EYESIBILI EKAPHETRO
1 Mina Simoni Phetro engiyinceku lomphostoli kaJesu Khristu, ngibhalela labo abamukele ukholo oluligugu njengolwethu ngokulunga kukaNkulunkulu wethu loMsindisi wethu uJesu Khristu:
2 Umusa omkhulu lokuthula kakwengezelelwe kini ngolwazi oluqondileyo+ lukaNkulunkulu loJesu iNkosi yethu 3 ngoba amandla kaNkulunkulu asesinike* zonke izinto ezifunekayo empilweni lasekuzinikeleni kuye. Lokhu kwenziwe ngolwazi oluqondileyo lwalowo owasibiza+ ngenkazimulo yakhe langobuhle bakhe. 4 Ngezinto lezi usesiphe* izithembiso eziligugu futhi ezinkulu kakhulu+ ukuze kuthi ngazo lihlanganyele ekubeni njengoNkulunkulu+ njengoba seliphunyukile ekonakaleni komhlaba okubangelwa yizifiso* ezimbi.
5 Yikho-ke zamani ngamandla wonke+ ukwengezelela ubuhle+ ekukholweni kwenu, ebuhleni benu lengezelele ulwazi,+ 6 elwazini lwenu ukuzibamba, ekuzibambeni kwenu+ ukuqinisela, ekuqiniseleni kwenu ukuzinikela kuNkulunkulu,+ 7 ekuzinikeleni kwenu kuNkulunkulu lengezelele uthando lobuzalwane, ethandweni lwenu lobuzalwane lengezelele ukuthanda bonke abantu.+ 8 Nxa lilazo izinto lezi futhi ziphuphuma, zizalinqanda ukuthi lingabi ngabangenzi lutho labangatheli izithelo+ elwazini oluqondileyo lweNkosi yethu uJesu Khristu.
9 Loba ngubani ongelazo izinto lezi uyisiphofu ngoba uvale amehlo akhe ukuthi angaboni ukukhanya*+ futhi usekhohliwe ukuthi wahlanjululwa ezonweni zakhe+ zakudala. 10 Ngakho bafowethu sebenzani gadalala ukuze lenze ukuthi ukubizwa kwenu+ lokukhethwa kwenu kuqiniseke, ngoba nxa lingaqhubeka likwenza lokhu alisoze lehluleke loba sekutheni.+ 11 Phela lingenza njalo lizathola isibusiso esikhulu sokungena eMbusweni waphakade+ weNkosi yethu loMsindisi wethu uJesu Khristu.+
12 Ngenxa yalokho, ngifuna ukuhlala ngilikhumbuza izinto lezi lanxa lizazi futhi limi liqinile eqinisweni elilalo. 13 Kodwa ngikubona kuqondile ukuthi ngilivuselele ngezikhumbuzo+ nxa ngisesekhona kulelithabanikeli*+ 14 ngoba ngiyakwazi ukuthi ithabanikeli lami selizasuswa, njengoba nje leNkosi yethu uJesu Khristu yangicacisela lokho.+ 15 Ngizahlala ngisenza konke okusemandleni ami ukuze nxa sengisukile lenelise ukuzikhumbuza konke lokhu.
16 Kasizange sisebenzise izindaba ezingamanga ezibunjwe ngobuqili ngesikhathi silazisa mayelana lamandla eNkosi yethu uJesu Khristu lokuba khona kwayo kodwa sazibonela ngawethu inkazimulo yayo emangalisayo.+ 17 Phela yemukela udumo lenkazimulo kuNkulunkulu uBaba lapho ithola amazwi la* ayevela enkazimulweni enkulu, athi: “Le yiNdodana yami engiyithandayo futhi engiyamukelayo.”+ 18 Sawezwa sibili amazwi la evela ezulwini ngesikhathi silaye entabeni engcwele.
