KWABASEGALATHIYA
1 Mina Phawuli engingumphostoli ongabekwanga ngabantu loba kusetshenziswa umuntu kodwa owabekwa nguJesu Khristu+ loNkulunkulu uBaba,+ lowo owamvusa kwabafileyo, 2 ngiyalibhalela ngilabafowethu bonke, lina mabandla aseGalathiya:
3 Umusa omkhulu lokuthula okuvela kuNkulunkulu uBaba wethu laseNkosini uJesu Khristu akube kini. 4 INkosi yazinikela ngenxa yezono zethu+ ukuze isikhulule kulo umumo wezinto* omubi,+ ngokuvumelana lentando kaNkulunkulu wethu uBaba.+ 5 Kwangathi uNkulunkulu angakhazinyuliswa kuze kube nini lanini. Ameni.
6 Ngiyamangala ukuthi seliphambuka* masinyane kangaka kulowo owalibizela emuseni omkhulu kaKhristu njalo selisamukela olunye uhlobo lwezindaba ezinhle.+ 7 Ayisikho ukuthi kulezinye izindaba ezinhle, kodwa kulabanye abalidalela uhlupho+ labafuna ukutshila izindaba ezinhle ezimayelana loKhristu. 8 Loba kunjalo, nxa ingilosi evela ezulwini kumbe omunye wethu engalitshumayeza ezinye izindaba ezinhle ezitshiyene lalezo esazitshumayela kini, kuyabe kumele aqalekiswe. 9 Njengoba nje sike satsho, ngiyaphinda futhi ngithi, loba ngubani olitshumayeza izindaba ezinhle ezitshiyene lalezo elazamukelayo kaqalekiswe.
10 Kambe ngifuna ukwamukelwa ngabantu yini kumbe nguNkulunkulu? Ngizama ukujabulisa abantu yini? Phela nxa ngilokhu ngisajabulisa abantu, ngiyabe ngingasinceku kaKhristu. 11 Ngifuna likwazi bafowethu ukuthi izindaba ezinhle engazitshumayela kini aziveli ebantwini+ 12 ngoba angiziphiwanga ngumuntu futhi angizifundiswanga ngumuntu, kodwa ngazembulelwa nguJesu Khristu.
13 Lezwa sibili ngokuziphatha kwami ngisesekholweni lwesiJuda,+ ukuthi ngangihlala ngilihlukuluza kakhulu* ibandla likaNkulunkulu njalo ngilibhidliza.+ 14 Okholweni lwesiJuda ngangithuthuka kulabanengi engangilingana labo esizweni sakithi, njengoba amasiko abobaba ngangiwatshisekela kakhulu kulabo.+ 15 Kodwa uNkulunkulu owangehlukanisa lesibeletho sikamama futhi wangibiza ngomusa wakhe omkhulu,+ wakubona kukuhle 16 ukuthi aveze iNdodana yakhe esebenzisa mina ukuze ngitshumayele izindaba ezinhle ezimayelana layo ebantwini bezinye izizwe.+ Ngesikhathi engikhetha ukuthi ngenze lokhu angizange ngigijimele ukuyabuza emuntwini* 17 futhi angizange ngiye eJerusalema kulabo ababa ngabaphostoli kuqala kulami. Kodwa ngaya e-Arabhiya, ngasengibuyela eDamaseko.+
18 Kwathi sekwedlule iminyaka emithathu ngaya eJerusalema+ ngisiyavakatshela uKhefasi,*+ ngahlala laye okwamalanga angu-15. 19 Loba kunjalo, abanye abaphostoli angizange ngibabone ngaphandle kukaJakhobe+ umfowabo weNkosi. 20 Ngiyaliqinisekisa phambi kukaNkulunkulu ukuthi angiqambi manga nxa ngibhala izinto lezi.
21 Ngemva kwalokho ngaya emangweni weSiriya loweKhilikhiya.+ 22 Kodwa amabandla aseJudiya ayemanyene loKhristu ayengakaze angibone. 23 Wona nje ayejayele ukuzwa kuthiwa: “Indoda leyana eyayisihlukuluza+ isitshumayela izindaba ezinhle ezimayelana lokholo eyayilutshabalalisa.”+ 24 Yikho aqalisa ukukhazimulisa uNkulunkulu ngenxa yami.
