IVANGELI ELABHALWA NGUJOHANE

1 Ekuqaleni kwakuloLizwi,+ uLizwi wayeloNkulunkulu+ njalo uLizwi wayengunkulunkulu.+ 2 WayeloNkulunkulu ekuqaleni. 3 Zonke izinto zaba khona ngaye+ futhi akukho ngitsho lokukodwa okukhona okungazange kwenziwe ngaye.

4 Ukuphila kwaba khona ngaye njalo ukuphila kwakuyikukhanya kwabantu.+ 5 Ukukhanya kuyakhanyisa emnyameni+ kodwa ubumnyama behlulekile ukukucitsha ukukhanya.

6 Kulendoda eyathunywa ukuthi ibe ngummeli kaNkulunkulu. Ibizo layo kwakunguJohane+ 7 njalo yayilande ukuzofakaza. Yayizofakaza ngokukhanya+ ukuze incede yonke imihlobo yabantu ukuthi ikholwe. 8 Yayingayisikho kukhanya lokho+ kodwa yayizofakaza ngakho.

9 Ukukhanya kweqiniso okukhanyisela yonke imihlobo yabantu kwasekuzafika emhlabeni.+ 10 ULizwi wayesemhlabeni+ njalo umhlaba waba khona ngaye.+ Kodwa umhlaba awuzange umazi. 11 Wafika endaweni yakibo kodwa abantu bakibo abazange bamamukele. 12 Bonke abamamukelayo wabapha ilungelo lokuba ngabantwana bakaNkulunkulu+ ngoba babetshengise ukuthi balokholo ebizweni lakhe.+ 13 Abazalwanga ngendlela yemvelo kumbe ngokuzikhethela komuntu loba ngentando yomuntu, kodwa bazalwa ngentando kaNkulunkulu.+

14 ULizwi waba ngumuntu+ wahlala lathi, sayibona inkazimulo yakhe enjengaleyo ubaba ayipha indodana yakhe ezelwe yodwa.+ Wayegcwele umusa kaNkulunkulu* kanye leqiniso. 15 (UJohane wafakaza ngaye ememeza esithi: “Lo nguye engangimutsho ngisithi, ‘Lowo oza ngemva kwami usedlule waya phambi kwami ngoba yena wayekhona mina ngingakabi khona.’”)+ 16 Sonke samukela umusa omkhulu phezu komusa omkhulu ngoba yena wayegcwele umusa omkhulu. 17 Umusa omkhulu+ leqiniso kwaba khona ngoJesu Khristu+ njengoba nje loMthetho walethwa ngoMosi.+ 18 Kakho osewake wambona uNkulunkulu+ kodwa unkulunkulu ozelwe yedwa+ oseceleni kukaYise*+ nguye osemchasisile.+

19 UJohane wafakaza kumaJuda ayethume abaphristi lamaLevi besuka eJerusalema ukuthi bayembuza bathi: “Wena ungubani?”+ 20 Kazange ale ukuphendula kodwa wabatshela iqiniso wathi: “Angisuye Khristu mina.” 21 Basebembuza bathi: “Manje okuyikho yikuphi? Ungu-Elija yini?”+ Yena wathi: “Hatshi.” Basebesithi: “Ungumphrofethi okwathiwa uyeza yini?”+ Waphendula wathi: “Hatshi!” 22 Bathi kuye: “Manje ungubani? Sitshele ukuze siyebikela abasithumileyo. Wena uzithi ungubani?” 23 Yena wathi: “Ngililizwi lalowo omemeza esenkangala esithi, ‘Yenzani indlela kaJehova* iqonde,’+ njengoba umphrofethi u-Isaya watsho.”+ 24 Labo ababembuza babethunywe ngabaFarisi. 25 Bambuza bathi: “Manje ubhabhathizelani wena ungayisuye uKhristu kumbe u-Elija njalo ungasimphrofethi okwathiwa uyeza?” 26 UJohane wabaphendula wathi: “Mina ngibhabhathiza ngamanzi. Ukhona omi phakathi kwenu elingamaziyo, 27 lowo oza ngemva kwami njalo akungifanelanga ukuthukulula intambo zamanyathela akhe.”+ 28 Izinto lezi zenzakala eBhethani ngaphetsheya kukaJodani lapho uJohane ayebhabhathizela khona.+

29 Ngelanga elilandelayo wabona uJesu esiza kuye, wathi: “Khangelani, nansi iMvana+ kaNkulunkulu esusa isono+ somhlaba!+ 30 Lo nguye engangimutsho ngisithi: ‘Ngemva kwami kuza indoda esidlule yaya phambi kwami ngoba yona yayikhona mina ngingakabi khona.’+ 31 Lami nginje bengingamazi kodwa ngibuye ngazobhabhathiza ngamanzi ukuze abonakale kwabako-Israyeli.”+ 32 UJohane waphinda wafakaza wathi: “Ngibone umoya usehla njengejuba uvela ezulwini, wahlala phezu kwakhe.+ 33 Lami bengingamazi kodwa lowo ongithume ukuthi ngibhabhathize ngamanzi uthe kimi: ‘Loba ngubani ozabona umoya usehlela phezu kwakhe uhlale kuye,+ nguye obhabhathiza ngomoya ongcwele.’+ 34 Lakanye ngikubonile lokhu ngafakaza ukuthi lo nguye iNdodana kaNkulunkulu.”+

35 Ngelanga elilandelayo uJohane wayemi labafundi bakhe ababili. 36 Uthe ebona uJesu edlula wathi: “Khangelani, nansiya iMvana+ kaNkulunkulu!” 37 Abafundi laba ababili bathi bemuzwa esitsho njalo balandela uJesu. 38 UJesu wathalaza wababona bemlandela wasesithi: “Lifunani?” Bathi kuye: “Rabi uhlala ngaphi?” (Ukuthi Rabi kutsho ukuthi, “Mfundisi.”) 39 Wathi kubo: “Buyani lizobona.” Basebehamba bayabona lapho ayehlala khona, batshona laye lelolanga. Kwakungaba lihora letshumi* ngesikhathi ebabiza. 40 U-Andreya+ umfowabo kaSimoni Phetro wayengomunye wabafundi ababili abezwa okwakhulunywa nguJohane basebelandela uJesu. 41 Into yokuqala ayenzayo yikudinga umfowabo uSimoni wasesithi kuye: “Sesimtholile uMesiya”+ (okutsho ukuthi, “uKhristu”). 42 Wahamba laye kuJesu. UJesu wakhangela uSimoni wathi: “UnguSimoni+ indodana kaJohane. Uzabizwa ngokuthi unguKhefasi” (okutsho ukuthi, “Phetro”).+

43 Ngelanga elilandelayo uJesu wayefuna ukuya eGalile. Wabona uFiliphu+ wathi kuye: “Woba ngumlandeli wami.” 44 UFiliphu wayengoweBhethisayida, idolobho okwakuvela kulo u-Andreya loPhetro. 45 UFiliphu wathola uNathaniyeli+ wathi kuye: “Sesimtholile uJesu waseNazaretha, indodana kaJosefa,+ lowo uMosi abhala ngaye eMthethweni lalowo abaPhrofethi ababhala ngaye.” 46 Kodwa uNathaniyeli waphendula wathi: “Kambe kukhona okuhle okungaphuma eNazaretha?” UFiliphu wathi: “Buya uzozibonela.” 47 UJesu wabona uNathaniyeli esiza kuye wakhuluma ngaye wathi: “Khangelani, um-Israyeli uqobo ongelabuqili ngitsho.”+ 48 UNathaniyeli wasesithi: “Kanti ungazela ngaphi?” UJesu wamphendula wathi: “Ngikubone ungaphansi kwesihlahla somkhiwa uFiliphu engakakubizi.” 49 UNathaniyeli wasesithi: “Rabi uyiNdodana kaNkulunkulu, uyiNkosi yako-Israyeli.”+ 50 UJesu wathi: “Okwenza ukholwe yikuthi ngithe ngikubone ungaphansi kwesihlahla somkhiwa yini? Uzabona izinto ezinkulu kulalezi.” 51 Wasesithi: “Madoda ngiqinisile sibili ngithi kini, lizabona izulu livuleka, libone lezingilosi zikaNkulunkulu zikhwela zisehla zisiya eNdodaneni yomuntu.”+

2 Ngelanga lesithathu kwaba ledili lomtshado eKhana yeGalile njalo unina kaJesu laye wayekhona. 2 UJesu labafundi bakhe labo babenxusiwe emtshadweni lo.

3 Iwayini lathi selisiyaphela, unina kaJesu wathi kuye: “Abaselawayini.” 4 Kodwa uJesu wathi: “Mina lawe* silani lakho lokho? Isikhathi sami asikafiki.” 5 Unina wathi kulabo ababenika abantu ukudla: “Yenzani konke azalitshela khona.” 6 Khonapho kwakulembiza zamatshe eziyisithupha, njengoba imithetho yamaJuda yokuzihlambulula yayisithi kube njalo.+ Ngayinye yayingagcwala ngemigqomo* emibili loba emithathu. 7 UJesu wathi kubo: “Gcwalisani imbiza lezi ngamanzi.” Lakanye bazigcwalisa phamu. 8 Wasesithi kubo: “Khanini liyenika umphathi wedili.” Ngakho benza njalo. 9 Umphathi wedili wathi enambitha amanzi la ayesetshintshwe aba liwayini kazange akwazi ukuthi lelowayini lalivele ngaphi (lanxa izinceku ezazikhe amanzi zazikwazi). Ngakho wabiza umyeni 10 wasesithi kuye: “Wonke umuntu uqala akhiphe iwayini elimnandi, besekusithi nxa abantu sebedakiwe abanike elingamnandi. Wena ugcine elimnandi kwaze kwaba khathesi.” 11 Lesi kwakuyisimangaliso sikaJesu sokuqala futhi wasenza eseKhana eGalile. Waveza inkazimulo yakhe,+ abafundi bakhe baba lokholo kuye.

12 Ngemva kwalokho yena lonina labafowabo+ kanye labafundi bakhe behla baya eKhaphenawume,+ kodwa abazange bafike bahlale amalanga amanengi.

13 IPhasika+ lamaJuda lithe seliseduze, uJesu waya eJerusalema. 14 Wathola ethempelini kulababethengisa inkomo lezimvu kanye lamajuba.+ Labatshintsha imali babehlezi ezitulweni zabo. 15 Yikho wenza umchilo ngezintambo, wabadudula ethempelini bonke ababelezimvu lenkomo, wachitha imali yalabo ababetshintsha imali, wagenqula lamatafula abo.+ 16 Wasesithi kulabo ababethengisa amajuba: “Susani izinto lezi lapha! Yekelani ukwenza indlu kaBaba indlu yokuthengiselana!”*+ 17 Abafundi bakhe bakhumbula ukuthi kubhaliwe ukuthi: “Ngizayitshisekela indlu yakho.”+

18 AmaJuda athi ebona lokho athi kuye: “Yisibonakaliso bani ongasitshengisa sona+ njengoba usenza izinto lezi?” 19 UJesu wawaphendula wathi: “Dilizani ithempeli leli, mina ngizalivusa ngamalanga amathathu.”+ 20 AmaJuda asesithi: “Kwathatha iminyaka engu-46 ukuthi ithempeli leli lakhiwe. Pho wena ungalivusa ngamalanga amathathu?” 21 Kodwa ithempeli ayelitsho ngumzimba wakhe.+ 22 Wathi esevusiwe kwabafileyo abafundi bakhe bakhumbula ukuthi wayejayele ukutsho njalo,+ basebewukholwa umbhalo lalokho okwakukhulunywe nguJesu.

23 Wathi eseJerusalema ngomkhosi wePhasika, abanengi baba lokholo ebizweni lakhe sebebone izimangaliso ayezenza. 24 Kodwa uJesu kazange abathembe ngoba wayebazi bonke, 25 futhi wayengadingi muntu owayengamtshela ngabantu ngenxa yokuthi yena wayekwazi okusenhliziyweni yomuntu.+

3 Kwakulendoda engumFarisi okwakuthiwa nguNikhodemu+ eyayingumbusi wamaJuda. 2 Yavakatshela uJesu ebusuku+ yathi kuye: “Rabi,+ siyakwazi ukuthi ungumfundisi ovela kuNkulunkulu ngoba akulamuntu ongenza izimangaliso lezi+ ozenzayo engancediswa nguNkulunkulu.”+ 3 UJesu wathi kuyo: “Ngiqinisile sibili ngithi kuwe, ngaphandle kokuthi umuntu azalwe kutsha,+ ngeke awubone uMbuso kaNkulunkulu.”+ 4 UNikhodemu wasesithi: “Umuntu angazalwa njani yena esemdala? Kambe angabuyela esiswini sikanina abesezalwa kutsha?” 5 UJesu wamphendula wathi: “Ngiqinisile sibili ngithi kuwe, ngaphandle kokuthi umuntu azalwe ngamanzi+ langomoya,+ ngeke angene eMbusweni kaNkulunkulu. 6 Lokho okuzelwe ngenyama kuyinyama, lalokho okuzelwe ngomoya kungumoya. 7 Akungakumangalisi ukuthi ngithe kuwe: Lina bantu kumele lizalwe kutsha. 8 Umoya uvunguza usiya lapho ofuna khona. Liyawuzwa umsindo wawo kodwa alikwazi ukuthi usuka ngaphi usiya ngaphi. Kunjalo lakubo bonke asebezelwe ngomoya.”+

9 UNikhodemu wamphendula wathi: “Lokho kungenzakala njani?” 10 UJesu wasesithi: “Kanti awukwazi lokho wena ungumfundisi wako-Israyeli? 11 Ngiqinisile sibili ngithi kuwe, esikwaziyo siyakukhuluma lesikubonileyo siyakufakaza kodwa lina alibamukeli ubufakazi esilinika bona. 12 Nxa ngilitshele izinto zemhlabeni lasala lilokhu lingakholwa, lizakholwa njani sengilitshela ezezulwini? 13 Kakho osewake waya ezulwini,+ iNdodana yomuntu yiyo yodwa eyehla ivela ezulwini.+ 14 Njengoba nje uMosi waphanyeka inyoka enkangala,+ iNdodana yomuntu layo kumele iphanyekwe phezulu+ 15 ukuze wonke umuntu okholwa kuyo abe lokuphila okungapheliyo.+

16 “UNkulunkulu wawuthanda kakhulu umhlaba waze wanikela ngeNdodana yakhe ezelwe yodwa,+ ukuze wonke umuntu otshengisa ukuthi uyakholwa kuyo angabhujiswa kodwa abe lokuphila okungapheliyo.+ 17 UNkulunkulu kathumanga iNdodana yakhe emhlabeni ukuthi izokwahlulela umhlaba kodwa wayithuma ukuze umhlaba usindiswe ngayo.+ 18 Lowo okholwa kuyo kasoze ahlulelwe,+ kodwa ongelakholo kuyo wahlulelwe kudala ngenxa yokuthi kazange akholwe ebizweni leNdodana kaNkulunkulu ezelwe yodwa.+ 19 Ukukhanya kufikile sibili emhlabeni+ kodwa abantu bathande ubumnyama kulokukhanya ngoba imisebenzi yabo mibi. Yikho bezakwahlulelwa. 20 Lowo owenza izinto ezimbi uzonda ukukhanya njalo kezi ekukhanyeni ukuze imisebenzi yakhe ingavezwa egcekeni.* 21 Kodwa lowo owenza okuqondileyo uyabuya ekukhanyeni+ ukuze kubonakale ukuthi imisebenzi yakhe ivumelana lentando kaNkulunkulu.”

22 Ngemva kwalokho uJesu labafundi bakhe baya emaphandleni aseJudiya. Wahlala labo insuku ezinengi njalo wayebhabhathiza.+ 23 Kodwa uJohane laye wayebhabhathiza e-Ayenoni duze leSalimi ngoba kwakulamanzi amanengi kuleyondawo+ futhi abantu babelokhu besiza bezobhabhathizwa.+ 24 Ngalesosikhathi uJohane wayengakavalelwa ejele.+

25 Abafundi bakaJohane baphikisana lomunye umJuda ngendaba yokuhlanjululwa. 26 Ngemva kwalokho baya kuJohane bathi kuye: “Rabi, indoda leyana owawulayo ngaphetsheya kukaJodani futhi owawufakaza ngayo+ isibhabhathiza. Abantu bonke baya kuyo.” 27 UJohane wabaphendula wathi: “Umuntu ngeke athole ngitsho lento eyodwa ngaphandle nxa eyiphiwe ivela ezulwini. 28 Lani liyangifakazela ukuthi ngathi, ‘Angisuye Khristu+ kodwa ngathunywa ukuthi ngibuye kuqala kulaye.’+ 29 Lowo olomakoti nguye umyeni.+ Kodwa nxa umngane womyeni emi eduze komyeni emuzwa ekhuluma, uyathokoza kakhulu ngenxa yelizwi lakhe. Ngakho injabulo yami isiphelele. 30 Yena kumele aqhubeke esiba mkhulu kodwa mina ngiqhubeke ngincipha.”

