KUTHITHUSI

1 Mina Phawuli ngiyinceku kaNkulunkulu njalo ngingumphostoli kaJesu Khristu ngokuvumelana lokholo lwabakhethiweyo bakaNkulunkulu, langolwazi oluqondileyo lweqiniso oluphathelane lokuzinikela kuNkulunkulu 2 okusekelwe ethembeni lokuphila okungapheliyo+ okwathenjiswa endulo nguNkulunkulu ongeke aqambe amanga.+ 3 Ngesikhathi sakhe esifaneleyo uNkulunkulu wenza ilizwi lakhe laziwa ngomsebenzi wokutshumayela angiphathise wona,+ ngokuvumelana lomlayo woMsindisi wethu uNkulunkulu. 4 Ngibhalela uThithusi umntwana oqotho njalo olokholo esilalo lathi, ngithi:

Umusa omkhulu lokuthula okuvela kuNkulunkulu uBaba lakuKhristu uJesu uMsindisi wethu akube kuwe.

5 Ngakutshiya eKhrethe ngisenzela ukuthi uqondise izinto ezazonakele* lokuthi ubeke abadala edolobheni ngalinye, njengoba nje ngakutshela ngathi: 6 Umdala kumele abe yindoda* engasolekiyo, elenkosikazi eyodwa futhi elabantwana abakholwayo, okungelamuntu obasola ngokuthi baziphethe butshapha* loba ngokuthi bangabahlamuki.+ 7 Phela umbonisi uphathiswe umsebenzi kaNkulunkulu, yikho kumele abe yindoda engasolekiyo, engelankani,+ engaphangisi ukuzonda,+ engayisiso sidakwa, engeladlakela,* lengayisiso sihwaba esithanda ukuthola inzuzo ngokungathembeki. 8 Kodwa kufanele abe ngowamukela izihambi,+ lothanda okuhle, losebenzisa kuhle ingqondo yakhe,*+ lolungileyo, loqotho,+ lozibambayo,+ 9 lonamathela elizwini elithembekileyo* nxa efundisa ngobungcitshi,+ ukuze enelise ukukhuthaza* ngemfundiso eqondileyo*+ lokukhuza+ abaphikisayo.

10 Phela banengi abantu abahlamukayo abakhuluma izinto ezingelancedo labangamaqili, ikakhulu labo abaqakathekisa ukusoka.+ 11 Kumele bathuliswe ngoba baqhubeka bechitha ukholo lwabanye ezimulini ngokufundisa izinto okungafanelanga bazifundise, besenzela ukuthola inzuzo ngokungathembeki. 12 Omunye umphrofethi wabo wathi: “Abantu baseKhrethe bahlala beqamba amanga, bazinyamazana zeganga eziyingozi lezihwaba ezitshona zingenzi lutho.”

13 Ubufakazi lobu buliqiniso. Yikho-ke qhubeka ubakhuza kakhulu ukuze baqine ekukholweni, 14 bangalaleli izinganekwane zamaJuda lemilayo yabantu abafulathela iqiniso. 15 Izinto zonke zihlanzekile ebantwini abahlanzekileyo,+ kodwa kulabo abangcolileyo labangelakholo akulanto ehlanzekileyo ngoba ingqondo zabo lemizwangedwa yabo kungcolile.+ 16 Batshela abantu ukuthi bayamazi uNkulunkulu kodwa bayamphika ngezenzo zabo+ ngenxa yokuthi bayenyanyeka, abalaleli njalo abavunyelwa ukwenza loba yiwuphi umsebenzi omuhle.

2 Kodwa wena qhubeka ukhuluma ngezinto ezivumelana lemfundiso eqondileyo.*+ 2 Amadoda amadala kawabe ngazibambayo kukho konke akwenzayo, angathathi izinto lula, asebenzise kuhle ingqondo, aqine ekukholweni, athande abanye njalo abe ngaqiniselayo ebunzimeni. 3 Labesifazana abadala kabaziphathe ngendlela etshengisa ukuthi bayakhonza, bangabi ngabanyundelayo, bangabi yizigqili zewayini, bafundise okuhle 4 ukuze bacebise abesifazana* abasesebatsha ukuthi bathande omkabo, bathande abantwababo, 5 basebenzise kuhle ingqondo zabo, babe msulwa, basebenze emizini yabo,* benze okuhle njalo bazehlise kubomkabo+ ukuze abantu bangakhulumi kubi ngelizwi likaNkulunkulu.

