EYESIBILI KWABASEKHORINTE

1 Mina Phawuli, umphostoli kaKhristu uJesu ngentando kaNkulunkulu kanye lomfowethu uThimothi,+ ngibhalela ibandla likaNkulunkulu eliseKhorinte, labangcwele bonke abakuyo yonke i-Akhaya:+

2 Umusa omkhulu lokuthula okuvela kuNkulunkulu uBaba wethu laseNkosini uJesu Khristu akube kini.

3 Kadunyiswe uNkulunkulu uYise weNkosi yethu uJesu Khristu,+ uYise wesihawu esikhulu+ loNkulunkulu wenduduzo yonke,+ 4 osiduduza* kuzo zonke inhlupho* zethu+ ukuze senelise ukududuza abanye+ kuloba yiziphi inhlupho,* sibaduduza ngenduduzo esiyiphiwa nguNkulunkulu.+ 5 Njengoba nje inhlupho esikuzo ngenxa kaKhristu zizinengi kakhulu,+ lenduduzo esiyithola ngoKhristu layo inengi kakhulu. 6 Nxa sisehlelwa zinhlupho,* kwenza liduduzwe futhi lisindiswe. Nxa siduduzwa, lani lithola induduzo elinceda ukuthi liqinisele nxa lihlangana lenhlupho ezifanana lalezo esikuzo lathi. 7 Ithemba esilalo ngani alinyikinyeki ngoba siyakwazi ukuthi njengoba lihlupheka njengathi lizaduduzwa njengathi.+

8 Sifuna lizazi bafowethu inhlupho ezasehlelayo esabelweni sase-Asiya.+ Sasicindezelwe ngendlela ebuhlungu futhi engaphezu kwamandla ethu, okokuthi sasingasela qiniso lokuthi sizaqhubeka siphila yini.+ 9 Sasesizibona sigwetshelwe ukufa sibili. Kodwa lokhu kwenzakala ukuze singazithembi thina, sithembe uNkulunkulu+ ovusa abafileyo. 10 Wasikhulula engozini enkulu yokufa njalo uzasikhulula, futhi sithembele kuye ukuthi uzaqhubeka esikhulula.+ 11 Lani lingasinceda ngokuthandaza lisincengela+ ngoba nxa bebanengi abasithandazelayo, uNkulunkulu uyayizwa imithandazo yabo asincedise+ besekusenza ukuthi abanengi bambonge.

12 Esiziqhenya ngakho yikuthi imizwangedwa yethu iyasifakazela ukuthi emhlabeni lo, ikakhulu kini, besiziphatha ngendlela engcwele langobuqotho obuvela kuNkulunkulu, hatshi ngokuhlakanipha kwabantu+ kodwa ngomusa omkhulu kaNkulunkulu. 13 Konke esilibhalela khona liyenelisa ukukubala* lokukuzwisisa njalo ngilethemba lokuthi lizaqhubeka likuzwisisa ngokugcweleyo,* 14 njengoba abanye benu sebekuzwisisa ukuthi lilesizatho sokuziqhenya ngathi, njengoba nje lathi sizaziqhenya ngani ngosuku lweNkosi yethu uJesu.

15 Angikuthandabuzi lokho, yikho ngangihlose ukuqala ngize kini ukuze lithole ithuba lesibili lokuthokoza* 16 ngoba ngangivele ngifuna ukudlula ngilivakatshela sengisiya eMakhedoniya lokudlula kini sengivela khona, lina beselingiphelekezela okomangwana sengisiya eJudiya.+ 17 Kambe lokhu engangifuna ukukwenza ngangingakubona kuyinto encane yini? Nxa ngicabanga ukwenza okuthile ngicabanga ngendlela yabantu yini, okokuthi ngiyathi “Yebo, yebo” besengisithi “Hatshi, hatshi”? 18 Kodwa uNkulunkulu lingamthemba ngoba nxa sisithi “yebo” kini siyabe singatsho ukuthi “hatshi.” 19 Phela iNdodana kaNkulunkulu, uJesu Khristu, eyatshunyayelwa kini kusetshenziswa mina loSilivanu* loThimothi,+ ayizange ibe “nguyebo” ngapha “inguhatshi,” kodwa kuyo “uyebo” usebe “nguyebo.” 20 Kungelani lokuthi zingaki izithembiso zikaNkulunkulu, sezibe “nguyebo” ngayo.+ Ngakho ngayo iNdodana sithi “Ameni” kuNkulunkulu+ ukuze simkhazimulise. 21 Lanxa kunjalo, uNkulunkulu nguye oqinisekisa ukuthi thina lani singabakaKhristu futhi nguye owasigcobayo.+ 22 Uphinde wafaka uphawu lwakhe kithi,+ wasipha lesibambiso* salokho okuzayo, okutsho umoya ongcwele+ osenhliziyweni zethu.

23 UNkulunkulu angangifakazela ukuthi angikabuyi eKhorinte ngoba angifuni ukulizwisa ubuhlungu. 24 Kangitsho ukuthi singababusi bokholo lwenu+ kodwa sisebenza lani ukuze lithokoze ngoba limi ngokholo lwenu.

2 Sengikhethe ukuthi lapho engizaphinda ngilivakatshele khona ngingalenzi lidane 2 ngoba nxa ngingalidanisa, ngizathokoziswa ngubani njengoba ngiyabe sengidanise labo okufanele bangithokozise? 3 Ngalibhalela lokho engakubhalayo ukuze kuthi nxa ngifika ngingadaniswa yilabo okumele bangithokozise ngoba ngileqiniso lokuthi okungithokozisayo kuyalithokozisa lani lonke. 4 Ngalibhalela ngiphakathi kosizi olukhulu lenhliziyo yami ibuhlungu, ngikhala ezimathonsi. Ngangingahlosanga ukulidanisa+ kodwa ngangifuna ukulitshengisa ukuthi ngiyalithanda kakhulu.