31 Ovela phezulu+ uphezu kwabanye bonke. Ovela emhlabeni uvela emhlabeni njalo ukhuluma ngezinto zomhlaba. Ovela ezulwini uphezu kwabanye bonke.+ 32 Ufakaza izinto azibonileyo lazizwileyo+ kodwa kakho obamukelayo ubufakazi bakhe.+ 33 Loba ngubani osebamukele ubufakazi bakhe usezifakele uphawu lokuthi* uNkulunkulu uqinisile.+ 34 Lowo owathunywa nguNkulunkulu ukhuluma amazwi kaNkulunkulu+ ngoba uNkulunkulu kancitshani ngomoya wakhe. 35 UBaba uyayithanda iNdodana+ njalo usebeke izinto zonke esandleni sayo.+ 36 Okholwa eNdodaneni ulokuphila okungapheliyo,+ kodwa ongayilaleliyo iNdodana kasoze akubone ukuphila+ futhi ulaka lukaNkulunkulu luqhubeka luphezu kwakhe.+

4 INkosi yananzelela ukuthi abaFarisi basebezwile ukuthi yona yenza abafundi abanengi ukwedlula uJohane lokuthi iyababhabhathiza.+ 2 (Lanxa kunjalo kwakungayisuye uJesu owayebhabhathiza, kwakubhabhathiza abafundi bakhe.) 3 Ngakho uJesu waphinda waya eGalile esuka eJudiya 4 kodwa kwakumele adlule eSamariya. 5 Wafika edolobheni leSamariya okuthiwa yiSikhari. Laliseduze lensimu uJakhobe ayinika uJosefa indodana yakhe.+ 6 Yikho lapho okwakulomthombo kaJakhobe.+ UJesu wafika wahlala emthonjeni edinwe efile ngenxa yohambo. Kwakungaba lihora lesithupha.*

7 Kwasekufika owesifazana weSamariya ezokukha amanzi, uJesu wathi kuye: “Ngicela unginathise.” 8 (Ngalesosikhathi abafundi bakhe babeyethenga ukudla edolobheni.) 9 Owesifazana ongumSamariya waphendula wathi: “Mina ngingumSamariya. Manje ucelelani ukuthi ngikunathise wena ungumJuda?” (Phela amaJuda awadlelani lamaSamariya.)+ 10 UJesu wasesithi: “Aluba ubusazi isipho samahala esivela kuNkulunkulu+ lokuthi ngubani othi kuwe, ‘Ngicela unginathise,’ ubuzacela kuye amanzi futhi yena ubezakupha amanzi okuphila.”+ 11 Owesifazana wathi kuye: “Mnumzana, awula lankonxa yokukha amanzi, lomthombo lo uyatshona. Pho uzawathatha ngaphi lawomanzi okuphila? 12 Kambe wena umkhulu kulokhokho wethu uJakhobe owasipha umthombo lo ayenatha kuwo lamadodana akhe kanye lenkomo zakhe?” 13 UJesu wamphendula wathi: “Wonke umuntu onatha amanzi la uzaphinda awome. 14 Kodwa loba ngubani onatha amanzi engizamupha wona kasoze aphinde awome+ loba sekutheni. Amanzi engizamupha wona azakuba ngumthombo wamanzi ogobhozayo ngaphakathi kwakhe, amnike ukuphila okungapheliyo.”+ 15 Owesifazana wathi kuye: “Mnumzana, ngipha amanzi lawo ukuze ngingomi futhi ngingabi ngilokhu ngibuya lapha ngizokukha amanzi.”

16 UJesu wasesithi: “Hamba uyebiza umkakho ubuye laye lapha.” 17 Owesifazana wamphendula wathi: “Angilandoda mina.” UJesu wathi kuye: “Uqinisile nxa usithi awulandoda 18 ngoba usube lamadoda amahlanu futhi leyo ohlala layo khathesi ayisiyo yakho. Okukhulumileyo kuliqiniso.” 19 Owesifazana wasesithi: “Mnumzana, ngiyabona ukuthi ungumphrofethi.+ 20 Okhokho bethu babekhonzela entabeni le kodwa lina lithi iJerusalema yiyo indawo abantu okumele bakhonzele kuyo.”+ 21 UJesu wathi kuye: “Kukholwe engikutshoyo mama. Isikhathi siyeza lapho elingasoze likhonzele uBaba entabeni le kumbe eJerusalema. 22 Lina likhonza elingakwaziyo+ kodwa thina sikhonza esikwaziyo ngoba insindiso iqala kumaJuda.+ 23 Lanxa kunjalo, isikhathi siyeza futhi sesifikile lapho abantu abakhonza ngeqiniso abazakhonza khona uBaba ngomoya langeqiniso. UBaba udinga abanjalo ukuthi bamkhonze.+ 24 UNkulunkulu ungumoya+ futhi abamkhonzayo kumele bamkhonze ngomoya langeqiniso.”+ 25 Owesifazana wathi: “Ngiyakwazi ukuthi uMesiya uyeza, lowo obizwa ngokuthi nguKhristu. Loba nini lapho azafika khona uzasichasisela zonke izinto.” 26 UJesu wasesithi kuye: “Mina engikhuluma lawe nginguye.”+

27 Ngalesosikhathi abafundi bakhe bafika, bamangala bembona ekhuluma lowesifazana. Kodwa kakho owathi kuJesu: “Ufunani kuye?” kumbe, “Ukhulumelani lowesifazana lo?” 28 Owesifazana wasetshiya imbiza yakhe yamanzi waya edolobheni wafika wathi ebantwini: 29 “Buyani lizobona indoda engitshele konke engakwenzayo. Pho ayisuye yini uKhristu?” 30 Basuka edolobheni baya kuye.

31 Kusenzakala konke lokho abafundi babemncenga besithi: “Rabi, dlana.”+ 32 Kodwa yena wathi kubo: “Ngilokudla elingazi lutho ngakho.” 33 Abafundi bakhuluma bebodwa bathi: “Kanti kulomuntu oke wamphathela ukudla?” 34 UJesu wasesithi kubo: “Ukudla kwami yikwenza intando yalowo ongithumileyo+ lokuqeda umsebenzi wakhe.+ 35 Angithi lithi sekusele inyanga ezine ukuthi isikhathi sokuvuna sifike? Ngithi kini: Phakamisani amehlo likhangele amasimu, asemhlophe njalo aselindele ukuvunwa.+ Khathesi 36 ovunayo usesamukela umholo wakhe futhi usebuthelela izithelo zokuphila okungapheliyo ukuze ohlanyelayo lovunayo bathokoze bonke.+ 37 Isitsho esithi: Omunye ngumhlanyeli, omunye ngovunayo siliqiniso endabeni le. 38 Ngalithuma ukuthi liyevuna lokho elingakusebenzelanga. Kwasebenza abanye kodwa lani selisabelana labo lokho abakusebenzelayo.”

39 AmaSamariya amanengi akulelodolobho akholwa kuye ngenxa yelizwi lowesifazana owayefakaze wathi: “Ungitshele zonke izinto engazenzayo.”+ 40 AmaSamariya la afika kuye amcela ukuthi ahlale lawo. Wasehlala lawo okwamalanga amabili. 41 Ngakho kwaba labanye abanengi abakholwayo ngenxa yalokho uJesu ayekutsho, 42 njalo batshela owesifazana bathi: “Asisakholwa ngenxa nje yalokho ositshele khona, kodwa sesikholwa ngoba sesizizwele ngezethu. Siyakwazi ukuthi indoda le ingumsindisi womhlaba sibili.”+

43 Ngemva kwamalanga amabili uJesu wasuka lapho waya eGalile 44 lanxa wayetshilo ukuthi umphrofethi kahlonitshwa lapho adabuka khona.+ 45 Wathi efika eGalile abantu bamamukela ngoba babezibonile izinto zonke ayezenzile emkhosini owawuseJerusalema,+ njengoba labo babehambile kulowomkhosi.+

46 Waphinda wabuyela eKhana yaseGalile lapho ayetshintshe khona amanzi aba liwayini.+ Kwakulesiphathamandla sesikhosini esasigulelwa yindodana yaso eKhaphenawume. 47 Indoda le yathi isizwa ukuthi uJesu wayesefikile eGalile evela eJudiya, yamlanda yamcela ukuthi ahambe layo ayesilisa indodana yayo ngoba yayisigulela ukufa. 48 Kodwa uJesu wathi kuyo: “Lina bantu alisoze lafa lakholwa nxa lingabonanga izibonakaliso lezimanga.”+ 49 Isiphathamandla sesikhosini sathi: “Nkosi, asihambe umntanami engakafi.” 50 UJesu wasesithi: “Zihambele, indodana yakho isiphilile.”+ Indoda le yawakholwa amazwi kaJesu, yasihamba. 51 Ithe isesendleleni izinceku zayo zayihlangabeza zayitshela ukuthi indodana yayo isiphilile.* 52 Ngakho yabuza izinceku zayo ukuthi yayisile sikhathi bani. Zaphendula zathi: “Isile* izolo ngehora lesikhombisa.”* 53 Uyise wahle wananzelela ukuthi kwakuyilo kanye ihora uJesu ayethe kuye: “Indodana yakho isiphilile.”+ Yikho yena labo bonke ayehlala labo bakholwa. 54 Lesi kwakuyisimangaliso sesibili+ uJesu asenza eGalile evela eJudiya.

5 Ngemva kwalokho kwaba lomkhosi+ wamaJuda yikho uJesu waya eJerusalema. 2 Manje eJerusalema egedini lezimvu+ kulechibi elibizwa ngokuthi yi-Bhethizatha ngesiHebheru futhi kulamavurandi amahlanu asemaceleni echibi lelo. 3 Emavurandini lawo kwakulele abantu abanengi ababegula, leziphofu, labagogekileyo kanye labakhubazekileyo. 4 *—— 5 Enye indoda eyayilapho yayisileminyaka engu-38 igula. 6 UJesu wathi eyibona ilele khonapho njalo esazi ukuthi yayisilesikhathi eside igula wathi kuyo: “Uyafuna yini ukusila?”+ 7 Indoda eyayigula yaphendula yathi: “Mnumzana, angilamuntu ongangifaka echibini nxa amanzi enyakaziswa. Ngisathi kahle ngingene, kudala omunye engiqalele.” 8 UJesu wathi kuyo: “Sukuma udobhe uhlaka* lwakho uhambe!”+ 9 Indoda leyo yahle yasila, yadobha uhlaka* lwayo yahamba.

Ngalelolanga kwakuliSabatha. 10 Ngakho amaJuda athi endodeni eyayisilisiwe: “Lamuhla liSabatha, akukho emthethweni ukuthi uthwale uhlaka* lolo.”+ 11 Kodwa yona yabaphendula yathi: “Umuntu ongisilisileyo nguye othe kimi, ‘Dobha uhlaka* lwakho uhambe.’” 12 Basebeyibuza bathi: “Ngubani lowo okutshele ukuthi ulidobhe uhambe?” 13 Kodwa leyondoda eyayisilisiwe yayingakwazi ukuthi ngubani ngoba uJesu wayesethe nyelele wangena phakathi kwabantu ababelapho.

14 Ngemva kwalokho uJesu wayithola ethempelini wasesithi kuyo: “Khangela ususilile. Ungoni futhi ukuze ungehlelwa yibunzima obedlula obukubo.” 15 Indoda le yasisiyatshela amaJuda ukuthi yayisiliswe nguJesu. 16 Yikho amaJuda amkhahlameza uJesu ngoba wayesenza izinto lezi ngeSabatha. 17 Kodwa wathi kuwo: “UBaba ulokhu esebenza kuze kube khathesi, lami ngiqhubeka ngisebenza.”+ 18 Lapho-ke amaJuda azimisela kakhulu ukumbulala, esithi kephuli iSabatha kuphela kodwa uphinda abize uNkulunkulu ngokuthi nguYise,+ ezenza olingana loNkulunkulu.+

19 Ngakho uJesu wathi kuwo: “Ngiqinisile sibili ngithi kini, iNdodana ngeke yenze lento eyodwa ezicabangela yona, kodwa yenza kuphela lokho ebona uYise ekwenza.+ Loba yiziphi izinto uBaba azenzayo, leNdodana iyazenza 20 ngoba uBaba uyayithanda kakhulu iNdodana+ futhi uyitshengisa konke akwenzayo. Uzayitshengisa lemisebenzi emikhulu kulale ukuze lina limangale.+ 21 INdodana iphilisa loba ngubani efuna ukumphilisa,+ njengoba nje loBaba evusa abafileyo abenze baphile.+ 22 UBaba kahluleli muntu kodwa wonke umsebenzi wokwahlulela uwuphathise iNdodana,+ 23 ukuze bonke badumise iNdodana njengoba bedumisa uYise. Loba ngubani ongayidumisiyo iNdodana kamdumisi loYise oyithumileyo.+ 24 Ngiqinisile sibili ngithi kini, loba ngubani ozwa ilizwi lami amkholwe lowo ongithumileyo, ulokuphila okungapheliyo+ njalo kasoze ahlulelwe, kodwa usesukile ekufeni wadlulela ekuphileni.+

25 “Ngiqinisile sibili ngithi kini, isikhathi siyeza futhi sesifikile lapho abafileyo abazalizwa khona ilizwi leNdodana kaNkulunkulu, njalo ababelalela bazaphila. 26 Njengoba nje uBaba elokuphila* phakathi kwakhe,+ usevumele leNdodana ukuthi ibe lokuphila phakathi kwayo,+ 27 njalo useyiphe amandla okwahlulela+ ngoba iyiNdodana yomuntu.+ 28 Akungalimangalisi lokhu ngoba isikhathi siyeza lapho bonke abasemathuneni* abazalizwa khona ilizwi layo+ 29 baphume, ababesenza izinto ezinhle bavukele ukuphila, kuthi labo ababesenza izinto ezimbi bavukele ukwahlulelwa.+ 30 Ngeke ngenze loba yini engizicabangela yona. Ngahlulela ngalokho engikutshelwayo futhi ukwahlulela kwami kulungile+ ngoba angifuni ukwenza intando yami kodwa intando yalowo ongithumileyo.+

31 “Nxa kuyimi ngedwa engizifakazelayo, ubufakazi bami kayisibo beqiniso.+ 32 Kulomunye ofakaza ngami futhi ngiyakwazi ukuthi lokho akufakazayo ngami kuliqiniso.+ 33 Lithume abantu kuJohane, yena wafakaza iqiniso ngami.+ 34 Loba kunjalo angidingi kufakazelwa ngumuntu, kodwa ngikhuluma izinto lezi ukuze lisindiswe. 35 Indoda le ibiyisibane ebesibhebha sikhanyisa futhi okwesikhatshana belizimisele ukuthokoza kakhulu ekukhanyeni kwayo.+ 36 Kodwa mina ngilobufakazi obedlula obukaJohane ngenxa yokuthi yona kanye imisebenzi uBaba athe ngiyenze, yonale engiyenzayo, iyafakaza ukuthi uBaba ungithumile.+ 37 UBaba ongithumileyo laye ufakazile ngami.+ Alikaze lilizwe ilizwi lakhe loba nini futhi alikaze libubone ubuso bakhe.+ 38 Ilizwi lakhe alihlali kini ngoba alimkholwa lowo amthumileyo.

39 “Lihlolisisa iMibhalo+ ngoba licabanga ukuthi lizathola ukuphila okungapheliyo ngayo. IMibhalo le yiyo kanye efakaza ngami.+ 40 Kodwa alifuni ukubuya kimi+ ukuze lithole ukuphila. 41 Mina angamukeli udumo oluvela ebantwini 42 njalo ngikwazi mhlophe ukuthi ezinhliziyweni zenu alimthandi uNkulunkulu. 43 Ngibuye ngebizo likaBaba kodwa alingamukeli. Nxa omunye umuntu ubengabuya ngebizo lakhe, belizamamukela. 44 Kambe lingakholwa lithini lina lisamukela udumo elilunikanayo futhi lingenzi lutho ukuze lithole udumo oluvela kuNkulunkulu onguye yedwa?+ 45 Lingacabangi ukuthi ngizalimangalela kuBaba. Limangalelwa nguMosi,+ lowo elithemba kuye. 46 Aluba belimkholwa uMosi belizangikholwa lami ngoba wabhala ngami.+ 47 Kodwa lizakukholwa njani engikutshoyo lina lingakukholwa okwabhalwa nguye?”

6 Ngemva kwalokho uJesu waya ngaphetsheya koLwandle lweGalile olwalubizwa langokuthi yiThibheriya.+ 2 Abantu abanengi babelokhu bemlandela+ ngoba babebona izimangaliso ayezenza esilisa abagulayo.+ 3 Ngakho uJesu wakhwela entabeni wasehlala phansi labafundi bakhe. 4 Umkhosi wamaJuda okuthiwa liPhasika+ wawususondele. 5 UJesu wathi ebona abantu abanengi besiza kuye wathi kuFiliphu: “Sizazithenga ngaphi izinkwa zokuthi abantu laba badle?”+ 6 Kodwa watsho lokhu efuna ukubona ukuthi uFiliphu uzathini ngoba yena wayekwazi ayesezakwenza. 7 UFiliphu wamphendula wathi: “Izinkwa zabodenariyu* abangu-200 ngeke zenele lanxa umuntu ngamunye engaphiwa okulucezwana.” 8 Umfundi wakhe okwakuthiwa ngu-Andreya owayengumfowabo kaSimoni Phetro wathi kuye: 9 “Nangu umfana olezinkwa zebhali ezinhlanu lenhlanzi ezimbili ezincane. Kodwa zingabenela yini abantu abanengi kangaka?”+

10 UJesu wathi: “Hlalisani abantu phansi.” Kwakulotshani obunengi endaweni leyo, yikho abantu bahlala phansi. Kwakulamadoda angaba ngu-5 000.+ 11 UJesu wathatha izinkwa wabonga uNkulunkulu, wasezinika ababehlezi. Wenza njalo langenhlanzi ezincane, badla baze batshiya. 12 Bathi sebedle basutha wathi kubafundi bakhe: “Buthani iziqephu eziseleyo ukuze kungadlaliswa lutho.” 13 Ngakho bazibutha bagcwalisa amabhasikiti angu-12 ngeziqephu zezinkwa zebhali ezazitshiywe ngababedle izinkwa ezinhlanu.

