke abakubonayo bazakubalekela+ bathi,
‘INiniva isibhidliziwe!
Ngubani ozayizwela usizi?’
Ngizabathola ngaphi abazakududuza?
8 Wena ungcono yini kuleNo-amoni*+ eyayiseduze kwemisele yeNayili?+
Yayigonjolozelwe ngamanzi,
Inotho yayo kwakululwandle njalo ulwandle lwalungumduli wayo.
9 Amandla ayo amakhulu yayiwathatha eTopiya laseGibhithe.
Abasizi bayo kwakuyiPhuthi+ leLibhiya.+
10 Kodwa layo yathunjwa;
Yaya ebugqilini.+
Abantwabayo bataklazelwa phansi kuwo wonke amakhona emigwaqo.
Benza inkatho ngamadoda ayo ahlonitshwayo,
Wonke amadoda ayo adumileyo abotshwa ngamaketane.
11 Lawe uzadakwa,+
Uzahamba uyecatsha.
Uzadinga isiphephelo ngenxa yesitha sakho.
12 Zonke izinqaba zakho zinjengezihlahla zomkhiwa ezilamakhiwane avuthwa kuqala,
Nxa zinganyikinywa, amakhiwane azawela emilonyeni yabantu abayizidli.
13 Khangela! Amabutho aphakathi kwakho azifananela labesifazana.
Amagedi elizwe lakho azavuleka asale ethe gengelezi phambi kwezitha zakho.
Umlilo uzaqeda imigoqo yamagedi akho.
14 Khana amanzi ulungiselele ukuvinjezelwa!+
Qinisa izinqaba zakho.
Hamba uye edakeni, uvoxe udaka,
Yibambe uqinise ifoloma yezitina.
15 Lakhonapho umlilo uzakutshisa ukuqede.
Inkemba izakuquma uwele phansi.+
Izakutshabalalisa ngendlela intethe ezincane ezitshabalalisa ngayo izilimo.+
Ziqoqeni libe banengi njengentethe ezincane!
Libuthane libe banengi njengentethe!
16 Abantu bakho abathengisayo ubenze baba banengi ukwedlula izinkanyezi zezulu.
Intethe encane ihluba ikhasi layo iphaphe ihambe.
17 Abalindi bakho banjengentethe,
Lezikhulu zakho zinjengomtshitshi wentethe.
Mhla kuqanda ziyahlala ezibayeni zamatshe,
Kuthi nxa ilanga lingatshisa ziphaphe zihambe,
Kakho okwaziyo ukuthi ziqonde ngaphi.
18 Abelusi bakho bayawozela, wena nkosi ye-Asiriya,
Izikhulu zakho zihlezi emizini yazo.
Abantu bakho basabalele ezintabeni,
Njalo akulamuntu obaqoqayo.+
19 Awusoze usibalekele isigameko esizakwehlela.
Inxeba lakho kalelapheki.
Bonke abazakuzwa umbiko omayelana lawe bazaqakeza izandla,+
Ngubani kambe ongazange ahlupheke ngenxa yesihluku esingapheliyo obusenza?”+
Ibizo leli litsho ukuthi, “Umduduzi.”
Kumbe, “uyindawo yokucatsha.”
Kumbe, “Uyabanakekela.”
Lapha kutshiwo iNiniva.
Lapha kutshiwo iNiniva.
Lapha kutshiwo uJuda.
Lapha kutshiwo i-Asiriya.
Kumbe, “ezisethempelini labonkulunkulu.”
Lapha kutshiwo iNiniva.
Kumbe, “sizabhidlika.”
Lapha kutshiwo iNiniva.
Ibizwa langokuthi yiThebhezi.