UZAKHARIYA
1 Ngenyanga yesi-8 ngomnyaka wesibili wokubusa kukaDariyu,+ ilizwi likaJehova lafika kumphrofethi uZakhariya*+ indodana kaBherekhiya indodana ka-Ido, lathi: 2 “UJehova wabathukuthelela kakhulu oyihlo.+
3 “Khuluma labantu uthi kubo, ‘Nanku okutshiwo nguJehova wamabutho: “‘Phendukani kimi,’ kutsho uJehova wamabutho, ‘lami ngizaphenduka kini,’+ utsho njalo uJehova wamabutho.”’
4 “‘Lingabi njengaboyihlo, labo abaphrofethi bakudala abathi kubo: “Nanku okutshiwo nguJehova wamabutho, ‘Ngicela litshiye izindlela zenu ezimbi kanye lezenzo zenu ezimbi.’”’+
“‘Kodwa bona abalalelanga njalo abazange babe lendaba lami,’+ kutsho uJehova.
5 “‘Bangaphi oyihlo khathesi? Bona abaphrofethi abafanga yini? 6 Oyihlo ngabatshela imilayo yami njalo ngathuma izinceku zami ezingabaphrofethi ukuthi zibaxwayise ngokwakuzakwenzakala nxa bengalaleli. Konke lokho akuzange kugcwaliseke yini?’+ Yikho baphenduka kimi bathi: ‘UJehova wamabutho usiphathe ngokufanele izindlela zethu lezenzo zethu njengoba wayetshilo.’”+
7 Ngosuku lwesi-24 lwenyanga yetshumi lanye, inyanga kaShebhathi,* ngomnyaka wesibili wokubusa kukaDariyu,+ ilizwi likaJehova lafika kumphrofethi uZakhariya indodana kaBherekhiya indodana ka-Ido, 8 wasesithi: “Ngibone umbono ebusuku. Bekulendoda ebigade ibhiza elibomvu imi phakathi kwezihlahla zommethile esihotsheni. Ngemva kwayo bekulamabhiza abomvu layibubende kanye lamhlophe.”
9 Ngakho ngithe: “Ngobani laba nkosi yami?”
Ingilosi ebikhuluma lami yaphendula yathi: “Ngizakutshela ukuthi laba ngobani.”
10 Indoda ebimi phakathi kwezihlahla zommethile yasisithi: “Laba yibo uJehova abathume ukuthi babhodabhode emhlabeni.” 11 Basebekhuluma lengilosi kaJehova ebimi phakathi kwezihlahla zommethile bathi: “Sesiwubhodile umhlaba futhi kulokuthula lokuhlaliseka emhlabeni wonke.”+
12 Ingilosi kaJehova yasisithi: “Awu Jehova wamabutho, kuzaze kube nini ulokhu ungayizweli isihawu iJerusalema njalo ungabi lomusa emadolobheni akoJuda+ obulokhu uwathukuthelele iminyaka yonke le engu-70?”+
13 UJehova uyiphendule ngamazwi alomusa laduduzayo ingilosi ebikhuluma lami. 14 Ingilosi le yasisithi kimi: “Memeza uthi, ‘Nanku okutshiwo nguJehova wamabutho: “Ngiyayitshisekela iJerusalema leZiyoni ngentshiseko enkulu.+ 15 Ngizithukuthelele kakhulu izizwe ezihlezi ngokuthula+ ngoba ngangifuna ukubajezisa kancane+ abantu bami kodwa zona zedlulisa amalawulo.”’+
16 “Ngakho nanku okutshiwo nguJehova: ‘“Ngizaphinda ngiyizwele isihawu iJerusalema+ futhi indlu yami izakwakhiwa kuyo,”+ kutsho uJehova wamabutho, “lentambo yokulinganisa izakwelulwa eJerusalema.”’+
17 “Memeza futhi uthi, ‘Nanku okutshiwo nguJehova wamabutho: “Emadolobheni ami kuzaphinda kugcwale konke okuhle. UJehova uzaphinda ayiduduze iZiyoni+ futhi ayikhethe kutsha iJerusalema.”’”+
18 Ngasengikhangela phezulu ngabona impondo ezine.+ 19 Yikho ngibuze ingilosi ebikhuluma lami ngathi: “Kuyini lokhu?” Yona yasingiphendula yathi: “Lezi yizo impondo ezachitha uJuda+ lo-Israyeli+ kanye leJerusalema.”+
20 UJehova wasengitshengisa amadoda amane azingcitshi zomsebenzi. 21 Ngabuza ngathi: “Laba bona bazokwenzani?”
Ingilosi yathi: “Laba yibo abazabuya bezokwethusa impondo zezizwe. Bazaphosela phansi impondo zezizwe, lezo izizwe ezaziziphakamisa zifuna ukuchitha uJuda. Impondo lezi yizo ezachitha uJuda kwaze kwasala kungela ngitsho loyedwa ongavusa ikhanda.”
2 Ngikhangele phezulu ngasengibona indoda ithwele intambo yokulinganisa,+ 2 ngasengiyibuza ngathi: “Uya ngaphi?”
Yaphendula yathi: “Ngiyalinganisa iJerusalema ukuze ngibone ububanzi bayo lobude bayo.”+
3 Ingilosi ebikhuluma lami iphumile kwasekuthutsha enye ingilosi iyihlangabeza. 4 Yasisithi kuyo: “Gijima uyetshela ijaha leliyana uthi, ‘“IJerusalema izakuba njengedolobho elingelamduli ngoba izakuba labantu abanengi+ lezifuyo ezinengi.+ 5 Ngizakuba ngumduli womlilo oyigombolozeleyo+ njalo inkazimulo yami izakuba phakathi kwayo,”’+ kutsho uJehova.”
6 “Wozani! Wozani! Balekani elizweni lasenyakatho,”+ kutsho uJehova.
“Ngoba lina sengilichithachithile emimoyeni yomine yamazulu,”+ kutsho uJehova.