14 Abantu bathi sebebone isimangaliso ayesenzile bathi: “Lo nguye sibili uMphrofethi okwakuthiwa uzabuya emhlabeni.”+ 15 UJesu wakwazi ukuthi basebezambamba ukuze bamenze inkosi. Ngakho waphinda wasuka+ kuleyondawo waya entabeni eyedwa.+

16 Sekuntambama abafundi bakhe baya elwandle,+ 17 bafika bangena esikepeni badabula elwandle besiya eKhaphenawume. Kwaze kwaba mnyama uJesu elokhu engakafiki kubo,+ 18 futhi elwandle kwasekusiba lesiphepho ngoba kwakuvunguza umoya omkhulu.+ 19 Kodwa abafundi bathi sebehambe amakhilomitha angaba mahlanu kumbe ayisithupha,* babona uJesu ehamba phezu kolwandle esondela esikepeni, bethuka. 20 Yena wathi kubo: “Yimi lingesabi!”+ 21 Basebemngenisa esikepeni bekhululekile. Masinyane nje isikepe safika endaweni ababesiya kuyo.+

22 Ngelanga elilandelayo abantu ababesele ngaphetsheya kolwandle bananzelela ukuthi kwakungaselasikepe. Lesikepe esincane ababesicine sisekhunjini sasingasekho ngoba abafundi bakaJesu babehambe ngaso, kodwa uJesu yena wayengahambanga labo. 23 Kusenjalo izikepe ezazivela eThibheriya zafika duze lalapho ababedlele khona izinkwa ngemva kokuba iNkosi ibonge uNkulunkulu. 24 Abantu bathi bebona ukuthi uJesu labafundi bakhe babengekho, bangena ezikepeni lezo bayadinga uJesu eKhaphenawume.

25 Bamthola ngaphetsheya kolwandle bathi kuye: “Rabi,+ kanti ufike nini lapha?” 26 UJesu wabaphendula wathi: “Ngiqinisile ngithi kini, alingidingeli ukuthi selibone izimangaliso kodwa lingidinga ngenxa yokuthi lidle izinkwa lasutha.+ 27 Lingasebenzeli ukudla okubolayo kodwa sebenzelani ukudla okungaboliyo* okuzalinika impilo engapheliyo,+ elizakuphiwa yiNdodana yomuntu. UBaba, uNkulunkulu ngokwakhe, uyifake uphawu lokuthi uyayamukela.”+

28 Basebesithi kuye: “Yiphi imisebenzi okumele siyenze ukuze uNkulunkulu asamukele?” 29 UJesu wabaphendula wathi: “UNkulunkulu ufuna litshengise ukuthi liyakholwa kulowo amthumileyo.”+ 30 Bathi kuye: “Uzasenzela siphi isimangaliso+ ukuze sisibone besesikukholwa? Uzakwenzani? 31 Okhokho bethu badla imana enkangala+ njengoba nje kubhaliwe ukuthi: ‘Wabapha isinkwa esasivela ezulwini ukuze badle.’”+ 32 UJesu wasesithi kubo: “Ngiqinisile ngithi kini, uMosi kazange aliphe isinkwa esivela ezulwini kodwa uBaba ulipha isinkwa seqiniso esivela ezulwini 33 ngoba isinkwa sikaNkulunkulu ngulowo oyehla ezulwini anike umhlaba ukuphila.” 34 Ngakho bathi: “Nkosi, siphe isinkwa leso zikhathi zonke.”

35 UJesu wasesithi: “Mina ngiyisinkwa sokuphila. Loba ngubani oza kimi kasoze alambe, njalo loba ngubani okholwa kimi kasoze ome loba sekutheni.+ 36 Kodwa lilokhu lingakholwa+ lanxa selingibonile, njengoba nje ngangitshilo kini. 37 Bonke engibaphiwa nguBaba bazakuza kimi njalo lowo oza kimi+ angisoze ngimxotshe loba sekutheni, 38 ngoba ngehle ezulwini+ ukuze ngizokwenza intando yalowo ongithumileyo hatshi eyami.+ 39 Intando yalowo ongithumileyo yikuthi ngingalahlekelwa langoyedwa kubo bonke angiphe bona, kodwa ngibavuse kwabafileyo+ ngelanga lokucina. 40 Intando kaBaba yikuthi wonke umuntu owamukela iNdodana futhi otshengisa ukuthi ulokholo kuyo athole ukuphila okungapheliyo.+ Mina ngizamvusa+ kwabafileyo ngelanga lokucina.”

41 AmaJuda aqalisa ukukhonona ngaye ngenxa yokuthi wayethe yena uyisinkwa esehla sivela ezulwini.+ 42 Athi: “Kanti lo ayisuye yini uJesu indodana kaJosefa? Angithi uyise lonina siyabazi?+ Manje kungani esesithi wavela ezulwini?” 43 UJesu wasesithi: “Yekelani ukukhonona. 44 Akulamuntu ongeza kimi engazange adonswe nguBaba ongithumileyo,+ futhi mina ngizamvusa kwabafileyo ngelanga lokucina.+ 45 Kubhaliwe kubaPhrofethi ukuthi: ‘Bonke bazafundiswa nguJehova.’*+ Wonke umuntu omlalelayo uBaba afunde, uyabuya kimi. 46 Kodwa kakho owake wabona uBaba+ ngaphandle kwalowo ovela kuNkulunkulu, lo nguye ombonileyo uBaba.+ 47 Ngiqinisile ngithi kini, loba ngubani okholwayo ulokuphila okungapheliyo.+

48 “Mina ngiyisinkwa sokuphila.+ 49 Okhokho benu bafa lanxa badla imana enkangala.+ 50 Nansi isinkwa esehla sivela ezulwini ukuze loba ngubani osidlayo angafi. 51 Yimi isinkwa sokuphila esehla sivela ezulwini. Loba ngubani odla isinkwa lesi uzaphila kuze kube nini lanini. Isinkwa engizanikela ngaso yinyama yami ezakwenza ukuthi umhlaba uthole ukuphila.”+

52 AmaJuda aseqalisa ukuphikisana esithi: “Indoda le ingasipha njani inyama yayo ukuthi siyidle?” 53 Ngakho uJesu wathi kuwo: “Ngiqinisile sibili ngithi kini, nxa lingasayidlanga inyama yeNdodana yomuntu lanatha legazi layo, alilakho ukuphila phakathi kwenu.+ 54 Loba ngubani odla inyama yami anathe legazi lami ulokuphila okungapheliyo futhi ngizamvusa+ ngelanga lokucina, 55 ngoba inyama yami yikudla kweqiniso legazi lami ngokunathwayo kweqiniso. 56 Loba ngubani odla inyama yami anathe legazi lami uzahlala emunye lami, futhi lami ngizahlala ngimunye laye.+ 57 Lowo ongidlayo uzaphila ngenxa yami njengoba nje uBaba ophilayo kunguye ongithumileyo njalo ngiphila ngenxa yakhe.+ 58 Lesi yiso isinkwa esehla sivela ezulwini. Asifanani laleso esadliwa ngokhokho benu abacina befile. Loba ngubani odla isinkwa lesi uzaphila kuze kube nini lanini.”+ 59 Izinto lezi wazikhuluma ngesikhathi efundisa esinagogeni* eKhaphenawume.

60 Abafundi bakhe abanengi bathi besizwa lokhu bathi: “Amazwi la ayethusa, ngubani ongawalalela?” 61 Kodwa uJesu wayesazi enhliziyweni yakhe ukuthi abafundi bakhe babekhonona ngayekutshilo, wasesithi kubo: “Kuyalikhuba yini lokhu? 62 Manje lizathini lingabona iNdodana yomuntu iphakama isiya lapho eyayikhona kuqala?+ 63 Umoya yiwo onika ukuphila,+ inyama ayincedi ngalutho ngitsho. Amazwi engilitshele wona angumoya lokuphila.+ 64 Kodwa kulabanye benu abangakholwayo.” UJesu watsho njalo ngoba wayesazi kusukela ekuqaleni ukuthi ngobani abangakholwayo lokuthi ngubani owayezamthengisa.+ 65 Waqhubeka wathi: “Yikho ngithe kini akulamuntu ongeza kimi ngaphandle nxa evunyelwe nguBaba.”+

66 Abafundi bakhe abanengi bayekela ukuhamba laye ngenxa yalokho, babuyela ezintweni ababezitshiye emuva.+ 67 Ngakho uJesu wathi kwabaliTshumi Lambili: “Lani lifuna ukuhamba yini?” 68 USimoni Phetro wamphendula wathi: “Nkosi singaya kubani?+ Nguwe olamazwi okuphila okungapheliyo.+ 69 Sesikholiwe futhi sesikwazi ukuthi ungoNgcwele kaNkulunkulu.”+ 70 UJesu wabaphendula wathi: “Lakhethwa yimi lina abalitshumi lambili angithi?+ Lanxa kunjalo omunye wenu ungumnyundeli.”*+ 71 Wayekhuluma ngoJudasi indodana kaSimoni Iskariyothi ngoba nguye owayezamthengisa lanxa wayengomunye wabaliTshumi Lambili.+

7 Ngemva kwalokho uJesu waqhubeka etshumayela* eGalile. Wayengafuni ukuya eJudiya ngoba amaJuda ayefuna ukumbulala.+ 2 Kodwa uMkhosi Wamathabanikeli*+ owawusenziwa ngamaJuda wawususeduze. 3 Ngakho abafowabo+ bathi kuye: “Suka lapha uye eJudiya ukuze abafundi bakho labo babone imisebenzi yakho 4 ngoba kakho owenza izinto efihla yena efuna ukwaziwa ngabantu. Nxa usenza izinto lezi phumela egcekeni umhlaba ukubone.” 5 Phela abafowabo babengakholwa kuye.+ 6 Yikho uJesu wathi kubo: “Isikhathi sami asikafiki+ kodwa kini loba yisiphi isikhathi sifanele. 7 Umhlaba awulasizatho sokulizonda kodwa mina uyangizonda ngoba ngifakaza ukuthi imisebenzi yawo mibi.+ 8 Hambani lina emkhosini. Mina angikahambi ngoba isikhathi sami asikafiki.”+ 9 Esebatshele lokhu wasala eGalile.

10 Abafowabo bathi sebehambile emkhosini, laye walandela kodwa wahamba ngudlu engabonwa ngabantu. 11 Ngakho amaJuda aqalisa ukumdinga emkhosini esithi: “Ingaphi indoda leyana?” 12 Abantu babekhuluma izinto ezinengi ngaye ensitha. Abanye babesithi: “Uyindoda elungileyo,” abanye besithi: “Kalunganga udukisa abantu.”+ 13 Kodwa akulamuntu owayekhuluma ngaye phakathi kwabantu ngenxa yokwesaba amaJuda.+

14 Kwathi sekungaba zinsuku ezine umkhosi uqalisile uJesu wangena ethempelini waqalisa ukufundisa. 15 AmaJuda aphelelwa athi: “Indoda le yaluthatha ngaphi ulwazi lweMibhalo+ olunengi kangaka yona ingafundanga ezikolo zaboRabi?”+ 16 UJesu wabaphendula wathi: “Engikufundisayo ayisikho kwami, ngokwalowo ongithumileyo.+ 17 Loba ngubani ofuna ukwenza intando kaNkulunkulu+ uzakwazi ukuthi engikufundisayo kuvela kuNkulunkulu yini kumbe ngikhuluma engizicabangela khona. 18 Lowo okhuluma azicabangela khona ufuna ukudunyiswa, kodwa loba ngubani ofuna kudunyiswe lowo omthumileyo,+ ukhuluma iqiniso njalo ukungalungi akukho kuye. 19 Angithi uMosi walinika uMthetho?+ Kodwa kakho loyedwa phakathi kwenu owulalelayo. Lifuna ukungibulalelani?”+ 20 Abantu bamphendula bathi: “Uledimoni wena. Ngubani ofuna ukukubulala?” 21 UJesu wabaphendula wathi: “Ngenze into eyodwa lonke lamangala. 22 Cabangani ngalokhu: UMosi walinika umthetho wokusoka+ (kungayisikho ukuthi uvela kuye kodwa uvela kubokhokho)+ njalo liyamsoka umuntu ngesabatha. 23 Nxa umuntu esokwa ngesabatha ukuze kungephulwa uMthetho kaMosi, kungani lingivukela ngolaka ngokuthi ngisilise indoda ngesabatha yaqina saka?+ 24 Yekelani ukwahlulela ngelikubona ngamehlo kodwa yahlulelani ngendlela elungileyo.”+

25 Abanye ababehlala eJerusalema bathi: “Indoda le ayisiyo yini abafuna ukuyibulala?+ 26 Khangelani! Iyazikhulumela phakathi kwabantu kodwa abatsho lutho kuyo. Kanti ababusi sebecabanga ukuthi lo nguye sibili uKhristu? 27 Thina siyakwazi ukuthi indoda le ivela ngaphi.+ Kodwa nxa uKhristu efika akulamuntu ozabe ekwazi ukuthi uvela ngaphi.” 28 UJesu wathi esafundisa ethempelini waphakamisa ilizwi wathi: “Liyangazi futhi liyakwazi ukuthi ngivela ngaphi. Angibuyanga lapha ngokuthanda kwami+ kodwa ongithumileyo ukhona sibili, lina alimazi.+ 29 Ngiyamazi+ ngoba ngingummeli wakhe njalo nguye ongithumileyo.” 30 Ngakho bazama ukumbamba+ kodwa kakho owenelisa ukumbeka isandla ngoba isikhathi sakhe sasingakafiki.+ 31 Lanxa kunjalo abanengi baba lokholo kuye+ futhi babesithi: “Kambe nxa uKhristu esebuyile uzakwenza izimangaliso ezedlula ezenziwa yindoda le?”

32 AbaFarisi bezwa abantu bengunguna bekhuluma konke lokhu ngaye. Abaphristi abakhokhelayo labaFarisi bathuma abalindi ukuthi bayembamba.* 33 UJesu wasesithi: “Ngizakuba lani okwesikhatshana ngingakayi kulowo ongithumileyo.+ 34 Lizangidinga kodwa alisoze lingithole njalo lapho engizabe ngikhona alingeke libuye.”+ 35 Ngakho amaJuda abuzana athi: “Kanti indoda le ifuna ukuya ngaphi lapho esingasoze siyithole khona? Pho kayifuni ukuya kumaJuda asabalale agcwala kumaGrikhi ukuze iyefundisa amaGrikhi? 36 Itshoni nxa isithi, ‘Lizangidinga kodwa alisoze lingithole njalo lapho engizabe ngikhona alingeke libuye’?”

37 Ngelanga lokucina, okwakulilanga lomkhosi eliqakatheke kakhulu,+ uJesu wasukuma wakhuluma ngelizwi eliphezulu wathi: “Loba ngubani owomileyo kabuye kimi azonatha.+ 38 Njengoba nje umbhalo usitsho, loba ngubani okholwa kimi, ‘izifudlana zamanzi okuphila zizageleza zisuka ekujuleni kwenhliziyo yakhe.’”+ 39 Kodwa uJesu watsho lokhu ekhuluma ngomoya owawusuzakwamukelwa yilabo ababekholwa kuye, ngoba kuze kube yilesosikhathi babengakawamukeli+ njengoba wayengakakhazinyuliswa.+ 40 Abanye ababelapho bathi besizwa amazwi la bathi: “Lo nguMphrofethi sibili.”+ 41 Abanye babesithi: “Lo nguKhristu,”+ kodwa abanye besithi: “Angithi uKhristu kaveli eGalile?+ 42 Kanti umbhalo awutsho yini ukuthi uKhristu uzavela enzalweni kaDavida+ laseBhethilehema,+ isigaba uDavida ayevela kuso?”+ 43 Ngakho abantu behlukana phakathi bephikisana ngaye. 44 Abanye babefuna ukumbamba* kodwa kakho owenelisayo.