19 Yikho saqiniseka kakhulu ukuthi ilizwi lesiphrofetho lizagcwaliseka njalo lenza kuhle nxa lilalela iziphrofetho ezinjengesibane+ esikhanyisa emnyameni, okutsho ezinhliziyweni zenu (kuze kube semadabukakusa, kuphume lendonsakusa).+ 20 Phezu kwakho konke, liyakwazi ukuthi asikho isiphrofetho esiseMibhalweni esivela kuloba yikuphi ukuchasisa komuntu 21 ngoba isiphrofetho asikaze silethwe ngentando yomuntu+ kodwa abantu babekhuluma okuvela kuNkulunkulu njengoba babeqhutshwa ngumoya ongcwele.+
2 Kodwa kwavela labaphrofethi bamanga ebantwini njengoba nje kuzakuba labafundisi bamanga phakathi kwenu.+ Bazabangela ukuthi kube lokwehlukana phakathi kwenu besebenzisa indlela ezicatshileyo baze baphike lalowo owabathengayo,+ bezilethela ukubhujiswa masinyane. 2 Phezu kwalokho abanengi bazalandela ukuxhwala kwabo*+ futhi indlela yeqiniso izathukwa ngenxa yabo.+ 3 Kanti njalo bazaliqilibezela ngamazwi obuqili ngenxa yokuthi bayizihwaba. Kodwa isigwebo sabo esakhitshwa endulo+ siyeza masinyane lokubhujiswa kwabo kuzafika loba sekutheni.+
4 UNkulunkulu kazange ayekele ukujezisa izingilosi ezonayo+ kodwa waziphosela eThatharasi,*+ wazibopha ngamaketane obumnyama* obukhulu ukuze zigcinelwe ukwahlulelwa.+ 5 Kazange ayekele lokujezisa umhlaba wasendulo+ kodwa ngesikhathi eletha uZamcolo emhlabeni owawulabantu abangamesabiyo+ wavikela uNowa umtshumayeli wokulunga+ labanye abayisikhombisa.+ 6 Kanti njalo wajezisa amadolobho eSodoma leGomora ngokuwatshisa abe ngumlotha,+ etshengisa abantu abangamesabiyo isibonelo salokho okuzayo.+ 7 Kodwa wahlenga uLothi+ umuntu olungileyo owayekhathazeke kakhulu ngokuxhwala* kwabantu ababengelamthetho— 8 ngoba nsuku zonke umuntu lo olungileyo wayehlukuluzeka emphefumulweni* wakhe ngenxa yezenzo ezimbi ayezibona layezizwa ngesikhathi ehlala phakathi kwabantu labo ababengelamthetho. 9 Yikho uJehova* uyakwazi ukubahlenga ekulingweni abantu abazinikele kuye+ lokugcinela abantu abangalunganga ukubhujiswa* ngosuku lokwahlulela,+ 10 ikakhulu labo abafuna ukungcolisa imizimba yabanye+ futhi abeyisa abalamandla.*+
Balesibindi futhi balenkani yikho bengesabi ukukhuluma kubi ngalabo uNkulunkulu abanike inkazimulo 11 kodwa izingilosi lanxa ziqine kakhulu futhi zilamandla kazibasoli zibathuka ngoba ziyamhlonipha* uJehova.*+ 12 Loba kunjalo abantu laba bakhuluma kubi ngezinto abangazaziyo.+ Banjengezinyamazana ezingacabangiyo ezenza izinto zifuqwa yimizwa yemvelo njalo ezizalelwa ukubanjwa lokubulawa. Bazabhujiswa ngenxa yokulandela indlela yabo embi, 13 bejeziselwa okubi abakwenzayo.
