EYESIBILI KUTHIMOTHI

1 Mina Phawuli umphostoli kaKhristu uJesu ngentando kaNkulunkulu, ngokuvumelana lesithembiso sokuphila okutholakala ngoKhristu uJesu,+ 2 kuwe Thimothi mntanami engimthandayo:+

Umusa omkhulu lesihawu lokuthula okuvela kuNkulunkulu uBaba lakuKhristu uJesu iNkosi yethu akube kuwe.

3 Ngiyambonga uNkulunkulu engimenzela inkonzo engcwele njengokwakusenziwa ngokhokho bami futhi ngiyenza ngomzwangedwa ohlanzekileyo. Ngikukhumbula zikhathi zonke nxa ngithandaza ngincenga ubusuku lemini. 4 Nxa ngikhumbula izinyembezi zakho, ngizwa ngifisa kakhulu ukukubona ukuze ngithokoze kakhulu 5 ngoba ngiyalukhumbula ukholo lwakho olungelakuzenzisa+ olwaqala kugogo wakho uLoyisi lakunyoko uYunisi, engileqiniso lokuthi lukhona lakuwe.

6 Ngenxa yalokho, ngiyakukhumbuza ukuthi usikhwezele njengomlilo isipho sikaNkulunkulu esikuwe, owasithola lapho ngikubeka izandla.+ 7 Phela uNkulunkulu kasiphanga umoya wobugwala+ kodwa wasipha owamandla+ lowothando lowokusebenzisa kuhle ingqondo. 8 Ngakho ungabi lenhloni zokufakaza ngeNkosi yethu+ kumbe ngami engiyisibotshwa ngenxa yayo kodwa lawe vuma ukuhluphekela+ izindaba ezinhle uthembele emandleni kaNkulunkulu.+ 9 Yena wasisindisa futhi wasibizela ukuthi sibe ngabangcwele.+ Okwenza wasibiza akusimisebenzi yethu kodwa yinhloso yakhe lomusa omkhulu+ esawuphiwa ngoKhristu uJesu khonale ezikhathini zasendulo. 10 Khathesi umusa lo usuvezwe egcekeni ngokubonakaliswa koMsindisi wethu uKhristu uJesu,+ osechithe ukufa+ waveza ukuphila+ lokungonakali+ esebenzisa izindaba ezinhle+ 11 engabekwa ukuthi ngibe ngumtshumayeli wazo lomphostoli wazo lokuthi ngizifundise abantu.+

12 Yikho lami ngizihluphekela lezozinto.+ Kodwa angilanhloni+ ngoba ngiyamazi lowo engikholwa kuye njalo angithandabuzi ukuthi uyenelisa ukulondoloza lokho engikubeke ezandleni zakhe kuze kube yilelolanga.+ 13 Qhubeka ubambelele esisekelweni samazwi aqondileyo*+ engakutshela wona, ulokholo lothando oludalwa yikumanyana loKhristu uJesu. 14 Igugu leli oliphathisiweyo lilondoloze ngomoya ongcwele ohlala phakathi kwethu.+

15 Uyakwazi ukuthi bonke abantu abasesabelweni se-Asiya+ sebengitshiyile, uFigelu loHemogene ngabanye babo. 16 INkosi kayibenzele isihawu abomuzi ka-Onesiforu+ ngoba wayehlala engivuselela njalo kazange abe lenhloni zokuthi ngisejele ngibotshwe ngamaketane. 17 Kodwa ngesikhathi eseRoma wangidinga esangidinga waze wangithola. 18 Sengathi iNkosi ingenza ukuthi ngalolosuku athole isihawu esivela kuJehova.* Lawe ukwazi mhlophe konke ayengenzela khona e-Efesu.