5 Nxa kulomuntu owenze into edanisayo,+ kadanisanga mina, udanise lina lonke. Kodwa angifuni ukukhuluma lokhu ngamazwi abuhlungu. 6 Indlela le akhuzwe ngayo ngabanengi imlingene umuntu lo. 7 Khathesi sekumele limthethelele ngesihle njalo limduduze+ ukuze angakhulelwa yikudana kakhulu.+ 8 Ngakho ngilikhuthaza ukuthi limqinisekise ukuthi liyamthanda.+ 9 Okunye okwenza ngalibhalela yikuthi ngangifuna ukubona ukuthi liyalalela yini ezintweni zonke. 10 Loba ngubani elimthethelelayo kungelani lokuthi woneni, lami ngiyamthethelela. Lowo engimthetheleleyo (nxa ekhona onjalo), ngimthethelele ngenxa yenu phambi kukaKhristu 11 ukuze singaqilwa nguSathane+ ngoba siyawazi amacebo akhe.*+

12 Ngathi ngifika eTrowa+ ngizotshumayela izindaba ezinhle ngoKhristu, ngavulelwa umnyango emsebenzini weNkosi, 13 kodwa umoya wami awuzange uhlaliseke ngoba angimtholanga uThithusi+ umfowethu. Yikho ngabavalelisa abazalwane ngaya eMakhedoniya.+

14 Lanxa kunjalo kabongwe uNkulunkulu ohlala esikhokhela njengamabutho avela nqoba empini ehamba loKhristu njalo osebenzisa thina ukuthi siluhaze yonke indawo ulwazi oluphathelane laye olunjengoqhatshi olumnandi. 15 KuNkulunkulu siluqhatshi olumnandi lukaKhristu oluphakathi kwabasindiswayo laphakathi kwalabo ababhubhayo. 16 Kwababhubhayo siliphunga lokufa eliletha ukufa,+ kwabasindiswayo siluqhatshi olumnandi lokuphila oluletha ukuphila. Ngubani ofaneleyo ukwenza izinto lezi? 17 Yithi ngoba asilithengisi ilizwi* likaNkulunkulu+ njengabanengi kodwa sikhuluma ngobuqotho bonke phambi kukaNkulunkulu simunye loKhristu, njengoba sithunywe nguNkulunkulu.

3 Sesizethula kutsha yini kini? Kanti lathi njengabanye abantu sekumele sibe lezincwadi zokusikhulumela kini kumbe lezo ezivela kini? 2 Lina liyincwadi yethu+ ebhalwe ezinhliziyweni zethu, eyaziwayo futhi ebalwa ngabantu bonke 3 ngoba kuyazikhanyela ukuthi liyincwadi kaKhristu ebhalwe yithi izinceku zikaNkulunkulu.+ Ibhalwe ngomoya kaNkulunkulu ophilayo hatshi nge-inki njalo ayibhalwanga ematsheni+ kodwa ibhalwe ezinhliziyweni.+

4 NgoKhristu silesibindi sokutsho lokhu phambi kukaNkulunkulu. 5 Ayisikho ukuthi thina yithi esizenza sibe ngabafaneleyo ukwenza umsebenzi lo kodwa nguNkulunkulu osenza sifanele ukuwenza.+ 6 Nguye osenze safanela ukuba yizinceku zesivumelwano esitsha,+ hatshi ezoMthetho obhaliweyo+ kodwa ezomoya ngoba uMthetho obhaliweyo ulesigwebo sokufa+ kodwa umoya wona uyaphilisa.+

7 Nxa uMthetho oletha ukufa owawubhalwe ematsheni+ weza ngenkazimulo eyayinkulu okokuthi abantu bako-Israyeli behluleka ukukhangela ubuso bukaMosi ngenxa yenkazimulo eyayisebusweni bakhe,+ inkazimulo eyayizasuswa, 8 kuyini okungenza ukuthi lokho umoya okwenzayo+ kungabi lenkazimulo enkulu kulaleyo?+ 9 Nxa uMthetho ogweba abantu ukuthi bafe+ wawulenkazimulo,+ kutsho ukuthi inkonzo eletha ukulunga yona ilenkazimulo enkulu kakhulu!+ 10 Phela lalokho okwakulenkazimulo sekuyithathelwe leyonkazimulo ngenxa yenkazimulo enkulu kulakho+ 11 ngoba nxa okwakuzasuswa kweza ngenkazimulo,+ kutsho ukuthi okukhona khathesi kulenkazimulo enkulu kakhulu!+

12 Silenkululeko enkulu yokukhuluma njengoba silethemba elinjalo+ 13 futhi kasenzi njengoMosi owayevala ubuso bakhe ngeveyili+ ukuze abantu bako-Israyeli bangaqhubeki bekhangele ukuthi okwakuzasuswa kwakuzaphetha ngani. 14 Kodwa ingqondo zabo zazibuthundu.+ Kuze kube khathesi, iveyili leyo iqhubeka ibavalile nxa kubalwa isivumelwano esidala+ ngoba isuswa ngoKhristu kuphela.+ 15 Kuze kube lamuhla, nxa kubalwa imibhalo kaMosi+ inhliziyo zabo ziyabe zivalwe ngeveyili.+ 16 Kodwa iveyili leyo iyasuswa+ emuntwini nxa ephendukela kuJehova.* 17 UJehova* unguMoya+ futhi lapho okulomoya kaJehova* kulenkululeko.+ 18 Sonke esilobuso obungavalwanga ngeveyili sitshengisa inkazimulo kaJehova* njengezibuko, siguqulwa sisiba ngumfanekiso munye, inkazimulo yethu iqhubeke isanda,* njengoba nje uJehova* efuna kube njalo, yena onguMoya.*+

4 Njengoba silenkonzo le ngenxa yokuthi senzelwa isihawu, asikhalali. 2 Kodwa sesilahle izinto ezilihlazo ezenziwa ensitha njalo asihambi ngobuqili futhi asilitshili ilizwi likaNkulunkulu.+ Senza iqiniso likhanye, sitshengisa ukuthi esikwenzayo kuqondile phambi kukaNkulunkulu ukuze yonke imizwangedwa yabantu ikunanzelele lokho.+ 3 Nxa izindaba ezinhle esizitshumayelayo zifihliwe,* zifihlelwe labo ababhubhayo, 4 abantu abangakholwayo labo unkulunkulu womumo lo wezinto*+ asevale ingqondo zabo ukuthi bangaboni,+ ukuze kungakhanyi+ kubo ukukhanya kwezindaba ezinhle ezikhazimulayo ezimayelana loKhristu ongumfanekiso kaNkulunkulu.+ 5 Nxa sitshumayela, asikhulumi okumayelana lathi kodwa sikhuluma ngokuthi uJesu Khristu uyiNkosi langokuthi thina siyizinceku zenu ngenxa kaJesu 6 ngoba uNkulunkulu nguye owathi: “Ukukhanya akukhanye emnyameni.”+ Kanti njalo usekhanyise inhliziyo zethu+ ngolwazi olukhazimulayo olumayelana laye esebenzisa ubuso bukaKhristu.