2 Ngemva kweminyaka engu-14 ngaphinda ngaya eJerusalema ngiloBhanabha+ loThithusi.+ 2 Okwenza ngaya khona yikuthi ngangembulelwe njalo ngafika ngabatshela izindaba ezinhle engizitshumayela kwabezinye izizwe. Kodwa lokho ngakwenza emhlanganweni engaba lawo lamadoda ayehlonitshwa kakhulu, kungela abanye abantu. Ngangifuna ukuba leqiniso lokuthi ngangingagijimeli ize lokuthi ngangingazange ngigijimele ize. 3 Loba kunjalo, ngitsho loThithusi+ engangilaye kazange abanjwe ngamandla ukuthi asoke+ lanxa wayengumGrikhi. 4 Kodwa okwavusa indaba le yikuthi kwakulabazalwane bamanga ababengene ngudlu,+ benyenya bezobona ukuthi silenkululeko bani+ kuKhristu uJesu ukuze basenze izigqili zabo ngokupheleleyo.+ 5 Asizange sivume ukuzehlisa kubo+ ngitsho lakancane ukuze iqiniso elimayelana lezindaba ezinhle liqhubeke likini.
6 Kodwa labo ababekhanya beqakathekile+ ngangingelandaba lokuthi babeyini ngoba uNkulunkulu kalani lokuthi umuntu ukhangeleka njani. Kangitholanga lutho olutsha ebantwini labo ababehlonitshwa kakhulu. 7 Lanxa kunjalo, babona ukuthi nginikwe umsebenzi wokutshumayela izindaba ezinhle kwabangasokanga+ njengoba nje loPhetro wayenikwe umsebenzi wokutshumayela kwabasokileyo. 8 (Phela lowo owayenike uPhetro amandla okuthi abe ngumphostoli kwabasokileyo nguye owayenginike amandla okuba ngumphostoli kwabezinye izizwe.)+ 9 Bananzelela lokuthi ngangenzelwe umusa omkhulu,+ yikho uJakhobe+ loKhefasi* loJohane ababekhanya bezinsika zebandla belulela isandla sokudla kuBhanabha lakimi+ bevuma ukuthi siye kwabezinye izizwe, bona baye kwabasokileyo. 10 Abasicela khona kuphela yikuthi sihlale sikhumbula abayanga, njalo ngiyazama ngamandla ami wonke ukuthi ngikwenze lokho.+
11 Kodwa uKhefasi*+ wathi esefikile e-Antiyokhi+ ngamkhuza sikhangelene ngoba kwakusegcekeni ukuthi wayephambanisa.* 12 Wayejayele ukudla labezinye izizwe+ kungakafiki amadoda ayevela kuJakhobe,+ kodwa athi esefikile wayekela ukwenza njalo, wazehlukanisa labezinye izizwe esesaba ababesokile.+ 13 Lamanye amaJuda amlandela ekuzenziseni lokho, uBhanabha laye waze wathatheka ngokuzenzisa kwabo. 14 Kodwa ngathi ngibona ukuthi abahambi eqinisweni elimayelana lezindaba ezinhle+ ngatshela uKhefasi* phambi kwabo bonke ngathi: “Njengoba wena ungumJuda kodwa uphila njengabezinye izizwe hatshi njengamaJuda, kungani ucindezela abezinye izizwe ukuthi balandele amasiko amaJuda?”+