2 Ngakho wena mntanami,+ qhubeka uthola amandla emuseni omkhulu okuKhristu uJesu. 2 Izinto owazizwa ngami futhi ezafakazelwa ngofakazi abanengi+ ziphathise amadoda athembekileyo. Lokhu kuzakwenza ukuthi lawo afanele sibili ukufundisa abanye. 3 Njengoba ulisotsha elihle+ likaKhristu uJesu, lawe zimisele ukuhlupheka.+ 4 Kakho othi elisotsha angenele izindaba zamabhizimusi* zempilo le ngoba yena akufunayo yikwamukelwa ngulowo owamngenisa esisotsheni. 5 Kwala lasemidlalweni, lowo oncintisana labanye kawuphiwa umqhele ngaphandle nxa elandele imithetho yomncintiswano.+ 6 Umlimi okhutheleyo nguye okufanele abe ngowokuqala ukudla izithelo zensimu yakhe. 7 Hlala ucabanga ngalokho engikutshoyo, iNkosi izakwenza ube lokuqedisisa* ezintweni zonke.

8 Khumbula ukuthi uJesu Khristu wavuswa kwabafileyo+ lokuthi wayeyinzalo kaDavida,+ njengoba nje izindaba ezinhle engizitshumayelayo zisitsho,+ 9 lezo engizihluphekelayo futhi engizibotshelweyo angathi ngiyisigebenga.+ Loba kunjalo, ilizwi likaNkulunkulu lona alibotshwanga.+ 10 Ngenxa yalokho ngiqhubeka ngiqinisela ezintweni zonke ngenxa yabakhethiweyo+ ukuze labo bathole insindiso etholakala ngoKhristu uJesu, baphinde bathole lenkazimulo engapheliyo. 11 Nanka amazwi aqotho: Nxa safa laye, sizaphinda siphile laye sibili,+ 12 nxa singaqhubeka siqinisela sizabusa laye singamakhosi,+ nxa singamphika laye uzasiphika,+ 13 lanxa singathembekanga, yena uhlala ethembekile ngoba ngeke aziphikise.

14 Qhubeka ubakhumbuza izinto lezi, ubalaya* phambi kukaNkulunkulu ukuthi bangaxatshaniswa ngamazwi. Lokho akuncedi ngitsho ngoba kulimaza* abalaleleyo. 15 Yenza konke okusemandleni akho ukuthi wamukeleke kuNkulunkulu, ube yisisebenzi esingelanhloni ngaloba yini, esiliphatha ngendlela eqondileyo ilizwi leqiniso.+ 16 Kodwa ungazamukeli inkulumo ezingancediyo eziphikisana lokungcwele+ ngoba zenza ukungamesabi uNkulunkulu kuqhubeke kusanda 17 njalo amazwi alabo abazikhulumayo azamemetheka angathi yikuqhela kwesilonda esibhibhidlayo. UHimenewu loFilethu ngabanye babo.+ 18 Amadoda la asedukile eqinisweni, athi ukuvuswa kwabafileyo sekwenzakele+ futhi achitha ukholo lwabanye. 19 Lanxa kunjalo, isisekelo sikaNkulunkulu esiqinileyo siqhubeka simi silophawu lolu oluthi, “UJehova* uyabazi abangabakhe,”+ loluthi, “Wonke umuntu obiza ibizo likaJehova*+ katshiye okungalunganga.”

20 Endlini enkulu akulazitsha zegolide lezesiliva kuphela kodwa zikhona lezesigodo lezebumba. Ezinye ngezomsebenzi ohloniphekayo, ezinye ngezomsebenzi ongahloniphekiyo. 21 Yikho nxa umuntu edlalela khatshana lalezi ezomsebenzi ongahloniphekiyo, uzakuba yisitsha somsebenzi ohloniphekayo, esingcwelisiweyo njalo esiqakathekileyo kumniniso futhi esilungiselelwe yonke imisebenzi emihle. 22 Ngakho balekela izifiso zobutsha kodwa uzame ngamandla wonke ukuba lokulunga, lokholo, lothando, lokuthula, ulalabo ababiza iNkosi ngenhliziyo emsulwa.