7 “Wozani bantu beZiyoni! Balekani lina elihlala lendodakazi yeBhabhiloni+ 8 ngoba uJehova wamabutho, owathi esekhazinyulisiwe wangithuma ezizweni ezilithwalise nzima+ uthi: ‘Loba ngubani othinta lina uthinta inhlamvu yelihlo lami.+ 9 Khathesi ngizaphakamisa isandla sami ngilwe labo njalo izigqili zabo zizathatha impahla yabo.’+ Lapho-ke lizakwazi mhlophe ukuthi uJehova wamabutho ungithumile.
10 “Memeza ngentokozo ndodakazi yeZiyoni+ ngoba ngiyeza+ futhi ngizahlala phakathi kwakho,”+ kutsho uJehova. 11 “Ngalolosuku izizwe ezinengi zizazihlanganisa loJehova+ zibe ngabantu bami. Ngizahlala phakathi kwenu.” Lizakwazi ukuthi uJehova wamabutho ungithumile kini. 12 UJehova uzathatha uJuda amenze ilifa lakhe endaweni engcwele njalo uzayikhetha kutsha iJerusalema.+ 13 Lonke thulani phambi kukaJehova ngoba usethatha inyathelo esendaweni yakhe engcwele.
3 Wasengitshengisa uJoshuwa+ umphristi omkhulu emi duze lengilosi kaJehova. USathane+ ubemi esandleni sakhe sokudla ukuze amvimbe. 2 Ingilosi kaJehova yasisithi kuSathane: “Kwangathi uJehova angakukhuza Sathane.+ Kakukhuze sibili uJehova, lowo oyikhethileyo iJerusalema.+ Phela uJoshuwa lo yisikhuni esikhitshwe emlilweni sibhebha.”
3 UJoshuwa ubegqoke izigqoko ezingcolileyo, emi eceleni kwengilosi. 4 Ingilosi ikhulume lalabo abakade bemi khonapho yathi, “Mkhipheni izigqoko lezo ezingcolileyo.” Yasisithi kuye, “Khangela sengisisusile isiphambeko sakho, uzagqokiswa izigqoko ezinhle.”+
5 Mina ngathi: “Mfakeni iqhiye ehlanzekileyo.”+ Basebemfaka iqhiye ehlanzekileyo ekhanda bamgqokisa lezigqoko. Ingilosi kaJehova ibimile eduze khonapho. 6 Ngakho ingilosi kaJehova ithe kuJoshuwa: 7 “Nanku okutshiwo nguJehova wamabutho, ‘Nxa ungahamba ezindleleni zami wenze konke engifuna ukwenze, uzakuba ngumahluleli endlini yami+ njalo uzagcina* amaguma ayo. Ngizakupha imvumo yokuba phakathi kwalaba abamileyo lapha.’
8 “‘O Mphristi Omkhulu Joshuwa kanye labaphristi abahlala phambi kwakho, lalelani ngoba lina liyisibonakaliso salokho okuzayo. Ngiletha inceku yami+ uHlumela.+ 9 Khangelani ilitshe engilibeke phambi kukaJoshuwa. Elitsheni leli kulamehlo* ayisikhombisa futhi ngizabhala amazwi phezu kwalo,’ kutsho uJehova wamabutho, ‘njalo icala labantu balelolizwe ngizalicitsha ngelanga elilodwa.’+
10 “UJehova wamabutho uthi, ‘Ngalelolanga omunye lomunye wenu uzanxusa umakhelwane wakhe ukuthi azohlala laye ngaphansi kwesihlahla sakhe samagilebisi langaphansi kwesihlahla sakhe somkhiwa.’”+
4 Ingilosi ebikhuluma lami iphendukile yafika yangivusa angathi ivusa umuntu osebuthongweni, 2 yathi kimi: “Ubonani?”
Ngasengisithi: “Ngibona uluthi lwesibane olwenziwe ngegolide+ kuphela njalo kulomganu phezu kwalo. Uluthi lolu lulezibane eziyisikhombisa,+ ziyisikhombisa sibili futhi zilamaphayiphi ayisikhombisa. 3 Eceleni koluthi kulezihlahla zama-oliva ezimbili+ eziphahle umganu, esinye sisesandleni sokudla esinye kwesenxele.”
4 Ngasengibuza ingilosi ebikhuluma lami ngathi: “Kutshoni lokhu nkosi yami?” 5 Ingilosi yangibuza yathi: “Awukwazi ukuthi izinto lezi zitshoni?”
Ngaphendula ngathi: “Angikwazi nkosi yami.”
6 Yasisithi kimi: “Nanku uJehova akutshoyo kuZerubhabheli: ‘“Lokhu akusoze kwenzakale ngebutho lempi kumbe ngamandla abantu,+ kodwa kuzakwenzakala ngomoya wami,”+ kutsho uJehova wamabutho. 7 Kambe uyini wena ntaba enkulu? Phambi kukaZerubhabheli+ uzakuba ngumhlabathi owendlalekileyo+ njalo yena uzathi eletha ilitshe lokucina lethempeli abantu bababaze bathi: “Asibuhle balo! Asibuhle balo!”’”
8 Ilizwi likaJehova liphinde lafika kimi lathi: 9 “Izandla zikaZerubhabheli yizo ezibeke isisekelo sendlu le,+ futhi nguye ozayiqedisa ngezandla zakhe.+ Lizakwazi ukuthi uJehova wamabutho ungithumile kini. 10 Lingeyisi usuku lwezinto ezincane*+ ngoba bazathokoza nxa sebebona uZerubhabheli ephethe intambo yokuqondisa.* Izibane lezi eziyisikhombisa* ngamehlo kaJehova ahlola okwenzakala emhlabeni wonke.”+
11 Ngasengiyibuza ingilosi ngathi: “Izihlahla zama-oliva ezimbili eziphahle uluthi lwesibane zona zimelani?”+ 12 Ngaphinda ngayibuza okwesibili ngathi: “Zimelani ingatsha zezihlahla* zama-oliva ezimbili ezithulula amafutha egolide ngamaphayiphi amabili egolide?”
13 Yasingibuza yathi: “Awukwazi ukuthi izinto lezi zitshoni?”
Ngaphendula ngathi: “Angikwazi nkosi yami.”