7 Silegugu leli+ embizeni* zebumba+ ukuze amandla amakhulu futhi angajayelekanga avele kuNkulunkulu hatshi kithi.+ 8 Siyacindezelwa ngazo zonke izindlela kodwa asibandezelwanga, siswela lokuthi senzeni kodwa akutsho ukuthi kayikho ngitsho indlela yokuphuma.*+ 9 Siyahlukuluzwa kodwa asilahlwanga,+ siwiselwa phansi kodwa asibhujiswa.+ 10 Siyaqinisela* zikhathi zonke lanxa sisezingozini zokubulawa ezinjengalezo ezehlela uJesu+ ukuze siphile impilo enjengekaJesu.* 11 Thina esiphilayo sihlala sikhangelane lokufa+ ngenxa kaJesu, ukuze siphile impilo enjengekaJesu.* 12 Sihlala sikhangelane lokufa sibili kodwa lokho kwenza lina lithole ukuphila.

13 Kubhaliwe ukuthi: “Ngangilokholo yikho ngakhuluma.”+ Lathi sitshengisa ukuthi silomoya lo wokholo yikho sikhuluma, 14 sisazi ukuthi lowo owavusa uJesu uzasivusa lathi ukuze siyekuba loJesu njalo uzasethula phambi kwakhe silani.+ 15 Izinto zonke lezi zenzelwa lina ukuze umusa omkhulu uqhubeke usanda. Okwenza wande yikuthi abanengi bayambonga uNkulunkulu, abesekhazinyuliswa.+

16 Yikho-ke asikhalali. Lanxa umuntu esinguye ngaphandle esiba buthakathaka, umuntu esinguye ngaphakathi wenziwa abe mutsha nsuku zonke. 17 Ukuhlupheka* ngokwesikhatshana futhi akutsho lutho kodwa kusenza sithole inkazimulo enkulu okumangalisayo* njalo ehlala kuze kube nini lanini.+ 18 Ngakho amehlo ethu siwathi nhlo ezintweni esingaziboniyo+ hatshi kwesizibonayo ngoba izinto esizibonayo ngezesikhatshana kodwa esingaziboniyo zihlala kuze kube nini lanini.

5 Siyakwazi ukuthi nxa itende leli eliyindlu yethu yasemhlabeni lingadilika,+ sizakuba lesakhiwo esivela kuNkulunkulu, esiyindlu engenziwanga ngezandla+ ezahlala kuze kube nini lanini ezulwini. 2 Endlini le siyabubula sibili, sifisa kakhulu ukungena endlini* yethu evela ezulwini,+ 3 ukuze nxa sesingene kuyo singatholakali singelandawo yokuhlala.* 4 Thina esisetendeni leli siyabubula futhi sikhathazeke kakhulu ngoba asifuni ukutshiya indlu le esilayo lanxa sifuna ukungena kule* enye+ ukuze okufayo kuginywe yikuphila.+ 5 UNkulunkulu owasinika umoya ukuthi ube yisibambiso* sokuzayo+ nguye osilungiselele lokho.+

6 Ngakho sihlala silesibindi njalo siyakwazi ukuthi nxa ikhaya lethu lisesengumzimba lo kasikho ndawonye leNkosi+ 7 ngoba sihamba ngokholo hatshi ngokubona. 8 Kodwa silesibindi njalo sifisa ukuthi ikhaya lethu libe lapho iNkosi ekhona+ kulokuthi sibe semzimbeni lo. 9 Yikho kungelani lokuthi sihlala laye ekhaya loba asilaye, sifuna ukwamukeleka kuye 10 ngoba sonke kumele sime* phambi kwesihlalo sokwahlulela sikaKhristu ukuze ngamunye aphiwe lokho okufanele izinto ayezenza esesemzimbeni lo, kungaba ngokuhle kumbe ngokubi.+

11 Yikho-ke njengoba sisazi ukuthi kutshoni ukwesaba iNkosi, siqhubeka sisenza ukuthi abantu basikholwe, kodwa thina uNkulunkulu usazi kuhle. Lanxa kunjalo, ngilethemba lokuthi lemizwangedwa yenu isazi kuhle. 12 Asifuni ukuphinda sizincome phambi kwenu kodwa silinika isizatho sokuthi lizigqaje ngathi ukuze lenelise ukuphendula labo abazigqaja ngesimo sangaphandle+ hatshi ngokusenhliziyweni. 13 Nxa kuyikuthi besiphambene,+ besisenzela uNkulunkulu kodwa nxa kuyikuthi ingqondo zethu zisebenza kuhle, senzela lina. 14 Uthando lukaKhristu luyasifuqa ngoba nanku esesiphethe ngakho: Umuntu oyedwa wafela bonke+ njengoba bonke basebefile. 15 Wafela abantu bonke ukuze abaphilayo bangasaziphileli bona+ kodwa baphilele lowo owabafelayo waphinda wavuswa.

16 Ngakho kusukela khathesi akulamuntu esimahlulela ngalokho esikubonayo kuphela.+ Kanti njalo nxa uKhristu sasimbona ngendlela le, khathesi asisamboni njalo.+ 17 Yikho-ke loba ngubani omanyene loKhristu uyindalo entsha.+ Izinto ezindala sezadlula, sekulezinto ezintsha. 18 Kodwa izinto zonke zivela kuNkulunkulu owasibuyisela kuye ngoKhristu+ njalo wasinika inkonzo yokubuyisana,+ 19 okutsho ukuthi uNkulunkulu wasebenzisa uKhristu ukuthi abuyisane lomhlaba,+ engasawubaleli amacala awo+ futhi wasiphathisa ilizwi lokubuyisana.+

20 Ngakho singabameli+ abasesikhundleni sikaKhristu+ njalo kungathi uNkulunkulu uyancenga esebenzisa thina. Njengoba sisesikhundleni sikaKhristu siyancenga sithi: “Buyisanani loNkulunkulu.” 21 Lowo owayengasazi isono+ wenziwa waba ngumhlatshelo wezono zethu* ukuze ngaye sibe ngabalungileyo phambi kukaNkulunkulu.+

6 Njengoba sisebenza loNkulunkulu,+ siyalikhuthaza ukuthi lingathi selamukele umusa wakhe omkhulu beselilahlekelwa yinhloso yawo.+ 2 Yena uthi: “Ngesikhathi sokwamukelwa ngakuzwa, ngakunceda ngelanga lensindiso.”+ Zwanini! Khathesi yiso kanye isikhathi sokwamukelwa! Leli yilo ilanga lensindiso!