23 Kanti njalo ungangeneli empikiswaneni ezingelangqondo lezingelancedo+ njengoba usazi ukuthi zidala ukulwa. 24 Phela inceku yeNkosi akumelanga ilwe kodwa kumele ibe lesineke kubo bonke,+ yenelise ukufundisa, itshengise ukuthi iyazibamba nxa yoniwe+ 25 njalo ibe mnene nxa iseluleka abalenkani.+ Mhlawumbe uNkulunkulu angabavumela ukuthi baphenduke* besebethola ulwazi oluqondileyo lweqiniso,+ 26 kuthi dlwe ezingqondweni zabo, baphunyuke emjibileni kaDeveli njengoba eyabe esebabambe bephila ukuze benze intando yakhe.+

3 Kodwa yazi ukuthi ezinsukwini zokucina+ kuzakuba lezikhathi ezinzima, okunzima ukuphila kuzo 2 ngoba abantu bazakuba ngabazithandayo, labathanda imali, labazigqajayo, labaziphakamisayo, labathukayo, labangalaleli abazali, labangabongiyo, labangathembekanga, 3 labangathandi abanye, labangafuni isivumelwano, labanyundiselayo, labangazikhuziyo, labalolaka, labangakuthandiyo okuhle, 4 labangabathengisi, labalenkani, labazikhukhumezayo, labathanda injabulo kulokuthanda uNkulunkulu, 5 labazitshaya angathi bayamesaba uNkulunkulu kodwa indlela abaphila ngayo ayikutshengisi lokho.+ Ungabi lobudlelwano labantu abanjalo. 6 Phakathi kwabo bakhona abangena ngobuqili emizini yabantu, bathumbe abesifazana ababuthakathaka abasindwa yizono futhi ababuswa yizifiso ezehlukeneyo. 7 Bahlala befunda kodwa bayehluleka ukuba lolwazi oluqondileyo lweqiniso.

8 Baqhubeka bephikisana leqiniso ngendlela uJanesi loJambiresi ababephikisa ngayo uMosi. Abantu abanjalo balengqondo ezixhwale kakhulu, kabamukeleki ekukholweni. 9 Lanxa kunjalo, abakwenzayo kuphelela emoyeni ngoba ubuphukuphuku babo buzavela egcekeni bubonwe ngabantu bonke njengoba kwaba njalo lakulawo madoda amabili.+ 10 Kodwa wena ubulokhu ukulandela eduze ukufundisa kwami, lendlela engiphila ngayo,+ lenhloso yami, lokholo lwami, lokubekezela kwami, lothando lwami, lokuqinisela kwami, 11 lokuhlukuluzwa kwami kanye lobunzima obunjengalobo obangehlela ngise-Antiyokhi+ lase-Ikhoniyami+ laseListra.+ Ngaqinisela ekuhlukuluzweni lokho njalo iNkosi yangihlenga kukho konke.+ 12 Phela bonke abazimisele ukuphila bezinikele kuNkulunkulu futhi bemanyene loKhristu uJesu labo bazahlukuluzwa.+ 13 Kodwa abantu abenza okubi labangamaqili bazaqhubeka besiba babi kakhulu, bedukisa futhi bedukiswa.+

14 Lanxa kunjalo wena qhubeka ubambelele ezintweni owazifundayo njalo wancediswa ukuthi uzikholwe,+ ukwazi ukuthi wazifunda kubobani 15 lokuthi kusukela useselusane+ wayazi imibhalo engcwele+ ekwenza uhlakaniphe ubusuthola insindiso ngokukholwa kuKhristu uJesu.+ 16 Yonke iMibhalo iphefumulelwe nguNkulunkulu+ futhi iyasiza ekufundiseni abantu,+ lasekukhuzeni, lasekuqondiseni izinto kanye lasekulayeni ngokulunga+ 17 ukuze umuntu kaNkulunkulu afanele sibili, abe ngoyilungiselele ngokugcweleyo yonke imisebenzi emihle.

