UHAGAYI

1 Mhlaka 1 ngenyanga yesithupha ngomnyaka wesibili weNkosi uDariyu, ilizwi likaJehova lafika ngomphrofethi uHagayi*+ kuZerubhabheli+ umbusi* wakoJuda, indodana kaSheyalithiyeli lakuJoshuwa umphristi omkhulu, indodana kaJehozadakhi lisithi:

2 “UJehova wamabutho uthi, ‘Abantu laba bathi, “Isikhathi sokwakha* indlu kaJehova* asikafiki.”’”+

3 Ilizwi likaJehova laphinda lafika ngomphrofethi uHagayi+ lisithi: 4 “Kambe lesi yisikhathi sokuthi lizihlalele ezindlini zenu ezinhle, ngapha liyekela indlu yami ilunxiwa?+ 5 Nanku okutshiwo nguJehova wamabutho, ‘Cabangisisani ngezindlela zenu. 6 Lihlanyela inhlanyelo enengi kodwa livuna okulutshwana.+ Liyadla kodwa kalisuthi, liyanatha kodwa kalikholwa, liyagqoka kodwa kalikhudumali. Losebenzayo ufaka umholo wakhe esikhwameni esilezikhala.’”

7 “Yikho uJehova wamabutho uthi, ‘Cabangisisani ngezindlela zenu.’

8 “‘Khwelani phezu kwentaba liyedinga izigodo+ libuye lazo lizokwakha indlu yami+ ukuze ngithokoze ngayo njalo ngikhazinyuliswe,’+ kutsho uJehova.”

9 “‘Belikhangelele okunengi kodwa lathola okulutshwana njalo lithe likuletha emizini yenu ngakuphephula.+ Ngenxa yani?’ kutsho uJehova wamabutho. ‘Ngenxa yokuthi munye ngamunye wenu ugijimisa ukulungisa eyakhe indlu, ngapha liyekela indlu yami ilunxiwa.+ 10 Ngakho amazulu aphezu kwenu awalilethelanga amazolo lomhlaba awulinikanga izithelo zawo. 11 Ngaqhubeka ngiletha isomiso emasimini lasezintabeni, yikho kungela mabele, lewayini elitsha, lamafutha kanye lezilimo. Lina lezifuyo zenu lithwele nzima futhi lisebenzela amahala.’”

12 Ngakho uZerubhabheli+ indodana kaSheyalithiyeli+ loJoshuwa umphristi omkhulu indodana kaJehozadakhi+ labo bonke abantu, balilalela ilizwi likaJehova uNkulunkulu wabo kanye lamazwi ayekhulunywa ngumphrofethi uHagayi ngoba wayethunywe nguJehova uNkulunkulu wabo. Abantu basebeqalisa ukumesaba uJehova.

13 Ngemva kwalokho uHagayi isithunywa sikaJehova watshela abantu umbiko lo esenza umsebenzi uJehova ayemnike wona, wathi: “‘Ngilani bantu bami,’+ kutsho uJehova.”

14 Ngakho uJehova wafaka idlabuzane+ kuZerubhabheli* umbusi* wakoJuda,+ indodana kaSheyalithiyeli, lakuJoshuwa+ umphristi omkhulu, indodana kaJehozadakhi lasebantwini bonke. Babuya baqalisa umsebenzi wokwakha kutsha indlu kaJehova wamabutho, uNkulunkulu wabo.+ 15 Lokhu kwenzakala mhlaka 24 ngenyanga yesithupha, ngomnyaka wesibili wokubusa kweNkosi uDariyu.+

2 Mhlaka 21 ngenyanga yesikhombisa, ilizwi likaJehova lafika kumphrofethi uHagayi+ lisithi, 2 “Ngicela ubuze uZerubhabheli+ umbusi* wakoJuda,+ indodana kaSheyalithiyeli loJoshuwa+ umphristi omkhulu, indodana kaJehozadakhi+ kanye labantu bonke uthi: 3 ‘Bakhona yini phakathi kwenu ababona inkazimulo indlu le eyayilayo kuqala?*+ Liyibona njani khathesi? Liyakubona yini ukuthi kayisilutho nxa iqathaniswa lalokho eyayiyikho kuqala?’+

4 “‘Ngakho khathesi qina wena Zerubhabheli,’ kutsho uJehova, ‘qina lawe Joshuwa mphristi omkhulu, ndodana kaJehozadakhi.’

“‘Qinani lani lonke bantu belizwe,’+ kutsho uJehova, ‘liwenze umsebenzi.’