45 Abalindi bathi sebephendukile, abaphristi abakhokhelayo labaFarisi bababuza bathi: “Kungani lingabuyanga laye?” 46 Abalindi baphendula bathi: “Akukaze kube lomuntu okhuluma kanje.”+ 47 AbaFarisi basebesithi: “Lani selidukisiwe yini? 48 Ukhona yini umbusi kumbe umFarisi osemkholiwe?+ 49 Abantu laba abangawaziyo uMthetho baqalekisiwe.” 50 UNikhodemu owayengomunye wabo njalo owayeke wavakatshela uJesu wathi kubo: 51 “Kanje eMthethweni wethu siyamahlulela yini umuntu singaqalanga samlalela sakwazi ukuthi wenzeni?”+ 52 Bamphendula bathi: “Kanti lawe uvela eGalile yini? Hlolisisa uzabona ukuthi akulamphrofethi ovela eGalile.”*

8 12 UJesu waphinda wathi kubo: “Mina ngiyikukhanya komhlaba.+ Loba ngubani ongilandelayo kasoze ahambe emnyameni loba sekutheni kodwa uzakuba lokukhanya+ okunika impilo.” 13 AbaFarisi basebesithi kuye: “Wena uyazifakazela, ubufakazi bakho ayisibo beqiniso.” 14 UJesu wabaphendula wathi: “Lanxa ngizifakazela, ubufakazi bami ngobeqiniso ngoba ngiyakwazi lapho engavela khona lalapho engiya khona.+ Kodwa lina alikwazi ukuthi ngavela ngaphi lokuthi ngiya ngaphi. 15 Lahlulela ngendlela yabantu,+ mina angahluleli muntu ngitsho. 16 Lanxa ngingahlulela, ngiyabe ngizakwahlulela ngeqiniso ngoba angingedwa, uBaba ongithumileyo ulami.+ 17 LaseMthethweni wenu kubhaliwe ukuthi: ‘Ubufakazi babantu ababili buliqiniso.’+ 18 Mina ngiyazifakazela futhi loBaba ongithumileyo uyangifakazela.”+ 19 Basebesithi kuye: “Ungaphi uYihlo?” UJesu waphendula wathi: “Alingazi njalo loBaba alimazi.+ Aluba belingazi belizamazi loBaba.”+ 20 Wakhuluma amazwi la ngesikhathi efundisa ethempelini, esendaweni okwakufakwa kuyo iminikelo.+ Kodwa akulamuntu owambambayo ngoba isikhathi sakhe sasingakafiki.+

21 Yikho waphinda wathi kubo: “Ngiyahamba futhi lizangidinga, kodwa lizafela esonweni senu.+ Lapho engiyakhona ngeke libuye.”+ 22 AmaJuda asesithi: “Kambe usefuna ukuzibulala? Phela uthi, ‘Lapho engiyakhona ngeke libuye.’” 23 Waqhubeka wathi kubo: “Lina lingabezindaweni zaphansi, mina ngingowezindaweni zaphezulu.+ Lingabalumhlaba, mina angisuye owalumhlaba. 24 Yikho ngithe kini lizafela ezonweni zenu. Nxa lingayekela ukukholwa ukuthi nginguye, lizafela ezonweni zenu.” 25 Ngakho bathi kuye: “Ungubani wena?” UJesu wabaphendula wathi: “Kanti vele ngizihluphelani ngokukhuluma lani? 26 Ngilezinto ezinengi okumele ngizikhulume ngani futhi kulezindaba ezinengi engizazahlulela. Phezu kwalokho, lowo ongithumileyo uqinisile njalo zona kanye izinto engazizwa ngaye ngiyazikhuluma emhlabeni.”+ 27 Abazange bazwisise ukuthi wayebatshela ngoYise. 28 UJesu wasesithi kubo: “Nxa seliyiphanyekile iNdodana yomuntu,+ lizakwazi ukuthi nginguye+ lokuthi angenzi lutho engizicabangela lona,+ kodwa izinto lezi engizikhulumayo ngazifundiswa nguBaba. 29 Lowo ongithumileyo ulami, kangitshiyanga ngedwa ngoba ngihlala ngisenza izinto ezimthokozisayo.”+ 30 Abanengi bamkholwa besizwa konke lokhu ayekukhuluma.

31 UJesu wasesithi kumaJuda ayemkholiwe: “Nxa lingahlala liselizwini lami, liyabe lingabafundi bami sibili 32 futhi lizalazi iqiniso+ njalo iqiniso lizalikhulula.”+ 33 Bamphendula bathi: “Thina singabantwana baka-Abrahama njalo asikaze sibe yizigqili zamuntu. Manje kungani usithi, ‘Lizakhululeka’?” 34 UJesu wabaphendula wathi: “Ngiqinisile sibili ngithi kini, wonke umuntu owenza isono uyisigqili sesono.+ 35 Phezu kwalokho isigqili asihlali kokuphela endlini yenkosi, indodana yiyo ehlala kuze kube nini lanini. 36 Yikho nxa iNdodana ingalikhulula, lizabe selikhululekile sibili. 37 Ngiyakwazi ukuthi lingabantwana baka-Abrahama. Kodwa lifuna ukungibulala ngoba alilamukeli ilizwi lami. 38 Ngikhuluma izinto engizibone ngesikhathi ngiloBaba,+ kodwa lina lenza izinto elizizwe ngoyihlo.” 39 Bamphendula bathi: “Ubaba wethu ngu-Abrahama.” UJesu wasesithi kubo: “Aluba belingabantwana baka-Abrahama,+ belizabe lisenza imisebenzi ka-Abrahama. 40 Kodwa lifuna ukungibulala lanxa ngilitshele iqiniso engilizwe ngoNkulunkulu.+ U-Abrahama kazange akwenze lokho elikwenzayo. 41 Lenza imisebenzi kayihlo.” Bona bathi kuye: “Thina asizalwanga ngobufebe,* siloBaba oyedwa, uNkulunkulu.”

42 UJesu wathi kubo: “Aluba uNkulunkulu ubenguYihlo belizangithanda+ ngoba ngavela kuNkulunkulu yikho ngilapha. Angibuyanga lapha ngokuthanda kwami kodwa ngithunywe nguye.+ 43 Kungani lingakuzwisisi engikukhulumayo? Kungenxa yokuthi liyehluleka ukulalela ilizwi lami. 44 Lina livela kuyihlo uDeveli njalo lifuna ukwenza okufunwa nguye.+ Yena wayengumbulali kusukela ekuqaleni*+ futhi kazange ame eqinisweni ngoba iqiniso alikho kuye. Nxa ekhuluma amanga ukhuluma okuhambelana lalokho ayikho khona ngoba ungusomangase loyise wamanga.+ 45 Kodwa mina alingikholwa ngoba ngilitshela iqiniso. 46 Ngubani phakathi kwenu ongaveza ubufakazi bokuthi ngilesono? Manje nxa ngikhuluma iqiniso, kuyini okwenza lingangikholwa? 47 Ovela kuNkulunkulu uyawalalela amazwi kaNkulunkulu.+ Okwenza lina lingalaleli yikuthi aliveli kuNkulunkulu.”+

48 AmaJuda amphendula athi: “Silamanga yini nxa sisithi ungumSamariya+ njalo uledimoni?”+ 49 UJesu waphendula wathi: “Angiladimoni mina, ngidumisa uBaba kodwa lina liyangeyisa. 50 Lanxa kunjalo angizifuneli inkazimulo+ kodwa ukhona ofuna ngiyithole njalo yena ungumahluleli. 51 Ngiqinisile sibili ngithi kini, nxa umuntu elalela amazwi ami kasoze akubone ukufa loba sekutheni.”+ 52 AmaJuda athi kuye: “Khathesi sesikwazi ukuthi uledimoni. U-Abrahama wafa, labaphrofethi labo bafa kodwa wena uthi, ‘Nxa umuntu elalela amazwi ami kasoze afe loba sekutheni.’ 53 Kanti wena umkhulu yini kulobaba wethu u-Abrahama? Yena wafa labaphrofethi labo bafa. Manje wena uzenza bani?” 54 UJesu waphendula wathi: “Nxa ngizikhazimulisa, inkazimulo yami ayitsho lutho. UBaba, lowo lina elimbiza ngokuthi nguNkulunkulu wenu, nguye ongikhazimulisayo.+ 55 Lanxa kunjalo alimazi+ kodwa mina ngiyamazi.+ Nxa bengingathi angimazi bengizabe ngiqamba amanga njengani. Mina ngiyamazi futhi ngiyalilalela ilizwi lakhe. 56 Uyihlo u-Abrahama wathokoza kakhulu ekhangelele ukubona usuku lwami, lakanye walubona wajabula.”+ 57 Ngakho amaJuda athi kuye: “Awukafikisi leminyaka engu-50. Manje kungani usithi wake wambona u-Abrahama?” 58 UJesu wathi kubo: “Ngiqinisile sibili ngithi kini, ngasengikhona u-Abrahama engakabi khona.”+ 59 Ngakho badobha amatshe befuna ukumjikijela kodwa yena wacatsha wasephuma ethempelini.

9 Wathi edlula wabona indoda eyayizelwe iyisiphofu. 2 Abafundi bakhe bambuza bathi: “Rabi,+ yisono sikabani esenza indoda le yazalwa iyisiphofu? Ngesayo kumbe ngesabazali bayo?” 3 UJesu waphendula wathi: “Indoda le kayonanga njalo labazali bayo kabonanga lutho, kodwa lokhu kwenzakala ukuze imisebenzi kaNkulunkulu ibonakale ngayo.+ 4 Kumele senze imisebenzi yalowo ongithumileyo kusesemini.+ Ubusuku buyeza lapho abantu abangasoze benelise khona ukusebenza. 5 Nxa ngisesekhona emhlabeni ngizabe ngilokhu ngiyikukhanya komhlaba.”+ 6 Wathi eqeda ukukhuluma lokhu wakhafulela phansi wabumba udaka ngamathe, waseluninda emehlweni endoda le+ 7 wathi kuyo: “Hamba uyegeza echibini leSilowami.” (Ukuthi Silowami kutsho ukuthi, “Okuthunyiweyo.”) Yasihamba yayageza yaphenduka isibona.+

8 Omakhelwane lalabo ababejayele ukuyibona icela uncedo ebantwini bathi: “Indoda le ayisiyo yini ebijayele ukucela uncedo?” 9 Abanye babesithi: “Yiyo,” kodwa abanye besithi: “Ayisiyo, yikufanana nje kuphela.” Yona yayilokhu isithi: “Yimi.” 10 Ngakho bayibuza bathi: “Manje amehlo akho avuleke njani?” 11 Yaphendula yathi: “Indoda okuthiwa nguJesu ibumbe udaka yaluninda emehlweni ami yasisithi kimi, ‘Hamba uyegeza eSilowami.’+ Ngasengihamba ngayageza ngaqalisa ukubona.” 12 Bathi besizwa lokho bathi kuyo: “Ingaphi indoda leyo?” Yona yathi: “Angazi.”

13 Bathatha indoda eyayikade iyisiphofu bahamba layo kubaFarisi. 14 Manje uJesu wayebumbe udaka wavula amehlo endoda le+ ngelanga leSabatha.+ 15 Yikho labaFarisi baqalisa ukuyibuza ukuthi amehlo ayo ayevuleke njani. Yaphendula yathi: “Uninde udaka emehlweni ami ngasengisiyageza ngabona.” 16 Abanye abaFarisi basebesithi: “Umuntu lo kaveli kuNkulunkulu ngoba kaligcini iSabatha.”+ Abanye bathi: “Umuntu oyisoni angazenza njani izimangaliso ezinjalo?”+ Ngakho behlukana phakathi.+ 17 Baphinda bathi endodeni eyayikade iyisiphofu: “Wena uthini ngaye njengoba evule amehlo akho?” Yathi kubo: “Ungumphrofethi.”

18 Kodwa amaJuda ayengakholwa ukuthi ekuqaliseni yayiyisiphofu yacina isibona. Yikho abiza abazali bayo 19 ababuza athi: “Le yiyo yini indodana yenu elithi yazalwa iyisiphofu? Pho kwenzakale njani ukuthi icine isibona?” 20 Abazali bayo baphendula bathi: “Thina esikwaziyo yikuthi uyindodana yethu lokuthi wazalwa eyisiphofu. 21 Kodwa asikwazi ukuthi kwenzakale njani ukuthi acine esebona lokuthi ngubani ovule amehlo akhe. Mbuzeni, ukhulile. Kumele azikhulumele.” 22 Abazali bendoda eyayikade iyisiphofu batsho njalo ngoba babesesaba amaJuda.+ Phela amaJuda ayesevumelene ukuthi loba ngubani ovuma ukuthi uJesu unguKhristu kumele axotshwe esinagogeni.+ 23 Yikho okwenza abazali bayo bathi: “Ukhulile, buzani yena.”

24 Bayibiza okwesibili indoda eyayikade iyisiphofu bathi kuyo: “Khazimulisa uNkulunkulu. Siyakwazi ukuthi umuntu lo uyisoni.” 25 Yona yathi: “Lokho okokuthi uyisoni mina angikwazi. Engikwaziyo yikuthi bengiyisiphofu kodwa khathesi sengibona.” 26 Basebesithi kuyo: “Ukwenzeni? Uwavule njani amehlo akho?” 27 Yabaphendula yathi: “Ngilitshele kudala kodwa alilaleli. Yindaba lifuna ngiphinde futhi? Kumbe lani selifuna ukuba ngabafundi bakhe?” 28 Bathi bekuzwa lokho bakhuluma beseyisa bathi: “Wena ungumfundi wakhe kodwa thina singabafundi bakaMosi. 29 Siyakwazi ukuthi uNkulunkulu wakhuluma loMosi kodwa asikwazi ukuthi umuntu lo uvela ngaphi.” 30 Indoda eyayikade iyisiphofu yabaphendula yathi: “Kuyamangalisa sibili ukuthi alikwazi ukuthi uvela ngaphi yena evule amehlo ami. 31 Siyakwazi ukuthi uNkulunkulu kalaleli izoni+ kodwa ulalela loba ngubani omesabayo futhi owenza intando yakhe.+ 32 Kusukela kudala asikaze sizwe ukuthi kulomuntu owake wavula amehlo omuntu owazalwa eyisiphofu. 33 Aluba umuntu lo ubengaveli kuNkulunkulu, ubengeke enze lutho.”+ 34 Bathi kuyo: “Kambe ungathi wazalwa ucwile esonweni ubususifundisa?” Basebeyixotsha.+

35 UJesu wezwa ukuthi babeyixotshile. Wathi ehlangana layo wathi kuyo: “Uyayikholwa yini iNdodana yomuntu?” 36 Yona yaphendula yathi: “Ingubani mnumzana? Ngitshela ukuze ngikholwe kuyo.” 37 UJesu wasesithi: “Usuyibonile, yiyonale ekhuluma lawe.” 38 Yasisithi: “Ngiyakholwa kuyo Nkosi.” Ngemva kwalokho yamkhothamela. 39 UJesu wathi: “Ngabuya emhlabeni ukuze abantu bahlulelwe, abangaboniyo babone+ lababonayo babe yiziphofu.”+ 40 Abanye abaFarisi ababekhonapho bathi besizwa lokhu bathi kuye: “Lathi siyiziphofu yini?” 41 UJesu wathi: “Aluba beliyiziphofu belizabe lingelasono. Kodwa lithi, ‘Siyabona.’ Yikho lizahlala lilesono.”+

10 “Ngiqinisile sibili ngithi kini, lowo ongangeni ngegedi esibayeni sezimvu kodwa okhwela angene ngenye indawo, ulisela njalo uyisigebenga.+ 2 Ongena ngegedi nguye umelusi wezimvu.+ 3 Olinda egedini uyamvulela+ futhi izimvu ziyalilalela ilizwi lakhe.+ Izimvu zakhe uzibiza ngamabizo azikhokhele aphume lazo. 4 Nxa esezikhiphile zonke ezakhe, uhamba phambi kwazo zona zimlandele ngoba ziyalazi ilizwi lakhe. 5 Azingeke zilandele umuntu ezingamaziyo kodwa ziyambalekela ngoba azilazi ilizwi lesihambi.” 6 UJesu wabatshela umzekeliso lo kodwa abazange bazwisise ukuthi wayesitshoni.

7 Ngakho waphinda wathi: “Ngiqinisile sibili ngithi kini, mina ngiligedi izimvu ezingena ngalo.+ 8 Bonke ababuye bezenza mina bangamasela futhi bayizigebenga, yikho izimvu zingabalalelanga. 9 Mina ngiligedi, loba ngubani ongena ngami uzasindiswa njalo uzangena aphume athole amadlelo.+ 10 Nxa isela lifika liyabe lilande ukuzotshontsha lokubulala lokutshabalalisa kuphela.+ Mina ngabuya ukuze abantu bathole ukuphila futhi baphile kuze kube nini lanini. 11 Ngingumelusi omuhle.+ Umelusi omuhle unikela ngempilo yakhe* ngenxa yezimvu zakhe.+ 12 Indoda eqhatshiweyo engasimelusi lengasimnikazi wezimvu iyathi ibona iganyana lisiza itshiye izimvu ibaleke, iganyana lifike libambe ezinye, ezinye zisabalale 13 ngoba yona iqhatshiwe, ayilandaba lezimvu. 14 Mina ngingumelusi omuhle. Ngiyazazi izimvu zami lezimvu zami ziyangazi+ 15 njengoba nje loBaba engazi, lami ngimazi uBaba.+ Nginikela ngempilo yami* ngenxa yezimvu zami.+

16 “Ngilezinye izimvu ezingayisizo zalesi sibaya.+ Lazo kumele ngizilethe futhi zizalilalela ilizwi lami, zibe ngumhlambi owodwa phansi komelusi oyedwa.+ 17 UBaba uyangithanda+ ngoba nginikela ngempilo yami*+ ukuze ngiphinde ngiyamukele. 18 Kakho ongangithathela yona kodwa nginikela ngayo ngokuthanda kwami. Ngilelungelo lokunikela ngayo lokuphinda ngiyamukele.+ Umlayo lo ngawuphiwa nguBaba.”

19 AmaJuda aphinda adabukana phakathi+ ngenxa yamazwi la. 20 Amanengi ayesithi: “Usephambene futhi uledimoni. Limlalelelani?” 21 Amanye esithi: “La akusimazwi omuntu oledimoni. Kambe idimoni lingavula amehlo eziphofu?”