14 Yasisithi: “Izinto lezi zimela abagcotshiweyo ababili abemi leNkosi yomhlaba wonke.”+
5 Ngiphinde ngakhangela phezulu ngabona incwadimgoqwa iphapha emoyeni. 2 Ingilosi yangibuza yathi: “Ubonani?”
Ngaphendula ngathi: “Ngibona incwadimgoqwa engaba ngamamitha angu-9 ubude lamamitha angu-4,5 ububanzi.”*
3 Yasisithi kimi: “Lesi yisiqalekiso esiya kuwo wonke umhlaba ngenxa yokuthi bonke abantu abatshontshayo+ balokhu bengakajeziswa. Isiqalekiso lesi sibhalwe kwelinye icele lencwadimgoqwa. Abantu bonke abenza izifungo+ labo balokhu bengakajeziswa. Isiqalekiso lesi laso sibhalwe kwelinye icele lencwadimgoqwa. 4 UJehova wamabutho uthi, ‘Ngithumele isiqalekiso lesi njalo sizangena endlini yesela lasendlini yalowo owenza isifungo samanga ngebizo lami. Sizahlala endlini leyo siyibhidlize, sitshabalalise izigodo zayo kanye lamatshe ayo.’”
5 Ingilosi ebikhuluma lami ingilandile yathi kimi: “Ngicela ukhangele phezulu ubone ukuthi kuyini okuthutshayo.”
6 Ngasengibuza ngathi: “Kuyini lokhu?”
Yasiphendula yathi: “Lokhu okubonayo yisitsha esikhulu sokulinganisa.”* Yaqhubeka yathi: “Le yiyo indlela abantu ababi abakhangeleka ngayo emhlabeni wonke.” 7 Ngasengibona isivalo sensimbi obekuvalwe ngaso isitsha esikhulu sokulinganisa siphakanyiswa njalo bekulowesifazana obehlezi phakathi. 8 Ingilosi yathi: “Owesifazana lo kuthiwa nguBubi.” Yasimfuqela phakathi kwesitsha esikhulu sokulinganisa yasivala ngci ngesivalo sensimbi.
9 Ngasengikhangela phezulu ngabona kusiza abesifazana ababili bephapha emoyeni. Bebelempiko ezinjengezengabuzane. Bafike baphakamisa isitsha leso esikhulu baqonga laso emkhathini. 10 Ngibuze ingilosi ebikhuluma lami ngathi: “Manje basisa ngaphi isitsha esikhulu sokulinganisa?”
11 Yaphendula yathi: “Basisa elizweni leShinari*+ ukuze bayekwakhela owesifazana ophakathi kwaso indlu. Izathi isiphelile bamfake endaweni yakhe efaneleyo.”
6 Ngiphinde ngakhangela phezulu ngabona inqola ezine zithutsha phakathi kwezintaba ezimbili. Izintaba lezi bezenziwe ngekhopha.* 2 Inqola yokuqala ibidonswa ngamabhiza abomvu, eyesibili idonswa ngamabhiza amnyama.+ 3 Eyesithathu yona ibidonswa ngamabhiza amhlophe, eyesine idonswa ngamabhiza alamatshathatshatha lalemibalabala.+
4 Ngibuze ingilosi ebikhuluma lami ngathi: “Zimelani inqola lezi nkosi yami?”
5 Ingilosi yasingiphendula yathi: “Lezi yizidalwa ezine+ zasezulwini ezisuka lapho ebezimi khona phambi kweNkosi yomhlaba wonke.+ 6 Inqola elamabhiza amnyama iya elizweni elisenyakatho,+ elamhlophe iya elizweni elisentshonalanga,* elamabhiza alamatshathatshatha yona iya elizweni eliseningizimu. 7 Amabhiza alamabalabala azimisele ukuwubhoda wonke umhlaba.” Ingilosi yasisithi kuwo: “Phumani libhodabhode kuwo wonke umhlaba.” Ngakho aqalisa ukuwubhoda wonke umhlaba.
8 Ingilosi yasiphakamisa ilizwi yathi kimi: “Khangela, amabhiza aya elizweni elisenyakatho asebangele ukuthi umoya kaJehova uhlale elizweni lasenyakatho.”
9 Ilizwi likaJehova liphinde lafika kimi lathi: 10 “Hamba kuHelidayi loThobhija loJedaya ufike uthathe lokho ababuye lakho bevela kwabathunjiweyo. Ngalelolanga kumele uye endlini kaJosiya indodana kaZefaniya, uhambe lalaba abavela eBhabhiloni. 11 Kumele uthathe isiliva legolide wenze umqhele uwufake ekhanda likaJoshuwa+ indodana kaJehozadakhi umphristi omkhulu, 12 uthi kuye:
“‘Nanku okutshiwo nguJehova wamabutho: “Nansi indoda okuthiwa nguHlumela.+ Izahluma endaweni yayo njalo izakwakhela uJehova ithempeli.+ 13 Yiyo ezakwakha ithempeli likaJehova njalo izathola udumo. Izahlala esihlalweni sayo sobukhosi ibuse futhi izakuba ngumphristi isesihlalweni sayo sobukhosi.+ Izaphatha izikhundla lezi ezimbili ngendlela ezakwenza kube lokuthula.* 14 Umqhele kumele ufakwe ethempelini likaJehova ukuze kukhunjulwe uHelemu, loThobhija, loJedaya,+ loHeni indodana kaZefaniya. 15 Labo abakhatshana bazabuya bezoncedisa ukwakha ithempeli likaJehova.” Lizakwazi ukuthi uJehova wamabutho ungithumile njalo izinto lezi zizakwenzakala nxa lingalilalela ilizwi likaJehova uNkulunkulu wenu.’”
7 Ngomnyaka wesine wokubusa kweNkosi uDariyu, ilizwi likaJehova lafika kuZakhariya+ ngelanga lesine, ngenyanga yesi-9 okuthiwa nguKhisilevu.* 2 Abantu baseBhetheli bathuma uSharezeri loRegemi-meleki labantu bakhe ukuthi bahambe bayencenga uJehova ukuthi abe lomusa kubo, 3 besithi kubaphristi bendlu kaJehova* wamabutho lakubaphrofethi: “Silile* yini ngenyanga yesihlanu+ futhi sizile ukudla njengoba besisenza okweminyaka yonke le?”