Ngitsho lasemini libalele bakubona kumnandi ukuphilela ukukholisa.+ Bangamatshatha angcolisayo, abantu abedlulisa amalawulo nxa bezijabulisa ngezimfundiso ezidukisayo ngesikhathi besidla lani emadilini.+ 14 Amehlo abo agcwele ubufebe+ futhi kuyabehlula ukuyekela ukwenza isono. Bahuga abantu abangaqinanga* njalo inhliziyo zabo zafundiswa ubuhwaba. Bangabantwana abaqalekisiweyo. 15 Batshiye indlela eqondileyo badukiswa. Balandele indlela kaBhalamu+ indodana kaBheyori eyayithanda umvuzo wokwenza okubi,+ 16 kodwa eyakhuzwa ngenxa yokwephula umthetho.+ Ubabhemi inyamazana engakhulumiyo wakhuluma ngelizwi lomuntu wavimba ukuhlanya komphrofethi lo.+
17 Bayimithombo engelamanzi lenkungu eqhutshwa yisiphepho esilamandla futhi bagcinelwe ubumnyama obumnyama bhuqe.+ 18 Bakhuluma amazwi azwakala elesisindo kodwa wona engatsho lutho. Basebenzisa izifiso zenyama+ lezenzo zokuxhwala* ukuze bahuge abasanda kubalekela labo abaphila ngendlela engaqondanga.+ 19 Babathembisa inkululeko kodwa bona beyizigqili zokonakala.+ Phela nxa umuntu enganqotshwa ngomunye umuntu useyisigqili sakhe.*+ 20 Nxa sebephunyukile ekungcoleni komhlaba+ ngokuba lolwazi oluqondileyo oluphathelane leNkosi loMsindisi wethu uJesu Khristu kodwa besebephinda bebuyela ezintweni lezi zibanqobe, isiphetho sabo siba sibi kakhulu kulesiqalo sabo.+ 21 Bekuzakuba ngcono ngabo aluba bebengazange babe lolwazi oluqondileyo olumayelana lendlela yokulunga, kulokuthi bathi sebeyazi bafulathele umlayo ongcwele abawamukelayo.+ 22 Okwenzakale kubo kutshengisa ukuthi siliqiniso sibili isaga lesi esithi: “Inja isibuyele emahlanzweni ayo, lengulube ebigezisiwe isibuyele edakeni yayazigiqa.”+
3 Bathandekayo, le yincwadi yesibili engilibhalela yona. Njengoba ngenza kweyakuqala, ngilibhalela ngilinika izikhumbuzo+ ezizalinceda ukuthi licabange ngendlela ecacileyo 2 ukuze likhumbule amazwi akhulunywa kudala* ngabaphrofethi abangcwele kanye lomlayo weNkosi enguMsindisi. Umlayo lo lawuthola kubaphostoli benu. 3 Okokuqala okumele likwazi yikuthi ezinsukwini zokucina abantu abeyisayo bazakuza beseyisa, belandela izifiso zabo+ 4 njalo besithi: “Kungaphi ukuba khona kwakhe okwathenjiswayo?+ Phela akulalutho olutshintshileyo selokhu okhokho bethu bafayo, zonke izinto ziqhubeka zinjalo njengasekuqaleni kwendalo.”+
5 Benza angathi abakwazi ukuthi endulo kwakulamazulu lomhlaba okwakumi kuqinile phandle kwamanzi laphakathi kwamanzi ngelizwi likaNkulunkulu,+ 6 lokuthi umhlaba wangalesosikhathi wabhujiswa ngakho lokho lapho usibekelwa ngamanzi.+ 7 Kodwa ngalo lelolizwi amazulu lomhlaba okukhona khathesi kugcinelwe umlilo njalo kuzagcinwa kuze kube lusuku lokwahlulela lolokubhubhisa abantu abangamesabiyo uNkulunkulu.+
8 Lanxa kunjalo, lingakhohlwa bathandekayo ukuthi ilanga elilodwa kuJehova* linjengeminyaka eyinkulungwane lokuthi iminyaka eyinkulungwane injengelanga elilodwa kuye.+ 9 UJehova* kaphuzi ukugcwalisa isithembiso sakhe+ lanxa abanye becabanga ukuthi uyaphuza kodwa uyalibekezelela ngoba kafisi ukuthi loba ngubani abhujiswe kodwa ufisa ukuthi abantu bonke baphenduke.+ 10 Loba kunjalo, usuku lukaJehova*+ luzafika njengesela,+ lapho amazulu azadlula khona+ ngomdumo omkhulu, kuncibilike izinto okwenziwe ngazo amazulu lomhlaba ezizabe zitshisa bhe, umhlaba lemisebenzi ekuwo kuvezwe egcekeni.+