4 Ngiyakuqonqosela phambi kukaNkulunkulu loKhristu uJesu ozakwahlulela+ abaphilayo labafileyo+ ngokubonakaliswa kwakhe+ loMbuso wakhe,+ ngithi: 2 Tshumayela ilizwi,+ ukwenze lokho masinyane,* ngezikhathi ezinhle langezikhathi ezinzima, ukhuze,+ usole, ukhuthaze, ngokubekezela konke langokufundisa ngobungcitshi.+ 3 Phela sizafika isikhathi lapho abangasoze bayibekezelele khona imfundiso eqondileyo,*+ kodwa bazalandela izifiso zabo, babuthelele abafundisi abanengi abazabatshela lokho abafuna ukukuzwa.+ 4 Bazayekela ukulalela iqiniso, bathande izindaba ezingamanga. 5 Kodwa wena yisebenzise kuhle ingqondo yakho ezintweni zonke, uqinisele ebunzimeni+ njalo wenze umsebenzi womvangeli,* uyenze ngokupheleleyo inkonzo yakho.+

6 Mina sengiqalisile ukuthululwa njengomnikelo wokunathwayo+ futhi isikhathi sokukhululwa kwami+ sesizafika. 7 Sengikulwile ukulwa okuhle,+ sengigijimile emncintiswaneni ngaze ngayafika ekucineni+ njalo ngiqhubeke ngilalo ukholo. 8 Kusukela khathesi sengigcinelwe umqhele wokulunga,+ okutsho umvuzo engizawuphiwa ngalolosuku+ yiNkosi engumahluleli olungileyo.+ Kayisimi ngedwa engizawuphiwa kodwa uzaphiwa labanye bonke abakuthandileyo ukubonakaliswa kwayo.

9 Yenza konke okusemandleni akho ukuthi uzofika kimi masinyane 10 ngoba uDemasi+ usengitshiyile waya eThesalonika ngenxa yokuthanda umumo lo wezinto.* UKhrisensi uye eGalathiya, uThithusi yena uye eDalimathiya. 11 Lapha ngiloLukha kuphela. Wena buya loMakho ngoba yena uluncedo kimi enkonzweni. 12 UThikhikhu+ yena ngimthume e-Efesu. 13 Nxa ususiza ungiphathele ijazi engalitshiya kuKhaphusi eTrowa. Ungiphathele lezincwadimgoqwa, ikakhulu ezesikhumba.

14 U-Alekizanda umkhandi wekhopha* wangiphatha kubi kakhulu. UJehova* uzaphindisela kuye lokho akwenzayo.+ 15 Lawe kufanele umnanzelele ngoba waphikisa amazwi ethu ngendlela eyedlulisa amalawulo.

16 Ekuzivikeleni kwami kokuqala kakho owabuya wazongisekela, bonke bangitshiya, kabangetheswa icala ngalokho. 17 Kodwa iNkosi yama eduze kwami yangipha amandla ukuze kuthi ngami, umsebenzi wokutshumayela wenziwe ngokupheleleyo njalo izizwe zonke zitshunyayezwe+ futhi ngakhitshwa emlonyeni wesilwane.+ 18 INkosi izangikhulula kuyo yonke imisebenzi emibi njalo izangisindisa ingilethe eMbusweni wayo wasezulwini.+ Kayikhazinyuliswe kuze kube nini lanini. Ameni.

19 Bingelela uPriska lo-Akhwila+ labomuzi ka-Onesiforu.+

20 U-Erastu+ wasala eKhorinte, kodwa uTrofimu+ ngamtshiya egula eMilethu. 21 Yenza konke okusemandleni akho ukuthi uzofika lapha kungakabi sebusika.

Uyakubingelela uYubhulu, loPhudeni uyakubingelela loLinu loKlawudiya kanye labo bonke abafowethu.

22 INkosi kayibe lomoya wakho.* Umusa wayo omkhulu kawube lani.