EYESIBILI KWABASETHESALONIKA

1 Mina Phawuli loSilivanu* loThimothi,+ kini lina elisebandleni leThesalonika elimanyene loNkulunkulu uBaba wethu kanye leNkosi uJesu Khristu:

2 Umusa omkhulu lokuthula okuvela kuNkulunkulu uBaba laseNkosini uJesu Khristu akube kini.

3 Kufanele simbonge zikhathi zonke uNkulunkulu ngenxa yenu bafowethu. Lokhu kuqondile sibili ngoba ukholo lwenu luyakhula okumangalisayo futhi uthando elilalo komunye lomunye luqhubeka lusanda.+ 4 Yikho sizigqaja ngani+ emabandleni kaNkulunkulu ngoba liyaqinisela njalo lilokholo lanxa liphakathi kwakho konke ukuhlukuluzwa lobunzima.+ 5 Lokhu kufakazela ukuthi ukwahlulela kukaNkulunkulu kulungile, okwenza ukuthi yena alibone lifanele ukungena eMbusweni wakhe eliwuhluphekelayo.+

6 Indlela le uNkulunkulu ahlulela ngayo ilungile ngoba ujezisa labo abalihluphayo.+ 7 Kodwa lina elihluphekayo lizaphunyuzwa kanye lathi ekwembulweni kweNkosi uJesu+ ezulwini ilezingilosi zayo ezilamandla+ 8 elangabini lomlilo ovuthayo, ngesikhathi isiphindisela kulabo abangamaziyo uNkulunkulu lakulabo abangazilaleliyo izindaba ezinhle ezimayelana leNkosi yethu uJesu.+ 9 Laba bazakwahlulelwa bajeziswe ngokubhujiswa phakade,+ basuswe phambi kweNkosi laphambi kwenkazimulo yamandla ayo 10 ngesikhathi isisiza izokhazinyuliswa labangcwele bayo. Ngalelolanga bonke abatshengise ukuthi balokholo bazamangala ngenxa yakhe ngoba lina lakukholwa lokho esakufakazayo.

11 Ngenxa yalokho sihlala silithandazela sicela ukuthi uNkulunkulu alibone lifanele ukubizwa nguye+ njalo asebenzise amandla akhe ukwenza konke okuhle akufunayo lokuphelelisa yonke imisebenzi yokholo, 12 ukuze ibizo leNkosi yethu uJesu likhazinyuliswe kini, lani likhazinyuliswe limanyene laye ngenxa yomusa omkhulu kaNkulunkulu wethu loweNkosi uJesu Khristu.

2 Kodwa mayelana lokuba khona kweNkosi yethu uJesu Khristu+ lokuqoqelwa kwethu kuyo,+ siyalicela bafowethu 2 ukuthi lingaphangi liphithane ingqondo futhi lingethuswa ngamazwi eliwazwayo kuthiwa usuku lukaJehova*+ selufikile, lanxa amazwi lawo efika kini ngelizwi eliphefumulelweyo*+ kumbe ngombiko okhulunyiweyo loba ngencwadi ekhanya angathi ivela kithi.

3 Lingavumeli muntu eliphambukisa* ngaloba yiphi indlela ngoba usuku lolu alusoze lufike kungaqalanga kwaba lokuhlamuka+ njalo kwavezwa lomuntu ongelamthetho,+ oyindodana yokubhujiswa.+ 4 Yena ungumphikisi futhi uyaziphakamisa phezu kwabo bonke okuthiwa ngonkulunkulu kumbe phezu kwezinto zonke ezikhonzwayo, aze ahlale phansi ethempelini likaNkulunkulu ezenza unkulunkulu efuna ukubonwa ngabantu. 5 Alikhumbuli yini ukuthi ngiseselani ngangijayele ukulitshela izinto lezi?

6 Khathesi-ke selikwazi ukuthi kuyini okuvimbelayo okuzakwenza ukuthi avezwe ngesikhathi sakhe esifaneleyo. 7 Lanxa ukungabi lamthetho lokhu okufihlakeleyo sekusebenza,+ kuzahlala kufihlakele kuze kusuke lowo ovimbelayo khathesi. 8 Ngemva kwalokho, ongelamthetho uzavezwa sibili, lowo iNkosi uJesu ezamsusa ngamandla omlomo* wayo+ ibisimqeda ngokubonakaliswa+ kokuba khona kwayo. 9 Kodwa ukuba khona kwalowo ongelamthetho kungumsebenzi kaSathane,+ omupha amandla okwenza zonke izimanga lezimangaliso lezibonakaliso zamanga,+ 10 lamandla okusebenzisa konke okungalunganga ukuze aqile+ abazatshabalala bejeziselwa ukuthi abalamukelanga futhi abalithandanga iqiniso elalizabenza basindiswe. 11 Yikho uNkulunkulu ebavumela ukuthi baqilwe ngemfundiso yamanga ukuze bakholwe amanga,+ 12 besebesahlulelwa bonke ngoba abalikholwanga iqiniso, kodwa babethokoziswa ngokungalunganga.