6 Qhubeka ukhuthaza lamajaha ukuthi asebenzise kuhle ingqondo zawo,+ 7 lawe ube yisibonelo ngazo zonke izindlela emisebenzini emihle. Fundisa izinto ezihlanzekileyo,* ungathathi izinto lula,+ 8 usebenzise amazwi aqondileyo* angeke achothozwe+ ukuze abaphikisayo bayangeke, bangabi lalutho olubi abangalukhuluma ngathi.+ 9 Izigqili kazizehlise kubanikazi bazo ezintweni zonke,+ zizame ukubathokozisa, zingabaphenduli kubi, 10 zingabatshontsheli+ kodwa zitshengise ukuthi zithembekile kukho konke ukuze zicecise imfundiso yoMsindisi wethu uNkulunkulu ngazo zonke izindlela.+

11 Umusa omkhulu kaNkulunkulu usubonakalisiwe waletha insindiso kuyo yonke imihlobo yabantu.+ 12 Umusa lo usifundisa ukuthi silahle izifiso zomhlaba+ lezenzo ezitshengisa ukungamesabi uNkulunkulu lokuthi siphile ngendlela etshengisa ukuthi sisebenzisa kuhle ingqondo, sibe ngabalungileyo labazinikele kuNkulunkulu phakathi komumo lo wezinto*+ 13 ngesikhathi sisalindele ithemba+ elithokozisayo kanye lokubonakaliswa okukhazimulayo kukaNkulunkulu uSomandla lokoMsindisi wethu uJesu Khristu. 14 Yena wazinikela ngenxa yethu+ ukuze asikhulule*+ kukho konke ukungabi lamthetho njalo azihlambululele abantu abayimpahla yakhe eqakathekileyo labatshisekela imisebenzi emihle.+

15 Qhubeka ukhuluma ngezinto lezi, useluleka* futhi ukhuza ngoba uwaphiwe amandla okuthi wenze njalo.+ Ungavumeli muntu akukhangelele phansi.

3 Qhubeka ubakhumbuza ukuthi bazehlise futhi balalele ohulumende leziphathamandla,+ bahlale bekulungele ukwenza yonke imisebenzi emihle, 2 bangakhulumi kubi ngaloba ngubani, bangathandi izingxabano kodwa babe ngabazwisisayo+ njalo babe mnene kubo bonke abantu ngazo zonke izikhathi.+ 3 Phela lathi sasingelangqondo, singalaleli, sidukisiwe futhi siyizigqili zenjabulo lezezifiso ezitshiyeneyo. Sasiqhubeka sisenza okubi, silomona, sisenyanyeka njalo sizondana.

4 Kodwa umusa woMsindisi wethu uNkulunkulu+ kanye lendlela athanda ngayo abantu kwathi kubonakaliswa 5 (ngenxa yesihawu sakhe+ hatshi ngenxa yemisebenzi elungileyo esasiyenzile),+ wasisindisa ngokusigezisa okwasenza sathola ukuphila+ langokusenza sibe batsha esebenzisa umoya ongcwele.+ 6 Umoya lo wawuthululela kithi ngobunengi bawo esebenzisa uJesu Khristu uMsindisi wethu,+ 7 ukwenzela ukuthi nxa sekuthiwe silungile ngenxa yomusa wakhe omkhulu,+ sibe zindlalifa+ ngokuvumelana lethemba lokuphila okungapheliyo.+

8 Amazwi la aqotho futhi ngifuna uhlale ukugcizelela konke lokhu ukuze asebekholwa kuNkulunkulu baqhubeke becabangisisa ngokwenza imisebenzi emihle zikhathi zonke. Izinto lezi zinhle njalo ziyabanceda abantu.

9 Kodwa wena ungazingeni izimpikiswano ezingelangqondo, lezindaba zosendo, lezingxabano kanye lokulwela uMthetho ngoba akuncedi futhi kuyize.+ 10 Zehlukaniseni+ lalowo obangela ukwehlukana ebandleni+ nxa selike lamxwayisa okokuqala, laphinda futhi okwesibili,+ 11 lisazi ukuthi lowomuntu usephambukile endleleni lokuthi uyona njalo usezigwebile.

12 Nxa ngingathuma u-Athema loThikhikhu+ kuwe, yenza konke okusemandleni akho ukuthi uze kimi eNikhopholi ngoba sengikhethe ukuhlala khona ngesikhathi sebusika. 13 Ube leqiniso lokuthi uyamsiza uZena oyisazi soMthetho kanye lo-Apholo ukuze bangasweli lutho nxa sebehamba.+ 14 Kodwa fundisa labantu bakithi ukuthi bahlale besenza imisebenzi emihle ukuze bancedise nxa kungaba lokufuneka masinyane,+ ukwenzela ukuthi bathele izithelo.+

15 Bonke engilabo lapha bayakubingelela. Bingelela abakholwayo abasithandayo.

Umusa omkhulu kawube lani lonke.