15 Thina esizelwe singamaJuda, esingayisizo zoni ezivela kwezinye izizwe, 16 siyakunanzelela ukuthi umuntu kuzathiwa ulungile ngokuba lokholo+ kuJesu Khristu+ kuphela, hatshi ngokwenza imisebenzi yomthetho. Ngakho sesibeke ukholo lwethu kuKhristu uJesu ukuze kuthiwe silungile ngokuba lokholo kuKhristu, hatshi ngokwenza imisebenzi yomthetho ngoba akulamuntu okuzathiwa ulungile ngokwenza imisebenzi yomthetho.+ 17 Nxa lathi sibalwe ngokuthi siyizoni lanxa sizama ukuthi kuthiwe silungile ngoKhristu, sekusitsho ukuthi uKhristu uyinceku yesono yini? Ngitsho sibili! 18 Nxa sengiphinda ngisakha zona kanye izinto engangizidiliza, ngiyabe ngitshengisa ukuthi ngiyisephulamthetho 19 ngoba ngokwamukela umthetho ngafa emthethweni+ ukuze ngiphile kuNkulunkulu. 20 Mina ngibethelwe esigodweni kanye loKhristu.+ Akuseyimi engiphilayo+ kodwa nguKhristu ophila emunye lami. Impilo engiyiphila khathesi emzimbeni lo* ngiyiphila ngokukholwa eNdodaneni kaNkulunkulu+ eyangithandayo yazinikela ngenxa yami.+ 21 Angiwali* umusa omkhulu kaNkulunkulu+ ngoba nxa ukulunga kutholakala ngomthetho, uKhristu wafela ize phela.+
3 Hawu maGalathiya ehluleka ukucabanga! Ngubani oseliyengele ezintweni ezimbi,+ khona kwacaciswa phambi kwenu ukubethelwa kukaJesu Khristu esigodweni?+ 2 Nansi into eyodwa engifuna ukulibuza yona: Umoya lawemukela ngokwenza imisebenzi yomthetho yini kumbe ngokukholwa lokho elakuzwayo?+ 3 Kanti alicabangi kangaka? Njengoba liqalise lihamba ngomoya, kungani seliqedisa uhambo lwenu ngokuhamba ngendlela yabantu bomhlaba?+ 4 Lalihluphekela ize yini ngesikhathi lisehlelwa zinhlupho ezinengi kangaka? Ngileqiniso lokuthi alihluphekelanga ize. 5 Lowo olipha umoya, enze lezimangaliso+ phakathi kwenu, wenza lokho ngenxa yokuthi lenza imisebenzi yomthetho yini kumbe ngenxa yokuthi liyazikholwa izinto elazizwayo? 6 Phela lo-Abrahama “wakholwa kuJehova* kwathiwa ulungile.”+
7 Likwazi mhlophe ukuthi ababambelela ekukholweni yibo abangamadodana ka-Abrahama.+ 8 Kudala umbhalo watshengisa ukuthi uNkulunkulu wayezakuthi abantu bezinye izizwe balungile ngenxa yokholo. UNkulunkulu watshela u-Abrahama izindaba ezinhle wathi: “Zonke izizwe zizabusiswa ngawe.”+ 9 Ngakho ababambelela ekukholweni babusiswa lo-Abrahama owayelokholo.+
10 Bonke abathembele emisebenzini yomthetho bangaphansi kwesiqalekiso ngoba kubhaliwe ukuthi: “Uqalekisiwe wonke umuntu ongaqhubeki elandela zonke izinto ezisencwadinimgoqwa yoMthetho.”+ 11 Phezu kwalokho kuyacaca ukuthi akulamuntu uNkulunkulu athi ulungile ngenxa yomthetho+ ngoba “olungileyo uzaphila ngenxa yokholo.”+ 12 UMthetho wona awusekelwanga ekukholweni. Kodwa “loba ngubani owenza izinto lezi uzaphila ngazo.”+ 13 UKhristu wasithenga+ wasikhulula+ esiqalekisweni soMthetho ngokuba yisiqalekiso esikhundleni sethu, njengoba kubhaliwe ukuthi: “Wonke umuntu olengiswe esigodweni uqalekisiwe.”+ 14 Lokhu kwenzelwa ukuthi isibusiso sika-Abrahama sifike kwabezinye izizwe ngoKhristu uJesu+ ukuze umoya esasiwuthenjisiwe+ siwuthole ngokholo lwethu.