4 Ilizwi likaJehova wamabutho laphinda lafika kimi lathi: 5 “Khuluma labantu bonke abaselizweni kanye labaphristi uthi, ‘Ngesikhathi lizila ukudla futhi lilila ngenyanga yesihlanu leyesikhombisa+ okweminyaka engu-70,+ lalikwenzela mina yini? 6 Lalapho lisidla njalo linatha lalingakwenzeli ukuzithokozisa yini? 7 Akumelanga liwalalele yini amazwi kaJehova awakhuluma esebenzisa abaphrofethi bakhe bakudala,+ ngesikhathi kuseselokuthula njalo kusahlala abantu eJerusalema lasemadolobheni aseduze kwayo, langesikhathi kuseselabantu eNegebhi leShefela?’”
8 Ilizwi likaJehova laphinda lafika kuZakhariya lathi: 9 “Nanku okutshiwo nguJehova wamabutho, ‘Yahlulelani ngokulunga,+ lithandane*+ futhi liphathane ngesihawu. 10 Lingaqilibezeli umfelokazi lentandane*+ lomuntu wesinye isizwe+ kanye lomyanga,+ njalo lingabumbelani amacebo amabi ezinhliziyweni zenu.’+ 11 Kodwa abazange balalele,+ baba yiziqholo*+ bavala izindlebe zabo ukuze bangezwa.+ 12 Benza inhliziyo zabo zaba lukhuni njengedayimana.+ Abazange bawulandele umthetho kaJehova kanye lamazwi akhe awatshela abaphrofethi bakhe bakudala+ esebenzisa umoya wakhe. Ngakho uJehova wamabutho wabathukuthelela kakhulu.”+
13 “UJehova wamabutho uthi, ‘Abazange balalele ngesikhathi ngikhuluma labo.+ Yikho lami ngingazange ngibalalele sebecela usizo.+ 14 Ngabahlasela ngomoya wesiphepho basabalala phakathi kwezizwe ababengazazi,+ ilizwe lasala lilunxiwa, kungela odabula phakathi kwalo+ ngoba benza ilizwe elihle laba yinto eyesabekayo.’”
8 llizwi likaJehova wamabutho laphinda lafika kimi lathi: 2 “Nanku okutshiwo nguJehova wamabutho, ‘Ngizayitshisekela kakhulu iZiyoni+ ngiyivikele ngentukuthelo enkulu.’”
3 “Nanku okutshiwo nguJehova, ‘Ngizabuyela eZiyoni+ ngiyehlala eJerusalema.+ IJerusalema izabizwa ngokuthi lidolobho leqiniso*+ lentaba kaJehova wamabutho, intaba engcwele.’”+
4 “Nanku okutshiwo nguJehova wamabutho, ‘Kuzaphinda kuhlale amaxhegu lezalukazi emagcekeni edolobho leJerusalema, ngamunye wabo ephethe udondolo lwakhe ngenxa yokuluphala.*+ 5 Abafana lamankazana bazagcwala emagcekeni edolobho bedlala.’”+
6 “Nanku okutshiwo nguJehova wamabutho, ‘Lanxa abantu bami abaseleyo bengabona angani lokhu ngeke kwenzakale, kambe mina ngingehluleka ukukwenza yini?’ kutsho uJehova wamabutho.”
7 “Nanku okutshiwo nguJehova wamabutho, ‘Ngizasindisa abantu bami emazweni asempumalanga lasentshonalanga.*+ 8 Ngizabaletha eJerusalema bahlale khona+ njalo bazakuba ngabantu bami, mina ngibe nguNkulunkulu wabo+ ngeqiniso* langokulunga.’”
9 “Nanku okutshiwo nguJehova wamabutho, ‘Qinisani izandla zenu*+ lina elizwa amazwi la eliwatshelwa ngabaphrofethi.+ Amazwi la yiwo akhulunywa ngelanga kubekwa isisekelo sendlu kaJehova wamabutho ukuze ithempeli lakhiwe kutsha. 10 Isikhathi leso singakafiki abantu babesebenza bengaholi futhi izifuyo zazingatholi umvuzo womsebenzi wazo.+ Abantu babengasazenzeli imisebenzi yabo bekhululekile ngenxa yezitha ngoba ngangenze abantu bonke bavukelana.’
11 “‘Kodwa khathesi abantu bami abaseleyo angisoze ngibaphathe ngendlela engangibaphatha ngayo kudala,’+ kutsho uJehova wamabutho, 12 ‘ngoba inhlanyelo yokuthula izahlanyelwa futhi isihlahla samagilebisi sizathela, lomhlabathi ukhiphe amabele.+ Amazulu lawo azakwehlisa amazolo njalo ngizakwenza ukuthi konke lokhu kube lilifa lalabo abaseleyo.+ 13 Lanxa izizwe bezilithuka+ lina bantu bakoJuda labako-Israyeli, ngizalisindisa futhi lizakuba yisibusiso.+ Lingesabi!+ Qinisani izandla zenu.’*+
14 “Nanku okutshiwo nguJehova wamabutho, ‘“Njengoba nje ngazimisela ukulitshabalalisa futhi ngangazisoli+ ngalokhu ngoba okhokho benu bangithukuthelisa,” kutsho uJehova wamabutho, 15 “lakhathesi ngizimisele ukuyenzela okuhle iJerusalema lendlu yakoJuda.+ Lingesabi!”’+
16 “‘Nanzi izinto okumele lizenze: Khulumani iqiniso komunye lomunye+ njalo lahlulele ngeqiniso langendlela eletha ukuthula nxa lisemagedini edolobho lenu.+ 17 Lingabumbelani amacebo amabi enhliziyweni zenu+ njalo lingenzi izifungo zamanga+ ngoba zonke izinto lezi ngiyazizonda,’+ kutsho uJehova.”
18 Ilizwi likaJehova wamabutho laphinda lafika kimi lathi: 19 “Nanku okutshiwo nguJehova wamabutho, ‘Ukuzila kwenyanga yesine,+ lokuzila kwenyanga yesihlanu,+ lokuzila kwenyanga yesikhombisa+ lokwenyanga yetshumi+ kuzakuba yizikhathi zokujabula kakhulu endlini yakoJuda, kube yimikhosi yokuthokoza.+ Yikho-ke thandani iqiniso lokuthula.’