22 Ngalesosikhathi eJerusalema kwaba loMkhosi Wokunikela Ithempeli njalo kwakuyisikhathi somqando. 23 UJesu wayesethempelini ehamba evurandini okwakuthiwa ngelikaSolomoni.+ 24 AmaJuda asembuthanela athi kuye: “Kuzaze kube nini usitshiya silenga? Nxa kunguwe uKhristu sitshele kucace.” 25 UJesu waphendula wathi: “Ngilitshelile kodwa alikholwa. Imisebenzi engiyenza ngebizo likaBaba iyafakaza ngami.+ 26 Kodwa lina alikholwa ngoba alisizozimvu zami.+ 27 Izimvu zami ziyalilalela ilizwi lami, ngiyazazi njalo zona ziyangilandela.+ 28 Ngizinika ukuphila okungapheliyo.+ Azisoze zibhujiswe loba sekutheni futhi akulamuntu ozazihluthuna esandleni sami.+ 29 Lokho uBaba angiphe khona kuqakatheke kulazo zonke izinto njalo akulamuntu ongahluthuna izimvu esandleni sikaBaba.+ 30 Mina loBaba simunye.”*+

31 AmaJuda aphinda adobha amatshe efuna ukumkhanda ngawo. 32 UJesu wasesithi kuwo: “Ngilitshengise imisebenzi kaBaba eminengi emihle. Yiwuphi phakathi kwayo elifuna ukungitshayela wona ngamatshe?” 33 AmaJuda amphendula athi: “Asikutshayeli umsebenzi omuhle, sikutshayela ukuthuka+ uNkulunkulu ngoba uzenza unkulunkulu wena ungumuntu.” 34 UJesu wasesithi: “Akubhalwanga yini eMthethweni wenu ukuthi, ‘Ngathi: “Lingonkulunkulu”’?+ 35 UNkulunkulu wababiza ngokuthi ‘bangonkulunkulu’+ labo abasolwa lilizwi lakhe futhi wona umbhalo uhlala uliqiniso. 36 Manje kungani lisithi mina engangcweliswa nguBaba ngasengithunywa emhlabeni ngithuka uNkulunkulu ngenxa yokuthi ngithe, ‘NgiyiNdodana kaNkulunkulu’?+ 37 Nxa ngingenzi imisebenzi kaBaba, lingaze langikholwa. 38 Kodwa nxa ngisenza yona, yikholweni imisebenzi le+ lanxa mina lingangikholwa ukuze lazi njalo liqhubeke lisazi ukuthi uBaba munye lami, lami ngimunye loBaba.”+ 39 Ngakho bazama futhi ukumbamba kodwa waphunyuka wasuka kubo.

40 Waphinda waya ngaphetsheya kukaJodani lapho uJohane ayebhabhathizela khona ekuqaleni,+ wafika wahlala kuleyondawo. 41 Abantu abanengi babuya kuye bathi: “UJohane kazange enze ngitsho lesimangaliso esisodwa kodwa konke akukhulumayo ngendoda le kwakuliqiniso.”+ 42 Abanengi endaweni leyo bakholwa kuye.

11 Kwakulendoda eyayigula okwakuthiwa nguLazaro. Yayihlala eBhethani, isigaba okwakuvela kuso uMariya lodadewabo uMatha.+ 2 UMariya nguye owayethele amafutha anukelelayo enyaweni zeNkosi, wazesula ngenwele+ zakhe zaze zoma. Lo owayegula kwakungumfowabo uLazaro. 3 Ngakho odadewabo bakaLazaro bathumela umbiko kuJesu besithi: “Nkosi, lowo omthanda kakhulu uyagula!” 4 Kodwa uJesu wathi ekuzwa lokhu wathi: “Ukugula lokhu akusoze kuphethe ngokufa kodwa kuzakwenza ukuthi uNkulunkulu akhazinyuliswe+ ukuze iNdodana kaNkulunkulu ikhazinyuliswe ngakho.”

5 UJesu wayemthanda uMatha lodadewabo kanye loLazaro. 6 Lanxa wezwa ukuthi uLazaro uyagula, waqhubeka esendaweni ayekuyo okwamalanga amabili. 7 Ngemva kwalokhu wathi kubafundi bakhe: “Asibuyeleni eJudiya.” 8 Abafundi bathi kuye: “Rabi,+ akukabi lesikhathi eside abantu beJudiya bezame ukukukhanda ngamatshe.+ Manje usufuna ukubuyela khona futhi?” 9 UJesu waphendula wathi: “Angithi ilanga likhanyisa okwamahora angu-12?+ Nxa umuntu ehamba emini, akulanto ezamkhuba ngoba uyabe ebona ukukhanya komhlaba lo. 10 Kodwa nxa umuntu ehamba ebusuku, uyakhubeka ngoba ukukhanya akukho kuye.”

11 Esekhulume konke lokhu waphinda wathi: “Umngane wethu uLazaro uselele+ kodwa ngiya khona ukuze ngiyemvusa.” 12 Abafundi basebesithi kuye: “Nkosi nxa elele kutsho ukuthi uzasila.” 13 Babecabanga ukuthi ukhuluma ngokuthi wayelele ephumula kodwa uJesu wayekhuluma ngokufa kwakhe. 14 Yikho wakubeka kwacaca wathi kubo: “ULazaro usefile+ 15 futhi kuyangithokozisa ukuthi bengingekho ngoba engizakwenza kuzalinceda ukuthi likholwe. Asiyeni kuye.” 16 UTomasi owayebizwa langokuthi liphahla wathi kwabanye abafundi: “Asihambeni lathi ukuze siyekufa laye.”+

17 UJesu wathi efika wathola ukuthi kwasekulamalanga amane uLazaro esethuneni. 18 IBhethani yayiseduze leJerusalema, kungamakhilomitha angaba mathathu* ukuya khona, 19 njalo amaJuda amanengi ayebuyile ukuzoduduza uMatha loMariya ngomfowabo. 20 UMatha wezwa ukuthi uJesu uyeza wasehamba wayamhlangabeza kodwa uMariya+ wasala ngekhaya. 21 UMatha wathi kuJesu: “Nkosi, aluba ubukhona ngabe umfowethu kafanga. 22 Kodwa ngiyakwazi ukuthi loba kuyini okucela kuNkulunkulu, uNkulunkulu uzakupha.” 23 UJesu wathi kuye: “Umfowenu uzavuka.” 24 UMatha wasesithi: “Ngiyakwazi ukuthi uzavuka nxa sekuvuswa abafileyo+ ngelanga lokucina.” 25 UJesu wathi: “Ngiyikuvuka kwabafileyo lokuphila.+ Lowo otshengisa ukuthi ulokholo kimi uzaphila lanxa angaze afe. 26 Wonke umuntu ophilayo otshengisa ukuthi ulokholo kimi kasoze afe loba sekutheni.+ Wena uyakukholwa yini lokhu?” 27 Wamphendula wathi: “Ye Nkosi, ngiyakholwa ukuthi unguKhristu iNdodana kaNkulunkulu okwatshiwo ukuthi izabuya emhlabeni.” 28 Esetsho njalo wasuka wayabiza udadewabo uMariya wamnyenyezela wathi: “UMfundisi+ usekhona, uyakubiza.” 29 UMariya wathi esizwa lokhu wahle wathi lothu waya kuye.

30 UJesu wayengakafiki esigabeni, wayelokhu elapho uMatha ayemhlangabeze khona. 31 AmaJuda ayeduduza uMariya endlini ambona esukuma masinyane esiya phandle, asemlandela ecabanga ukuthi wayesiyakhalela ethuneni.+ 32 UMariya uthe efika lapho uJesu ayekhona futhi embona, wazilahla phansi enyaweni zakhe wathi kuye: “Nkosi, aluba ubulapha ngabe umfowethu kafanga.” 33 UJesu wathi embona ekhala, lamaJuda ayebuye laye ekhala, wadabuka kakhulu emoyeni wakhe njalo wakhathazeka. 34 Wasesithi: “Limbeke ngaphi?” Bathi kuye: “Nkosi buya uzobona.” 35 UJesu wakhala.+ 36 AmaJuda athi ekubona lokhu athi: “Liyabona ukuthi ubemthanda njani!” 37 Kodwa abanye babo bathi: “Kanti indoda le eyavula amehlo esiphofu+ ibingehluleka yini ukwenza ukuthi umuntu lo angafi?”

38 UJesu waphinda wadabuka kakhulu emoyeni wakhe, waya ethuneni. Ithuna lelo lalilubhalu njalo lalivalwe ngelitshe. 39 UJesu wathi: “Susani ilitshe.” UMatha udadewabo kamufi wathi kuye: “Nkosi, khathesi kumele ukuthi usenuka ngoba sekungamalanga amane.” 40 UJesu wasesithi: “Angikutshelanga yini ukuthi nxa ukholwa uzabona inkazimulo kaNkulunkulu?”+ 41 Basebelisusa ilitshe, uJesu wakhangela ezulwini+ wathi: “Baba, ngiyabonga ukuthi ungizwile. 42 Bengikwazi sibili ukuthi uhlala ungizwa. Kodwa ngikhulume ngenxa yabantu abalapha ukuze bakholwe ukuthi ungithumile.”+ 43 Esekutshilo lokhu wamemeza ngelizwi elikhulu wathi: “Lazaro, phuma!”+ 44 Indoda eyayifile yaphuma ithandelwe ngamaqhele enyaweni lasezandleni, lobuso bayo buthandelwe ngelembu. UJesu wasesithi kubo: “Mthukululeni limyekele ahambe.”

45 Ngakho amaJuda amanengi ayelande uMariya njalo ayebone okwakwenziwe nguJesu akholwa kuye,+ 46 kodwa amanye aya kubaFarisi abatshela lokho uJesu ayekwenzile. 47 Abaphristi abakhokhelayo labaFarisi basebebuthanisa iSanihedrini bathi: “Manje senzeni njengoba indoda le isenza izimangaliso ezinengi kangaka?+ 48 Nxa singayiyekela isenzenje bonke bazakholwa kuyo, amaRoma abesebuya athathe indawo yethu* lesizwe sethu.” 49 Kodwa omunye wabo okwakuthiwa nguKhayifasi+ owayengumphristi omkhulu ngalowomnyaka wathi kubo: “Kalazi lutho lina 50 njalo alizange licabangisise ngokuthi kunceda lina ukuthi indoda eyodwa ifele abantu kulokuthi isizwe sonke sibhujiswe.” 51 Lokhu akutshoyo kwakungaveli ekhanda lakhe kodwa njengoba wayengumphristi omkhulu ngalowomnyaka, wayephrofetha ukuthi uJesu wayezafela isizwe. 52 Lanxa kunjalo, wayengasoze afele isizwe kuphela kodwa wayezabuthanisa abantwana bakaNkulunkulu ababesabalele, abenze babe munye. 53 Ngakho kusukela ngalelolanga babumba icebo lokumbulala.

54 Ngenxa yalokho uJesu wayengasahambeli ebantwini nxa wayephakathi kwamaJuda. Wasuka lapho waya endaweni eyayiseduze lenkangala, edolobheni elalibizwa ngokuthi yi-Efrayimi,+ wasehlala khona labafundi bakhe. 55 IPhasika+ lamaJuda laseliseduze. Abantu abanengi ababesemaphandleni baya eJerusalema iPhasika lingakafiki ukuze bayezihlambulula ngokoMthetho kaMosi. 56 Babedinga uJesu, futhi ngesikhathi bemi ethempelini babelokhu bebuzana besithi: “Libona njani? Kambe ukuthi uzabuya emkhosini?” 57 Kodwa abaphristi abakhokhelayo labaFarisi babetshele abantu ukuthi loba ngubani ozakwazi ukuthi uJesu ungaphi kumele ayebika ukuze bambambe.*

12 Kwathi sekusele amalanga ayisithupha ukuthi kube liPhasika, uJesu wafika eBhethani lapho okwakuhlala khona uLazaro,+ indoda ayeyivuse kwabafileyo. 2 Bamenzela idili lantambama njalo uMatha nguye owayebalungisela ukudla.+ LoLazaro wayekhona kwababesidla laye. 3 UMariya wathatha amafutha anukelelayo ayingxenye yelitha,* inadi yoqobo edula kakhulu, wawathela enyaweni zikaJesu wasemesula ngenwele zakhe. Indlu yonke yanukelela.+ 4 Kodwa uJudasi Iskariyothi,+ omunye wabafundi bakhe owayesezamthengisa wathi: 5 “Kungani amafutha la anukelelayo engathengiswanga ngabodenariyu* abangu-300, imali yakhona yaphiwa abayanga?” 6 Lokhu wayengakukhulunyiswa yikuthi ulendaba labayanga kodwa wakutsho ngoba wayelisela futhi wayegcina ibhokisi lemali, ejayele ukutshontsha imali eyayifakwa kulo. 7 UJesu wathi: “Myekeleni akwenze lokhu ukuze alungiselele ilanga lokungcwatshwa kwami.+ 8 Abayanga lihlala lilabo+ kodwa mina alisoze lihlale lilami.”+

9 AmaJuda amanengi ezwa ukuthi uJesu wayekuleyondawo, asebuya lapho engalandanga yena kuphela kodwa ezobona loLazaro, lowo ayemvuse kwabafileyo.+ 10 Abaphristi abakhokhelayo babumba icebo lokuthi babulale laye uLazaro, 11 njengoba kunguye owayesenza ukuthi amaJuda amanengi abuye lapho futhi akholwe kuJesu.+

12 Ngelanga elilandelayo abantu abanengi ababebuye emkhosini bezwa ukuthi uJesu wayesiza eJerusalema. 13 Ngakho bathatha izingatsha zesihlahla selala baphuma besiyamhlangabeza, bememeza besithi: “Sicela umsindise! Ubusisiwe lowo oza ngebizo likaJehova.*+ Ibusisiwe iNkosi yako-Israyeli!”+ 14 UJesu wathi ethola idonkana wayigada wahlala phezu kwayo+ njengoba kubhaliwe ukuthi: 15 “Ungesabi ndodakazi yeZiyoni. Khangela! Inkosi yakho iza ihlezi phezu kwedonkana.”+ 16 Ekuqaliseni abafundi bakhe babengakuzwisisi lokhu kodwa uJesu wathi esekhazinyulisiwe,+ bakhumbula ukuthi okwakwenzakale kuye yikho kanye okwakubhaliwe mayelana laye.+

17 Abantu ababelaye lapho ebiza uLazaro ukuthi aphume ethuneni+ ngesikhathi emvusa kwabafileyo baqhubeka befakaza.+ 18 Lokhu ngokunye okwenza ukuthi abantu bamhlangabeze. Babezwile ukuthi wenze isimangaliso leso. 19 Yikho abaFarisi bakhuluma bodwa bathi: “Liyabona ukuthi aliyindawo ngento le. Khangelani! Umhlaba wonke usumlandela.”+

20 Phakathi kwalabo ababebuye emkhosini bezokhonza kwakulamaGrikhi. 21 AmaGrikhi la alanda uFiliphu+ owayedabuka eBhethisayida yeGalile athi: “Mnumzana, sicela ukubona uJesu.” 22 UFiliphu wasuka wayatshela u-Andreya, basebesiyatshela uJesu.

23 Kodwa uJesu wabaphendula wathi: “Isikhathi sokuthi iNdodana yomuntu ikhazinyuliswe sesifikile.+ 24 Ngiqinisile sibili ngithi kini, nxa uhlamvu lwengqoloyi lungazange luwele emhlabathini lufe, luhlala luluhlamvu olulodwa nje. Kodwa nxa lungafa+ luthela amabele amanengi. 25 Loba ngubani othanda impilo yakhe* uzayitshabalalisa, kodwa loba ngubani ozonda impilo yakhe*+ emhlabeni lo uzayilondoloza athole ukuphila okungapheliyo.+ 26 Nxa umuntu efuna ukuba yinceku yami, kangilandele. Lapho engikhona lenceku yami izakuba khonapho.+ Nxa umuntu efuna ukuba yinceku yami, uBaba uzamupha udumo. 27 Khathesi ngikhathazekile,+ pho ngithini? Baba ngisindisa kulelihora.+ Lanxa kunjalo, lokhu yikho okwenze ngafika kulelihora. 28 Baba khazimulisa ibizo lakho.” Kwasekuzwakala ilizwi+ livela ezulwini lisithi: “Ngilikhazimulisile futhi ngizaphinda ngilikhazimulise.”+

29 Abantu ababemi lapho balizwa ilizwi basebesithi kudume izulu. Abanye bathi: “Ingilosi ikhulume laye.” 30 UJesu wabaphendula wathi: “Ilizwi leli lizwakele ukuze lincede lina, hatshi mina. 31 Khathesi umhlaba lo uyahlulelwa, umbusi womhlaba+ uzaxotshwa.+ 32 Kodwa nxa mina sengiphakanyisiwe emhlabeni,*+ ngizadonsela yonke imihlobo yabantu kimi.” 33 Wayesitsho lokhu ukuze atshengise ukuthi wayezakufa njani+ esikhathini esiseduze nje. 34 Abantu basebemphendula bathi: “Thina sezwa eMthethweni ukuthi uKhristu uzahlala kuze kube nini lanini.+ Manje kungani usithi iNdodana yomuntu kumele iphakanyiswe?*+ Ingubani leyo Ndodana yomuntu?” 35 UJesu wasesithi: “Ukukhanya kuzakuba kini okwesikhatshana nje. Hambani liseselokukhanya ukuze ubumnyama bungalikhuleli. Loba ngubani ohamba emnyameni kakwazi ukuthi uyangaphi.+ 36 Nxa ukukhanya liseselakho, tshengisani ukuthi liyakukholwa ukukhanya ukuze libe ngamadodana okukhanya.”+