15 Bafowethu, lapha ngizasebenzisa umzekeliso walokho okwenzakala ebantwini: Nxa isivumelwano sesenziwe, kakho osesulayo kumbe ongezelela okuthile kuso lanxa senziwe ngumuntu nje. 16 Izithembiso zatshelwa u-Abrahama lenzalo yakhe.+ Umbhalo kawutsho ukuthi, “lasezizukulwaneni zakho,” angathi kutshiwo abantu abanengi. Kodwa uthi, “lasenzalweni yakho,” usitsho umuntu oyedwa, uKhristu.+ 17 Nanku okunye engikutshoyo: UMthetho owabakhona ngemva kweminyaka engu-430+ awusesuli isivumelwano uNkulunkulu ayesesenzile njalo awusichithi isithembiso. 18 Nxa ilifa lisekelwe emthethweni liyabe lingasasekelwanga esithembisweni, kodwa ngomusa wakhe uNkulunkulu uphe u-Abrahama ilifa ngesithembiso.+
19 Pho uMthetho wawungowani? Wafakwa ukuze uveze iziphambeko+ kuze kufike inzalo+ okwakwenziwe kuyo isithembiso njalo wadluliselwa ngezingilosi+ ngesandla somlamuli.+ 20 Nxa kulomuntu oyedwa kuphela umlamuli kafunakali, kodwa uNkulunkulu yena wasenza eyedwa lesosithembiso.* 21 Pho uMthetho uphikisana lezithembiso zikaNkulunkulu yini? Ngitsho lakancane! Aluba abantu babephiwe umthetho owawungaletha ukuphila, ukulunga kwakuzabe kutholakala ngomthetho. 22 Kodwa iMibhalo yatshengisa ukuthi abantu bayizigqili zesono ukuze isithembiso esibakhona ngokukholwa kuJesu Khristu siphiwe labo abalokholo.
23 Lanxa kunjalo, sasigcinwe ngaphansi komthetho ukholo lungakafiki, sivalelwe yiwo njalo silindele ukholo olwaseluzavezwa.+ 24 Ngakho uMthetho waba ngumkhokheli* wethu owasikhokhela usisa kuKhristu+ ukuze kuthiwe silungile ngokholo.+ 25 Kodwa khathesi asisekho ngaphansi kwalowomkhokheli*+ ngoba ukholo selufikile.+
26 Lonke lingamadodana kaNkulunkulu+ ngokukholwa kuKhristu uJesu+ 27 ngoba lonke elabhabhathizelwa kuKhristu seligqoke uKhristu.+ 28 AkulamJuda kumbe umGrikhi,+ akulasigqili kumbe okhululekileyo,+ akulandoda kumbe owesifazana+ ngoba lonke limanyene loKhristu uJesu.+ 29 Kanti njalo nxa lingabakaKhristu liyinzalo ka-Abrahama sibili,+ lizindlalifa+ ngokuvumelana lesithembiso.+
4 Nxa indlalifa isesengumntwana kayehlukananga lesigqili lanxa iyinkosi yezinto zonke 2 ngoba ingaphansi kwabayinakekelayo labaphathi bendlu kuze kufike ilanga elibekwe nguyise. 3 Lathi sathi sisesengabantwana sasiyizigqili zezinto zobuntwana zalumhlaba.+ 4 Kodwa isikhathi esibekiweyo sathi sesifikile, uNkulunkulu wathuma iNdodana yakhe yazalwa ngowesifazana+ ingaphansi komthetho+ 5 ukuze ikhulule abangaphansi komthetho ngokubathenga+ babe ngamadodana akhe.+
6 Njengoba lingamadodana, uNkulunkulu uthumele umoya+ weNdodana yakhe ezinhliziyweni zenu*+ futhi wona umemeza usithi: “Abha,* Baba!”+ 7 Yikho aliseyizo zigqili kodwa selingamadodana. Nxa selingamadodana, uNkulunkulu uselenze laba zindlalifa.+
8 Kodwa lingakamazi uNkulunkulu laliyizigqili zalokho okungasibonkulunkulu. 9 Manje njengoba selimazi uNkulunkulu, kumbe ngithi njengoba selisaziwa nguNkulunkulu, selibuyelelani ezintweni zobuntwana ezibuthakathaka+ lezingancedi ngalutho njalo lifunelani ukuphinda libe yizigqili zazo?+ 10 Phela liwagcina ngonanzelelo amalanga, lezinyanga,+ lezikhathi zomnyaka kanye leminyaka. 11 Ngikhathazekile ngani ukuthi mhlawumbe ngadlalisa amandla ami ngizama ukulincedisa.