20 “Nanku okutshiwo nguJehova wamabutho, ‘Sizafika sibili isikhathi lapho izizwe ezitshiyeneyo labantu abavela emadolobheni amanengi abazakuza endaweni le. 21 Abantu belinye idolobho bazakuya kwabelinye idolobho bathi: “Asambeni khathesi siyencenga uJehova ukuthi abe lomusa kithi, simdinge uJehova wamabutho. Lathi sizahamba lani.”+ 22 Abantu abanengi lezizwe ezilamandla bazakuza kuJehova wamabutho eJerusalema+ bezoncenga uJehova ukuthi abe lomusa kubo.’
23 “Nanku okutshiwo nguJehova wamabutho, ‘Ngalezonsuku amadoda alitshumi avela kuzo zonke izizwe lezindimi+ azabamba umphetho wejazi lendoda engumJuda awugagadlele, athi: “Sifuna ukuhamba lani+ ngoba sizwile ukuthi uNkulunkulu ulani.”’”+
9 Nansi isimemezelo esivela kuNkulunkulu:
“Ilizwi likaJehova mayelana lokwahlulelwa kweHadirakhi.
3 IThire yazakhela umduli wokuzivikela,*
Yabuthelela isiliva saba sinengi angathi luthuli,
Legolide kwangathi yinhlabathi esendleleni.+
4 UJehova uzayithathela impahla yayo,
Abhubhise ibutho layo elwandle.+
Izatshabalaliswa ngomlilo.+
5 I-Ashikheloni izakubona lokhu yesabe,
LeGaza izathuthumela izwe ubuhlungu,
Kube yiso leso lase-Ekhroni ngoba ithemba layo selitshabalele.
IGaza yona izasala ingelankosi,
Le-Ashikheloni isale ingelamuntu.+
6 I-Ashidodi izahlalwa ngabantu bezinye izizwe,
Ngizakuqeda ukuzigqaja komFilisti.+
7 Ngizakhipha izinto ezigcwele igazi emlonyeni wakhe,
Ngikhiphe lezinto ezenyanyekayo emazinyweni akhe.
Abaseleyo bakhe bazakuba ngabakaNkulunkulu wethu,
Njalo uzakuba njengenduna koJuda,+
Abantu be-Ekhroni babe njengamaJebusi.+
8 Ngizamisa itende ngilinde indlu yami+
Ukuze kungabi khona odlulayo lophendukayo.
9 Thokoza kakhulu ndodakazi yeZiyoni.
Memeza ngentokozo ndodakazi yeJerusalema.
Khangela! Inkosi yakho iza kuwe.+
Ilungile njalo iletha insindiso.*
10 Ngizasusa inqola yempi ko-Efrayimi,
Ngikhiphe ibhiza eJerusalema.
Idandili* lempi lizathathwa.
Inkosi yakho izamemezela ukuthula ezizweni.+
11 Kodwa ngizakhipha izibotshwa zakho* emgodini ongelamanzi,+
Ngenxa yesivumelwano segazi esiphakathi kwami lawe.
12 Buyelani enqabeni lina zibotshwa ezilethemba.+
Lamuhla ngithi kuwe,
‘Ngizakubuyisela isabelo sakho sesiphindwe kabili.+
13 Ngizagobisa uJuda abe lidandili lami,
Ngifake u-Efrayimi kulo abe ngumtshoko.
Ngizavusa amadodana akho Ziyoni
Ukuze alwe lamadodana eGrisi,
Ngikwenze ube yinkemba yeqhawe.’
14 Kuzabonakala ukuthi uJehova ulabantu bakhe,
Umtshoko wakhe uzaphuma njengombane.
INkosi Enkulu uJehova izatshaya uphondo,+
Ihlasele izitha zayo njengesiphepho esivela eningizimu.
15 UJehova wamabutho uzabavikela,
Bazanqoba bachoboze amatshe ezavutha.+
Bazathokoza bamemeze angathi banathe iwayini,
Bagcwale intokozo njengezitsha zethempeli ezigcwele igazi,
Lanjengamakhona e-alithare acwile egazini.+
16 UJehova uNkulunkulu wabo uzabasindisa ngalolosuku
Njengomelusi esindisa izimvu zakhe,+
Ngoba bazakhazimula emhlabathini wakhe njengamatshe omqhele aligugu.+
17 Ubuhle bakhe buyamangalisa,+
Kuyamangalisa ukubukeka kwakhe!
Ukudla kuzakwenza amajaha aqine saka,
Lewayini elitsha lizakwenza izintombi zibe ledlabuzane.”+
10 “Celani kuJehova izulu lokucina.
2 Onkulunkulu bezimuli zabo bayakhohlisa,*
Izangoma zabo zibona imibono yamanga,
Zikhuluma ngamaphupho angelancedo,
Lenduduzo yazo ayincedi ngalutho.
Yikho abantu bezahlanhlatha njengezimvu,
Bahlupheke ngenxa yokuthi abalamelusi.
3 Ngibathukuthelele kakhulu abelusi.
Ngizababeka icala abakhokheli abalesihluku
Ngoba uJehova wamabutho usewukhumbulile umhlambi wakhe,+ indlu yakoJuda.
Usewenze waba lodumo njengebhiza lakhe nxa lisempini.
4 Induna ivela kuye,
Umsekeli wombusi* uphuma kuye,
Idandili* lempi livela kuye,
Bonke abakhokheli* baphuma kuye.
5 Bazakuba njengamaqhawe asempini,
Anyathenyathela udaka olusemgwaqweni.
6 Ngizakwenza indlu kaJuda ibe ngcono kulezinye,
Ngisindise indlu kaJosefa.+
Ngizababuyisela elizweni labo
Ngoba ngizakuba lesihawu kubo,+
Kube angathi angizange ngibalahle,+
Ngoba nginguJehova uNkulunkulu wabo njalo ngizabaphendula.