UJesu wathi esekhulume lokhu wasuka kubo wabacatshela. 37 Lanxa wenza izimangaliso ezinengi phambi kwabo, babengamkholwa 38 ukuze kugcwaliseke ilizwi lomphrofethi u-Isaya owathi: “Jehova,* ngubani osekukholiwe lokho abakuzwa ngathi?*+ Ngubani osevezelwe ingalo kaJehova?”*+ 39 Okwakusenza bangakholwa yilokho okwaphinda kwatshiwo ngu-Isaya lapho esithi: 40 “Wenze ukuthi amehlo abo angaboni lokuthi inhliziyo zabo zibe lukhuni, ukuze bangaboni ngamehlo abo, bangazwisisi ngezinhliziyo zabo futhi bangaphenduki ngibasilise.”+ 41 U-Isaya watsho izinto lezi ngoba wayibona inkazimulo yakhe wasekhuluma ngaye.+ 42 Loba kunjalo, ngitsho lababusi abanengi bakholwa kuye+ kodwa abazange bakuvume lokhu ngenxa yabaFarisi. Babesenzela ukuthi bangaxotshwa esinagogeni+ 43 ngoba babethanda inkazimulo yabantu ukwedlula inkazimulo kaNkulunkulu.+

44 UJesu waphakamisa ilizwi wathi: “Loba ngubani okholwa kimi, kakholwa kimi kuphela kodwa ukholwa lakulowo ongithumileyo,+ 45 njalo loba ngubani obona mina ubona lalowo ongithumileyo.+ 46 Ngibuye ngiyikukhanya emhlabeni+ ukuze wonke umuntu okholwa kimi angaqhubeki esemnyameni.+ 47 Kodwa nxa umuntu esizwa amazwi ami ayekele ukuwagcina, angimahluleli ngoba angilandanga ukuzokwahlulela umhlaba, ngalanda ukuzowusindisa.+ 48 Ukhona ozakwahlulela loba ngubani ongelandaba lami longamukeli amazwi ami. Ilizwi engilikhulumileyo yilo elizamahlulela ngelanga lokucina 49 ngoba angikhulumi lokho engizicabangela khona. Kodwa uBaba ongithumileyo nguye ongitshele ukuthi* ngithini lokuthi ngifundiseni,+ 50 njalo ngiyakwazi ukuthi lokho angitshele khona kunika ukuphila okungapheliyo.+ Yikho loba yikuphi engikukhulumayo, ngikukhuluma njengoba nje uBaba engitshelile.”+

13 UJesu wayevele ebathanda abangabakhe ababesemhlabeni futhi waqhubeka ebathanda kwaze kwaba sekucineni.+ Umkhosi wePhasika ungakafiki wayesekwazi ukuthi ihora lakhe lokuthi atshiye umhlaba lo aye kuYise+ laselifikile.+ 2 Ngalesosikhathi uDeveli wayesekufakile enhliziyweni kaJudasi Iskariyothi+ indodana kaSimoni ukuthi amthengise.+ UJesu labafundi bakhe babesidla ukudla kwantambama njalo 3 wayekwazi ukuthi uYise wayefake izinto zonke esandleni sakhe lokuthi yena wayevela kuNkulunkulu futhi wayesiya kuNkulunkulu.+ 4 Ngakho wasukuma besadla, wabeka eceleni izembatho zakhe zangaphandle. Wasethatha ithawulo wayithandela ekhalweni,+ 5 wathela amanzi enditshini waqalisa ukugezisa abafundi bakhe inyawo, ebathawula ngethawulo ayeyithandele. 6 Wathi esefike kuSimoni Phetro, uPhetro wathi kuye: “Nkosi, kambe ungangigezisa inyawo?” 7 UJesu wamphendula wathi: “Engikwenzayo awukuzwisisi khathesi, kodwa uzakuzwisisa ngemva kwezinto lezi.” 8 UPhetro wathi: “Awusoze ungigezise inyawo loba sekutheni.” UJesu wamphendula wathi: “Awulasabelo lami nxa ngingakugezisanga inyawo.”+ 9 USimoni Phetro wasesithi: “Nkosi ungangigezisi inyawo kuphela, ngigezisa lezandla lekhanda.” 10 UJesu wathi kuye: “Ogeze umzimba kadingi kugeziswa okunye futhi ngaphandle kwenyawo, uyabe esehlanzeke waphelela. Lina madoda lihlanzekile kodwa ayisini lonke elihlanzekileyo.” 11 Wayemazi umuntu owayezamthengisa+ yikho wathi: “Ayisini lonke elihlanzekileyo.”

12 Wathi eseqedile ukubagezisa inyawo wagqoka izembatho zakhe zangaphandle waphinda wahlala etafuleni wathi kubo: “Liyakuzwisisa yini lokhu engikwenze kini? 13 Lingibiza ngokuthi ‘Mfundisi’ langokuthi ‘Nkosi,’ njalo liqondile ngoba ngiyikho lokho.+ 14 Yikho nxa mina engiyiNkosi loMfundisi ngiligezise inyawo,+ lani kumele ligezisane* inyawo+ 15 ngoba ngilitshiyele isibonelo ukuze lani lenze njengoba ngenzile kini.+ 16 Ngiqinisile sibili ngithi kini, inceku kayinkulu kulenkosi yayo, lalowo othunyiweyo kamkhulu kulalowo omthumileyo. 17 Nxa lizazi izinto lezi lizathokoza lingazenza.+ 18 Angikhulumi ngani lonke, ngiyabazi engibakhethileyo. Kodwa lokhu kwenzakele ukuze kugcwaliseke okwatshiwo ngumbhalo othi:+ ‘Obesidla lami usengihlamukele.’*+ 19 Khathesi ngilitshela kungakenzakali ukuze nxa sekusenzakala likholwe ukuthi nginguye.+ 20 Ngiqinisile sibili ngithi kini, loba ngubani owemukela lowo engimthumileyo uyangemukela lami+ njalo loba ngubani ongemukelayo wemukela lalowo ongithumileyo.”+

21 UJesu wathi esekhulume amazwi la wakhathazeka emoyeni, wasefakaza esithi: “Ngiqinisile sibili ngithi kini, omunye wenu uzangithengisa.”+ 22 Abafundi baqalisa ukukhangelana bezibuza ukuthi wayengabe esitsho bani.+ 23 Omunye wabafundi, lowo owayethandwa nguJesu,+ wayehlezi eduze kwakhe. 24 USimoni Phetro wanqekuza ikhanda lakhe embiza, wathi kuye: “Akusitshele ukuthi ngubani akhuluma ngaye.” 25 Umfundi lo weyama esifubeni sikaJesu wathi kuye: “Nkosi, ngubani?”+ 26 UJesu waphendula wathi: “Ngulowo engizamnika ucezu lwesinkwa engizalutsheba.”+ Wathi esesitshebile isinkwa leso, wasinika uJudasi indodana kaSimoni Iskariyothi. 27 UJudasi uthe esesithethe isinkwa, uSathane wangena kuye.+ Ngakho uJesu wathi kuye: “Okwenzayo kwenze masinyane.” 28 Lanxa kunjalo, kakho kulabo ababesidla laye owayekwazi ukuthi kungani etsho njalo kuye. 29 Abanye baze bacabanga ukuthi njengoba uJudasi wayegcina ibhokisi lemali,+ uJesu wayesithi athenge ababezakufuna emkhosini kumbe anike abayanga imali. 30 Eqeda ukwamukela ucezu lwesinkwa wahle waphuma. Ngalesosikhathi kwasekusebusuku.+

31 UJudasi wathi esephumile, uJesu wathi: “Khathesi iNdodana yomuntu isikhazinyuliswa+ njalo uNkulunkulu usekhazinyuliswa ngayo. 32 NguNkulunkulu ozayikhazimulisa+ futhi uzayikhazimulisa masinyane. 33 Bantwana abathandekayo, ngiseselani okwesikhatshana. Lizangidinga, futhi njengoba ngatshela amaJuda ngathi, ‘Lapho engiyakhona ngeke libuye,’+ lani ngilitshela khonokho. 34 Ngilinika umlayo omutsha wokuthi lithandane. Thandanani+ ngendlela lami engilithande ngayo.+ 35 Nxa lithandana,+ abantu bonke bazakwazi ukuthi lingabafundi bami.”

36 USimoni Phetro wathi kuye: “Nkosi uyangaphi?” UJesu waphendula wathi: “Lapho engiyakhona ngeke ungilandele khathesi kodwa uzalandela ngokuhamba kwesikhathi.”+ 37 UPhetro wathi kuye: “Nkosi, kungani ngingeke ngikulandele khathesi? Ngizanikela ngempilo yami ngenxa yakho.”+ 38 UJesu waphendula wathi: “Utsho ukuthi uzanikela ngempilo yakho ngenxa yami? Ngiqinisile sibili ngithi kuwe, iqhude lingakakhali uzabe usungiphike kathathu.”+

14 “Inhliziyo zenu kazingakhathazeki.+ Kholwani kuNkulunkulu+ likholwe lakimi. 2 Endlini kaBaba kulezindawo ezinengi zokuhlala. Aluba bezingekho bengizalitshela. Ngiya khona ukuyalilungisela indawo.+ 3 Nxa sengihambile ngayalilungisela indawo ngizaphinda ngibuye njalo ngizalemukela ekhaya lami ukuze lapho engiyabe ngikhona lani libe khona.+ 4 Liyayazi indlela eya lapho engiyakhona.”

5 UTomasi+ wathi kuye: “Nkosi asikwazi ukuthi uyangaphi. Manje singayazi njani indlela?”

6 UJesu wasesithi kuye: “Mina ngiyindlela+ leqiniso+ kanye lokuphila.+ Akulamuntu ongeza kuBaba ngaphandle kokuthi eze ngami.+ 7 Ngabe lina madoda belingazi mina, belizamazi loBaba. Kusukela khathesi selimazi futhi selimbonile.”+

8 UFiliphu wathi: “Nkosi, sitshengise uYihlo sisuthiseke.”

9 UJesu wathi kuye: “Filiphu, utsho ukuthi awukangazi mina sengibe lani okwesikhathi eside kangaka? Loba ngubani ongibonileyo usembonile loBaba.+ Pho kungani usithi, ‘Sitshengise uYihlo’? 10 Alikholwa kanti ukuthi ngimunye loBaba lokuthi uBaba munye lami?+ Angilitsheli izinto engizicabangela zona,+ uBaba ohlala emunye lami nguye owenza imisebenzi yakhe. 11 Ngikholwani nxa ngilitshela ukuthi ngimunye loBaba lokuthi uBaba munye lami, kumbe likholwe ngenxa yemisebenzi yami.+ 12 Ngiqinisile sibili ngithi kini, lowo otshengisa ukuthi ulokholo kimi uzakwenza imisebenzi engiyenzayo futhi uzakwenza imisebenzi emikhulu ukwedlula le+ ngoba mina sengisiya kuBaba.+ 13 Kanti njalo loba yini eliyicela ngebizo lami ngizayenza ukuze uBaba akhazinyuliswe ngeNdodana.+ 14 Nxa lingacela loba yini ngebizo lami ngizayenza.

15 “Nxa lingithanda lizayilalela imilayo yami.+ 16 Ngizacela kuBaba futhi yena uzalinika omunye umsizi* ukuthi abe lani kuze kube nini lanini.+ 17 Uzalinika umoya weqiniso+ ongeke wemukelwe ngumhlaba ngenxa yokuthi umhlaba awuwuboni njalo awuwazi.+ Lina liyawazi ngoba ukini futhi uhlala ulani. 18 Angisoze ngilitshiye lizintandane,* ngiyabuya kini.+ 19 Ngesikhatshana nje umhlaba awusoze uphinde ungibone kodwa lina lizangibona,+ njalo lizaphila ngoba mina ngiyaphila. 20 Ngalelolanga lizakwazi ukuthi ngimunye loBaba lokuthi lina limunye lami kanye lokuthi mina ngimunye lani.+ 21 Loba ngubani olemilayo yami loyilalelayo nguye ongithandayo, njalo lowo ongithandayo uzathandwa nguBaba futhi lami ngizamthanda ngiziveze kuye.”

22 UJudasi+ (hatshi uJudasi Iskariyothi) wathi kuye: “Nkosi sekutheni usufuna ukuziveza kithi hatshi emhlabeni?”

23 UJesu wamphendula wathi: “Loba ngubani ongithandayo uzalilalela ilizwi lami.+ UBaba uzamthanda futhi sizabuya kulowomuntu sihlale laye.+ 24 Ongangithandiyo kawalaleli amazwi ami. Ilizwi elilizwayo ayisilo lami kodwa ngelikaBaba ongithumileyo.+

25 “Ngilitshele izinto lezi ngiseselani. 26 Kodwa umsizi,* umoya ongcwele uBaba azawuthumela ngebizo lami, uzalifundisa izinto zonke njalo ulikhumbuze konke engilitshele khona.+ 27 Ngilitshiyela ukuthula, ngilinika ukuthula kwami.+ Angiliniki ukuthula ngendlela umhlaba onika ngayo ukuthula. Inhliziyo zenu kazingakhathazeki futhi kazingapheli amandla ngokwesaba. 28 Lizwile ukuthi ngithe kini, ‘Ngiyahamba njalo ngizaphenduka kini.’ Aluba belingithanda belizathokoza ngokuthi ngiya kuBaba ngoba uBaba mkhulu kulami.+ 29 Ngilitshele lokhu kungakenzakali ukuze likholwe nxa sekusenzakala.+ 30 Angisoze ngiqhubeke ngikhuluma lani okunengi ngoba umbusi womhlaba+ uyeza futhi kalamandla phezu kwami.+ 31 Kodwa mina ngenza lokho uBaba angitshele khona+ ukuze umhlaba wazi ukuthi ngiyamthanda uBaba. Sukumani sihambe.

15 “Mina ngiyisihlahla samagilebisi seqiniso, uBaba yena ngumlimi. 2 Uyaziquma zonke ingatsha ezikimi ezingatheli izithelo njalo zonke ezithelayo uyazithena ukuze zihlanzeke besezithela izithelo ezinengi.+ 3 Lina selihlanzekile kudala ngenxa yelizwi engilitshele lona.+ 4 Hlalani limunye lami, lami ngizahlala ngimunye lani. Njengoba nje ugatsha lungeke luthele izithelo lulodwa ngaphandle kokuthi luqhubeke lusesihlahleni, lani ngeke lithele izithelo ngaphandle nxa lingaqhubeka limunye lami.+ 5 Mina ngiyisihlahla samagilebisi, lina lizingatsha. Loba ngubani ohlala emunye lami njalo lami ngimunye laye uzathela izithelo ezinengi+ ngoba nxa lingekho kimi ngeke lenze lutho ngitsho. 6 Lowo ongahlali emunye lami uyalahlwa njengogatsha awome. Abantu bayazibutha ingatsha lezo baziphosele emlilweni zitshe. 7 Nxa lihlala limunye lami futhi lamazwi ami ehlala ekini, celani loba yini eliyifisayo lizayiphiwa.+ 8 UBaba uyakhazinyuliswa nxa liqhubeka lithela izithelo ezinengi futhi litshengisa ukuthi lingabafundi bami.+ 9 Njengoba nje uBaba engithandile,+ lami ngilithandile. Hlalani lisethandweni lwami. 10 Nxa lingagcina imilayo yami ngizahlala ngilithanda, njengoba lami ngiyigcinile imilayo kaBaba wahlala engithanda.

11 “Ngilitshele lokhu ukwenzela ukuthi libe lenjabulo mina engilayo lokuthi injabulo yenu iphelele.+ 12 Nanku umlayo engilinika wona: Thandanani njengoba nje lami ngilithandile.+ 13 Kakho olothando olwedlula lolu, ukuthi umuntu anikele ngempilo yakhe ngenxa yabangane bakhe.+ 14 Lingabangane bami nxa lisenza engilitshela khona.+ 15 Angisalibizi ngokuthi liyizigqili ngoba isigqili asikwazi okwenziwa yinkosi yaso. Kodwa ngilibiza ngokuthi lingabangane bami ngoba sengilitshele zonke izinto engizizwe ngoBaba. 16 Alizange lingikhethe kodwa yimi engalikhethayo ngalibeka ukuthi liqhubeke lithela izithelo, lokuthi izithelo zenu zihlale zikhona ukuze loba yini eliyicela kuBaba ngebizo lami alinike yona.+

17 “Ngilinika umlayo lo ukuze lithandane.+ 18 Nxa umhlaba ulizonda, liyakwazi ukuthi waqala ngokuzonda mina ungakalizondi lina.+ 19 Ngabe belingabomhlaba, umhlaba ubuzathanda okungokwawo. Alisibo bomhlaba+ kodwa ngilikhethile emhlabeni, yikho umhlaba ulizonda.+ 20 Hlalani likhumbula ilizwi engalitshela lona elithi: Inceku kayinkulu kulenkosi yayo. Nxa bengihlukuluzile lani bazalihlukuluza,+ nxa belalele ilizwi lami bazalilalela lelenu. 21 Bazalenza zonke izinto lezi ngenxa yebizo lami ngoba abamazi lowo ongithumileyo.+ 22 Aluba angizange ngibuye ngazokhuluma labo, bebengasoze babe lesono.+ Kodwa khathesi abalaso isizatho sokuzigeza ngesono sabo.+ 23 Loba ngubani ongizondayo uzonda loBaba.+ 24 Ngabe bengingenzanga phakathi kwabo imisebenzi engakaze yenziwe ngomunye, bebengasoze babe lesono.+ Kodwa bangibonile bangizonda, bazonda loBaba. 25 Lanxa kunjalo, lokhu kwenzakele ukuze kugcwaliseke ilizwi elibhalwe eMthethweni wabo elithi: ‘Bangizonda ngingonanga lutho.’+ 26 Umsizi engizalithumela yena esuka kuBaba njalo ongumoya weqiniso+ ovela kuBaba uzafika afakaze ngami.+ 27 Ngemva kwalokho lani kumele lifakaze ngami+ ngoba belilami kusukela ekuqaleni.