11 Njengoba zonke izinto lezi zizancibilikiswa ngalindlela, cabangani ngokuthi kumele libe ngabantu abanjani. Ukuziphatha kwenu kufanele kube ngcwele njalo kumele lenze imisebenzi yokuzinikela kuNkulunkulu, 12 ngesikhathi lisalindile futhi liqhubeka likukhumbula* ukuba khona kosuku lukaJehova,*+ lapho amazulu azabhujiswa khona+ ngamalangabi omlilo, izinto okwenziwe ngazo amazulu lomhlaba zincibilikiswe yikutshisa okukhulu! 13 Kodwa kulamazulu amatsha lomhlaba omutsha esikulindeleyo njengoba nje wathembisa+ njalo kukho kuzahlala ukulunga.+
14 Yikho-ke bathandekayo njengoba lilindele izinto lezi, yenzani konke okusemandleni enu ukuthi ekucineni uNkulunkulu alithole lingelasici, limsulwa njalo lilokuthula.+ 15 Phezu kwalokho, bonani ukubekezela kweNkosi yethu njengokusindiswa, njengoba umfowethu othandekayo uPhawuli laye walibhalela esebenzisa ukuhlakanipha akuphiwayo,+ 16 ekhuluma ngezinto lezi njengoba esenza kuzo zonke izincwadi zakhe. Kodwa okunye okusezincwadini lezo kunzima ukukuzwisisa futhi abangelalwazi* labangaqinanga bayakutshila, njengoba besenza njalo lakuyo yonke eminye iMibhalo futhi lokhu kuzakwenza babhujiswe.
17 Ngakho lina bathandekayo eselikwazi lokho okuzakwenzakala, qaphelani ukuze abantu laba bangalidukisi ngemfundiso ezingaqondanga zabantu abangelamthetho, beselisiwa kulokuthi liqhubeke liqinile.+ 18 Kodwa qhubekani likhula emuseni omkhulu laselwazini lweNkosi loMsindisi wethu uJesu Khristu. Kakhazinyuliswe khathesi kuze kube lusuku lwaphakade. Ameni.
Kumbe, “asesinike mahala.”
Kumbe, “usesiphe mahala.”
Kumbe, “zinkanuko.”
Ezinye inguqulo zithi, “uyisiphofu, ubonela eduze.”
Kumbe, “kulelitende,” okutsho umzimba wakhe wasemhlabeni.
Kumbe, “ilizwi leli.”
Kumbe, “ukuziphatha kwabo okulihlazo.” Lapha kusetshenziswe ibala lesiGrikhi elisebunengini elithi a·sel′gei·a. Khangela iNgcazelo Yamabala.
Khangela iNgcazelo Yamabala.
Ezinye inguqulo zithi, “wazifaka emigodini yobumnyama.”
Kumbe, “ngokuziphatha okulihlazo.” Lapha kusetshenziswe ibala lesiGrikhi elisebunengini elithi a·sel′gei·a. Khangela iNgcazelo Yamabala.
Khangela iNgcazelo Yamabala.
Khangela iSengezo ku-A5.
NgesiGrikhi, “ukuqunywa.”
Kumbe, “abakhangelela phansi ubukhosi.”
Kumbe, “ziyahlonipha phambi kwakhe.”
Khangela iSengezo ku-A5.
Kumbe, “imiphefumulo engaqinanga.”
Kumbe, “zokuziphatha okulihlazo.” Lapha kusetshenziswe ibala lesiGrikhi elisebunengini elithi a·sel′gei·a. Khangela iNgcazelo Yamabala.
Kumbe, “enqotshwa yinto ethile, uyisigqili sayo.”
Kumbe, “akhulunywa ngaphambili.”
Khangela iSengezo ku-A5.
Khangela iSengezo ku-A5.
Khangela iSengezo ku-A5.
Kumbe, “likufisa kakhulu.” NgesiGrikhi, “likuphangisisa.”
Khangela iSengezo ku-A5.
Kumbe, “abangafundiswanga.”