7 Abako-Efrayimi bazakuba njengeqhawe elilamandla,
Inhliziyo zabo zizathokoza angathi banathe iwayini.+
Abantwababo bazakubona lokhu bajabule,
Inhliziyo zabo zithokoziswe nguJehova.+
9 Lanxa ngibahaza njengenhlanyelo phakathi kwezizwe,
Bazangikhumbula besezindaweni ezikhatshana,
Bazavuselelwa baphenduke lamadodana abo.
10 Ngizabasusa elizweni leGibhithe,
Ngibakhiphe lase- Asiriya.+
11 Ngizakwehlisela uhlupho phezu kolwandle ngidabule phakathi kwalo,
Ngitshaye amagagasi olwandle.+
11 “Vula iminyango yakho we Lebhanoni,
Ukuze umlilo ungene utshise zonke izihlahla zakho zomsedari.
2 Lila wena sihlahla somjunipha ngoba umsedari uwile.
Izihlahla ebezibatshazwa sezitshabalele!
Lilani lani zihlahla zom-okhi eziseBhashani
Ngoba igusu ebeliminyene seliligceke!
3 Lalela! Abelusi baqhinqa isililo
Ngoba udumo lwabo selutshabalele.
Lalela! Izilwane ezilamandla ziyabhonga
Ngoba igusu laseJodani ebeliminyene selilobile.
4 “Nanku okutshiwo nguJehova uNkulunkulu wami, ‘Yelusa umhlambi wezimvu ezigcinelwe ukuhlatshwa.+ 5 Abazithengileyo bayazihlaba+ kodwa kabetheswa cala, labazithengisayo+ bathi, “Kadunyiswe uJehova ngoba sesizanotha.” Abelusi bazo kabazizweli ngitsho.’+
6 “‘Angisoze ngibazwele abantu abahlala elizweni leli,’ kutsho uJehova. ‘Ngakho ngizakwenza ukuthi umuntu ahlukuluzwe ngumakhelwane wakhe layinkosi yakhe. Bazalitshabalalisa ilizwe futhi angisoze ngibakhulule esandleni sabo.’”
7 Ngaqalisa ukwelusa umhlambi wezimvu ezazigcinelwe ukuhlatshwa,+ ngisenzela lina zimvu zomhlambi ohlukuluzwayo. Ngakho ngathatha imiqwayi emibili, omunye ngawubiza ngokuthi nguMusa omunye ngathi nguManyano,+ ngasengiqalisa ukwelusa izimvu. 8 Ngaxotsha abelusi abathathu ngenyanga eyodwa ngoba bangicaphula kakhulu njalo labo basebengizonda. 9 Ngathi: “Angisoze ngiqhubeke ngilelusa. Ofayo kafe lobhubhayo kabhubhe. Abaseleyo kabadlithizane baqedane.” 10 Ngakho ngathatha umqwayi wami okuthiwa nguMusa+ ngawuquma, ngisephula isivumelwano engangisenze labantu bami. 11 Ngasephula ngalelolanga futhi izimvu zomhlambi wami ezihlukuluzwayo ezazingibukele zakwazi ukuthi lelo kwakulilizwi likaJehova.
12 Ngemva kwalokho ngathi kubo: “Nginikani umholo wami nxa likubona kuqondile lokho kodwa nxa libona kungafanelanga yekelani ukungibhadala.” Basebengiholisa* inhlamvu zesiliva ezingu-30.+
13 UJehova wathi kimi: “Phosela imali leyo lapho okugcinwa khona iminikelo, okuyimadlana okungatsho lutho abangibhadale ngakho.”+ Ngakho ngazithatha inhlamvu zesiliva ezingu-30 ngayaziphosela lapho okugcinwa khona iminikelo endlini kaJehova.+
14 Ngasengiquma umqwayi wami wesibili okuthiwa nguManyano,+ ngisephula ubuhlobo obuphakathi kukaJuda lo-Israyeli.+
15 UJehova wasesithi kimi: “Thatha izinto ezisetshenziswa ngumelusi ongelancedo+ 16 ngoba ngizabeka umelusi omutsha elizweni. Kasoze azinakekele izimvu ezifayo+ loba adinge amazinyane futhi kasoze elaphe lezo ezilimeleyo+ kumbe azinike ukudla lezo eziqinileyo. Kodwa uzadlithiza inyama yalezo ezinonileyo,+ adle lamangqina azo.+
17 Maye kumelusi wami ongelancedo+ odela izimvu!+
Uzagalelwa ngenkemba esandleni sokudla laselihlweni lesokudla.
Ingalo yakhe izatshwabhana,
Ilihlo lakhe lesokudla livaleke lingasaboni ngitsho.”
12 Nansi isimemezelo:
“Leli lilizwi likaJehova elimayelana lo-Israyeli,” kutsho uJehova,
Lowo owelula amazulu,+
Wabeka isisekelo somhlaba,+
Wanika lomuntu umoya wokuphila.