12 Bafowethu ngiyalincenga, wobani njengami ngoba lami nganginjengani.+ Alingonelanga lutho. 13 Liyakwazi ukuthi okwangenza ngathola ithuba lami lokuqala lokutshumayela izindaba ezinhle kini yikuthi ngangigula. 14 Lanxa ukugula kwami kwalithwalisa nzima, alizange lingeyise loba lingenyanye,* kodwa langamukela angathi ngiyingilosi kaNkulunkulu loba angathi nginguKhristu uJesu. 15 Kungani lingasathokozi ngendlela elalithokoza ngayo? Phela angithandabuzi ukuthi ngabe kwakuvuma lalizazikopola amehlo lingiphe wona.+ 16 Sengiyisitha senu yini ngenxa yokuthi ngilitshela iqiniso? 17 Bazama ngamandla wonke ukulidonsela kubo kodwa abalanhloso enhle. Bafuna ukulehlukanisa lami ukuze litshisekele bona. 18 Loba kunjalo, kuhlala kukuhle ukuthi umuntu azame ngamandla wonke ukulidonsela kuye nxa ehlose okuhle, hatshi kuphela nxa ngilani 19 bantwabami engibathandayo.+ Ngizaqhubeka ngisizwa ubuhlungu* ngenxa yenu lize libe lobuntu obunjengobukaKhristu.* 20 Ngifisa ukuthi ngabe ngilani khathesi, ngingakhulumi ngendlela le engikhuluma ngayo ngoba lingiphithanisa ikhanda.
21 Ngitshelani lina elifuna ukuba ngaphansi komthetho, kalizwa yini ukuthi uMthetho uthini? 22 Ngokwesibonelo, kubhaliwe ukuthi u-Abrahama wayelamadodana amabili, enye ingeyencekukazi,+ enye ingeyomkakhe owayengayisiso sigqili.+ 23 Indodana yencekukazi yayizelwe ngendlela yemvelo,+ kodwa eyomkakhe yayizelwe ngesithembiso.+ 24 Indaba le ingaba ngumzekeliso. Abesifazana laba batsho izivumelwano ezimbili. Esinye ngesentabeni iSinayi,+ esizala abantwana ababa yizigqili futhi simelwa nguHagari. 25 UHagari umela iSinayi+ intaba ese-Arabhiya, amele leJerusalema yalamuhla ngoba yena labantwabakhe bayizigqili. 26 Kodwa iJerusalema ephezulu ikhululekile njalo ingumama wethu.
27 Kubhaliwe ukuthi: “Thaba wena wesifazana oyinyumba, umemeze ngentokozo wena mfazi ongelamihelo yokubeletha ngoba abantwana bowesifazana otshiyiweyo banengi kakhulu kulabowesifazana olendoda.”+ 28 Lina bafowethu lingabantwana besithembiso njengoba nje lo-Isaka wayenjalo.+ 29 Kodwa njengoba lowo owayezelwe ngendlela yemvelo waqalisa ukuhlukuluza owayezelwe ngomoya,+ kunjalo lakhathesi.+ 30 Kodwa uthini umbhalo? Uthi: “Xotsha incekukazi lendodana yayo ngoba indodana yencekukazi ayisoze yafa yaba yindlalifa ndawonye lendodana yowesifazana ongayisiso sigqili.”+ 31 Ngakho bafowethu thina kasisibo bantwana bencekukazi, singabowesifazana okhululekileyo, ongayisiso sigqili.
5 UKhristu walikhulula ukuze lithole inkululeko enjalo. Ngakho manini liqine+ lingavumi ukuphinda libotshelwe ejogweni lobugqili.+
2 Zwanini! Mina Phawuli ngilitshela ukuthi nxa lingasoka, lokho uKhristu asekwenzile akusoze kulincede.+ 3 Ngiyafakaza futhi ukuthi wonke umuntu osokwayo ulomlandu wokugcina wonke uMthetho.+ 4 Lina elizama ukuthi kuthiwe lilungile ngomthetho selehlukaniswe loKhristu,+ selisukile emuseni wakhe omkhulu. 5 Kodwa thina umoya kaNkulunkulu uyasisiza ukuthi sikulindele ngabomvu ukulunga okupheleleyo esilethemba lokukuthola ngenxa yokholo, 6 ngoba kulabo abamanyene loKhristu uJesu, ukusoka kumbe ukungasoki akuncedi ngalutho+ kodwa ukholo olukhanya ngokuba lothando yilo oluncedayo.