3 Kasenzi izinto ezingakhuba abanye ukuze inkonzo yethu ingasolwa.+ 4 Sitshengisa ngezindlela zonke ukuthi siyizikhonzi zikaNkulunkulu:+ Saqinisela ezilingweni ezinengi, lekuhluphekeni, lezikhathini zokuswela lasebunzimeni.+ 5 Satshaywa, safakwa emajele,+ savukelwa ngabantu futhi sasebenza nzima. Sasingalali ebusuku njalo kwezinye izikhathi sasiswela ukudla.+ 6 Simsulwa, silolwazi, siyabekezela,+ silomusa,+ silomoya ongcwele futhi silothando lweqiniso.+ 7 Sikhuluma iqiniso, sithembele emandleni kaNkulunkulu,+ sithwala izikhali zokulunga+ esandleni sokudla* lakwesenxele.* 8 Silenkazimulo lehlazo, siyachothozwa njalo siyanconywa. Bathi singamaqili kodwa thina sikhuluma iqiniso, 9 bathi kasaziwa kodwa siyaziwa, bathi siyafa* kodwa nanko siyaphila!+ Bathi siyajeziswa* kodwa kasibulawa,+ 10 bathi sisosizini kodwa sihlala sithokoza, bathi siyadubeka kodwa sinothisa abanengi, bathi asilalutho kodwa silezinto zonke.+

11 Sivule imilomo yethu ukuze sikhulume lani* bantu beKhorinte njalo inhliziyo zethu sizivule ngokupheleleyo. 12 Silipha lonke uthando lwethu, asincitshani.+ Kodwa lina alisithandi kangako, liyancitshana lothando lwenu. 13 Ngikhuluma lani angathi lingabantwabami ngisithi yenzani njengathi, lizivule ngokupheleleyo inhliziyo zenu.+

14 Lingabotshelwa ejogweni linye* labangakholwayo.+ Kulobudlelwano bani phakathi kokulunga lobubi?+ Kulokuhambelana bani phakathi kokukhanya lobumnyama?+ 15 Kanti kulokuvumelana bani phakathi kukaKhristu loBheliyali?*+ Kulokuhambelana bani* phakathi komuntu okholwayo lomuntu ongakholwayo?+ 16 Kulokuvumelana bani phakathi kwethempeli likaNkulunkulu lezithombe?+ Phela thina silithempeli likaNkulunkulu ophilayo,+ njengoba nje uNkulunkulu wathi: “Ngizahlala phakathi kwabo+ ngihambe phakathi kwabo futhi ngizakuba nguNkulunkulu wabo, bona babe ngabantu bami.”+ 17 “‘Yikho phumani kubo, lehlukane labo,’ kutsho uJehova,* ‘njalo lingathinti into engcolileyo’”;+ “‘mina ngizalamukela.’”+ 18 “‘Ngizakuba nguyihlo+ lina libe ngamadodana lamadodakazi ami,’+ kutsho uJehova* uSomandla.”

7 Njengoba silezithembiso lezi+ bathandekayo, asizihlambululeni ezintweni zonke ezingcolisa umzimba* lomoya,+ siphelelise ubungcwele bethu, sitshengisa ukuthi siyamesaba uNkulunkulu.

2 Sivuleleni inhliziyo zenu.+ Kasonelanga muntu, kasixhwalisanga muntu njalo kakho esimqilileyo.+ 3 Lokhu angikukhulumeli ukuthi ngilisole njengoba ngike ngalitshela ukuthi lisezinhliziyweni zethu ukuze siphile sonke futhi sife sonke. 4 Ngikhuluma lani ngikhululekile njalo ngiyazigqaja kakhulu ngani. Ngiduduzeke kakhulu futhi intokozo yami iyaphuphuma lanxa sihlupheka.+

5 Sathi sifika eMakhedoniya+ imizimba* yethu kayizange ike iphumule. Saqhubeka sihlupheka ngazo zonke izindlela, sihlaselwa ngaphandle, ngaphakathi kulokwesaba. 6 Lanxa kunjalo, uNkulunkulu oduduza abalenhliziyo ezidabukileyo+ wasiduduza ngokuba khona kukaThithusi. 7 Kodwa asiduduzwanga yikuba khona kwakhe kuphela, saduduzwa layinduduzo ayithola ngenxa yenu njengoba wasitshela ukuthi lalifisa kakhulu ukungibona lokuthi lalihlulukelwe futhi likhathazeke* kakhulu ngami. Lokhu kwengezelela intokozo yami.

8 Lanxa incwadi yami yalidanisa+ angizisoli ngakho. Ekuqaliseni ngazisola sibili (ngibona ukuthi incwadi yami ilizwise ubuhlungu lanxa kwakungokwesikhatshana nje), 9 kodwa okungithokozisayo khathesi kayisikho ukuthi ladana kuphela kodwa yikuthi ukudana kwenu kwabangela ukuthi liphenduke. Ukudana kwenu kwakuvumelana lentando kaNkulunkulu njalo kwenza ukuthi singalilimazi. 10 Phela ukudana okuvumelana lentando kaNkulunkulu kwenza umuntu aphenduke abesethola insindiso futhi angazisoli,+ kodwa ukudana komhlaba kuletha ukufa. 11 Khangelani ukuthi ukudana kwenu okuvumelana lentando kaNkulunkulu kwenza lazimisela njani: Latshengisa ukuthi alilasici, lathukuthela, lesaba kakhulu, lazimisela ukuphenduka, latshiseka sibili, laqondisa okwakungaqondanga!+ Kukho konke latshengisa ukuthi limsulwa* endabeni le. 12 Lanxa ngalibhalela, ngangingenzeli owayephambanisile+ kumbe owayephanjanisiwe kodwa ngangisenzela ukuthi kukhanye phakathi kwenu laphambi kukaNkulunkulu ukuthi lizama ngamandla wonke ukusilalela, 13 yikho siduduzekile.

Kodwa ngaphandle kokududuzeka kwethu, okunye okwasithokozisa kakhulu yintokozo kaThithusi ngoba lonke lamvuselela. 14 Phela ngangizigqaje ngani kuThithusi futhi kangizange ngiyangeke. Njengoba nje zonke izinto esalitshela zona zaziliqiniso, lokuzigqaja kwethu kuye sekube liqiniso. 15 Yena ulithanda kakhulu ngoba ukhumbula indlela elalimlalela ngayo lonke,+ limemukela ngokwesaba langokuqhuqha. 16 Kuyangithokozisa ukuthi ngingalithemba* ezintweni zonke.