2 Uthi, “Ngenza iJerusalema ibe yinkomitsho ezakwenza bonke abantu abakhelane layo badiyazele. IJerusalema kanye loJuda kuzavinjezelwa.+ 3 Ngalelolanga ngizakwenza iJerusalema ibe lilitshe elisindayo ebantwini bonke. Bazalimala kakhulu bonke abaliphakamisayo+ njalo izizwe zonke zomhlaba zizabuthana ukuze ziyihlasele.+ 4 Ngalolosuku ngizakwenza ibhiza ngalinye liphaphatheke lomgadi walo ahlanye,” kutsho uJehova. “Ngizahlala ngiyikhangele indlu kaJuda kodwa ngizakwenza wonke amabhiza ezizwe abe zimpumputhe. 5 Izinduna zakoJuda zizakuthi ezinhliziyweni zazo, ‘Izakhamizi zeJerusalema ziyasiqinisa ngoba uJehova wamabutho unguNkulunkulu wazo.’+ 6 Ngalelolanga ngizakwenza izinduna zakoJuda zibe njengembawula yomlilo ephakathi kwezigodo futhi zizakuba njengesibane esibhebhayo phakathi kwezithungo zamabele.+ Zizatshabalalisa bonke abantu abakhelane labo, abasesandleni sokudla lakwesenxele+ njalo abantu beJerusalema bazaphinda bahlale endaweni yabo.*+
7 “UJehova uzasindisa amatende akoJuda kuqala ukuze ubuhle bendlu kaDavida lobezakhamizi zeJerusalema bungedluli obakoJuda. 8 Ngalolosuku uJehova uzazivikela izakhamizi zeJerusalema.+ Loba ngubani okhubekayo* phakathi kwabo ngalolosuku uzakuba njengoDavida njalo indlu kaDavida izakuba njengoNkulunkulu, ibe njengengilosi kaJehova ehamba phambi kwabo.+ 9 Ngalolosuku ngizazibhubhisa loba sekutheni zonke izizwe ezihlasela iJerusalema.+
10 “Ngizathululela umoya womusa lowokuncenga phezu kwendlu kaDavida laphezu kwezakhamizi zeJerusalema njalo bazamkhangela lowo abamgwazileyo,+ bamkhalele angani bakhalela indodana ezelwe yodwa. Bazamlilela kabuhlungu angani balilela indodana elizibulo. 11 Ngalolosuku isililo esiseJerusalema sizakuba sikhulu njengesililo esaba khona eHadadirimoni egcekeni leMegido.+ 12 Ilizwe lizalila, lemuli ngayinye ilile iyodwa. Abendlu kaDavida bazalila bodwa, labesifazana babo balile bodwa. Abendlu kaNathani+ labo bazalila bodwa, labesifazana babo balile bodwa. 13 Abendlu kaLevi+ bazalila bodwa, labesifazana babo balile bodwa. Abendlu kaShimeyi+ bazalila bodwa, labesifazana babo balile bodwa. 14 Zonke izimuli eziseleyo zizalila zizodwa, labesifazana bazo balile bodwa.
13 “Ngalolosuku kuzagejwa umthombo ukuze kuhlanjululwe izono lokungcola kwendlu kaDavida lezakhamizi zeJerusalema.+
2 “Ngalolosuku,” kutsho uJehova wamabutho, “ngizasusa zonke izithombe elizweni+ zingaphindi zikhunjulwe futhi. Ngizakhipha abaphrofethi+ lomoya wokungcola elizweni. 3 Nxa kungaba lomuntu ozaphinda aphrofethe, uyise lonina abamzalayo bazakuthi kuye, ‘Uzakufa ngenxa yokuthi ukhulume amanga usebenzisa ibizo likaJehova.’ Uyise lonina bazamgwaza ngenxa yokuthi uyaphrofetha.+
4 “Ngalolosuku umphrofethi ngamunye uzakuba lenhloni ngombono wakhe nxa ephrofetha futhi kasoze agqoke isembatho somphrofethi esenziwe ngoboya+ efuna ukuqila abantu. 5 Uzakuthi, ‘Angisuye mphrofethi mina, ngingumlimi. Ngathengwa ngenye indoda ngisesemncane.’ 6 Nxa omunye umuntu angambuza athi, ‘Manje amanxeba la asemzimbeni ngawani?’ Uzaphendula athi, ‘Ngalimala ngisendlini yabangane bami.’”*
7 “Vuka we nkemba uhlasele umelusi wami,+
Uhlasele lendoda engumngane wami,” kutsho uJehova wamabutho.
8 “Elizweni lonke,” kutsho uJehova,
“Kuzaqunywa ingxenye ezimbili zitshabalale,*
Ingxenye yesithathu isale kulo.
9 Ingxenye yesithathu ngizayifaka emlilweni.
Ngizabacenga angathi ngicenga isiliva,
Ngibahlole angathi ngihlola igolide.+
Bazabiza ibizo lami,
Mina ngibaphendule.
Ngizakuthi, ‘Bangabantu bami,’+
Bona bathi, ‘UJehova nguNkulunkulu wethu.’”
14 “Khangela! Usuku lukaJehova luyeza, usuku lapho impahla ethunjwe kuwe* ezakwabiwa phakathi kwakho. 2 Ngizabuthanisa zonke izizwe ukuze zilwe leJerusalema. Idolobho lizathunjwa, izindlu zigqekezwe, labesifazana babanjwe iganyavu. Ingxenye yabantu abasedolobheni izathunjwa kodwa abaseleyo abasoze basuswe edolobheni lelo.
3 “UJehova uzasuka ayekulwa lezizwe lezo+ njengamhla esilwa ngosuku lwempi.+ 4 Ngalolosuku inyawo zakhe zizakuma phezu kwentaba yama-oliva+ esempumalanga kweJerusalema. Intaba yama-oliva izakwehlukaniswa ibe zingxenye ezimbili kusukela empumalanga kusiya entshonalanga,* kube lesigodi esikhulu phakathi. Enye ingxenye yentaba izakuya enyakatho enye iye eningizimu. 5 Lizabalekela esigodini sezintaba zami ngoba isigodi sezintaba zami sizafika khonale e-Azeli. Lizabaleka njengalokho elakwenza libalekela ukuzamazama komhlaba ngensuku zika-Uziya inkosi yakoJuda.+ UJehova uNkulunkulu wami uzakuza labo bonke abangcwele bakhe.+
6 “Ngalolosuku akusoze kube lokukhanya okukhazimulayo,+ izinto zonke zizabanjwa ngumqando zome. 7 Usuku lolo luzakwaziwa ngokuthi lusuku lukaJehova.+ Akusoze kube lemini loba ubusuku, lakusihlwa kuzabe kukhanya. 8 Ngalolosuku amanzi okuphila+ azageleza ephuma eJerusalema,+ amanye azakuya* elwandle olusempumalanga*+ amanye aye* elwandle olusentshonalanga.*+ Lokhu kuzakwenzakala ngesikhathi sehlobo lasebusika. 9 UJehova uzakuba yiNkosi yomhlaba wonke.+ Ngalolosuku kuzakhonzwa uJehova kuphela+ njalo ibizo lakhe yilo lodwa elizadunyiswa.+
10 “IIizwe lonke lizakuba njenge-Arabha+ kusukela eGebha+ kusiya eRimoni+ eningizimu yeJerusalema njalo iJerusalema izaphakanyiswa ibuyiselwe endaweni yayo.+ Abantu bazahlala kuyo kusukela egedini lakoBhenjamini+ kuze kuyefika lapho okulegedi lokuqala, kuqhubeke kuyefika lasegedini elisekhoneni. Bazahlala kusukela lasemphotshongweni kaHananeli+ kuze kuyefika ezikhamelweni zewayini* lenkosi. 11 Abantu bazahlala eJerusalema njalo akusoze kuphinde kube lesiqalekiso sokubhujiswa+ edolobheni leli. Bazahlala kulo bevikelekile.+
12 “Nansi isifo uJehova azatshaya ngaso bonke abalwa leJerusalema:+ Inyama yabo izabola bemi ngenyawo zabo, amehlo abo abolele ezikhoxweni zawo, lolimi lwabo lubolele emilonyeni yabo.