7 Beligijima kuhle nje.+ Manje ngubani oselenze layekela ukuqhubeka lilalela iqiniso? 8 Imfundiso le ehugayo ayiveli kulowo owalibizayo. 9 Imvubelo encane* iyayibilisa yonke inhlama.+ 10 Ngileqiniso lokuthi lina elimanyene leNkosi+ lizavumelana lami. Kodwa lowo olidalela uhlupho,+ kungelani lokuthi ngubani, uzathola isahlulelo esimfaneleyo. 11 Bafowethu, nxa mina ngisatshumayela ngokusoka, kungani ngilokhu ngihlukuluzwa? Phela nxa kunjalo, kutsho ukuthi isigodo sokuhlutshwa*+ asisakhubi. 12 Ngifisa ukuthi bazithene* abantu laba abazama ukuliphambanisa.
13 Bafowethu, labizelwa ukuthi libe lenkululeko. Lanxa kunjalo, inkululeko le lingayisebenziseli ukuphilela izifiso zenyama,+ kodwa ngothando wobani yizigqili zomunye lomunye+ 14 ngoba uMthetho wonke ugcwaliswa* ngomlayo owodwa othi: “Kumele uthande umakhelwane wakho ngendlela ozithanda ngayo.”+ 15 Kodwa nxa lilokhu lilumana futhi lihlaselana,+ nanzelelani lingaqedani.+
16 Ngithi qhubekani lihamba ngomoya,+ lingenza njalo alisoze lilandele isifiso senyama loba sekutheni+ 17 ngoba inyama iphikisana lomoya ngenxa yezifiso zayo, lomoya uphikisana lenyama. Kokubili kuyaphikisana, besekubangela ukuthi lehluleke ukwenza khona kanye elifuna ukukwenza.+ 18 Phezu kwalokho, nxa likhokhelwa ngumoya liyabe lingekho ngaphansi komthetho.
19 Imisebenzi yenyama iyazikhanyela njalo yile: Ukufeba,*+ lokungcola, lokuxhwala,*+ 20 lokukhonza izithombe, lokusebenzelana lemimoya,*+ lenzondo, lokuxabana, lomhawu, lolaka, lezimpikiswano, lokwehlukana, lokulandela imfundiso zabantu,* 21 lomona, lokudakwa,+ lamadili* axokozelayo lezinye izinto ezinjengalezi.+ Ngilixwayisa ngezinto lezi kusesengaphambili ngendlela engake ngalixwayisa ngayo, ngithi abalomkhuba wokwenza izinto lezi abasoze balithole ilifa loMbuso kaNkulunkulu.+
22 Kodwa izithelo zomoya luthando, lokuthokoza, lokuthula, lokubekezela, lomusa, lobuhle,+ lokholo, 23 lobumnene lokuzibamba.+ Akulamthetho ophikisana lezinto lezi. 24 Kanti njalo abangabakaKhristu uJesu sebeyibethele esigodweni inyama lezinkanuko zayo kanye lezifiso zayo.+
25 Nxa siphila ngomoya, kasiqhubekeni sihamba ngomoya ngendlela ehlelekileyo.+ 26 Kasingaziphakamisi+ njalo kasingancintisani+ sisenzelana umona.
6 Bafowethu, nxa umuntu esephambuka engananzeleli, lina elikhokhelwa ngumoya zamani ukumbuyisela endleleni eqondileyo,* futhi lokhu likwenze limnene.+ Loba kunjalo zinanzeleleni+ ukuze lani lingacini selilingwa.+ 2 Qhubekani lithwalisana imithwalo esindayo.+ Nxa lingenza njalo lizawugcwalisa umthetho kaKhristu.+ 3 Loba ngubani ocabanga ukuthi uqakathekile yena engasilutho+ uyaziyenga. 4 Umuntu ngamunye kahlole ezakhe izenzo.+ Nxa angenza njalo uzakuba lesizatho sokuthokoza ngalokho yena akwenzayo, hatshi ngokuziqathanisa lomunye+ 5 ngoba umuntu ngamunye uzazithwalela umthwalo* wakhe.+
6 Ofundiswa ilizwi* kabelane zonke izinto ezinhle lalowo omfundisayo.+
7 Lingayengwa: UNkulunkulu ngeke aqilwe. Loba yini umuntu ayihlanyelayo uzavuna yona+ 8 ngoba lowo ohlanyela ehlose ukuthokozisa umzimba olesono uzavuna ukonakala emzimbeni wakhe, kodwa ohlanyela efuna ukuthokozisa umoya uzavuna ukuphila okungapheliyo kulowomoya.+ 9 Yikho-ke kasingayekeli ukwenza okuhle ngoba ngesikhathi esifaneleyo sizavuna nxa kuyikuthi asidinwa.*+ 10 Ngakho nxa nje siseselethuba, kasenzeni okuhle kubo bonke, kodwa ikakhulu kulabo abangabemuli yethu yabakholwayo.*