8 Bafowethu, sifuna lazi ngomusa omkhulu kaNkulunkulu owenzelwe amabandla eMakhedoniya.+ 2 Lanxa abasemabandleni la babehlupheka, bephakathi kokulingwa okukhulu futhi bengabayanga bokucina, ukuthokoza kwabo okukhulu kwenza batshengisa ukuthi banothile ngenxa yokuphana kwabo okumangalisayo. 3 Banikela ngalokho ababelakho+ futhi ngiyabafakazela ukuthi benza okwakungaphezu kwamandla abo.+ 4 Bazikhethela baqhubeka besincenga kakhulu becela ukuthi babe lesibusiso sokupha ngesihle ukuze bancedise enkonzweni yokusiza abangcwele.+ 5 Benza okwakusedlula esasikucabanga, baqala ngokuzinikela eNkosini lakithi ngentando kaNkulunkulu. 6 Yikho sakhuthaza uThithusi+ ukuthi aqedise ukuqoqa isipho senu somusa, njengoba wayevele esewuqalisile umsebenzi lo. 7 Lina linothile ezintweni zonke, ekukholweni, lasemazwini, laselwazini, lasethandweni esilipha lona futhi lisebenza gadalala. Ngakho-ke nothani lasekupheni abanye izipho zomusa.+

8 Kangilibekeli mlayo kodwa ngilitshela lokhu ukuze likwazi ukuthi abanye bazimisele njalo ngifuna ukuhlola ukuthi uthando lwenu ngolweqiniso yini. 9 Liyawazi umusa omkhulu weNkosi yethu uJesu Khristu, ukuthi lanxa yayinothile yaba ngumyanga ngenxa yenu+ ukuze libe ngabanothileyo ngenxa yobuyanga bayo.

10 Lapha ngilitshela engikucabangayo:+ Umsebenzi lo uzalinceda njengoba lihle lawuqalisa ngomnyaka ophelileyo futhi latshengisa ukuthi lilesifiso sokuwenza. 11 Ngakho qedisani ebeselikuqalisile, likwenze litshiseka ngendlela elalitshiseka ngayo likuqalisa, kusiya ngokuthi khathesi lenelisa ukwenza okunganani. 12 Nxa umuntu elesifiso sokupha, siyamukeleka kakhulu kusiya ngalokho alakho+ hatshi ngalokho angelakho. 13 Angifuni ukulithwalisa nzima ngapha abanye ngibenzela kube lula. 14 Ngifuna kube lokulingana, inala elilayo khathesi ivale ukuswela kwabo, lenala yabo ivale ukuswela kwenu, besekusiba lokulingana, 15 njengoba nje kubhaliwe ukuthi: “Umuntu olokunengi kazange abe lokunengi kakhulu, lalowo olokulutshwana kazange abe lokulutshwana kakhulu.”+

16 Kabongwe uNkulunkulu ngokuthi wenze loThithusi wakhathazeka kakhulu ngani enhliziyweni yakhe+ 17 ngoba usamukele isikhuthazo sethu. Kodwa ubevele efuna ukwenza esimcele khona yikho ezikhethele ukuza kini. 18 Simthuma lomfowethu obatshazwa ngamabandla wonke ngenxa yalokho akwenzela izindaba ezinhle. 19 Kenzi lokho kuphela kodwa lamabandla amkhethe ukuthi ahambe lathi nxa sihambisa isipho lesi somusa ukuze iNkosi ikhazinyuliswe njalo kukhanye ukuthi sizimisele ukuncedisa. 20 Yikho silwisa ukuthi kungabi lomuntu osisolayo ngesipho esisiphiwe ngenhliziyo emhlophe esisinika abantu+ 21 ngoba ‘kukho konke esikwenzayo sithembekile emehlweni kaJehova* lasemehlweni abantu.’+

22 Phezu kwalokho, abazalwane laba sibathuma lomunye umfowethu esimhlole kanengi sathola ukuthi ukhuthele ezintweni ezinengi kodwa khathesi usezakhuthala kakhulu ngenxa yokuthi uyalithemba sibili. 23 Nxa lilemibuzo ngoThithusi, yazini ukuthi uncedisana lami lokuthi sisebenza sonke ukuze silincede. Nxa lilemibuzo ngabafowethu, bona bangabaphostoli bamabandla futhi bayinkazimulo kaKhristu. 24 Ngakho batshengiseni ukuthi liyabathanda,+ litshengise lamabandla ukuthi sasizigqajelani ngani.

9 Akulasizatho sokuthi ngilibhalele ngenkonzo yokuncedisa abangcwele+ 2 ngoba ngiyakwazi ukuthi lizimisele ukukwenza lokho futhi ngizigqaja ngakho kwabaseMakhedoniya, ngibatshela ukuthi sekulomnyaka i-Akhaya ilungiselele ukuncedisa. Ukukhuthala kwenu sekukhuthaze abanengi babo. 3 Kodwa ngithuma abazalwane ukuze ukuzigqaja kwethu ngani endabeni le kungapheleli emoyeni njalo libe lilungiselele sibili njengoba ngangitshilo ukuthi lizabe lilungiselele. 4 Phela nxa lingenzanga njalo, ngizathi ngifika labaseMakhedoniya balithole lingalungiselelanga, besesiyangeka ngokuthi besilithembile, lani lisale liyangekile. 5 Yikho ngibone kungcono ukukhuthaza abafowethu ukuthi baqale bona ukuza kini, bazosiqoqa kuseselesikhathi isipho senu somusa elalisithembisile, ukuze kube yisipho esitshengisa ukuthi liyaphana, kungakhanyi angathi libanjwa ngamandla.