13 “Ngalolosuku uJehova uzakwenza bonke baphithane amakhanda. Ngamunye wabo uzabamba isandla somngane wakhe njalo isandla sakhe sizamelana lesandla somngane wakhe.*+ 14 UJuda laye uzakulwa empini ezakuba seJerusalema. Inotho yezizwe zonke eziseduze izabuthwa, kube lenqwaba yegolide lesiliva kanye lezigqoko ezinengi.+
15 “Kuzakuba lesifo esinjengaleso esizakwehlela amabhiza, lezimbongolo,* lamakamela, labobabhemi lazo zonke izifuyo ezilapho.
16 “Bonke abaseleyo ezizweni zonke ezihlasela iJerusalema bazahamba minyaka yonke+ besiyakhothamela* iNkosi uJehova wamabutho+ njalo besiyathakazelela uMkhosi Wezihonqo.+ 17 Kodwa nxa bekhona abesinye isizwe abangasoze baye eJerusalema ukuyakhothamela iNkosi uJehova wamabutho, izulu alisoze line endaweni abahlala kuyo.+ 18 Labantu baseGibhithe abasoze balithole izulu nxa bengabuyi eJerusalema. Bazakwehlelwa yisifo uJehova asehlisela izizwe ezingabuyiyo ukuzothakazelela uMkhosi Wezihonqo. 19 Lesi yiso isijeziso esizatholwa yiGibhithe lazo zonke izizwe ezingabuyiyo ukuzothakazelela uMkhosi Wezihonqo.
20 “Ngalolosuku amazwi athi ‘Ubungcwele ngobukaJehova!’+ azabhalwa phezu kwamabhera amabhiza. Imbiza zokupheka+ ezisendlini kaJehova zizakuba njengemiganu+ ephambi kwe-alithare. 21 Imbiza zonke eziseJerusalema lezikoJuda zizakuba ngcwele zibe ngezikaJehova wamabutho. Bonke abazonikela imihlatshelo bazasebenzisa ezinye zazo ukuxhwathisa inyama yabo. Ngalolosuku akusoze kube lomKhenani* endlini kaJehova wamabutho.”+
Ibizo leli litsho ukuthi, “UJehova ukhumbulile.”
Khangela iSengezo ku-B15.
Kumbe, “uzalinda.”
Ezinye inguqulo zithi, “Ilitshe lelo likhangelwe ngamehlo.”
Kumbe, “lwesiqalo esincane.”
Intambo le yayisiba lelitshe elincane loba insimbi kumbe umdaka ekucineni kwayo futhi yayisetshenziswa ukuhlola ukuthi ulutho luqondile yini.
Ezinye inguqulo zithi, “Amehlo la ayisikhombisa.”
Lapha kutshiwo ingatsha zesihlahla ezisindwa yizithelo.
NgesiHebheru, “ezingalo ezingu-20 ubude lezingu-10 ububanzi.” Khangela iSengezo ku-B14.
NgesiHebheru, “yi-efa.” I-efa yayilingana lamalitha angu-22. Khangela iSengezo ku-B14.
Lapha kutshiwo ilizwe leBhabhiloni.
Kumbe, “ngethusi.”
Kumbe, “ngaphetsheya kolwandle.”
Kumbe, “Kuzakuba lokuvumelana phakathi kwezikhundla lezi ezimbili.”
Khangela iSengezo ku-B15.
Kumbe, “bethempeli likaJehova.”
NgesiHebheru, “Ngilile.”
Kumbe, “libe lothando oluqotho.”
NgesiHebheru, “lomntwana ongelayise.”
Kumbe, “bafulathela.”
Kumbe, “lokuthembeka.”
NgesiHebheru, “yobunengi bezinsuku.”
Kumbe, “elizweni elisempumalanga lelizweni elisentshonalanga.”
Kumbe, “ngokuthembeka.”
Kumbe, “Wobani lesibindi.”
Kumbe, “Wobani lesibindi.”
Kumbe, “inqaba.”
Lapha kumele ukuthi kutshiwo ukuhlupheka kwabantu bakhe.
Kumbe, “njalo iyanqoba.”
Khangela iNgcazelo Yamabala.
Lapha kutshiwo umfula uYufrathe.
Lapha kutshiwo iZiyoni loba iJerusalema.
Kumbe, “Amatherafimu abo ayakhohlisa.”
NgesiHebheru, “Isikhonkwane,” okutsho umuntu osekelayo.
Khangela iNgcazelo Yamabala.
Kumbe, “abaphathi bomsebenzi.”
NgesiHebheru, “Basebengilinganisela.”
Kumbe, “endaweni yabo efaneleyo.”
Kumbe, “ongelamandla.”
Kumbe, “yabantu abangithandayo.”
Kumbe, “zife.”
Lapha kutshiwo idolobho okukhulunywa ngalo kuvesi 2.
NgesiHebheru, “elwandle.”
Kumbe, “enye ingxenye izakuya.”
Lapha kutshiwo uLwandle Lwesawudo.
Kumbe, “enye ingxenye iye.”
Lapha kutshiwo uLwandle lweMedithera.
Lapha kutshiwo indawo okuvoxelwa kuyo amagilebisi.
Kumbe “njalo bazahlaselana.”
Imbongolo yinyamazana ezalwa libhiza lobabhemi.
Kumbe, “besiyakhonza.”
Ezinye inguqulo zithi, “lomthengi.”