16 “Ngilitshele lokhu ukuze lingakhubeki. 2 Abantu bazalixotsha esinagogeni.+ Isikhathi siyeza sibili lapho wonke umuntu olibulalayo+ ezabe ecabanga ukuthi wenza inkonzo engcwele kuNkulunkulu. 3 Kodwa okuzakwenza abantu benze izinto lezi yikuthi abazange bangazi mina kanye loBaba.+ 4 Lanxa kunjalo, ngilitshela lokhu ukuze nxa isikhathi sokuthi kwenzakale sifika, likhumbule ukuthi ngangilitshelile ngakho.+

“Angilitshelanga ngakho ekuqaleni ngoba ngangilani. 5 Khathesi sengisiya kulowo ongithumileyo+ kodwa kakho phakathi kwenu ongibuza ukuthi ngiyangaphi. 6 Inhliziyo zenu sezigcwele usizi ngenxa yalokho engilitshele khona.+ 7 Kungasenani ngiqinisile ngithi kini, ukuhamba kwami kunceda lina. Nxa ngingayekela ukuhamba, umsizi*+ kasoze abuye kini kodwa ngingahamba ngizalithumela yena. 8 Angabuya uzanika umhlaba ubufakazi obucacileyo mayelana lesono lokulunga kanye lokwahlulela. 9 Ubufakazi bokuqala bumayelana lesono+ ngoba umhlaba awukholwa kimi.+ 10 Obesibili bumayelana lokulunga ngoba ngiya kuBaba futhi alisoze libe lisangibona. 11 Obesithathu bona bumayelana lokwahlulela ngoba umbusi womhlaba lo wahlulelwe kudala.+

12 “Kusesekunengi okumele ngilitshele khona kodwa khathesi ngeke lenelise ukukuthwala. 13 Loba kunjalo nxa esefikile umsizi,* umoya weqiniso,+ uzalikhokhela alincedise ukuthi lizwisise lonke iqiniso ngoba kasoze akhulume okuvela kuye kodwa uzakhuluma akuzwayo, alitshele lezinto ezizayo.+ 14 Uzangikhazimulisa+ ngoba uzakwamukela okungokwami abeselitshela khona.+ 15 Zonke izinto uBaba alazo ngezami.+ Yikho ngithe umsizi wamukela okungokwami abeselitshela khona. 16 Ngesikhatshana nje alisoze libe lisangibona+ kodwa lizaphinda lingibone ngesikhatshana nje.”

17 Abanye abafundi bakhe basebebuzana besithi: “Kanti utshoni nxa esithi, ‘Ngesikhatshana nje alisoze libe lisangibona kodwa lizaphinda lingibone ngesikhatshana nje,’ lalapho esithi, ‘ngoba ngiya kuBaba’?” 18 Babelokhu besithi: “Utshoni nxa esithi, ‘ngesikhatshana nje’? Asikwazi ukuthi ukhuluma ngani.” 19 UJesu wayekwazi ukuthi bafuna ukumbuza, yikho wathi kubo: “Kanti libuzana lokhu ngoba ngithe kini: ‘Ngesikhatshana nje alisoze libe lisangibona kodwa lizaphinda lingibone ngesikhatshana nje’? 20 Ngiqinisile sibili ngithi kini, lizakhala lilile kodwa umhlaba wona uzathokoza, lizakuba losizi kodwa usizi lwenu luzatshintshwa lube yinjabulo.+ 21 Nxa owesifazana ebeletha uba losizi ngenxa yokuthi isikhathi sakhe siyabe sesifikile, kodwa nxa esebelethile kasabukhumbuli ubuhlungu obukhulu abekubo ngoba usethokoziswa yikuthi kulomuntu osezelwe emhlabeni. 22 Lani liphakathi kosizi khathesi kodwa ngizaphinda ngilibone. Inhliziyo zenu zizathokoza+ njalo kakho ozalithathela injabulo yenu. 23 Ngalelolanga alisoze lingibuze lowodwa umbuzo. Ngiqinisile sibili ngithi kini, uBaba uzalinika loba yini eliyicelayo+ ngebizo lami.+ 24 Alikaze licele lutho ngebizo lami kuze kube lamuhla. Celani lizakwamukela ukuze injabulo yenu iphelele.

25 “Ngilitshele lokhu ngisebenzisa imizekeliso. Isikhathi siyeza lapho engingasoze ngikhulume lani ngemizekeliso, kodwa ngizalitshela ngoBaba ngendlela ecacileyo. 26 Ngalelolanga lizacela kuBaba ngebizo lami. Angitsho ukuthi mina ngizalicelela kuBaba. 27 Phela uBaba uyalithanda kakhulu ngoba lina lingithandile+ futhi lakholwa ukuthi ngeza ngingummeli kaNkulunkulu.+ 28 Ngabuya emhlabeni ngingummeli kaBaba. Khathesi sengisuka emhlabeni, ngiya kuBaba.”+

29 Abafundi bakhe bathi: “Awuboni-ke! Khathesi usukhuluma ngendlela ecacileyo, awusasebenzisi imizekeliso. 30 Sesikwazi ukuthi wazi zonke izinto lokuthi akudingeki ukuthi umuntu akubuze. Ngenxa yalokho siyakholwa ukuthi wavela kuNkulunkulu.” 31 UJesu wabaphendula wathi: “Khathesi selikholwa yini? 32 Lalelani! Isikhathi siyeza futhi sesifikile lapho elizasabalala khona ngamunye wenu aye endlini yakhe, lingitshiye ngedwa.+ Kodwa angingedwa ngoba uBaba ulami.+ 33 Ngilitshele konke lokhu ukuze libe lokuthula ngenxa yami.+ Emhlabeni lizahlupheka kodwa wobani lesibindi! Mina ngiwunqobile umhlaba.”+

17 UJesu wathi esekhulume lokhu waphakamisa amehlo akhe wakhangela ezulwini wathi: “Baba, isikhathi sesifikile. Khazimulisa indodana yakho ukuze indodana yakho ikukhazimulise,+ 2 njengoba nje uyiphe amandla phezu kwabo bonke abantu+ ukuze ibaphe ukuphila okungapheliyo+ bonke obanike yona.+ 3 Ukuze bathole ukuphila okungapheliyo+ kumele bakwazi* wena onguwe wedwa uNkulunkulu weqiniso+ lalowo omthumileyo, uJesu Khristu.+ 4 Ngikukhazimulisile emhlabeni+ ngoba ngiwuqedile umsebenzi ongiphe wona.+ 5 Khathesi-ke Baba, ngikhazimulisa eceleni kwakho ngenkazimulo engangilayo ngiseceleni kwakho umhlaba ungakabi khona.+

6 “Sengenze ibizo lakho laziwa* ebantwini owangipha bona emhlabeni.+ Babengabakho wangipha bona njalo baligcinile* ilizwi lakho. 7 Khathesi sebekwazi ukuthi zonke izinto owangipha zona zivela kuwe 8 ngoba sengibatshelile amazwi owangitshela wona+ njalo bawamukele. Sebekwazi mhlophe ukuthi ngabuya ngingummeli wakho+ futhi bayakholwa ukuthi ungithumile.+ 9 Ngiyabacelela, angiceleli umhlaba kodwa ngicelela labo ongiphe bona ngoba bangabakho. 10 Konke okwami ngokwakho, lokwakho ngokwami.+ Sengikhazinyulisiwe kubo.

11 “Mina sengisiza kuwe, angisekho emhlabeni kodwa bona basemhlabeni.+ Baba Ongcwele, bakhangele+ ngenxa yebizo lakho ongiphe lona ukuze babe munye* njengoba nje lathi simunye.*+ 12 Ngiseselabo bengibakhangele+ ngenxa yebizo lakho ongiphe lona. Bengibavikela njalo kakho loyedwa wabo oselahlekile+ ngaphandle kwendodana yokubhujiswa,+ ukuze umbhalo ugcwaliseke.+ 13 Kodwa khathesi ngiza kuwe futhi ngikhuluma izinto lezi emhlabeni ukuze intokozo yami ipheleliswe kubo.+ 14 Ngibaphile ilizwi lakho kodwa umhlaba uyabazonda ngoba abasibo bomhlaba+ njengoba lami ngingayisuye womhlaba.

15 “Angiceli ukuthi ubasuse emhlabeni kodwa engikucelayo yikuthi ubakhangele ngenxa yomubi.+ 16 Ayisibo bomhlaba+ njengoba nje lami ngingayisuye womhlaba.+ 17 Bangcwelise* ngeqiniso,+ ilizwi lakho liliqiniso.+ 18 Ngibathumile emhlabeni njengoba lawe wangithuma emhlabeni.+ 19 Ngiyazingcwelisa ngenxa yabo ukuze labo bangcweliswe ngeqiniso.

20 “Kodwa angiceleli bona kuphela, ngicelela lalabo abazakuzwa ilizwi labo bakholwe kimi, 21 ukuze bonke babe munye+ njengoba wena Baba umunye lami, lami ngimunye lawe.+ Ngifuna babe munye lathi ukuze umhlaba ukholwe ukuthi ungithumile. 22 Ngibaphe inkazimulo onginike yona ukuze babe munye njengoba lathi simunye,+ 23 mina ngibe munye labo, lawe ube munye lami ukwenzela ukuthi bamanyane ngokupheleleyo. Lokhu kuzakwenza ukuthi umhlaba ukwazi ukuthi ungithumile lokuthi ubathandile njengoba nje ungithandile. 24 Baba, ngifuna ukuthi ongiphe bona babe lami lapho engikhona+ ukuze babone inkazimulo yami ongiphe yona ngoba wangithanda umhlaba ungakasungulwa.+ 25 Baba Olungileyo, umhlaba awukwazi sibili ukuthi wena ungubani,+ kodwa mina ngiyakwazi+ njalo labo sebekwazi ukuthi ungithumile. 26 Sengenze balazi ibizo lakho njalo ngizalenza laziwe+ ukuze uthando owangithanda ngalo lube kubo, lami ngibe munye labo.”+

18 UJesu wathi eseqedile ukukhuleka, waphuma labafundi bakhe badabula esigodini seKhidroni+ besiya kwenye insimu, bafika bangena kuyo.+ 2 UJudasi, lowo owayezamthengisa laye wayeyazi indawo leyo ngoba uJesu labafundi bakhe babejayele ukuhlangana kuyo. 3 Yikho uJudasi wafika ehamba leqembu lamasotsha kanye labalindi ababethunywe ngabaphristi abakhokhelayo labaFarisi. Babephethe izikhali lezibane.+ 4 UJesu wayekwazi konke okwakuzakwenzakala kuye, yikho wasondela kubo wathi: “Lidinga bani?” 5 Bamphendula bathi: “UJesu umNazaretha.”+ Wasesithi kubo: “Yimi.” UJudasi umthengisi wakhe laye wayemi khonapho.+

6 Kodwa uJesu wathi esithi kubo, “Yimi,” batshedela emuva bawela phansi.+ 7 Waphinda wababuza wathi: “Lidinga bani?” Bathi: “UJesu umNazaretha.” 8 UJesu wasesithi: “Ngilitshelile ukuthi yimi. Nxa lidinga mina, yekelani amadoda la ahambe.” 9 Lokhu kwenzakala ukuze kugcwaliseke amazwi awatshoyo athi: “Kubo bonke ongiphe bona angilahlekelwanga langoyedwa.”+

10 USimoni Phetro wayelenkemba, yikho wayihwatsha wagalela inceku yomphristi omkhulu wayiquma indlebe yesokudla.+ Inceku leyo kwakuthiwa nguMalikhusi. 11 Kodwa uJesu wathi kuPhetro: “Buyisela inkemba leyo esikhwameni sayo.+ Akufanelanga ngiyinathe yini inkomitsho uBaba anginike yona?”+

12 Amasotsha lenduna yamabutho kanye labalindi ababethunywe ngamaJuda bambamba uJesu bambopha. 13 Baqala bamusa ku-Anasi ngoba wayenguyisezala kaKhayifasi+ owayengumphristi omkhulu ngalowomnyaka.+ 14 UKhayifasi lo nguye owayecebise amaJuda ngokuthi kwakunceda wona ukuthi indoda eyodwa ifele abantu.+

15 USimoni Phetro lomunye umfundi balandela uJesu.+ Umfundi lo wayesaziwa ngumphristi omkhulu njalo wangena loJesu egumeni lomphristi omkhulu, 16 kodwa uPhetro yena wasala emi phandle emnyango.* Yikho umfundi lo owayesaziwa ngumphristi omkhulu waphuma wayakhuluma lomuntu owayelinde emnyango, wamngenisa uPhetro. 17 Intombazana eyincekukazi eyayilinde emnyango yathi kuPhetro: “Awusimfundi wendoda le nje wena?” Yena wathi: “Angisuye.”+ 18 Izinceku labalindi babesotha umlilo wamalahle ababewubasile ngoba kwakuqanda. Babemile bewugombolozele, loPhetro laye emi labo esotha umlilo.

19 Umphristi okhokhelayo wabuza uJesu ngabafundi bakhe langemfundiso yakhe. 20 UJesu wamphendula wathi: “Bengihlala ngikhuluma labantu egcekeni futhi ngifundisa esinagogeni lasethempelini,+ lapho wonke amaJuda abuthana khona. Angikhulumanga lutho ensitha. 21 Manje kungani ubuza mina? Buza labo abangizwa ngikhuluma. Bayakwazi engakutshoyo.” 22 UJesu esetsho njalo, omunye wabalindi owayemi khonapho wamtshaya ngempama ebusweni+ wathi: “Ungaphendula njalo umphristi okhokhelayo?” 23 UJesu wasesithi kuye: “Nxa engikukhulumileyo kungaqondanga tshono ukuthi ngiphambaniseni, kodwa nxa kuqondile ungitshayelani?” 24 U-Anasi wasemdlulisela kuKhayifasi umphristi omkhulu,+ elokhu ebotshiwe.

25 USimoni Phetro yena wayelokhu emile esotha umlilo. Bathi kuye: “Pho lawe awusimfundi wakhe?” Waphika wathi: “Angisuye.”+ 26 Enye inceku yomphristi omkhulu, eyayiyisihlobo sendoda eyayiqunywe indlebe nguPhetro+ yathi: “Kanti wena angizange ngikubone ulaye ensimini?” 27 Kodwa uPhetro waphinda waphika, iqhude lahle lakhala.+

28 Ekuseni kakhulu basuka loJesu kuKhayifasi bamusa esigodlweni sombusi.*+ Bona abazange bangene esigodlweni sombusi ukuze bangazingcolisi+ besebesehluleka ukudla iPhasika. 29 Ngakho uPhilathu waphuma wabalanda, wafika wathi: “Liyimangalela ngani indoda le?” 30 Bamphendula bathi: “Ngabe indoda le ibingayisiso sigangi, besingasoze siyilethe kuwe.” 31 UPhilathu wasesithi kubo: “Mthatheni lina limahlulele ngomthetho wenu.”+ AmaJuda athi: “Akukho emthethweni ukuthi sibulale umuntu.”+ 32 Lokhu kwenzakala ukuze kugcwaliseke ilizwi uJesu ayelitshilo eveza ukuthi wayezakufa njani.+

33 Ngakho umbusi uPhilathu waphinda wangena esigodlweni sakhe wabiza uJesu wathi kuye: “UyiNkosi yamaJuda yini?”+ 34 UJesu waphendula wathi: “Lokhu okubuzayo uzicabangele kumbe kulabantu abakutshele ngami?” 35 UPhilathu wathi: “NgingumJuda yini mina? Isizwe sakini labaphristi abakhokhelayo yibo abakulethe kimi. Kanti wena wenzeni?” 36 UJesu wasesithi:+ “UMbuso wami awusiwo walumhlaba.+ Aluba uMbuso wami ubungowalumhlaba, izinceku zami bezizakulwa ukuze nginganikelwa kumaJuda.+ Kodwa uMbuso wami wona awuveli lapha.” 37 UPhilathu wasesithi kuye: “Uyinkosi yini?” UJesu waphendula wathi: “Kunjengoba nje usitsho ukuthi ngiyinkosi.+ Ngazalelwa ukuthi ngizofakaza iqiniso+ futhi lokho yikho engakulandayo emhlabeni. Wonke umuntu osekela iqiniso uyalilalela ilizwi lami.” 38 UPhilathu wathi: “Kuyini iqiniso?”

Esetsho njalo waphinda waphuma waya kumaJuda wafika wathi kuwo: “Mina angitholi cala kuye.+ 39 Lijayele ukuthi ngilikhululele umuntu ngePhasika.+ Liyafuna yini ukuthi ngilikhululele iNkosi yamaJuda?” 40 Baphinda bamemeza bathi: “Sifuna uBharabha hatshi indoda le!” UBharabha lo wayeyisigebenga.+

19 UPhilathu wasesithi uJesu athathwe abhaxabulwe.+ 2 Amasotsha eluka umqhele wameva awufaka ekhanda lakhe, amgqokisa ijazi elalilombala oyibubende.*+ 3 Ayelokhu esiza kuye esithi: “Sabona wena* Nkosi yamaJuda!” Ayemtshaya langamampama ebusweni.+ 4 UPhilathu waphinda waphuma phandle wathi kumaJuda: “Khangelani! Sengimletha kini phandle ukuze likwazi ukuthi angiboni lutho aluphambanisileyo.”+ 5 UJesu wasephuma phandle egqoke umqhele wameva lejazi eliyibubende. UPhilathu wathi: “Khangelani! Nansi indoda!” 6 Abaphristi abakhokhelayo labalindi bathi bembona bamemeza besithi: “Kabethelwe esigodweni! Kabethelwe esigodweni!”+ UPhilathu wasesithi: “Mthatheni lina liyembulala,* mina angiboni lutho aluphambanisileyo.”+ 7 AmaJuda amphendula athi: “Thina silomthetho wethu futhi ngokwalowomthetho kumele afe+ ngoba uzenze indodana kaNkulunkulu.”+

8 UPhilathu wathi esizwa lokho wesaba kakhulu. 9 Waphinda wangena esigodlweni sakhe wathi kuJesu: “Ungowangaphi wena?” Kodwa uJesu kazange amphendule.+ 10 UPhilathu wasesithi: “Kanti awufuni ukukhuluma lami? Awukwazi yini ukuthi ngilamandla okukukhulula lawokukubulala?”* 11 UJesu wamphendula wathi: “Ubungeke ube lamandla phezu kwami ngabe ubungawaphiwanga evela phezulu. Yikho umuntu ongilethe kuwe elesono esikhulu kakhulu.”