6 Kodwa endabeni le, loba ngubani ohlanyela okuncane uzavuna okuncane njalo loba ngubani ohlanyela okunengi uzavuna okunengi.+ 7 Ngamunye wenu kenze lokho akukhethileyo enhliziyweni yakhe, angenzi elensolo* loba ebanjwa ngamandla+ ngoba uNkulunkulu uthanda umuntu opha ethokoza.+

8 Phezu kwalokho, uNkulunkulu uyenelisa ukulithululela umusa wakhe omkhulu ukuze lingasweli lutho zikhathi zonke njalo libe lokunengi okuzalinceda ukuthi lenze yonke imisebenzi emihle,+ 9 (njengoba nje kubhaliwe ukuthi: “Uyaphana,* uphe abayanga. Ukulunga kwakhe kuzahlala kuze kube phakade.”+ 10 Yena opha umhlanyeli inhlanyelo enengi kanye lesinkwa sokudla uzalinika inhlanyelo ukuze lihlanyele futhi uzayandisa, angezelele isivuno senu sokulunga.) 11 UNkulunkulu uyalibusisa kukho konke ukuze liphane ngazo zonke izindlela njalo abantu bayambonga ngenxa yalokho esikwenzayo. 12 Phela inkonzo le yokuncedisa abanye kayisiyo yokusiza abangcwele ngezinswelo zabo+ nje kuphela kodwa yenza lokuthi abantu abanengi bambonge kanengi uNkulunkulu. 13 Bakhazimulisa uNkulunkulu ngenxa yobufakazi obuvezwa yinkonzo le yokusiza abanye ngoba lina liyazehlisa lenze lokho okutshiwo zindaba ezinhle ezimayelana loKhristu elazitshumayela ebantwini njalo lipha abangcwele labanye bonke okunengi.+ 14 Bayathandaza belincengela betshengisa ukuthi bayalithanda ngenxa yokuthi umusa omkhulu kaNkulunkulu ongeke ulinganiswe lalutho uphezu kwenu.

15 Kabongwe uNkulunkulu ngesipho sakhe samahala esihle okwamagama.*

10 Mina Phawuli ngiyalincenga ngomusa kaKhristu futhi ngimnene.+ Ngikhanya ngingumuntu ophansi nxa ngiphakathi kwenu+ kodwa olesibindi nxa engekho kini.+ 2 Ngicela ukuthi nxa ngifika kini kungadingeki ukuthi ngibe lesibindi ngicine sengibakhuza kabuhlungu labo abacabanga ukuthi siphila silandela izifiso zenyama. 3 Lanxa siphila njengabanye abantu, asilwi njengabantu bomhlaba* 4 ngoba izikhali zempi yethu kayisizo zabantu bomhlaba*+ kodwa zilamandla avela kuNkulunkulu+ okudiliza izinto eziqine njengezinqaba. 5 Sidiliza imicabango layo yonke into ephakemeyo ephikisana lolwazi oluphathelane loNkulunkulu+ njalo sithumba yonke imicabango ukuze siyenze ilalele uKhristu. 6 Nxa lina selilalela ngokugcweleyo, siyabe sesikulungele ukujezisa wonke umuntu oqhubeka engalaleli.+

7 Lahlulela izinto ngokuthi zikhangeleka njani. Nxa ekhona ozithembayo ukuthi yena ungokaKhristu, nanku okumele aphinde acabangisise ngakho: Lathi singabakaKhristu njengaye. 8 Lanxa ngingazigqaja kakhulu ngamandla esiwaphiwe yiNkosi okulakha hatshi awokulidiliza,+ angisoze ngiyangeke. 9 Kodwa angifuni kukhanye angathi bengifuna ukulethusa ngezincwadi zami 10 ngoba abanye bathi: “Izincwadi zakhe zilesisindo futhi zilamandla kodwa nxa ekhona uyadeleleka njalo akukhulumayo akuncedi.” 11 Umuntu otsho njalo kananzelele ukuthi esikutshoyo ezincwadini zethu* nxa singekho yikho esizakwenza* sesikhona.+ 12 Thina asisoze sizilinganise labaziphakamisayo kumbe siziqathanise labo.+ Kodwa nxa bezahlulela ngalokho abakucabangayo futhi beziqathanisa lalokho abazitshela ukuthi kuqondile, bayabe bengazwisisi.+

13 Lanxa kunjalo, thina asisoze sizigqaje sedlulele ngale kwemingcele ebekiweyo kodwa sizazigqaja phakathi kwemingcele yendawo uNkulunkulu asinike yona, enaba ize izofika lakini.+ 14 Nxa sisiza kini siyabe singeqi imingcele njengoba lani liphakathi kwemingcele leyo. Phela yithi esaba ngabokuqala ukufika kini lezindaba ezinhle eziphathelane loKhristu.+ 15 Kasizigqaji sedlulele ngale kwemingcele ebekiweyo ngokuzikhukhumeza ngemisebenzi yomunye umuntu kodwa silethemba lokuthi nxa ukholo lwenu luqhubeka lukhula, esikwenzileyo lakho kuzakhuliswa endaweni esitshumayela kuyo. Lapho-ke sizakwenelisa ukwenza okunengi, 16 ukuze sitshumayele izindaba ezinhle emazweni angale kwenu, ukwenzela ukuthi singazigqaji ngalokho osekuvele kwenziwe endaweni yomunye. 17 “Kodwa ozigqajayo kazigqaje ngoJehova,”*+ 18 ngoba ozincomayo kayisuye owamukelwayo,+ kwamukelwa lowo onconywa nguJehova.*+

11 Ngifisa ukuthi lingibekezelele lanxa ngikhanya ngingumuntu ongelangqondo kancane. Kodwa livele liyangibekezelela! 2 Ngilobukhwele ngani, ubukhwele obunjengobukaNkulunkulu ngoba yimi engathembisa ukulendisela endodeni eyodwa. Ngifuna ukulethula kuKhristu liyintombi egcweleyo futhi emsulwa.*+ 3 Kodwa ngiyesaba ukuthi kungenzeka ingqondo zenu ziphanjulwe njengo-Eva owahugwa yinyoka ngobuqili bayo,+ licine lisehluleka ukuba qotho kuKhristu lokuba msulwa kuye.+ 4 Liyambekezelela umuntu ofika etshumayela ngoJesu ongayisuye lowo esalitshumayeza ngaye njalo liyawamukela umoya otshiyene lalowo elawamukelayo. Lamukela lezindaba ezinhle ezitshiyene lalezo elazamukelayo.+ 5 Ngicabanga ukuthi kayikho lento eyodwa etshengisa ukuthi bangcono kulami abaphostoli benu laba abazenza abalunge kakhulu.+ 6 Ngingabe ngingayisilogabazi ekukhulumeni+ kodwa ulwazi ngilalo sibili. Lokhu sesikwenze kwacaca kini ngezindlela zonke.