11 Khangelani ukuthi ngibhale ngamabala amakhulu njani, ngilibhalela ngesami isandla.
12 Bonke abafuna ukubukwa ngabantu yibo abazama ukulicindezela ukuthi lisokwe, njalo lokho bakwenzela nje ukuthi babalekele ukuhlukuluzwa ngenxa yesigodo sokuhlutshwa* sikaKhristu. 13 Phela lalabo abasokwayo abawugcini uMthetho,+ kodwa bafuna ukuthi lisokwe ukuze babe lesizatho sokuzigqaja ngani.* 14 Kodwa mina angisoze ngizigqaje ngalutho ngaphandle kwesigodo sokuhlutshwa* seNkosi yethu uJesu Khristu.+ Kimi umhlaba usufile* ngenxa yakhe njalo lawo umhlaba ungibona ngifile ngenxa yakhe. 15 Ukusoka loba ukungasoki akuqakathekanga,+ okuqakathekileyo yikuba yindalo entsha.+ 16 Bonke abalandela isimiso lesi, labo abangu-Israyeli kaNkulunkulu,+ kababe lokuthula lesihawu.
17 Kusukela lamuhla akungabi lomuntu ongihluphayo ngoba emzimbeni wami ngilezimpawu zokuthi* ngiyisigqili sikaJesu.+
18 Umusa omkhulu weNkosi yethu uJesu Khristu kawube lomoya wenu* bafowethu. Ameni.
Khangela iNgcazelo Yamabala.
Kumbe, “selisuswa.”
NgesiGrikhi, “ngize ngedlulise amalawulo.”
NgesiGrikhi, “inyama legazi.”
Ubizwa langokuthi nguPhetro.
Ubizwa langokuthi nguPhetro.
Ubizwa langokuthi nguPhetro.
Kumbe, “wayelecala.”
Ubizwa langokuthi nguPhetro.
NgesiGrikhi, “enyameni.”
Kumbe, “Angiwulahli.”
Khangela iSengezo ku-A5.
Kumbe, “yena munye.”
Kumbe, “ngumgcini.”
Kumbe, “kwalowomgcini.”
NgesiGrikhi, “zethu.”
Leli libala lesiHebheru kumbe elesi-Aramu elitsho ukuthi, “O! Baba.”
Kumbe, “lingikhafulele.”
NgesiGrikhi, “ngihelelwa.”
NgesiGrikhi, “uKhristu aze abunjwe kini.”
Kumbe, “Umkhukhumezo omncane.”
Khangela iNgcazelo Yamabala.
Kumbe, “babe ngabathenwa,” okuzakwenza bangafaneli ukwenza lokho okukulowomthetho abafuna ulandelwe.
Ezinye inguqulo zithi, “uhlanganiswa.”
NgesiGrikhi, por·nei′a. Khangela iNgcazelo Yamabala.
Kumbe, “lokuziphatha okulihlazo.” NgesiGrikhi, a·sel′gei·a. Khangela iNgcazelo Yamabala.
Kumbe, “lobuthakathi.” Ibala lesiGrikhi elisetshenziswe lapha lingagoqela lokusebenzisa izidakamizwa.
Kumbe, “lokubhazuka.”
Kumbe, “lamaphathi.”
Kumbe, “ukumlungisa.”
Kumbe, “umlandu.”
Kumbe, “Ofundiswa ilizwi ngomlomo.”
Kumbe, “asikhalali.”
Kumbe, “esimanyene labo ekukholweni.”
Khangela iNgcazelo Yamabala.
NgesiGrikhi, “ngenyama yenu.”
Khangela iNgcazelo Yamabala.
Kumbe, “usubethelwe esigodweni.”
Kumbe, “ngilemitshiso yokuba.”
Kumbe, “lendlela elicabanga ngayo.”