12 Ngenxa yalokho uPhilathu waqhubeka ezama ukudinga indlela yokumkhulula. Kodwa amaJuda amemeza athi: “Nxa ungakhulula indoda le, uyabe ungayisuye mngane kaKhesari. Wonke umuntu ozenza inkosi uphikisana loKhesari.”+ 13 UPhilathu wathi esezwe amazwi la waphuma loJesu phandle wasehlala esihlalweni sokwahlulela endaweni egandelwe ngamatshe, ebizwa ngokuthi yi-Gabatha ngesiHebheru. 14 Kwakulilanga lokulungiselela+ iPhasika futhi kwakungaba lihora lesithupha.* UPhilathu wathi kumaJuda: “Khangelani inkosi yenu!” 15 Kodwa wona amemeza athi: “Mbulale! Mbulale! Kabethelwe esigodweni!” Yena wasesithi: “Ngibulale inkosi yenu yini?” Abaphristi abakhokhelayo baphendula bathi: “Asila enye inkosi ngaphandle kukaKhesari.” 16 Wasemdlulisela kubo ukuthi ayebulawa ngokubethelwa esigodweni.+

Ngakho bamthatha uJesu. 17 Wazithwalela isigodo sokuhlutshwa* waya endaweni ebizwa ngokuthi yiNdawo Yokhakhayi,+ ethiwa yi-Goligotha ngesiHebheru.+ 18 Bafika babethela uJesu esigodweni,+ ephahlwe ngamanye amadoda amabili.+ 19 UPhilathu wabhala amazwi la ebhakaneni: “UJesu UmNazaretha, INkosi YamaJuda.”+ Wasewafaka phezu kwesigodo sokuhlutshwa.* 20 AmaJuda amanengi awabala amazwi la ngoba indawo uJesu ayebethelwe kuyo yayiseduze leJerusalema futhi ayebhalwe ngesiHebheru lesiLathini lesiGrikhi. 21 Kodwa abaphristi abakhokhelayo bamaJuda bathi kuPhilathu: “Ungabhali ukuthi, ‘INkosi YamaJuda,’ bhala ukuthi yena wathi, ‘NgiyiNkosi YamaJuda.’” 22 UPhilathu waphendula wathi: “Engikubhalileyo ngikubhalile.”

23 Amasotsha athi esebethele uJesu esigodweni athatha izembatho zakhe zangaphandle azehlukanisa zaba zingxenye ezine, isotsha ngalinye lathola ingxenye eyodwa. Athatha lesembatho sakhe sangaphakathi kodwa sona sasingelamthungo, selukwe kusukela phezulu kusiya phansi. 24 Asekhuluma wodwa athi: “Asingasidabuli lesi kodwa asenzeni inkatho ukuze sibone ukuthi sizathathwa ngubani.”+ Lokhu kwenzakala ukuze kugcwaliseke umbhalo othi: “Behlukaniselana izembatho zami futhi benza inkatho babelana izigqoko zami.”+ Amasotsha azenza sibili izinto lezi.

25 Eduze kwesigodo sokuhlutshwa* uJesu ayebethelwe kuso kwakumi unina+ lodadewabo kanina, loMariya umkaKlophasi kanye loMariya Magadalena.+ 26 UJesu wathi ebona unina lomfundi ayemthanda+ bemi eduze, wathi kunina: “Mama, nansi indodana yakho!” 27 Wasesithi kumfundi ayemthanda: “Nangu unyoko!” Kusukela ngalesosikhathi umfundi lo wamthatha wayahlala laye emzini wakhe.

28 Ngemva kwalokhu, uJesu esekwazi ukuthi izinto zonke zasezenzakele wathi: “Sengomile.”+ Lokhu wakutsho ukuze umbhalo ugcwaliseke. 29 Khonapho kwakulembiza eyayigcwele iwayini elimunyu. Ngakho bathatha isipontshi esasigxanyuzwe ewayinini leli basifaka emhlangeni wehisophi,* basisondeza emlonyeni wakhe.+ 30 UJesu uthe eselinambithile iwayini elimunyu wathi: “Sengikwenzile konke!”+ Wasekhothamisa ikhanda wafa.+

31 Njengoba kwakuliLanga Lokulungiselela,+ amaJuda ayengafuni ukuthi ababethelwe ezigodweni zokuhlutshwa+ baqhubeke belapho ngeSabatha. (Phela lelo kwakuliSabatha elikhulu.)+ Yikho acela kuPhilathu ukuthi inyawo zabo zephulwe, izidumbu besezisuswa. 32 Amasotsha ephula inyawo zamadoda amabili ayebethelwe loJesu. 33 Athi efika kuJesu abona ukuthi wayesefile. Ngakho kawasazephulanga inyawo zakhe. 34 Kodwa elinye isotsha lamgwaza ngomkhonto emhlubulweni,+ kwaphuma igazi lamanzi. 35 Osefakaze lokhu ngulowo owakubonayo njalo ubufakazi bakhe buliqiniso. Uyakwazi ukuthi akukhulumayo kuliqiniso ukuze lani likholwe.+ 36 Izinto lezi zenzakala ukuze kugcwaliseke umbhalo othi: “Akusoze kwephulwe lelilodwa ithambo lakhe.”+ 37 Kanti njalo omunye umbhalo uthi: “Bazamkhangela lowo abamgwazileyo.”+

38 Ngemva kwalokhu uJosefa wase-Arimathiya owayengumfundi kaJesu kodwa ekufihla lokho ngoba esesaba amaJuda,+ wacela kuPhilathu ukuthi athathe isidumbu sikaJesu, uPhilathu wamvumela. Ngakho wafika wasithatha isidumbu.+ 39 Kwabuya loNikhodemu,+ indoda eyayike yalanda uJesu ebusuku. Wayethwele imure ehlanganiswe lenhlaba, ilesisindo esingaba ngamakhilogremu angu-30.+ 40 Bathatha isidumbu sikaJesu basigoqela ngamalembu elineni ayefakwe amakha,+ belandela umkhuba wamaJuda wokungcwaba. 41 Endaweni uJesu ayebulawelwe kuyo* kwakulensimu futhi ensimini le kwakulethuna elitsha+ okwakungakaze kungcwatshwe muntu kulo. 42 Ngakho bambeka lapho ngoba kwakulilanga lamaJuda lokulungiselela+ njalo ithuna lelo laliseduze.

20 Ngelanga lokuqala leviki, uMariya Magadalena wafika ethuneni ekuseni+ kusesemnyama, wabona ukuthi ilitshe lalisusiwe ethuneni.+ 2 Yikho wagijima waya kuSimoni Phetro lomunye umfundi, lowo owayethandwa nguJesu,+ wafika wathi kubo: “Sebeyithethe iNkosi bayisusa ethuneni,+ asazi ukuthi bayibeke ngaphi.”

3 UPhetro lomfundi lo basuka baya ethuneni. 4 Bagijima bobabili kodwa umfundi lowo wagijima watshiya uPhetro, wafika kuqala ethuneni. 5 Wakhothama walunguza phakathi, wasebona amalembu elineni ephansi+ kodwa kazange angene. 6 USimoni Phetro owayengemuva kwakhe wathi efika wangena ethuneni, wawabona amalembu elineni ephansi. 7 Ilembu elalikade lisekhanda lakhe lalingekho kwamanye amalembu kodwa laligoqiwe labekwa lodwa. 8 Umfundi owayefike kuqala ethuneni laye wangena, wabona futhi wakholwa. 9 Kodwa babengakawuzwisisi umbhalo othi kumele avuke kwabafileyo.+ 10 Abafundi basebesuka babuyela emizini yabo.

11 UMariya yena waqhubeka emi phandle duze kwethuna ekhala. Wakhothama elokhu ekhala, walunguza ethuneni 12 wabona izingilosi ezimbili+ ezazigqoke okumhlophe. Zazihlezi lapho isidumbu sikaJesu esasikade sikhona, enye ngasekhanda enye ngasenyaweni. 13 Zathi kuye: “Dadewethu ukhalelani?” Yena wathi: “Bathethe iNkosi yami, angazi ukuthi bayibeke ngaphi.” 14 Esetsho njalo watshibilika wabona uJesu emi khonapho, kodwa kananzelelanga ukuthi kwakunguye.+ 15 UJesu wathi kuye: “Dadewethu ukhalelani? Udinga bani?” UMariya wacabanga ukuthi ngumuntu osebenza ensimini, wathi kuye: “Mnumzana, nxa umthethe ngitshela ukuthi umbeke ngaphi ngiyemthatha.” 16 UJesu wasesithi: “Mariya!” Yena watshibilika wathi kuye ngesiHebheru: “Rabhoni!” (okutsho ukuthi, “Mfundisi!”) 17 UJesu wathi: “Yekela ukunginamathela ngoba angikayi kuBaba. Kodwa hamba uyetshela abafowethu+ uthi, ‘Ngiya kuBaba+ onguYihlo, loNkulunkulu wami+ onguNkulunkulu wenu.’” 18 UMariya Magadalena wasesiya kubafundi wafika wathi: “Ngiyibonile iNkosi!” Wabatshela lokuthi yayitheni kuye.+

19 Ngalelolanga ntambama, okwakulilanga lokuqala leviki, iminyango yalapho abafundi ababekhona yayikhiyiwe njengoba babesesaba amaJuda. UJesu wafika wama phakathi kwabo wathi: “Ukuthula akube kini.”+ 20 Esetsho njalo wabatshengisa izandla zakhe lomhlubulo wakhe.+ Abafundi bathaba bebona iNkosi.+ 21 UJesu waphinda wathi kubo: “Ukuthula akube kini.+ Ngiyalithuma+ njengoba loBaba wangithuma.”+ 22 Esekutshilo lokhu wabavuthela wathi: “Yamukelani umoya ongcwele.+ 23 Nxa lingaxolela loba ngubani, izono zakhe ziyabe sezithethelelwe, kodwa loba ngubani elingamxoleliyo, izono zakhe azithethelelwa.”

24 Kodwa uTomasi+ omunye wabaliTshumi Lambili owayebizwa ngokuthi liphahla, wayengekho kwabanye ngesikhathi uJesu efika. 25 Abanye abafundi bamtshela bathi: “Siyibonile iNkosi!” Kodwa yena wathi: “Angisoze ngikukholwe lokho ngaphandle ngize ngibone amanxeba ezipikili ezandleni zakhe, ngihlome umunwe wami phakathi kwawo ngifake lesandla sami emhlubulweni wakhe.”+

26 Ngemva kwensuku ezingu-8 abafundi babesendlini, loTomasi laye ekhona. Lanxa iminyango yayikhiyiwe, uJesu wangena wama phakathi kwabo wathi: “Ukuthula akube kini.”+ 27 Wasesithi kuTomasi: “Hloma umunwe wakho lapha, khangela izandla zami ufake lesandla sakho lapha emhlubulweni wami. Yekela ukuthandabuza ukholwe.” 28 UTomasi wasesithi: “Nkosi yami, Nkulunkulu wami!” 29 UJesu wathi kuye: “Usukholwa yini njengoba usungibonile? Bayathokoza abakholwa bengazange babone.”

30 UJesu wenza lezinye izimangaliso ezinengi phambi kwabafundi bakhe, ezingazange zibhalwe encwadinimgoqwa le.+ 31 Kodwa lezi zabhalwa phansi ukuze likholwe ukuthi uJesu unguKhristu iNdodana kaNkulunkulu, besekusithi ngokholo lolu lithole ukuphila ngebizo lakhe.+

21 Ngemva kwalokho uJesu waphinda waziveza* kubafundi bakhe eLwandle lweThibheriya. Nansi indlela aziveza ngayo: 2 KwakuloSimoni Phetro, loTomasi (owayebizwa ngokuthi liphahla),+ loNathaniyeli+ owayedabuka eKhana yeGalile, lamadodana kaZebhedi+ kanye labanye abafundi bakhe ababili. 3 USimoni Phetro wathi kubo: “Ngisayagola inhlanzi.” Bona bathi: “Sizahamba lawe.” Basebephuma bayangena esikepeni. Lanxa kunjalo ababambanga lutho ngalobobusuku.+

4 Kwathi sekuzakusa uJesu wafika wama ekhunjini kodwa abafundi abananzelelanga ukuthi kwakunguye.+ 5 UJesu wathi kubo: “Bantwana, lilakho yini ukudla?”* Baphendula bathi: “Hatshi!” 6 Wasesithi kubo: “Phoselani amanethi ngakwesokudla kwesikepe, lizabamba inhlanzi.” Lakanye bawaphosela kodwa behluleka ukuwadonsela esikepeni ngoba inhlanzi zazizinengi kakhulu.+ 7 Umfundi owayethandwa nguJesu+ wathi kuPhetro: “YiNkosi!” USimoni Phetro wathi esizwa ukuthi kwakuyiNkosi, wagqoka isembatho sakhe sangaphandle njengoba wayengagqokanga phezulu, wasebhudlukela elwandle. 8 Abanye abafundi bona beza ngesikepe esincane ababekuso, bedonsa inethi egcwele inhlanzi. Babengekho khatshana lekhunjini, kwakungaba ngamamitha angu-100* kuphela ukuyafika khona.

9 Bathi befika ekhunjini babona kulomlilo wamalahle, phezu kwawo kulenhlanzi lesinkwa. 10 UJesu wathi kubo: “Lethani ezinye inhlanzi elisanda kuzibamba.” 11 Yikho uSimoni Phetro wangena esikepeni wadonsela inethi ekhunjini. Yayigcwele inhlanzi ezinkulu ezingu-153. Lanxa zazizinengi kangako, inethi ayizange idabuke. 12 UJesu wasesithi kubo: “Buyani lizokudla.” Kakho loyedwa umfundi owaba lesibindi sokumbuza ukuthi ungubani ngoba babesazi ukuthi yiNkosi. 13 UJesu wathatha isinkwa wabapha, wabanika lenhlanzi. 14 Kwasekungokwesithathu+ uJesu ebonakala kubafundi bakhe esevusiwe kwabafileyo.

15 Bathi sebedlile ukudla kwekuseni, uJesu wathi kuSimoni Phetro: “Simoni ndodana kaJohane, uyangithanda yini ukwedlula lezi?” Waphendula wathi: “Ye Nkosi, uyakwazi ukuthi ngiyakuthanda kakhulu.” Yena wasesithi: “Nika amazinyane ami ukudla.”+ 16 Waphinda wathi kuye: “Simoni ndodana kaJohane, uyangithanda yini?” Waphendula wathi: “Ye Nkosi, uyakwazi ukuthi ngiyakuthanda kakhulu.” UJesu wasesithi: “Yelusa amazinyane ezimvu zami.”+ 17 Waphinda okwesithathu wathi: “Simoni ndodana kaJohane, uyangithanda kakhulu yini?” UPhetro wakhathazeka ngokuthi wayesembuza okwesithathu esithi: “Uyangithanda kakhulu yini?” Ngakho wathi kuye: “Nkosi, wena uyazazi zonke izinto, uyakwazi ukuthi ngiyakuthanda kakhulu.” UJesu wasesithi kuye: “Nika amazinyane ezimvu zami ukudla.+ 18 Ngiqinisile sibili ngithi kuwe, usesemutsha wawuzigqokela uzihambele lapho ofuna ukuya khona. Kodwa nxa usuluphele uzakwelula izandla zakho ugqokiswe ngenye indoda, ikuthwale ikuse lapho ongafuni khona.” 19 Lokhu wakutsho ukuze aveze indlela uPhetro ayezakufa ngayo, eyayizakhazimulisa uNkulunkulu. Esetsho njalo wathi kuye: “Qhubeka ungilandela.”+

20 UPhetro watshibilika wabona umfundi owayethandwa nguJesu+ elandela, lowo oweyama esifubeni sakhe besidla ukudla kwantambama wathi: “Nkosi ngubani ozakuthengisa?” 21 Yikho uPhetro wathi embona wathi kuJesu: “Nkosi, indoda le yona ke?” 22 UJesu wasesithi kuye: “Nxa kuyintando yami ukuthi aqhubeke ekhona ngize ngibuye, kulani lawe lokho? Wena qhubeka ungilandela.” 23 Yikho ilizwi lokuthi umfundi lo wayengasoze afe lamemetheka phakathi kwabazalwane. Kodwa uJesu katshongo ukuthi kasoze afe, wathi: “Nxa kuyintando yami ukuthi aqhubeke ekhona ngize ngibuye, kulani lawe lokho?”

24 Umfundi lo+ nguye ofakaza izinto lezi futhi nguye owazibhalayo, njalo siyakwazi ukuthi ubufakazi bakhe buliqiniso.

25 Kulezinto ezinengi ezenziwa nguJesu. Aluba zonke zabhalwa, ngibona angathi lomhlaba wawungeke ube lendawo eyeneleyo yokubeka izincwadimgoqwa zakhona.+