13 Lanxa kunjalo, thina kufanele sihlale sibonga uNkulunkulu ngenxa yenu lina bafowethu abathandwa nguJehova,* ngoba kusukela ekuqaleni uNkulunkulu walikhetha+ ukuthi lisindiswe ngokulingcwelisa+ ngomoya wakhe langokukholwa kwenu iqiniso. 14 Walibizela kulokhu ngezindaba ezinhle esizitshumayelayo ukuze lithole inkazimulo yeNkosi yethu uJesu Khristu.+ 15 Ngakho-ke bafowethu, manini liqine,+ lihlale libambelele ezintweni elazifundiswayo+ kungelani lokuthi lazizwa ngelizwi elakhulunywayo kumbe ngencwadi eyavela kithi. 16 Phezu kwalokho sengathi iNkosi yethu uJesu Khristu loNkulunkulu uBaba wethu owasithandayo+ wasipha induduzo engapheliyo lethemba elihle+ ngomusa wakhe omkhulu, 17 bangaduduza inhliziyo zenu baliqinise ukuze lenze konke okuhle futhi likhulume okuhle.

3 Okokucina bafowethu, qhubekani lisithandazela+ ukuze ilizwi likaJehova* liqhubeke lisabalala ngamandla*+ futhi likhazinyuliswa, njengoba nje likhazinyuliswa phakathi kwenu. 2 Thandazelani lokuthi sikhululwe ebantwini ababi+ labayingozi ngoba ukholo kayisilo lwabantu bonke.+ 3 Kodwa iNkosi ithembekile, izaliqinisa ilivikele komubi. 4 Phezu kwalokho, njengoba siseNkosini, asithandabuzi ukuthi liyakwenza lokho esalitshela khona lokuthi lizaqhubeka likwenza. 5 Kwangathi iNkosi ingakhokhela inhliziyo zenu, yenze ukuthi limthande uNkulunkulu+ futhi liqinisele+ ebunzimeni ngenxa kaKhristu.

6 Siyalilaya bafowethu ngebizo leNkosi yethu uJesu Khristu ukuthi lehlukane laloba nguphi umzalwane ophila ngendlela engahlelekanga+ futhi ongayilandeliyo imilayo esalinika* yona.+ 7 Lina ngokwenu liyakwazi ukuthi kufanele lisilingisele njani+ ngoba asizange siziphathe ngendlela engahlelekanga ngesikhathi silani. 8 Asidlanga kudla komuntu mahala,*+ kodwa sasisebenza nzima ubusuku lemini singaphumuli, sisenzela ukungalithwalisi nzima ngezindleko.+ 9 Ayisikho ukuthi kasilalo ilungelo lokuncediswa,+ kodwa sasifuna ukuzinikela ukuze sibe yisibonelo elingasilingisela.+ 10 Phela siseselani sasijayele ukulitshela sisithi: “Nxa umuntu engafuni ukusebenza, kangadli.”+ 11 Sizwa kuthiwa phakathi kwenu kulabanye abaphila ngendlela engahlelekanga,+ abangasebenziyo ngitsho kodwa abangenela izinto ezingaqondananga labo.+ 12 Abantu laba siyabalaya eNkosini uJesu Khristu futhi sibeluleka ukuthi basebenze ngokuthula, badle ukudla abakusebenzele ngezandla zabo.+

13 Kodwa lina bafowethu lingadinwa yikwenza okuhle. 14 Nxa ekhona ongakulaleliyo esikutshoyo encwadini le, mnanzeleleni* liyekele ukuba lobudlelwano laye+ ukuze ayangeke. 15 Kodwa lingamphathi njengesitha, qhubekani limeluleka+ njengomfowethu.

16 Kwangathi iNkosi yokuthula ingalipha ukuthula ngazo zonke izikhathi langezindlela zonke.+ INkosi kayibe lani lonke.

17 Mina Phawuli ngiyalibingelela ngibhala ngesami isandla.+ Lokhu kuluphawu encwadini zami zonke njalo le yiyo indlela engibhala ngayo.

18 Umusa omkhulu weNkosi yethu uJesu Khristu kawube lani lonke.