7 Kanti ngenza isono yini ngokuzithoba ukuze lina liphakanyiswe? Phela ngatshumayela kini izindaba ezinhle zikaNkulunkulu ngithokoza futhi ngingalibhadalisi.+ 8 Kwakungathi ngiqila amanye amabandla ngokwamukela kuwo izinto engangiziswela ukuze ngisebenzele lina.+ 9 Loba kunjalo ngathi sengiswela ngesikhathi ngikini, kakho loyedwa engamthwalisa nzima ngoba abafowethu ababevela eMakhedoniya bangipha konke engangikuswela.+ Ngaba leqiniso lokuthi angilithwalisi nzima ngaloba yini futhi ngizaqhubeka ngisenza njalo.+ 10 Angisoze ngiyekele ukuzigqaja ngalokhu+ ezindaweni ezise-Akhaya nxa nje iqiniso likaKhristu lisesekimi. 11 Ngenxa yani? Ngenxa yokuthi angilithandi yini? UNkulunkulu uyakwazi ukuthi ngiyalithanda.

12 Kodwa engikwenzayo ngizaqhubeka ngikwenza+ ukuze abafuna ukukhanya belingana lathi ezintweni* abazigqaja ngazo baswele abangazigqaja ngakho 13 ngoba amadoda anjalo angabaphostoli bamanga njalo ayizisebenzi ezingamaqili ezizenza abaphostoli bakaKhristu.+ 14 Lokho akumangalisi ngoba loSathane ngokwakhe uqhubeka ezenza ingilosi yokukhanya.+ 15 Ngakho akusimangalisi ukuthi lezinceku zakhe ziqhubeka zizenza izinceku zokulunga. Loba kunjalo, isiphetho sazo sizakuba ngesifanele lokho ezikwenzayo.+

16 Ngiyaphinda futhi ngithi akungabi lomuntu ocabanga ukuthi kangilangqondo. Kodwa nxa kuyikho elikucabangayo, ngamukelani ngingumuntu ongelangqondo ukuze lami ngizigqaje kancane. 17 Engikutshoyo khathesi ngikukhuluma ngingalingiseli iNkosi kodwa ngikutsho njengomuntu ongelangqondo, ngizigqaja okomuntu ozithembayo. 18 Abanengi bazigqaja ngezinto zomhlaba, yikho lami ngizazigqaja. 19 Lina lizitshela ukuthi lilengqondo, manje kungani libekezelela abantu abangelangqondo? 20 Phela libekezelela loba ngubani olenza izigqili, lalowo olithathela izinto zenu, lolihluthunela elilakho, lozenza ongcono kulani kanye lalowo olitshaya ebusweni.

21 Engikutshoyo kuyangisa thina njengoba kungakhanya angathi senze njengabantu ababuthakathaka.

Kodwa nxa abanye belesibindi, lami ngilaso isibindi lanxa ngikhuluma njengomuntu ongelangqondo. 22 BangamaHebheru yini? Lami nginguye.+ Bangama-Israyeli yini? Lami nginguye. Bayizizukulwane zika-Abrahama yini? Lami ngiyiso.+ 23 Bayizikhonzi zikaKhristu yini? Ngiphendula njengohlanya, mina ngiyisikhonzi esingcono kakhulu kulabo: Ngenze umsebenzi omkhulu kulowabo,+ ngabotshwa kanengi kulabo,+ ngatshaywa kanengi kakhulu futhi ngaphosa ngafa izikhathi ezinengi.+ 24 Kahlanu ngatshaywa ngamaJuda inswazi ezingu-39,+ 25 ngatshaywa kathathu ngemiqwayi,+ ngakhandwa ngamatshe kanye,+ ngabhidlikelwa ngumkhumbi kathathu,+ ngaba phakathi kolwandle ubusuku bonke lelanga lonke, 26 bengisemangweni kanengi, lasezingozini emifuleni, lasezingozini zokuhlaselwa yizigebenga, lasezingozini ebantwini bakithi,+ lasezingozini kwabezizweni,+ lasezingozini edolobheni,+ lasezingozini enkangala, lasezingozini elwandle, lasezingozini kubazalwane bamanga 27 njalo bengisebenza gadalala ngingaphumuli, izikhathi ezinengi ngingalali ebusuku,+ ngilambile futhi ngomile,+ izikhathi ezinengi ngingelakudla,+ ngigodola njalo ngingela zigqoko.

28 Singasabali izinto lezi ezenzakala ngaphandle, nanku engikuzwa ngaphakathi kwami* nsuku zonke: Ngikhathazekile ngawo wonke amabandla.+ 29 Kambe ngubani ongaphela amandla lami ngingapheli amandla? Ngubani ongakhubeka mina ngingazondi?

30 Nxa kumele ngizigqaje, ngizazigqaja ngezinto ezitshengisa ukuthi ngibuthakathaka. 31 UNkulunkulu onguYise weNkosi uJesu, yena okufanele adunyiswe kuze kube nini lanini uyakwazi ukuthi kangiqambi manga. 32 EDamaseko umbusi* ongaphansi kweNkosi u-Arethasi wayelinde idolobho leDamaseko ukuze angibambe, 33 kodwa ngehliswa ngewindi elisemdulini wedolobho ngiphakathi kwebhasikiti enkulu,+ ngaphunyuka esandleni sakhe.

12 Kumele ngizigqaje. Lanxa lokho kungancedi, khathesi ngizaqalisa ukukhuluma ngemibono engajayelekanga+ langezambulo zeNkosi.+ 2 Kulenye indoda engiyaziyo emanyene loKhristu eyathathwa yasiwa ezulwini lesithathu eminyakeni engu-14 eyadlulayo, ukuthi yayisemzimbeni wayo kumbe hatshi, angikwazi, uNkulunkulu nguye okwaziyo. 3 Ngiyayazi sibili indoda leyo kodwa ukuthi yayisemzimbeni wayo kumbe hatshi angikwazi, uNkulunkulu nguye okwaziyo. 4 Yathathwa yasiwa epharadayisi futhi yezwa amazwi angeke akhulunywe njalo okungekho emthethweni ukuthi umuntu awakhulume. 5 Ngizazigqaja ngomuntu onjalo kodwa angisoze ngizigqaje ngami, ngizazigqaja ngobuthakathaka bami. 6 Lanxa bengingafuna ukuzigqaja, bengingasoze ngibe ngongelangqondo ngoba bengizakhuluma iqiniso. Kodwa angisoze ngizigqaje ukuze kungabi lomuntu ongincoma ukwedlula lokho akubona kimi kumbe akuzwa ngami, 7 engincoma ngenxa nje yokuthi ngambulelwe izambulo lezi ezimangalisayo.