“‘Ngoba ngilani,’+ kutsho uJehova wamabutho. 5 ‘Khumbulani engalithembisa khona liphuma eGibhithe,+ umoya wami ulokhu ulani.+ Lingesabi.’”+

6 “Nanku okutshiwo nguJehova wamabutho, ‘Ngesikhatshana nje ngizaphinda nginyikinye amazulu, lomhlaba, lolwandle kanye lomhlabathi owomileyo.’+

7 “‘Ngizanyikinya zonke izizwe njalo izinto eziligugu ezivela ezizweni zonke zizabuya+ zizongena endlini le, futhi ngizayigcwalisa ngenkazimulo,’+ kutsho uJehova wamabutho.

8 “‘Isiliva ngesami legolide ngelami,’ kutsho uJehova wamabutho.

9 “‘Inkazimulo ezakuba sendlini le izakuba nkulu ukwedlula eyakuqala,’+ kutsho uJehova wamabutho.

“‘Ngizakwenza kube lokuthula endaweni le,’+ kutsho uJehova wamabutho.”

10 Mhlaka 24 ngenyanga yesi-9, ngomnyaka wesibili wokubusa kukaDariyu, ilizwi likaJehova lafika kumphrofethi uHagayi+ lisithi: 11 “UJehova wamabutho uthi, ‘Ngicela ubuze abaphristi ukuthi umthetho uthini:+ 12 “Nxa umuntu ethwele inyama engcwele ngesigqoko sakhe, isigqoko sakhe besesithinta isinkwa loba ukudla okuxhwathisiweyo kumbe iwayini loba amafutha loba okunye nje ukudla, kuba ngcwele yini?”’”

Abaphristi baphendula bathi: “Hatshi!”

13 UHagayi waphinda wababuza wathi: “Nxa umuntu ongcoliswe yikuthinta isidumbu ethinta okunye kwalokhu, kuyangcola yini?”+

Abaphristi baphendula bathi: “Ye kuyangcola.”

14 Ngakho uHagayi wathi: “‘Abantu laba banjalo lesizwe lesi sinjalo phambi kwami,’ kutsho uJehova, ‘yonke imisebenzi yabo injalo futhi konke abanikela ngakho kungcolile.’

15 “‘Kodwa khathesi ngiyalicela, kusukela lamuhla kusiya phambili cabangisisani ngokuthi izinto zazinjani kungakabekwa ilitshe phezu kwelitshe ethempelini likaJehova.+ 16 Kwakusithi nxa umuntu esiya enqunjini yamabele ekhangelele ukuthola amasaka angu-20 athole angu-10 kuphela, nxa esiya egodini lokuvoxela amagilebisi efuna imbiza ezingu-50 zewayini athole ezingu-20 kuphela,+ 17 Ngalitshaya ngokutshisa lomkhuhlane ohlasela izilimo+ kanye lesiqhotho, lina kanye lemisebenzi yezandla zenu, kodwa kakho loyedwa owaphendukayo weza kimi,’ kutsho uJehova.

18 “‘Ngiyalicela, kusukela lamuhla mhlaka 24 kusiya phambili cabangisisani ngalokhu, kusukela ngalolusuku lwenyanga yesi-9 okubekwe ngalo isisekelo sethempeli likaJehova;+ cabangisisani ngalokhu: 19 Inhlanyelo isesekhona yini esiphaleni?+ Sezikhona yini izithelo esihlahleni samagilebisi, lesomkhiwa, lesamaharinathi lesama-oliva? Kusukela lamuhla sengizalibusisa.’”+

20 Mhlaka 24 ngenyanga yesi-9 ilizwi likaJehova lafika okwesibili kuHagayi+ lisithi: 21 “Tshela uZerubhabheli umbusi* wakoJuda uthi, ‘Ngizanyikinya amazulu lomhlaba.+ 22 Ngizagenqula izihlalo zobukhosi zemibuso futhi ngichithe amandla emibuso yezizwe.+ Ngizabhewula inqola labagadi bayo, amabhiza labagadi bawo bazakuwa, ngamunye abulawe yinkemba yomfowabo.’”+

23 “‘Ngalolosuku,’ kutsho uJehova wamabutho, ‘Ngizakuthatha wena nceku yami Zerubhabheli,+ ndodana kaSheyalithiyeli,+ kutsho uJehova, ‘ngikwenze ube njengendandatho elophawu ngoba nguwe engikukhethileyo,’ kutsho uJehova wamabutho.”