Ukuze ngingaziphakamisi ngedlulise, ngafakwa ameva enyameni,+ ingilosi kaSathane ehlala ingitshaya ukwenzela ukuthi ngingaziphakamisi ngedlulise. 8 Ngayincenga kathathu iNkosi ngendaba le ngicela ukuthi ameva la akhitshwe kimi. 9 Kodwa yona yathi kimi: “Umusa wami omkhulu ukwenele ngoba nxa ubuthakathaka, kulapho engiveza khona amandla ami ngokugcweleyo.”+ Ngakho ngizathokoza kakhulu ngizigqaje ngobuthakathaka bami ukuze amandla kaKhristu aqhubeke ephezu kwami njengetende. 10 Kuyangijabulisa ukuba buthakathaka, lokuthethiswa, lokuba sezikhathini zokuswela, lokuhlukuluzwa kanye lobunzima obusehlela ngenxa kaKhristu ngoba nxa ngibuthakathaka kulapho engilamandla khona.+

11 Sengibe ngumuntu ongelangqondo. Yini elingenze ngaba njalo ngoba bekumele lingincome. Phela akula ngitsho lento eyodwa etshengisa ukuthi bangcono kulami abaphostoli benu laba abazenza abalunge kakhulu, lanxa mina ngingasilutho.+ 12 Ngaqinisela kakhulu ngilitshengisa ubufakazi bokuthi ngingumphostoli,+ ngenza lezibonakaliso lezimangaliso kanye lemisebenzi yamandla.+ 13 Kuyini okwenza libe phansi kulawo wonke amanye amabandla? Ayisikho yini ukuthi angizange ngibe ngumthwalo kini?+ Nxa ngiphambanisile ngicela lingithethelele ngesihle.

14 Zwanini, khathesi sekungokwesithathu ngilungela ukuza kini njalo angisoze ngibe ngumthwalo. Angiyifuni impahla yenu+ kodwa ngifuna lina ngoba akukhangelelwanga ukuthi abantwana+ baqogelele impahla besenzela abazali, abazali yibo okumele benzele abantwana. 15 Mina ngizathokoza ngokuzinikela lokusetshenziswa ngokupheleleyo ngenxa yenu.+ Kanti nxa mina ngilithanda kangaka, lina kufanele lingithande kancane yini? 16 Lanxa kunjalo kangizange ngibe ngumthwalo kini.+ Kodwa lina lithi ngaba “limenemene” futhi ngalibamba “ngobuqili.” 17 Kambe ngake ngaliqila ngisebenzisa labo engabathuma kini yini? 18 Ngancenga uThithusi ukuthi aze kini, ngamthuma kini lomunye umzalwane. Walidlelezela yini uThithusi?+ Sasingahambi laye simoya munye yini? Sasingahambi emanyathelweni afananayo yini?

19 Kanti isikhathi sonke lesi belicabanga ukuthi siyazivikela yini? Lokhu esikukhulumayo sikutsho phambi kukaNkulunkulu simunye loKhristu. Bathandekayo, thina esikwenzayo yikulakha kuphela. 20 Ngiyesaba ukuthi ngizathi ngifika kini ngilithole lingayisikho lokho engifisa libe yikho, lami ngingabi yilokho elifisa ngibe yikho, ngithole kulezingxabano, lomhawu, lolaka, lokudabukana phakathi, lokukhuluma amazwi ahlabayo, lokunyeya,* lokuzikhukhumeza kanye lokuxokozela. 21 Mhlawumbe ngizathi ngifika kini futhi, uNkulunkulu wami angiyangise phambi kwenu, ngilile ngenxa yabanengi benu ababesona bengaphenduki ekungcoleni kwabo lasekufebeni* kanye lasekuxhwaleni* abaqhubeka bekwenza.

13 Sengisiza kini okwesithathu. “Yonke indaba kumele iqiniswe yibufakazi babantu* ababili kumbe abathathu.”+ 2 Lanxa khathesi ngingekho kini, kufanana lokuthi ngilani okwesibili. Ngibaxwayisa kuseselesikhathi abake benza isono labanye bonke ukuthi nxa ngingaphinda ngifike khonangapho angisoze ngibayekele, 3 njengoba lidinga ubufakazi bokuthi uKhristu ukhuluma esebenzisa mina sibili. Yena kabuthakathaka phakathi kwenu kodwa ulamandla. 4 Lanxa wabulawa ngokubethelwa esigodweni ngenxa yokungabi lamandla, uyaphila ngenxa yamandla kaNkulunkulu.+ Lathi asilamandla njengoba nje laye wayengelamandla kodwa sizaphila laye+ ngenxa yamandla kaNkulunkulu akini.+

5 Qhubekani lizihlola ukuthi lisekukholweni yini, qhubekani lizihlolisisa ukuthi lingabantu abanjani.+ Kalinanzeleli yini ukuthi uJesu Khristu umanyene lani? Ngaphandle nxa kuyikuthi kalemukelwa. 6 Ngithemba lizananzelela ukuthi thina siyemukelwa.

7 Khathesi sithandaza kuNkulunkulu sicela ukuthi lingenzi lutho olubi kodwa lokho asikwenzeli ukuthi kukhanye angathi siyemukelwa. Sikwenzela ukuthi lenze okuhle lanxa kungakhanya angathi thina kasemukelwa. 8 Asingeke senze lutho oluphikisana leqiniso kodwa senza okuvumelana leqiniso kuphela. 9 Sihlala sithokoza kakhulu nxa sibuthakathaka kodwa lina lilamandla njalo esikuthandazelayo yikuthi lilungisiswe. 10 Yikho ngibhala izinto lezi ngingekho kini, ngisenzela ukuthi nxa sengifikile ngingabi lesihluku sengisebenzisa amandla engawaphiwa yiNkosi+ ukuze ngilakhe, ngingalidilizi.

11 Okokucina bafowethu qhubekani lithokoza, litshintsha lapho okumele litshintshe khona, liduduzwa,+ livumelana emicabangweni yenu+ njalo lihlalisane ngokuthula.+ Lingenza njalo uNkulunkulu wothando lokuthula+ uzakuba lani. 12 Bingelelanani ngokuqabuzana okungcwele. 13 Bonke abangcwele bayalibingelela.

14 Umusa omkhulu weNkosi uJesu Khristu lothando lukaNkulunkulu kanye lomoya ongcwele olincedayo akube lani lonke.